Marco 2:1-28
2 2:1-2 Dãrãẽ́ ɓʉɗe Jesura wayacusa Capernauʉ̃ puruɗaa wãsia. Idjira diguiɗa ɓʉda cawasiɗaɗe ẽberãrãda zocãrã idjimaa powua nũmesia. Dera, dji eɗa wãbada siɗa pẽsua nũmesia. Maʉ̃ne Jesuba Ãcõrẽ Beɗeara jaradia ɓasia.
2 –
3 Mãwã ɓʉɗe ẽberãda quĩmãrẽ zesiɗaa. Maʉ̃rãba ẽberã cacua beu ɓʉda Jesumaa ede quĩrĩã panasiɗaa.
4 Baribʉrʉ pẽsua nũmʉ bẽrã poya edeɗaẽ́ basía. Maʉ̃ carea de ʉ̃rʉ̃ uria oɗapeɗa dji cacua beu ɓʉra dji cʉɗaɗeba eɗaa ɓʉsiɗaa.
5 Jesuba unusia ãdjia wãrãda ĩjã panʉda dji cacua beu ɓʉra poya biabida. Maʉ̃ carea Jesuba dji cacua beu ɓʉ́a jarasia:
–Cũdra, bʉa cadjirua oɗara mʉ̃a quĩrãdoasia.–
6 Maʉ̃ne judiorã ley jaradiabadarãda ʉ̃cʉrʉ arima chũpanasiɗaa. Maʉ̃gʉrãba crĩchasiɗaa:
7 “¿Cãrẽ cãrẽã jãwã beɗea ɓʉ? ¡Ãcõrẽ quĩrãpita biẽ́ beɗea ɓʉa! Aɓa Ãcõrẽbʉrʉ ẽberãba cadjirua oɗara poya quĩrãdoaya.”
8 Ãdjia mãwã crĩcha duanʉra Jesuba idji soɗe aɓeɗa cawasia.* Maʉ̃ bẽrã ãdjía jarasia:
–¿Cãrẽ cãrẽã jãwã crĩcha panʉ?
9 Bãrãmaarã ¿sãʉ̃gʉda zareaara ɓʉ? ¿Cadjirua oɗara quĩrãdoayaɗa aida wa naʉ̃ ẽberã cacua beu ɓʉra piradrʉbipeɗa idji cʉɗa edabipeɗa nĩbabida?
10 Ãcõrẽba mʉ̃, Naʉ̃ Djara Edaɗara ɓʉsia naʉ̃ ẽjũãne duanʉba cadjirua obadara quĩrãdoamãrẽã. Maʉ̃ra bãrãa unubiya.–
Ara maʉ̃da dji cacua beu ɓʉ́a nãwã jarasia:
12 Ara maʉ̃da dji cacua beu ɓaɗara piraɓaripeɗa idji cʉɗa edapeɗa jũmarã quĩrãpita ẽdrʉ wãsia. Maʉ̃ carea jũmarãba cawa crĩchaɗaẽ́ basía idjaɓa Ãcõrẽa bia beɗea duanesiɗaa. Nãwã jarasiɗaa:
–¡Naʉ̃ quĩrãca dadjirãba ununaca basía!–
Jesuba Levi trʉ̃na
Mateo 9:9-13; Luca 5:27-32
13 Mãwãnacarea Jesura wayacusa Galilea amene dromanaa wãsia. Maʉ̃ne ẽberãrãda zocãrã idjimaa wãsiɗaa. Idjia ãdjirãa jaradiasia.
14 Wãbʉrʉɗe Jesuba Alpeo warra Levida unusia. Maʉ̃ Levira Romanebema boro itea parata diabada deɗe chũmasia. Jesuba idjía jarasia:
–Mʉ̃ ume zedua.–
Ara maʉ̃da Levira piradrʉpeɗa Jesu ume wãsia.
