Marco 6:1-56
6 Mamaʉba Jesura idji puruɗaa wãsia. Idji ume nĩbabadarã siɗa wãsiɗaa.
2 Ʉ̃nãũbada ewariɗe Jesuba judiorã dji jʉrebada deɗe Ãcõrẽ beɗeara jaradia ɓasia. Maʉ̃ne zocãrã ũrĩ duanʉba cawa crĩchaɗaẽ́ basía. Nãwã jara duanasiɗaa:
–Idjia ¿sãmaareba jãʉ̃ crĩcha cawaara edasi? ¿Caiba idjía necawaada diasi? ¿Sãwã ne ununacada poya oi?
3 ¿Idjira de obariẽ́ca? ¿Maria warrada jãwã ɓʉẽ́ca? ¿Idji djabarãra Santiago, Jose, Juda idjaɓa Simoʉ̃ẽ́ca? ¿Idji djabawẽrãrã siɗa dadjirã tãẽna panʉẽ́ca?–
Ãdjirãba Jesura ĩjã quĩrĩãnaẽ́ basía.
4 Maʉ̃ bẽrã Jesuba jarasia:
–Ãcõrẽneba beɗeabarida djãrã druaɗe wayabadaa, baribʉrʉ ara idji druaɗebemarãba wayaɗacaa. Idji puruba, idji deɗe panabada biɗa wayaɗacaa.–
5 Mama Jesuba ne ununacara poya oẽ́ basía. Aɓabe idji jʉwara ʉ̃cʉrʉ cacua biẽ́ ɓea ʉ̃rʉ̃ ɓʉbʉrʉɗe biabisia.
6 Idji puruɗebemarãba ĩjãnaẽ́ baɗa bẽrã Jesuba cawa crĩchaẽ́ ɓesia.
Jesuba doce edaɗarã diabueɗa
Mateo 10:5-15; Luca 9:1-6
Jesuba puru zaque ɓeaza jaradia wãsia.
7 Mãwãnacarea idjia doce edaɗarãra ãbaa trʉ̃sia. Ãdjirãa ʉɓʉada diasia jaida ãyã jʉretaɗamãrẽã. Maʉ̃be puru zaque ɓeaza umé uméa diabuesia.
8 Ãdji wãni naẽna jarasia wãbʉdaɗe ni cãrẽ siɗa ederãnamãrẽã. Oɗe coɗida, buchacada, parata siɗa edeɗiẽ́ panʉana asia. Bardona awa edeɗida panʉda jarasia.
9 Idjaɓa jarasia zapato jʉ̃nida panʉda baribʉrʉ ãdjia cacuaɗe jʉ̃ panʉ awa edeɗida panʉda.
10 Maʉ̃ awara jarasia:
–Bãrã baridua puruɗe jũẽbʉdaɗe aɓaʉ deɗe ɓaɗe wãnibʉrʉ maʉ̃ deɗe pananadua aɓa puruɗeba ẽdrʉbʉdaɗaa.
11 Aɓaʉ puruba bãrãda bia edaẽ́bʉrʉ, ãdjia bãrã beɗeada ũrĩ quĩrĩãnaẽ́bʉrʉ, mamaʉba ẽdrʉɗadua. Ẽdrʉbʉdaɗe egoro pora bãrã jĩrũ jãne ɓʉra jãrãpetaɗadua. Maʉ̃ba cawabiya ãdjia Ãcõrẽ igara panʉ carea idjia cawa oida.–*
12 Ara maʉ̃da Jesu ume nĩbabadarãra wãsiɗaa. Wãbʉdaza ẽberãrãa jarabadjiɗaa ãdji cadjiruara igaraɗapeɗa Ãcõrẽmaa zeɗamãrẽã.
