Marco 5:1-43
5 Maʉ̃be amene droma chãnapeɗa Gerasa druaɗe jũẽsiɗaa.*
2 Jesura jãbaɗeba drua ɓadosiɗe cawaẽ́ne ẽberã jai bara ɓʉda idjimaa zesia.
3 Maʉ̃ ẽberãra beuɗarã tʉɓaribada uriaɗe ɓabadjia. Ni aɓaʉba idjira poyaɗaca basía, carenaba jʉ̃bʉda siɗa.
4 Ɓarima zocãrã idjira carenaba jĩrũ jʉ̃badjiɗamĩna, jʉwa siɗa jʉ̃badjiɗamĩna aɓeɗa jũma tʉcuabadjia. Idjira ni aɓaʉba poyaɗaca basía.
5 Diamasi, ãsa biɗa idjira bẽwãrã tʉɓaribada uriaɗe, eyaɗe biɗa ɓia nĩbabadjia. Idjaɓa ara idji cacuara mõgaraba puobadjia.
6 5:6-7 Idjia tʉmʉba Jesu unusiɗe pira zesia. Jesu quĩrãpita chĩrãboroɗe coɓepeɗa jĩgua jarasia:
–Ãcõrẽ dji Dromaara ɓʉ Warra, Jesu, ¿cãrẽ cãrẽã mʉ̃ra mĩã sẽ ɓʉ? ¡Ãcõrẽ quĩrãpita wãrãneba jaradua bʉa mʉ̃ra biẽ́ ɓʉẽ́da!–
7 –
8 Mãwã beɗeasia Jesuba idjía nãwã jara ɓaɗa bẽrã:
–¡Jai, naʉ̃ ẽberã cacuaɗebemada ãyã wãdua!–
9 Maʉ̃be Jesuba dji jaia iwiɗisia:
–¿Bʉra casa trʉ̃ jarabada?–
Dji jaiba panusia:
–Mʉ̃ trʉ̃ra Cãbana abadaa, dairãra cãbana panʉ bẽrã.–
10 Maʉ̃ne jaiba Jesua beɗea djuburiasia maʉ̃ druaɗebemada ãyã jʉretarãmãrẽã.
11 Mãwã panʉne ara caita ɓʉ eyaɗe chinada zocãrã ne co duanasiɗaa.
12 Maʉ̃ carea dji jairãba Jesua nãwã beɗea djuburiasiɗaa:
–Dairãra jãʉ̃gʉrã china cacuaɗe idu eɗa wãbidua.–
13 Maʉ̃ne Jesuba iduaribisia. Ara maʉ̃da jairãra ẽberã cacuaɗebemada ẽdrʉcuaɗapeɗa china cacuaɗe eɗa wãbʉrʉsiɗaa. Baribʉrʉ eɗa wãnapeɗa chinara pirapoɗapeɗa perawaɗeba daiɗu tẽũcuasiɗaa. Mama aɓeɗa jũma nãbʉrʉ quinisiɗaa. Maʉ̃gʉrã chinara mil umé panasiɗaca ɓʉa.
14 Maʉ̃ carea dji china acʉ pananara puruɗaa pira wãsiɗaa. Ãdji puruɗebemarãa, dji puru caita ɓearãa biɗa jai bara ɓaɗaɗebemada jũma nẽbʉrʉsiɗaa. Maʉ̃ carea puruɗebemarãba acʉɗe zesesiɗaa.
15 5:15-16 Jesu ɓʉma jũẽbʉdaɗe unusiɗaa jai zocãrã eroɓaɗara Jesu caita chũmʉda. Quĩrã ɓapeɗa cacuaɗe jʉ̃badara jʉ̃ ɓasia. Maʉ̃ unupeɗaɗaba dewararãa nẽbʉrʉsiɗaa jai bara ɓaɗara sãwãsida. China sãwãpeɗaɗa siɗa nẽbʉrʉsiɗaa. Jũmarãda bio ne waya duanesiɗaa.
17 Maʉ̃ carea ãdjirãba Jesua beɗea djuburiasiɗaa ãdji druaɗebemada ãyã wãmãrẽã.
18 Jesu jãbaɗe ɓadosiɗe dji jai bara ɓaɗaba beɗea djuburiasia idji ume wãi carea.
19 Baribʉrʉ Jesuba idu wãbiẽ́ basía. Ãtebʉrʉ jarasia:
–Diguiɗa wãpeɗa bʉ ẽberãrãa jaradua Ãcõrẽba bʉ ume ne waiɓʉa oɗada. Ãdjía nẽbʉrʉdua sãwã idjia bʉra bio quĩrã djuburiasida.–
20 Ara maʉ̃da jai eroɓaɗara wãpeɗa jũma Decapoli druaɗe nẽbʉrʉbadjia Jesuba idji ume ne waiɓʉa oɗada. Maʉ̃ bẽrã jũmarãba cawa crĩchaɗaẽ́ basía.
