Marco 3:1-35
3 Wayacusa Jesura judiorã dji jʉrebada deɗaa wãsia. Mama ẽberã jʉwa beu ɓʉda ɓasia.
2 Ʉ̃cʉrʉba Jesura acʉ panasiɗaa ʉ̃nãũbada ewariɗe maʉ̃ ẽberã biabi cawaya. Biabisira biẽ́ jaraɗida crĩcha panasiɗaa.
3 Maʉ̃ne Jesuba ẽberã jʉwa beu ɓʉ́a jarasia:
–Piradrʉpeɗa ẽsi nũmane zedua.–
4 Maʉ̃be Jesuba ãdjía iwiɗisia:
–¿Ʉ̃nãũbada ewariɗe cãrẽda oɗida panʉ? ¿Biada wa cadjiruada? ¿Djãrã carebaida wa idu beubida?–
Baribʉrʉ ãdjirãra chupea panesiɗaa.
5 Maʉ̃ne Jesura sopuasia cʉwʉrʉ zarea ɓea bẽrã. Quĩrũbiɗeba ãdjirã acʉbʉrʉɗe dji jʉwa beu ɓʉ́a jarasia:
–Jʉwara jiradua.–
Mãwã jirabʉrʉɗe idji jʉwara aɓeɗa biasia.
6 Ara maʉ̃da pariseorãra ẽdrʉɗapeɗa Herodeare ɓearãmaa wãsiɗaa. Ãdjirã ume Jesu beaɗi carea crĩcha jʉrʉsiɗaa.
Galilea amene droma icawa duanana
7 Maʉ̃be Jesura idji ume nĩbabadarã siɗa Galilea amene dromanaa wãsiɗaa. Mama Galilea druaɗebemarãda zocãrã idji caiɗu nĩbasiɗaa.*
8 Jesuba ne ununacada o ɓʉda dewararã biɗa ũrĩsiɗaa. Maʉ̃ carea Judea druaɗebemarãda, Jerusaleʉ̃ puruɗebemarãda, Idumea druaɗebemarãda, Jordaʉ̃ do wa quĩrãrẽbemarãda, Tiro druaɗebemarãda, Sidoʉ̃ druaɗebemarã siɗa Jesu ɓʉmaa wãsiɗaa.
9 3:9-10 Idjia cacua biẽ́ ɓeada biabi ɓaɗa bẽrã ẽberãrãba idji tãni carea powuabadjiɗaa. Idjira pẽsua eropanarãnamãrẽã Jesuba idji ume nĩbabadarãa jarasia jãbada enenamãrẽã.
11 Ẽberã jai bara ɓeaba Jesu unubʉdaɗe idji quĩrãpita chĩrãboroɗe copanenapeɗa jaiba ne wayaaɗeba jĩgua jarabadjiɗaa:
–¡Bʉra Ãcõrẽ Warraa!–
12 Baribʉrʉ Jesuba jairãa bio jarabadjia idjiɗebemada ebuɗa jararãnamãrẽã.
Jesuba ẽberã doce edaɗa
Mateo 10:1-4; Luca 6:12-16
13 9:13-14 Mãwãnacarea Jesura eyaɗaa wãpeɗa idjia quĩrĩãbʉrʉda idjimaa trʉ̃sia. Ãdjirã zesiɗaɗe idjia doce edasia idji ume nĩbaɗamãrẽã idjaɓa idji beɗea jara nĩbaɗamãrẽã. Maʉ̃gʉrãra Jesuba trʉ̃ ɓʉsia “mʉ̃a diabueɗarã.”*
15 Jesuba ãdjirãa ʉɓʉada diasia cacua biẽ́ ɓeara biabiɗamãrẽã idjaɓa jai siɗa ãyã jʉretaɗamãrẽã.
16 Aɓa Simoʉ̃ basía.* Jesuba idjira trʉ̃ ɓʉsia Pedro.
17 Maʉ̃ awara Zebedeo warra Santiagoda, dji djaba Juaʉ̃ siɗa edasia. Maʉ̃ umébemara Jesuba trʉ̃ ɓʉsia Boanergerã. Maʉ̃ trʉ̃ba jara ɓʉa “baa warrarã.”