13 Maʉ̃ awara jaira zocãrã ẽberãrã cacuaɗebemada ãyã jʉrecuasiɗaa idjaɓa zocãrã cacua biẽ́ ɓeara olivo dragaba pʉrʉbʉdaɗe biabibadjiɗaa.*
Herodeba Jesuɗebema ũrĩna
Mateo 14:1-12; Luca 9:7-9
14 Herodeda Galilea druaɗebema boro basía.* Maʉ̃ Herodeba Jesura trʉ̃ ɓʉga ɓʉda ũrĩsia. Ʉ̃cʉrʉba Jesuɗebemada nãwã jarabadjiɗaa:
–Borocuebari Juaʉ̃da ʉ̃rẽbasia. Maʉ̃ bẽrã jũma ne ununacara poya o ɓʉa.–*
15 Dewararãba jarasiɗaa Jesura Ãcõrẽneba beɗeabari Elíada. Dewararãba jarasiɗaa:
–Idjira Ãcõrẽneba beɗeabaria dadji drõãenabema ewariɗe ɓeaɗa quĩrãca.–
16 Baribʉrʉ Herodeba mãwã ũrĩpeɗa jarasia:
–Maʉ̃gʉra Juaʉ̃a. Mʉ̃a idjira oɓʉá tʉ beabisia baribʉrʉ beuɗada ʉ̃rẽbasia.–
17 6:17-18 Herodeba Juaʉ̃ beabiɗara nãwã ɓasia: Herodeba ara idji djaba Pelipe quimada edasia. Maʉ̃ wẽrãra Herodía abadjiɗaa. Herodeba idji ãyõrẽra edaɗa bẽrã Juaʉ̃ba jarabadjia: “Bʉ djaba quimada eroɓacara ɓʉa.”* Maʉ̃ carea Herodeba Juaʉ̃ra jidabipeɗa preso ɓʉbada deɗe carenaba jʉ̃ ɓʉsia.
19 Maʉ̃ awara Herodíaba Juaʉ̃ra quĩrãma ɓasia. Idjira beabi quĩrĩã ɓasia mãwãmĩna poya oẽ́ ɓasia.
20 Dji boro Herodeba Juaʉ̃ra waya ɓasia idjaɓa cawa ɓasia Juaʉ̃ra ẽberã jipa ɓʉda, Ãcõrẽ itea ɓʉda. Maʉ̃ carea Juaʉ̃ra idu biẽ́ obica basía. Herodeba Juaʉ̃ beɗeara bia ũrĩbadjia baribʉrʉ cawa crĩchaẽ́ ɓesia.
21 Ewari aɓa Herodíaba cawasia sãwã Juaʉ̃ra beabida. Nãwã ɓasia: dji boro Herode toɗa ewari jũẽsiɗe ne cobada waiɓʉada obisia. Idjiare ɓea dji dromarãda, dji djõbada bororãda, Galilea druaɗebema dji droma ɓea siɗa trʉ̃bicuasia idji ume ne coɗamãrẽã.
22 Mãwã ne co duanʉne Herodía cauda eɗa zepeɗa jũmarã quĩrãpita bairasia. Maʉ̃ba Herodera, idji ume ne co duanʉ siɗa bio ɓʉsriɗasiɗaa. Herodeba maʉ̃ awẽrãa jarasia:
–Bʉdjia quĩrĩãbʉrʉda mʉ̃́a iwiɗidua. Ara maʉ̃da mʉ̃a bʉ́a diaya.–
23 Idjia wãrãneba jarasia:
–Bʉa mʉ̃́a iwiɗibʉrʉda mʉ̃a jũma diaya. Mʉ̃a poya eroɓʉ siɗa ẽsidra diaya.–
24 Maʉ̃ne Herodía caura dajadaa wãpeɗa idji papaa nãwã iwiɗisia:
–Mʉ̃a ¿cãrẽda iwiɗi?–
Maʉ̃ne dji papaba panusia:
–Borocuebari Juaʉ̃ boroda iwiɗidua.–
25 Dji caura Herodemaa isabe jẽda wãpeɗa nãwã jarasia:
–Mʉ̃a quĩrĩã ɓʉa ara nawena bʉa Borocuebari Juaʉ̃ boroda mʉ̃́a epeɗecoɗe diaida.–
26 Mãwã iwiɗisiɗe Herodera bio sopuasia. Baribʉrʉ idji ume ne co duanʉ quĩrãpita wãrãneba jaraɗa bẽrã awẽrãba iwiɗiɗa quĩrãca o quĩrĩãsia.
27 Ara maʉ̃da Herodeba zarrada wãbisia Juaʉ̃ borora enemãrẽã.
28 Maʉ̃ zarrara preso ɓʉbadamaa wãpeɗa Juaʉ̃ra oɓʉá tʉsia. Idji borora epeɗecoɗe enepeɗa Herodía caua diasia. Maʉ̃be dji cauba dji papaa diasia.