15 Mãwãnacarea Jesura Levi deɗe ne co ɓasia. Zocãrãba Jesura ẽpẽbʉda bẽrã ãdjirã siɗa ne co chũmeasia: Jesu ume nĩbabadarãda, Romanebema boro itea parata jʉrʉ pebadarãda, judiorã ley igara ɓea siɗa panasiɗaa.*
16 Mãwã panʉne judiorã ley jaradiabadaba, pariseorã biɗa unusiɗaa Jesura Romanebema boro itea parata jʉrʉ pebadarã ume, judiorã ley igara ɓea ume biɗa ne co ɓʉda. Maʉ̃ carea pariseorãba Jesu ume nĩbabadarãa iwiɗisiɗaa:
–Bãrãa jaradiabarira ¿cãrẽ cãrẽã cadjirua obadarã ume, parata jʉrʉ pebadarã ume biɗa ne co ɓʉ?–
17 Maʉ̃ ũrĩpeɗa Jesuba jarasia:
–Cacua bia ɓeaba nẽãrã diabarira jʉrʉɗacaa. Dji cacua biẽ́ ɓeabʉrʉ jʉrʉbadaa. Mʉ̃ra jipa ɓea trʉ̃i carea zeẽ́ ɓʉa, ãtebʉrʉ cadjirua obadarãda trʉ̃ ɓʉa Ãcõrẽmaa zeɗamãrẽã.–
Ne coɗaca ewariɗebema
Mateo 9:14-17; Luca 5:33-34
18 Maʉ̃ ewariɗe Borocuebari Juaʉ̃ ume nĩbabadarãba, pariseorã biɗa ne coɗaca ewarida o panasiɗaa. Mãwã panʉne dewararãda Jesumaa zeɗapeɗa iwiɗisiɗaa:
–Borocuebari Juaʉ̃ ume nĩbabadarãba, pariseorã biɗa ne coɗaca ewarira obadaa. Baribʉrʉ bʉ ume nĩbabadarãba ¿sãwãẽrã oɗaca?–
19 Jesuba panusia:
–Umaquĩrãba wẽrã edabʉrʉɗe ¿caiba ne coɗaca ewarida oi? Maʉ̃ umaquĩrãra waɗibiɗa idjia eɗoɗarã ume ɓʉmisa ne coɗaca ewarira oɗaẽ́a.
20 Baribʉrʉ ewari aɓa dewara ẽberãrãba idjira ãyã edeɗia. Maʉ̃ ewariɗebʉrʉ idjia eɗoɗarãba ne coɗaca ewarira oɗia.
21 Dadjirãba cacuaɗe jʉ̃bada dji sore cõã ɓʉmaa wua djiwiɗida cajuɗacaa. Mãwã oɗibʉrʉ djiwiɗi cajuɗa erreɓaribʉrʉba dji wua sorera waiɓʉara cõãya.
22 Idjaɓa ni aɓaʉba uva ɓa djiwiɗira animarã e oɗa dji soreɗe tʉɗacaa. Mãwã oɗibʉrʉ aseabʉrʉɗe animarã e oɗa dji sorera cõãya. Maʉ̃be uva ɓara, animarã e oɗa siɗa aduaya. Maʉ̃ carea uva ɓa djiwiɗira animarã e oɗa djiwiɗiɗe tʉɗida panʉa.–*
Jesura ʉ̃nãũbada ewari djibaria
Mateo 12:1-8; Luca 6:1-5
23 Ʉ̃nãũbada ewariɗe Jesura ẽjũã trigo uɗaɗe nĩbasia. Maʉ̃ne idji ume nĩbabadarãba trigora tʉ eda nĩbasiɗaa.
24 Maʉ̃ carea pariseorã ãdji caiɗu zebʉdaba Jesua jarasiɗaa:
–¡Acʉdua! Bʉ ume nĩbabadarãba ¿cãrẽ cãrẽã ʉ̃nãũbada ewariɗe ocara panʉda o panʉ?–
25 Jesuba ãdjía jarasia:
–Ewari aɓa Daviba, idji ume nĩbabadarã biɗa coɗira neẽ́ panasiɗaa. Jarra panasiɗaɗe ¿sãwã osiɗa?*
26 Abiata sacerdote dji droma ɓasiɗe Davira Ãcõrẽ deɗe eɗa wãpeɗa Ãcõrẽ quĩrãpita ɓaɗa paʉ̃da edasia.* Maʉ̃ paʉ̃ra ¿aɓabe sacerdoterãba coɗida panasiɗaẽ́ca? Baribʉrʉ Daviba copeɗa idji ume nĩbabadarãa diasia.–
27 Maʉ̃be Jesuba ãdjía jarasia:
–Ãcõrẽba ẽberãra oẽ́ basía ʉ̃nãũbada ewari wagaɗamãrẽã ãtebʉrʉ ʉ̃nãũbada ewarira ɓʉsia ẽberãrã ʉ̃nãũnamãrẽã.
28 Mʉ̃, Naʉ̃ Djara Edaɗara ʉ̃nãũbada ewari djibaria.–
