Marco 15:1-47
15 Ãsaboɗoɗe sacerdote bororãra, judiorã dji dromarãra, judiorã ley jaradiabada siɗa ãbaa beɗea ausiɗaa Jesura Pilatomaa edeɗi carea.* Ara maʉ̃da Jesura jʉwa jʉ̃ edesiɗaa.
2 Pilatoba Jesua iwiɗisia:
–¿Bʉda wãrãda judiorã boroca?–
Jesuba panusia:
–Mãẽ, bʉa mãwã jara ɓʉa.–
3 Maʉ̃ne sacerdote bororãba ne zocãrãneba Jesura biẽ́ jarasiɗaa.
4 Maʉ̃ bẽrã Pilatoba waya Jesua iwiɗisia:
–Ũrĩdua, ãdjirãba bʉra ne jũmaneba biẽ́ jara duanʉa. ¿Bʉa panuẽ́ca?–
5 Baribʉrʉ Jesuba maʉ̃ siɗa panuẽ́ basía. Maʉ̃ bẽrã Pilatoba cawa crĩchaẽ́ ɓesia.
Jesu beaɗi carea jarapeɗaɗa
Mateo 27:15-31; Luca 23:13-25; Juaʉ̃ 18:38 –19:16
6 Poaza judiorãba maʉ̃ ewari droma o panʉne Pilatoba preso ɓeada aɓa ẽdrʉ ɓʉbadjia. Ãdjirãba iwiɗibʉdada ẽdrʉ ɓʉbadjia.
7 Maʉ̃ne ẽberã Barrabá abadada ɓasia. Maʉ̃ Barrabára idjiare ɓearã siɗa puru quĩrũbigasiɗaɗe mĩã beasiɗaa. Maʉ̃ bẽrã preso panasiɗaa.
8 Maʉ̃ne zocãrã judiorãda Pilatomaa zeɗapeɗa iwiɗi duanesiɗaa idjia poaza obarida omãrẽã.
9 15:9-10 Pilatoba cawa ɓasia sacerdote bororãda Jesu ume biẽ́ duanʉ bẽrã idjira jida diasiɗada. Maʉ̃ carea dji ẽberãrã powua nũmʉ́a iwiɗisia:
–¿Bãrãba quĩrĩã panʉca mʉ̃a za ɓʉ judiorã borora ẽdrʉ ɓʉida?–
11 Maʉ̃ne sacerdote bororãba dji powua nũmʉ́a nãwã jarasiɗaa: “Pilatoa jaraɗadua Barrabádrʉ ẽdrʉ ɓʉmãrẽã.”
12 Maʉ̃ carea Pilatoba wayacusa ãdjirãa iwiɗisia:
–Mãwãra bãrãba judiorã boro abadara ¿mʉ̃a sãwã oi?–
13 Maʉ̃ne ãdjirãba jĩgua jara duanesiɗaa:
–¡Cruɗe cachi beabidua!–
14 Pilatoba iwiɗisia:
–¿Cãrẽ cãrẽã mãwã oi? ¿Idjia cãrẽ cadjiruada osi?–
Mãwã beɗea ɓʉɗe ãdjirãba wetara ɓʉga jara duanasiɗaa:
–¡Cruɗe cachi beabidua!–
15 Pilatora ẽberãrã ume biẽ́ ɓe amaaba Barrabádrʉ ẽdrʉ ɓʉsia. Baribʉrʉ Jesura soaba ubipeɗa sordaorãa diasia cruɗe cachi beaɗamãrẽã.
16 Ara maʉ̃da sordaorãba Jesura ãdji de droma Pretorio abadaɗe eɗa edesiɗaa. Mama waabema sordaorãda trʉ̃siɗaa.
17 Maʉ̃be djio pursupursua ɓʉda Jesua jʉ̃bisiɗaa. Boroɓari ʉrʉ caɗada idji boroɗe wẽãju ɓʉsiɗaa.
18 Maʉ̃be jĩgua jara duanesiɗaa:
–¡Bio bia ɓʉa, judiorã boro!–
19 Idji boroɗe bacuruba ubadjiɗaa idjaɓa dau iɗobadjiɗaa. Chĩrãboroɗe copanesiɗaa idjira wãrãda bio waya panʉ quĩrãca.
20 Idjira ipiɗa biẽ́ jaraɗapeɗa maʉ̃ pursupursua ɓʉ jʉ̃bipeɗaɗara wẽãsiɗaa. Wẽãnapeɗa idjia jʉ̃ ɓaɗada wayacusa jʉ̃bisiɗaa. Maʉ̃be cruɗe cachi beaɗi carea edesiɗaa.
