Marco 13:1-37
13 Jesura Ãcõrẽ de droma dajadaare ɓaɗada wãbʉrʉ basiɗe idji ume nĩbabariba jarasia:
–Jaradiabari, ¡acʉdua naʉ̃ mõgarara sãwã waiɓʉa ɓeada idjaɓa naʉ̃ de siɗa sãwã quĩrãwãrẽã queɗeada!–
2 Maʉ̃ne Jesuba jarasia:
–Mãẽ, bʉa unu ɓʉra waiɓʉa ɓeaa. Baribʉrʉ wãrã arada mʉ̃a jaraya: naʉ̃ mõgara capeɗaɗara jũma toɗogozoaya.–
3 Maʉ̃be Olivo eyaɗaa wãsiɗaa. Dji eyara Ãcõrẽ de droma quĩrãpe ɓʉa. Jesu mama chũmasiɗe Pedroba, Santiagoba, Juaʉ̃ba, Andre biɗa ãduɓa idjía iwiɗisiɗaa:
4 –Dairãa jaradua: Ãcõrẽ de dromara ¿sãʉ̃be toɗogozoai? ¿Cãrẽneba cawaɗi maʉ̃ ewarira caita ɓʉda?–
5 Maʉ̃ne Jesuba jarasia:
–Quĩrãcuita ɓeaɗadua ni aɓaʉba cũrũgarãnamãrẽã.
6 Zocãrãba jaraɗia ãdjidrʉ Ãcõrẽba ẽdrʉ edabari diai jaraɗada. Mãwã ẽberãrãda zocãrã cũrũgaɗia.
7 Bãrãba ũrĩnia aɓaʉ puruda dewara ume djõ duanʉda idjaɓa drua ãyã biɗa mãwã duanʉda. Baribʉrʉ ne wayarãnadua. Maʉ̃gʉra jũma mãwãida ɓʉa. Baribʉrʉ naʉ̃ ewarira waɗi jõẽ́a.
8 Aɓaʉ puruda dewara puru ume djõnia. Aɓaʉ druaɗebema boroda dewara druaɗebema boro ume djõnia. De uremiada druaza wãya, idjaɓa zocãrã druaɗe jarrabada baraya. Baribʉrʉ maʉ̃ naãrã mĩgabʉdara maãrĩ ɓaya wẽrã warra pua za ɓʉ quĩrãca.
9 Quĩrãcuita ɓeaɗadua. Bãrãra jidabiɗapeɗa dji jʉrebada deɗaa edeɗapeɗa bia uɗia. Mʉ̃ ĩjã panʉ carea ãdjirãba bãrãra dji dromarã quĩrãpita, dji bororã quĩrãpita biɗa edeɗia. Maʉ̃nebʉrʉ bãrãba mʉ̃ beɗeara ãdjirã quĩrãpita jaraɗia.
10 Wãrãda beɗea bia mʉ̃nebemada jũma puruza jaraɗida panʉa.
11 Ẽberãrãba bãrãra jida edebʉdaɗe sopuarãnadua sãwã beɗeaɗida. Maʉ̃nebemada crĩcharãnadua. Aɓabe jaraɗadua Ãcõrẽba jarabibʉrʉda. Ara bãdji crĩchaɗeba beɗeaɗaẽ́a, ãtebʉrʉ Ãcõrẽ Jauredrʉ bãrãneba beɗeaya.
12 Aɓaʉba ara idji djabada beabiya. Dji zezaba idji warrada beabiya idjaɓa warrarãra ãdji djibarirã ume biẽ́ panenapeɗa beabiɗia.
13 Mʉ̃ ĩjã panʉ carea jũmarãba bãrãra quĩrãmania. Baribʉrʉ maʉ̃ ewari zareaɗe mʉ̃ ĩjã panʉda igaraɗaẽ́bʉrʉ, Ãcõrẽba ẽdrʉ edaya idji ume ewariza zocai panani carea.
14 Ãcõrẽba quĩrĩãcada idji ɓaiẽ́ ɓʉma bãrãba unubʉdaɗe jũma Judea druaɗe ɓeara eyaɗaa mĩrũ wãnida panʉa.* (Dji carta acʉ ɓʉba cãrẽ jara ɓʉda cawaida ɓʉa.)
15 Maʉ̃ne ẽberã idji de ʉ̃rʉ̃ ɓʉra idji deɗe eɗa wãiẽ́ ɓʉa ne edai carea.
16 Dji peaɗe ɓʉba idjia ʉ̃rʉ̃ jʉ̃barira jẽda edaɗe wãiẽ́ ɓʉa.
17 Maʉ̃ ewariɗe wẽrãrã ɓiogoa ɓeara, warra ju dawa eroɓea siɗa bio mĩã djuburi ɓeaɗia.
18 Ãcõrẽa iwiɗiɗadua cue jara mĩrũ wãna amaaba.
19 Maʉ̃ ewariɗe ẽberãrãra bio bia mĩgaɗia. Ãcõrẽba naʉ̃ ẽjũã oɗaɗeba ʉ̃taa ẽberãrãra maʉ̃ quĩrãca bia mĩgaɗacaa idjaɓa mãwãnacarea waa ara maʉ̃ quĩrãca mĩgaɗaẽ́a.
20 Maʉ̃ ewarira dãrãya. Dadjirã Boroba jũma daucha bia mĩgabibara, ni aɓaʉda ẽdrʉɗaẽ́ bacasia. Baribʉrʉ Ãcõrẽba jũma daucha bia mĩgabiẽ́a idjia edaɗa ẽberãrã carea.