Jesuba wẽrãcau biabiɗa
Mateo 9:18-26; Luca 8:40-56
21 Jesu jẽda jãbaɗe amene droma quĩrãrã chãnacarea ẽberãrã zocãrã idji ɓʉmaa zesiɗaa. Maʉ̃ carea Jesura do icawa ɓesia.
22 5:22-23 Mãwã ɓʉɗe ẽberã Jairo abadada zesia. Maʉ̃ Jairora judiorã dji jʉrebada deɗe dji boro basía. Maʉ̃ne Jairora Jesu caita jũẽpeɗa idji jĩrũ caita ɓarru coɓepeɗa nãwã beɗea djuburiasia:
–Mʉ̃ cauda jũãcãyã nũmʉa. Bʉ jʉwara idji ʉ̃rʉ̃ ɓʉɗe zedua biamãrẽã.–
24 Ara maʉ̃da Jesura Jairo ume wãsia. Ẽberãrã zocãrã Jesu ume wãbʉda bẽrã pẽsua nĩbasia.
25 Maʉ̃ne ẽberãrã tãẽna wẽrã doce poa oamiaba jida ɓʉda nĩbasia.
26 Maʉ̃ wẽrãba nẽãrã diabadarãa idji paratara jũma diaɗoaɗamĩna biaẽ́ basía. Zocãrã nẽãrã diabadarãba idjira bia mĩgabisiɗaa baribʉrʉ wetara wãsia.
27 5:27-28 Maʉ̃ne Jesuɗebemada beɗea panʉda ũrĩpeɗa ẽberãrã tãẽna Jesu jẽdaare caita wãsia. Nãwã crĩchasia: “Idji cacuaɗe jʉ̃ ɓʉda tãibʉrʉ, mʉ̃ra biaya.” Ara maʉ̃da Jesu cacuaɗe jʉ̃ ɓʉra chupea tãsia.
29 Tãbʉrʉɗe idji oara tʉdrʉsia. Mãwã cawasia idji cacua biẽ́ ɓaɗara biasida.
30 Baribʉrʉ Jesuba cawasia idji ʉɓʉaɗeba aɓaʉda biasida. Maʉ̃ bẽrã jẽda acʉpeɗa iwiɗisia:
–Mʉ̃a cacuaɗe jʉ̃ ɓʉra ¿caiba tãsi?–
31 Maʉ̃ne idji ume nĩbabadarãba jarasiɗaa:
–¿Sãwã iwiɗi ɓʉ caiba bʉra tãsida? Bʉa unu ɓʉa ẽberãrãba bʉra pẽsua eropanʉda.–
32 Mãwã jarabʉdamĩna Jesuba jũmarãda pʉrrʉga acʉsia idji tãnada cawai carea.
33 Mãwã ɓʉɗe wẽrãra ne wayaaba ure nũmasia Jesuɗeba biaɗada cawa ɓʉ bẽrã. Maʉ̃be Jesumaa zepeɗa idji quĩrãpita ɓarru coɓepeɗa jarasia:
–Mʉ̃abʉrʉ wãrãda bʉra tãsia.–
34 Maʉ̃ carea Jesuba idjía jarasia:
–Cau, wãrãda biaida ĩjãna bẽrã bʉra biasia. Necai wãdua. Bʉra waa bia mĩgaẽ́a.–
35 Jesu waɗi beɗea ɓʉɗe Jairo deɗeba ʉ̃cʉrʉ zeɗapeɗa idjía jarasiɗaa:
–Bʉ caura jaiɗasia. ¿Cãrẽã jaradiabarira mĩã sẽi?–
36 Mãwã jarabʉdara Jesuba quĩrãcuitaẽ́ basía. Ãtebʉrʉ Jairoa jarasia:
–Ne wayarãdua. Soɗeba ĩjãdua.–
37 Maʉ̃be Jesuba Pedroda, Santiagoda, Santiago djaba Juaʉ̃ siɗa Jairo deɗaa edesia. Waabemara idu wãbiẽ́ basía.
38 Jairo dema jũẽbʉdaɗe Jesuba ũrĩsia ẽberãrãra ɓʉga aujĩã duanʉda.
39 Eɗa wãpeɗa Jesuba dji aujĩã duanʉ́a jarasia:
–¿Cãrẽ cãrẽã jãcua aujĩã duanʉ? Jãʉ̃ wẽrãcaura beuẽ́ ɓʉa, ãtebʉrʉ cãĩ ɓʉa.–
40 Maʉ̃ carea ẽberãrãba idjimaa acʉɗapeɗa ipiɗasiɗaa. Baribʉrʉ Jesuba jũmarãda dajadaa wãbisia. Maʉ̃be idji ume nĩbabadarãda ũbea, dji wẽrãcau zezada, dji papa siɗa eɗa edesia wẽrãcau ɓʉpeɗaɗamaa.
41 Wẽrãcau jʉwaɗe jidapeɗa Jesuba jarasia:
–Talita cumi.– (Maʉ̃ arameo beɗeaba nãwã jara ɓʉa: “Cau zaque, mʉ̃a bʉ́a jaraya: piraɓaridua.”)
42 Ara maʉ̃da wẽrãcaura piraɓaripeɗa nĩbaɗe wãsia. Idjira doce poa ɓasia. Maʉ̃gʉɗebemada jũmarãba cawa crĩchaɗaẽ́ basía.
43 Baribʉrʉ Jesuba ãdjía bio jarasia ni aɓaʉa jararãnamãrẽã. Idjaɓa jarasia wẽrãcaura ne cobiɗamãrẽã.
Beɗea eɗaare
^ 5:1. Gerasa. Griego beɗeaɗe ʉ̃cʉrʉ cartaɗe “Gadara” wa “Gergasa” ɓʉ́ ɓʉa.