Jesu cruɗe cachi ɓʉpeɗaɗa
Mateo 27:32-44; Luca 23:26-43; Juaʉ̃ 19:17-27
21 Jesu puru dajadaa edesiɗaɗe ẽberã Simoʉ̃ abadada Jerusaleʉ̃naa zebʉrʉ basía. Alejandroba Rupo biɗa maʉ̃ Simoʉ̃ra ãdji zeza basía.* Idjira Cirene puruɗebema basía. Sordaorãba idjía Jesu crura ataubisiɗaa.
22 Mãwã Jesura ẽjũã Golgota abadamaa edesiɗaa. Golgota trʉ̃ba jara ɓʉa Boro Ɓʉwʉrʉ.
23 Mama uva ɓa asea mirraɗa pueraɗada Jesua diasiɗaa pua droamãrẽã. Baribʉrʉ Jesuba doẽ́ basía.
24 Maʉ̃be cruɗe cachi ɓʉsiɗaa. Mãwãnacarea ne jemenesiɗaa Jesuba cacuaɗe jʉ̃ ɓaɗara sãwã jeɗecaɗi cawaya.
25 Jesu cruɗe cachi ɓʉsiɗaɗe ʉ̃mãdau ʉ̃tʉ ɓasia.
26 Maʉ̃ne beɗeada cachi jira ɓʉsiɗaa cawabiɗi carea idjira cãrẽ cãrẽã beabʉdada. Nãwã ɓʉ́ ɓasia: “Judiorã Boro.”
27 Idjaɓa ne drʉabadada umé Jesu caita cruɗe cachi jira ɓʉsiɗaa, aɓa idji jʉwa araare, aɓa idji jʉwa acʉare.
28 Mãwãsia Ãcõrẽ cartaɗe jara ɓʉ quĩrãca. Nãwã jara ɓʉa: “Idjira ẽberã cadjirua quĩrãca beasiɗaa.”*
29 15:29-30 Maʉ̃ne ʉ̃cʉrʉ ẽberãrãda caita wãnapeɗa boro ʉ̃rãtʉ ʉ̃rãtʉɗapeɗa Jesua nãwã biẽ́ beɗeabadjiɗaa:
–Ãjãã, bʉa Ãcõrẽ de dromara ãrĩpeɗa ewari ũbeaɗe wayacusa poya oibʉrʉ, ¡ara bʉduɓa ẽdrʉdua! ¡Jãʉ̃ cruɗeba uɗaa zedua!–
31 Aɓari quĩrãca sacerdote bororãba, judiorã ley jaradiabadarã biɗa Jesura ipiɗa biẽ́ jarabʉdaɗe nãwã jarabadjiɗaa:
–Idjia dewararãda carebasia, baribʉrʉ ara iduɓa poya ẽdrʉẽ́a.*
32 Mãwãra ¿idjira Ãcõrẽba ẽdrʉ edabari diai jaraɗaca? ¿Idjira Israelɗebema boroca? Jãʉ̃ cruɗeba uɗaa zeida ɓʉa dairãba cawaɗapeɗa ĩjãni carea.–
Maʉ̃ne Jesu caita cruɗe cachipeɗaɗa biɗa aɓari quĩrãca biẽ́ jarasiɗaa.
Jesu cruɗe beuɗa
Mateo 27:45-56; Luca 23:44-49; Juaʉ̃ 19:28-30
33 Umatipa ʉ̃mãdaura quisia.* Maʉ̃ba naʉ̃ ẽjũãra hora ũbea jũma pãĩma nũmasia.
34 Hora ũbea baɗacarea Jesuba jĩgua jarasia:
–Eloi, Eloi, ¿lama sabactani?–
Maʉ̃ arameo beɗeaba jara ɓʉa: “Mʉ̃ Ãcõrẽ, mʉ̃ Ãcõrẽ, ¿cãrẽ cãrẽã mʉ̃duɓa ɓeesi?”