18 Naʉ̃gʉrã siɗa edasia: Andre, Pelipe, Bartolomé, Mateo, Tomá, Alpeo warra Santiago, Tadeo, idjaɓa Simoʉ̃ Cananeo.*
19 Jesuba Juda Iscariote siɗa edasia. Maʉ̃gʉba idjira jidabisia.
Jesu biẽ́ jarapeɗaɗa
Mateo 12:22-32; Luca 11:14-23; 12:10
20 Jesu diguiɗaa zesiɗe ẽberãrãda zocãrã powuasiɗaa. Maʉ̃ba Jesura, idji ume nĩbabada siɗa poya ne coɗaẽ́ basía.
21 Jesu djabarãba cawaɗapeɗa idjira edaɗe wãsiɗaa. Ãdjia crĩcha panasiɗaa idjira quĩrãẽ́ ɓesida.
22 Baribʉrʉ judiorã ley jaradiabadarã Jerusaleʉ̃ puruɗeba zepeɗaɗaba jarasiɗaa:
–Jãʉ̃ Jesura jairã boro Beelzebúɗeba ɓʉ bẽrã jãwã ɓʉa. Idjia jaira ãyã jʉretabaria Beelzebúba maʉ̃ ʉɓʉada diaɗa bẽrã.–
23 Maʉ̃ ũrĩpeɗa Jesuba ãdjirã trʉ̃peɗa ne jara ɓʉɗeba beɗeasia. Nãwã jarasia:
–¿Sãwã Satanaba ara idjida ãyã jʉretai?
24 Aɓari druaɗebemarãda ara ãdjiduɓa djõ pananibʉrʉ dãrã pananaẽ́a.
25 Idjaɓa aɓari deɗe ɓeada djõ pananibʉrʉ dãrã pananaẽ́a.
26 Ara maʉ̃ quĩrãca Satanada ara idji jairã ume djõpeɗa awara wãibʉrʉ ¿sãwã idjia poya ɓʉra dãrã eroɓai? Aɓeɗa jõya.
27 Ẽberã mẽsrã ɓʉda naãrã jʉ̃ chũmʉnaẽ́bʉrʉ, ¿sãwã idji deɗe eɗa ne drʉaɗe wãni? Jʉ̃ chũmʉnadrʉ poya idji nebiara drʉaɗia.
28 Wãrã arada mʉ̃a bãrãa jaraya: ẽberãrãba cadjirua obadara, biẽ́ beɗeabada siɗa Ãcõrẽba jũma poya quĩrãdoaya.
29 Baribʉrʉ aɓaʉba Ãcõrẽ Jaureba oɗada diauruba jãwã osiaɗa aibʉrʉ, Ãcõrẽba maʉ̃ra quĩrãdoaẽ́a. Maʉ̃ ẽberãra ewariza beɗeaɗe ɓaya.–
30 Jesuba mãwã jarasia idjira jai bara ɓʉaɗa apeɗaɗa bẽrã.
Jesu ẽberãrã idjimaa zepeɗaɗa
Mateo 12:46-50; Marco 3:21; Luca 8:19-21
31 Maʉ̃ne Jesu djabarãda, dji papa siɗa jũẽnapeɗa Jesura dajadaareba trʉ̃bisiɗaa.
32 Maʉ̃be ẽberãrã Jesuare chũmeaba idjía jarasiɗaa:
–Bʉ papara, bʉ djabarã siɗa dajadaare panʉa.* Ãdjia bʉra jʉrʉ panʉa.–
33 Baribʉrʉ Jesuba jarasia:
–Bãrãmaarã ¿cairãda mʉ̃ papa idjaɓa mʉ̃ djabarã?–
34 Idji caita chũmeada acʉpeɗa jarasia:
–Naʉ̃gʉrãda mʉ̃ papaa idjaɓa mʉ̃ djabarãa.
35 Ãcõrẽba quĩrĩã ɓʉ o ɓeadrʉ mʉ̃ djabaa, mʉ̃ djabawẽrãa, idjaɓa mʉ̃ papaa.–
Beɗea eɗaare
^ 3:7. Griego beɗeaɗe ʉ̃cʉrʉ cartaɗe idjaɓa ɓʉ́ ɓʉa “Judeaɗebemarã siɗa.”
^ 3:13-14. Maʉg̃ʉrãra Jesuba trʉ̃ ɓʉsia “mʉ̃a diabueɗarã.” Griego beɗeaɗe ʉ̃cʉrʉ cartaɗe maʉ̃ra neẽ́a.
^ 3:16. Griego beɗeaɗe ʉ̃cʉrʉ cartaɗe idjaɓa nãwã ɓʉ́ ɓʉa: “Naʉ̃gʉrã doce panʉda edasia.”
^ 3:18. Simoʉ̃ Cananeo. Luca 6:15ɗe “Simoʉ̃ Zelote” ɓʉ́ ɓʉa.
^ 3:32. Griego beɗeaɗe ʉ̃cʉrʉ cartaɗe idjaɓa “bʉ djabawẽrãrã” ɓʉ́ ɓʉa.