29 Juaʉ̃ ume nĩbapeɗaɗaba maʉ̃ ũrĩsiɗaɗe Juaʉ̃ cacuara jʉrʉɗe wãnapeɗa tʉɓariɗe edesiɗaa.
Jesuba mil juesuma auɗu ne cobigaɗa
Mateo 14:13-21; Luca 9:10-17; Juaʉ̃ 6:1-4
30 Mãwãnacarea Jesuba diabueɗarãra idji ume ãbaa dji jʉresiɗaa. Ãdjia opeɗaɗara, jaradiapeɗaɗa siɗa Jesua jũma nẽbʉrʉ panasiɗaa.
31 Mãwã panʉne ẽberãrãra zocãrã zesesiɗaa. Ãdjirã careba panʉba poya ne coɗaẽ́ basía. Maʉ̃ bẽrã Jesuba jarasia:
–Wãnadrʉ ẽberã neẽ́maa ʉ̃nãũni carea.–
32 Ara maʉ̃da ãduɓa jãbaɗe wãsiɗaa ẽberã neẽ́maa.
33 Baribʉrʉ zocãrãba ãdji wãbʉdara unusiɗaa. Maʉ̃ne cawasiɗaa cairãda mãwã wãnada. Maʉ̃ bẽrã puruzabemarãda ãdji wãbʉdamaa jĩrũba wãnapeɗa ãdji na jũẽsiɗaa.
34 Jesura jãbaɗeba drua ɓadobʉrʉɗe maʉ̃ ẽberãrã zocãrã duanʉda unusia. Oveja dji wagabari neẽ́ queɗea quĩrãca panʉ bẽrã Jesuba ãdjirãra mĩã djuburi unusia. Maʉ̃ carea ãdjirãa jaradia ɓesia.
35 Queuboɗoɗe Jesu ume nĩbabadarãra idjimaa zeɗapeɗa jarasiɗaa:
–Nama ẽberãra caita neẽ́a. Maʉ̃ awara queubʉrʉa.
36 Ẽberãrãa jaradua de ɓeamaa wa puru ɓeaɗaa coɗira nẽdoɗe wãnamãrẽã. Ni cãrẽ siɗa neẽ́ panʉa.–*
37 Baribʉrʉ Jesuba jarasia:
–Bãrãbʉrʉ ne cobiɗadua.–
Maʉ̃ne ãdjia jarasiɗaa:
–¿Cãrẽda daiba cobiɗi? ¿Bʉa quĩrĩã ɓʉca daiba jũma naʉ̃ ẽberãrã itea paʉ̃ nẽdoɗe wãnida? Aɓaʉda berara poa aɓa trajaida ɓʉa maʉ̃ parata edai carea.–
38 Maʉ̃ne Jesuba iwiɗisia:
–¿Dadjirãba paʉ̃da jũmasãwã eropanʉ? Acʉɗe wãnadua.–
Ara maʉ̃da wãsiɗaa. Acʉɗapeɗa ãdjia jaraɗe zesiɗaa:
–Paʉ̃da juesumabe idjaɓa ɓedada umébe eropanʉa.–
39 Maʉ̃be Jesuba jũmarãa jarasia põãjãrã pãwãrãne awara awara chũpanenamãrẽã.
40 Ara maʉ̃da ʉ̃cʉrʉ cien, ʉ̃cʉrʉ cincuenta awara awara chũpanesiɗaa.
41 Jesuba paʉ̃ juesuma panʉra, ɓeda umé panʉ siɗa idji jʉwaɗe edapeɗa bajãnaa acʉpeɗa Ãcõrẽa bia jarasia. Maʉ̃be paʉ̃ra cõrãcuapeɗa idji ume nĩbabadarãa diasia jeɗecaɗamãrẽã. Ɓeda umébema siɗa jeɗecaɗamãrẽã diasia.
42 Maʉ̃be jũmarãda ne coɗapeɗa jãwũãsiɗaa.
43 Paʉ̃ aɗubaɗara, ɓeda aɗubaɗa siɗa jʉrʉ pesiɗaɗe doce jamara birasiɗaa.
44 Mama ne copeɗaɗara dji umaquĩrã awa mil juesuma panasiɗaa.
Jesu do ʉ̃rʉ̃ nĩbaɗa
Mateo 14:22-27; Juaʉ̃ 6:16-21
45 Mãwãnacarea Jesuba idji ume nĩbabadarãra jãbaɗe ɓadobisia idji na quĩrãrã chãnapeɗa Betsaidá puruɗaa wãnamãrẽã. Maʉ̃ne idjira ɓesia ẽberãrã diguiɗaa wãbigai carea.