35 Maʉ̃ beɗea ũrĩbʉdaɗe ʉ̃cʉrʉ mama caita duanʉba jarasiɗaa:
–Ũrĩnadua, idjia Elíada trʉ̃ ɓʉa.–
36 Ara maʉ̃da aɓa pira wãpeɗa uva ɓa oregueada mõda quiruɗe dodoba edasia. Bacuruɗe jʉ̃peɗa Jesua diasia domãrẽã. Maʉ̃be dji ẽberãba jarasia:
–Jʉ̃ãnadua; acʉɗia Elíaba idjira uɗaa ɓʉɗe zei cawaya.–
37 Maʉ̃ne Jesura mĩãdua ɓiapeɗa ĩyãdrʉsia.
38 Ara mãwãbʉrʉɗe Ãcõrẽ de dromane eɗa wua eatʉ jira ɓʉda ẽsidra ʉ̃tʉba eɗaa cõã dogosia.*
39 Romanebema sordaorã boro Jesu quĩrãpita ɓʉba idji mãwã beubʉrʉ unusiɗe jarasia:
–Wãrãda naʉ̃ ẽberãra Ãcõrẽ Warra basía.–
40 Maʉ̃ne ʉ̃cʉrʉ wẽrãrãba tʉmʉba acʉ duanasiɗaa. Ãdjirã tãẽna Maria Magdalenada, Salomé siɗa panasiɗaa. Dewarabema Maria siɗa ɓasia. Santiago Tẽãbema vadaba, Jose biɗa maʉ̃gʉ Mariara ãdji papa basía.
41 Jesu Galileaɗe ɓasiɗe maʉ̃ wẽrãrãra idji ume nĩbasiɗaa idjaɓa careba panasiɗaa. Arima dewara wẽrãrãda baraasia Jesu ume Jerusaleʉ̃naa wãpeɗaɗada.
Jesu tʉɓaripeɗaɗa
Mateo 27:57-61; Luca 23:50-56; Juaʉ̃ 19:38-42
42 15:42-43 Nurẽma ʉ̃nãũbada ewari basía. Maʉ̃ ewari carea judiorãra ne o panasiɗaa. Queuboɗoɗe Jose Arimatea puruɗebemada Pilatomaa wãsia. Maʉ̃ Josera judiorã bororãnebema basía. Jũmarãba idjira bio bia unubadjiɗaa. Idjia jʉ̃ã ɓabadjia Ãcõrẽba jũmarãda pe eroɓamãrẽã. Ne waya neẽ́ Pilatomaa wãpeɗa Jesu cacuada iwiɗisia tʉɓari carea.
44 Maʉ̃ne Pilatoba cawa crĩchaẽ́ basía sãwã Jesura isabe beusida. Maʉ̃ carea sordaorã boroda trʉ̃peɗa iwiɗisia Jesura wãrãda beusi cawaya.
45 Sordaorã boroba wãrãda beusiaɗa aɗa bẽrã Pilatoba Josea Jesu cacuara idu edebisia.
46 Joseba boroɓada nẽdopeɗa Jesu cacuara cruɗebemada uɗaa ɓʉpeɗa maʉ̃ boroɓaba bʉrá ɓʉsia. Maʉ̃be mõjẽ uria coroɗaɗe eɗa ɓʉpeɗa mõgara waiɓʉaba uriara jũãtrʉ ɓʉsia.
47 Maria Magdalenaba, Jose papa Maria biɗa acʉ panasiɗaa Jesu cacuara mama ɓʉbʉdada.*
Beɗea eɗaare
^ 15:1. Pilato. Romanorã boro Tiberio abadaba Pilatora Judea druaɗebema boroda ɓʉsia. Dji boroda ɓasia poa 26ɗeba aɓa 36ɗaa. Judiorã bororãba Jesura Pilatomaa edesiɗaa ãdjia preso ɓearã beacara panʉ bẽrã. Aɓa romanorãba mãwã oɗida panasiɗaa.
^ 15:21. Romano 16:13.
^ 15:28. Isaía 53:12. Griego beɗeaɗe ʉ̃cʉrʉ cartaɗe versículo 28 neẽ́a.
^ 15:31. Carebasia. Griego beɗeaɗe ɓʉ́ ɓʉa “ẽdrʉ edasia.”
^ 15:33. Amos 8:9-10.
^ 15:38. Exodo 26:31-33; Hebreo 9:1-15.
^ 15:47. Jose. Maʉ̃gʉ Josera Arimateaɗebemaẽ́a, ãtebʉrʉ Santiago Tẽãbema abada ume dji djaba basía. Marco 15:40; 16:1.
