Marco 4:1-41
4 Wayacusa Jesuba Ãcõrẽ beɗeara amene droma icawa jaradia ɓesia. Maʉ̃ne ẽberãrãda zocãrã idjima powua nũmesia. Maʉ̃ bẽrã jãba doeɗa ũmʉne ɓadopeɗa chũmesia. Ẽberãrãra do icawa duanesiɗaa.
2 Maʉ̃be Jesuba ne quĩrãtanoa ne jara ɓʉɗeba jaradiasia. Nãwã jarasia:
3 –¡Ũrĩnadua! Ẽberãda ne poɗe wãsia.
4 Mãwã po nĩne ʉ̃cʉrʉ tara oɗe ɓaecuasia. Maʉ̃ne ĩbanada zeseɗapeɗa mĩcuasiɗaa.
5 Ʉ̃cʉrʉ tara ẽjũã mõgaraiɗa ɓʉɗe ɓaecuasia. Dji egorora nãũcha ɓʉ bẽrã maʉ̃ tara isabe tunusia.
6 Mãwãmĩna besea jʉ̃wʉ̃rʉ̃ãba purrubasia bio carra jidaẽ́ ɓaɗa bẽrã.
7 Idjaɓa ʉ̃cʉrʉ tara ẽjũã ʉrʉiɗa ɓʉɗe ɓaecuasia. Mama ɓaecuaɗara jʉ̃cara ʉrʉ bara ɓʉba bʉrá quenasia. Maʉ̃ba poya zauɗaẽ́ basía.
8 Baribʉrʉ ʉ̃cʉrʉ tara ẽjũã biaɗe ɓaecuasia. Maʉ̃gʉra bio zausia. Ʉ̃cʉrʉ cʉmʉba ara ariɗe diasia, dewaraba waitabeara diasia, waabemaba waiɓʉara diasia.–*
9 Maʉ̃be Jesuba jarasia:
–Dji cʉwʉrʉ bara ɓʉba quĩrãcuita ũrĩdua.–
Jesuba ¿cãrẽ cãrẽã ne jara ɓʉɗeba jaradiasi?
Mateo 13:10-17; Luca 8:9-10
10 Ẽberãrã wãpeɗaɗacarea Jesu ume nĩbabadarã doce panʉba, dewara idjiare chũmea biɗa iwiɗisiɗaa idjia ne jara ɓʉɗeba jaradiaɗaɗebemada.
11 4:11-12 Jesuba panusia:
–Ãcõrẽba ẽberãrã pe eroɓʉɗebemada jũmarãa cawabiẽ́ ɓʉmĩna bãrãa cawabi ɓʉa. Baribʉrʉ dewararãa mʉ̃a ne jara ɓʉɗeba beɗea ɓʉa ãdjirãba acʉ panʉmĩna unurãnamãrẽã, idjaɓa ũrĩ panʉmĩna cawarãnamãrẽã. Mãwã ɓeaɗaẽ́bara Ãcõrẽmaa zeɗapeɗa ãdjia cadjirua obadara quĩrãdoacasia.–*
13 Maʉ̃ne Jesuba ãdjía jarasia:
–¿Bãrãba pea poɗaɗebema ne jara ɓʉɗeba jaraɗara cawaɗaẽ́ca? Mãwãra dewarada jaraibʉrʉ ¿sãwã cawaɗi?
14 Ũrĩnadua. Pea pobarira Ãcõrẽ beɗea jarabari quĩrãca ɓʉa.
15 Ta oɗe ɓaeɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗeada ũrĩbadaa. Baribʉrʉ Satanada zepeɗa maʉ̃ beɗea ãdji soɗe jũẽnara quĩrãdoabibaria.