21 13:21-22 Maʉ̃ ewariɗe ʉ̃cʉrʉba sewaɗeba jaraɗia ãdjira Ãcõrẽba ẽdrʉ edabari diai jaraɗada. Idjaɓa ʉ̃cʉrʉba sewaɗeba jaraɗia ãdjira Ãcõrẽneba beɗeabarida. Maʉ̃gʉrãba ne ununaca waiɓʉa ɓeada oɗia ẽberãrã cũrũgaɗi carea. Ãcõrẽba edaɗarã siɗa poya cũrũgaɗibara, ãdjirã siɗa cũrũgacasiɗaa. Maʉ̃ bẽrã aɓaʉba bãrãa jaraibʉrʉ, “Acʉɗadua, Ãcõrẽba ẽdrʉ edabari diai jaraɗara nama ɓʉa,” maʉ̃ra ĩjãrãnadua. Dewaraʉba idjira jarima ɓʉaɗa aibʉrʉ, maʉ̃ siɗa ĩjãrãnadua.
23 Quĩrãcuita ɓeaɗadua. Jũma mʉ̃a bãrãa jarasia mãwãi naẽna.
Naʉ̃ Djara Edaɗa zeiɗebema
Mateo 24:29-44; Luca 21:25-36
24 Ẽberãrã bio bia mĩga pananacarea ʉ̃mãdaura pãĩmaya. Jeɗeco siɗa ʉ̃naẽ́a.
25 Chĩdaura bajãneba ɓaecuaɗia. Jũma bajãne ɓeara quĩrã awara ɓeya.
26 Maʉ̃gʉ ewariɗe mʉ̃, Naʉ̃ Djara Edaɗara jʉ̃rãrãne ʉɓʉa bara zebʉrʉda idjaɓa quĩrãwãrẽã dorrodorroa ɓʉda ununia.*
27 Maʉ̃ne mʉ̃a bajãnebema nezocarãda drua ɓeaza wãbiya Ãcõrẽba edaɗarãda ãbaa jʉreɗamãrẽã.
28 Higojõneba ne jarabʉrʉda cawaɗadua. Dji jʉwatera tucu nũmepeɗa quedua barabaria. Maʉ̃neba jũmarãba cawa panʉa dãrãẽ́ne poara zeida.
29 Ara maʉ̃ quĩrãca mʉ̃a jaraɗa unubʉdaɗe cawaɗadua mʉ̃ zei ewarira jũẽboɗoda.
30 Mʉ̃a bãrãa wãrãda jaraya: naʉ̃ ewariɗebema ẽberãrã beuɗi naẽna maʉ̃ra jũma mãwãya.
31 Bajãra jõya, naʉ̃ ẽjũã siɗa jõya, baribʉrʉ mʉ̃a jaraɗara wãrãda mãwãya.
32 Baribʉrʉ ni aɓaʉba maʉ̃ ewarira sãʉ̃be mãwãida cawaɗaẽ́a. Ãcõrẽ nezoca bajãne ɓea biɗa adua panʉa. Mʉ̃, Naʉ̃ Djara Edaɗa biɗa adua ɓʉa. Aɓabe mʉ̃ Zezabʉrʉ cawa ɓʉa.
33 Quĩrãcuita ɓeaɗadua. Dau ʉɓʉa ɓeaɗadua idjaɓa Ãcõrẽa iwiɗi ɓeaɗadua. Bãrãba dji ewari sãʉ̃be zeida adua panʉa.
34 Maʉ̃ ewari zebʉrʉra naʉ̃ quĩrãca ɓaya: ẽberãda dewara druaɗaa wãbʉrʉɗe dji nezocarãda idji de wagaɗamãrẽã amesia. Ãdjiza ne oɗamãrẽã ɓʉsia. Dji eɗa wãbada acʉbaría jarasia quĩrãcuita acʉ ɓamãrẽã.
35 13:35-36 Ara maʉ̃ quĩrãca bãrã biɗa adua panʉa bãrã De Djibarira sãʉ̃be waya zeida: queubʉrʉɗe, ariquẽtra, eterre berubʉrʉɗe wa diapeɗa. Maʉ̃ bẽrã dau ʉɓʉa ɓeaɗadua, mʉ̃ cawaẽ́ne zebʉrʉɗe bãrãra cãĩ duanʉda unurãmãrẽã.
37 Mʉ̃a bãrãa jara ɓʉra jũmarãa jarabʉrʉa: dau ʉɓʉa ɓeaɗadua.–
Beɗea eɗaare
^ 13:14. Ãcõrẽba quĩrĩãca. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Ãcõrẽneba beɗeabari Danielba jaraɗa” (Daniel 9:27; 11:31; 12:11). Griego Antioco Epipaneba Ãcõrẽ de dromara mititia ɓʉsia 168 poa Jesu toɗi naẽna. Baribʉrʉ Jesuba jarasia maʉ̃ Antiocoba oɗa quĩrãca wayacusa mãwãida. Ʉ̃cʉrʉmaarã Jesuba jaraɗara wãrãda mãwãsia romanorãba Jerusaleʉ̃ puruda, Ãcõrẽ de droma siɗa poa 70ɗe jũma ãrĩsiɗaɗe. Ʉ̃cʉrʉmaarã jara ɓʉa cadjiruaɗebema ẽberãba mãwã oya (2 Tesalonica 2:3-10). Idjaɓa ʉ̃cʉrʉmaarã Jesuba jaraɗara jĩrũarebema ewariɗe mãwãya.
^ 13:26. Daniel 7:13-14.