46 Jũmarãda wãbigapeɗa eyaɗaa Ãcõrẽa iwiɗiɗe wãsia.
47 Queusiɗe Jesu ume nĩbabadarãra jãbaɗe do quẽsidra panasiɗaa. Maʉ̃ne Jesura drua iduɓa ɓasia.
48 Idjia unusia ãdjira dowiba poya wãnaẽ́ panʉda nãũrãda ãdji nocoareba puá nũmʉ bẽrã. Ãsaboɗoɗe Jesura do ʉ̃rʉ̃ nĩda ãdjirã caita wãyã wãbʉrʉ basía.
49 6:49-50 Maʉ̃ne jũmarãba idjira do ʉ̃rʉ̃ nĩda unusiɗaa. Baribʉrʉ bẽwãrãda mãwã ɓʉda crĩchasiɗaa. Maʉ̃ carea bio dauperaɗapeɗa ne wayaaba ɓiasiɗaa. Ara maʉ̃da Jesuba jarasia:
–¡Sozarra ɓeaɗadua! Mʉ̃da jãwã ɓʉa. ¡Ne wayarãnadua!–
51 Jesu jãbaɗe ɓadosiɗe nãũrãra cãbasia. Maʉ̃ bẽrã bio ne wayasiɗaa idjaɓa cawa crĩchaɗaẽ́ panesiɗaa.
52 Jesuba paʉ̃ maãrĩ ɓʉɗeba ẽberãrãra zocãrã ne cobigaɗamĩna ãdjia waɗibiɗa idjiɗebemada cawaɗaẽ́ panasiɗaa. Aɓeɗa poya cawaɗaẽ́ basía.
Jesuba Genesare druaɗe cacua biẽ́ ɓea biabiɗa
Mateo 14:34-36
53 Chã wãnada Genesare druaɗe jũẽnapeɗa doya wiɓarisiɗaa.
54 Jãbaɗeba drua ɓadosiɗaɗe mamabemarãba aɓeɗa Jesura cawasiɗaa.
55 Maʉ̃ carea puruza pira wãsiɗaa ãdji cacua biẽ́ ɓeara Jesumaa edeɗamãrẽã. Ẽberãrãba Jesura sãma ɓʉda ũrĩsiɗara dji cacua biẽ́ ɓeara cʉɗaɗe araa edebadjiɗaa.
56 Idji wãbʉrʉza ẽberãrãba cacua biẽ́ queɗeara oɗe ɓʉbadjiɗaa. Puru zaqueɗe, puru ɓeaɗe, puru ãĩ biɗa mãwã obadjiɗaa. Maʉ̃ne Jesua beɗea djuburiabadjiɗaa idjia cacuaɗe jʉ̃ ɓʉ ida tãbimãrẽã. Idji tãbʉdara jũmaena biacuabadjiɗaa.
Beɗea eɗaare
^ 6:11. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Wãrã arada mʉ̃a jaraya: Ãcõrẽba cawa oi ewariɗe Sodoma, Gomorra puru cãyãbara maʉ̃ purura wetara cawa oya.” Genesi 18:16ɗeba aɓa 19:29ɗaa.
^ 6:13. Jesu ume nĩbabadarãba cacua biẽ́ ɓeara olivo dragaba pʉrʉɗaẽ́ basía biabiɗi carea. Ãtebʉrʉ mãwã pʉrʉbʉdaɗe cawabisiɗaa Ãcõrẽba ẽberãrã biabi ɓʉda (Santiago 5:14-15). Eɗauɗe olivo dragaba pʉrʉɗaẽ́ne cacua biẽ́ ɓeara biabisiɗaa (Hecho 3:1-10; 5:12-16; 9:32-35; 19:11-12).
^ 6:14. Herode. Maʉ̃ Herodera Antipa trʉ̃ jarabadjiɗaa. Ãcõrẽ Beɗeaɗe odja ɓʉa Mateo 14:1-10ɗe, Luca 3:19ɗe, 9:7-9ɗe, 13:31-33ɗe, 23:6-12ɗe biɗa. Idji zezara “Herode dji Droma” abadjiɗaa (Mateo 2:1-23).
^ 6:14. Griego beɗeaɗe ʉ̃cʉrʉ cartaɗe ɓʉ́ ɓʉa Herodebʉrʉ mãwã jarasida.
^ 6:17-18. Levitico 18:16.
^ 6:36. Ni cãrẽ siɗa neẽ́ panʉa. Griego beɗeaɗe ʉ̃cʉrʉ cartaɗe maʉ̃ra neẽ́a.