16 Ta mõgaraiɗa ɓʉ ẽjũãne poɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗea ũrĩnapeɗa bio ɓʉsriɗa edabadaa.
17 Baribʉrʉ bio carra jidaẽ́ ɓea bẽrã dãrã droaɗacaa. Ewari zarea zebʉrʉɗe wa Ãcõrẽ beɗea ĩjã panʉ carea ẽberãrãba biẽ́ obʉdaɗe ãdjia ĩjã panʉra igarabadaa.
18 Ta ẽjũã ʉrʉiɗa ɓʉɗe poɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗeara ũrĩbadaa.
19 Baribʉrʉ ãdjirã sãwã bia ɓeaɗiɗebemada jũmawãyã crĩchabadaa idjaɓa ne jũmada awuabadaa. Crĩchabadaa ne jũmada eroɓeaɗibʉrʉ, ɓʉsriɗa ɓeaɗida. Jũma maʉ̃ crĩchaba beɗea ãdji soɗe ɓeɗara bʉrá beabaria. Maʉ̃ bẽrã ãdjira wariɗacaa.
20 Baribʉrʉ ta ẽjũã biaɗe poɗaba naʉ̃da jara ɓʉa: ʉ̃cʉrʉba Ãcõrẽ beɗeara bia ũrĩnapeɗa ĩjãbadaa. Maʉ̃be ʉ̃cʉrʉba ne biada ara ariɗe obadaa, ʉ̃cʉrʉba waitabeara obadaa, idjaɓa ʉ̃cʉrʉba waiɓʉara obadaa.–*
Ĩbĩrãnebema ne jara ɓʉ
Mateo 5:15; Luca 8:16-18
21 Jesuba dewara ne jara ɓʉɗeba jarasia:
–Dadjirãba ĩbĩrãra coaɗapeɗa ¿epeɗeco droma edre ɓʉbadaca? Mẽrã nũmʉnacaa, ãtebʉrʉ ʉ̃tʉ dji ɓʉbadaɗe nũmʉbadaa.*
22 Ara maʉ̃ quĩrãca ne jũma ebuɗa ɓʉẽ́ra mẽrã ɓeẽ́a. Dadjia cawaɗaẽ́ panʉra Ãcõrẽba ebuɗa cawabiya.
23 Dji cʉwʉrʉ bara ɓʉba quĩrãcuita ũrĩdua.–
24 Maʉ̃ awara Jesuba jarasia:
–Mʉ̃a jaradia ɓʉra quĩrãcuitaɗadua. Bãrãba cawaɗi carea bio quĩrãcuitaɗibʉrʉ Ãcõrẽba bãrãa auɗuara cawabiya.
25 Aɓaʉba wãrãda cawaibʉrʉ, Ãcõrẽba auɗuara cawabiya. Baribʉrʉ adua ɓʉba cawa ɓʉda crĩchaibʉrʉ, idjia crĩcha ɓʉ siɗa Ãcõrẽba jãrĩya.–
Néu sãwã waribariɗebema ne jara ɓʉ
26 Jesuba idjaɓa jarasia:
–Ãcõrẽba ẽberãrã pe eroɓʉra aɓaʉba ne ta poɗa quĩrãca ɓʉa.
27 Diamasi dji ẽberã cãĩ ɓʉmisa idjaɓa ãsa zocai ɓʉmisa dji tara quiɗa buyapeɗa waribaria. Dji poɗaba cãrẽba waribi ɓʉda cawacamĩna mãwãbaria.
28 Egoroɗe ara iduɓa tunubaria. Naãrã dji ɓʉwʉrʉda odjabaria. Maʉ̃be dji cʉmʉda zebaria. Idjaɓa dji cʉmʉba dji tada diabaria.
29 Maʉ̃bebʉrʉ dji tara waragabaria. Dji ewarira jũẽna bẽrã ẽberãba necoba ewabaria.–
Mostaza taɗebema ne jara ɓʉ
Mateo 13:31-32, 34-35; Luca 13:18-19
30 Idjaɓa Jesuba jarasia:
–Ãcõrẽba ẽberãrã pe eroɓʉra ¿cãrẽ quĩrãca ɓʉ? ¿Sãʉ̃gʉ ne jara ɓʉɗeba mʉ̃a cawa jarai?
31 Mostaza ta quĩrãca ɓʉa. Maʉ̃ mostaza tara jũma dadjia ubada cãyãbara djubibiara quirua.
32 Baribʉrʉ uɗacarea dewara néu ɓea cãyãbara waiɓʉara waribaria. Dji jʉwatera waiɓʉa jeɗeguezoabaria. Maʉ̃ bẽrã ĩbanara dji jʉwateɗe cũrãdrʉ ɓʉma de ocuaɗe zebadaa.–
33 Mãwã ne jara ɓʉɗeba Jesuba jaradiabadjia ẽberãrãba poya cawaɗida panʉ quĩrãca.
34 Aɓabe ne jara ɓʉɗeba ãdjirãa beɗeabadjia. Baribʉrʉ idji ume nĩbabadarã ãduɓa panʉne jũma cawa jarabadjia.
Jesuba nãũrã, amene droma siɗa tumabiɗa
Mateo 8:23-27; Luca 8:22-25
35 Maʉ̃ ewariɗe queuboɗoɗe Jesuba idji ume nĩbabadarãa jarasia:
–¡Wa quĩrãrẽ wãnadrʉ!–
36 Ara maʉ̃da ãdjia ẽberãrã arima duanʉra amenapeɗa Jesura ara idji ɓʉ jãbaɗe quĩrãrã edesiɗaa. Dewara jãba siɗa ãdji daucha wãsiɗaa.
37 Mãwã panʉne nãũrãda dji cãbãyã puá nũmesia. Maʉ̃ bẽrã baido bogozoara jãbaɗe eɗa wã nũmesia. Jãbara biru ɓaeboɗo basía.
38 Maʉ̃ne Jesura jãba ãdauare borocau cãĩ ɓasia. Maʉ̃ carea idji ume nĩbabadarãba ʉ̃rʉ̃manapeɗa nãwã jarasiɗaa:
–Jaradiabari, ¿bʉmaarã dadjirã ɓarruɗida bia ɓʉca?–
39 Maʉ̃be Jesura ʉ̃ta nũmepeɗa nãũrãra, baido bogozoa siɗa nãwã quẽãsia:
–¡Chupeadua! ¡Ipi ɓedua!–
Ara maʉ̃da nãũrãra ipi ɓesia. Jũma tuma nũmesia.
40 Mãwã ɓʉɗe Jesuba ãdjirãa jarasia:
–Bãrãra ¿sãwãẽrã ne waya panʉ? ¿Cãrẽ cãrẽã Ãcõrẽra ĩjãnaẽ́ panʉ?–
41 Baribʉrʉ Jesuba oɗa carea ãdjirãra bio ne wayasiɗaa. Maʉ̃ bẽrã ãduɓa iwiɗidrua duanesiɗaa:
–Naʉ̃gʉra ¿caida jãwã ɓʉ? Nãũrãba, baido bogozoa biɗa idji beɗeara ĩjãbadaa.–
Beɗea eɗaare
^ 4:8. Griego beɗeaɗe nãwã ɓʉa: “Ʉ̃cʉrʉ cʉmʉba treinta diasia, dewaraba sesenta diasia, waabemaba cien diasia.”
^ 4:11-12. Isaía 6:9-10.
^ 4:20. Griego beɗeaɗe nãwã ɓʉ́ ɓʉa: “Ʉ̃cʉrʉba treinta zaubadaa, ʉ̃cʉrʉba sesenta zaubadaa, idjaɓa ʉ̃cʉrʉba cien zaubadaa.”
^ 4:21. Mẽrã nũmʉnacaa. Griego beɗeaɗe nãwã ɓʉ́ ɓʉa: “Cʉɗa edre ɓʉɗacaa.”
