Marco 7:1-37
7 Ewari aɓa pariseorãda, judiorã ley jaradiabadarã siɗa Jerusaleʉ̃ puruɗeba Jesumaa zesiɗaa.
2 Maʉ̃ ẽberãrãba unusiɗaa ʉ̃cʉrʉ Jesu ume nĩbabadarãda jʉwa sʉgʉɗaẽ́ ne co panʉda. Drõãenabemaba jʉwa sʉgʉbadaɗebema jaradiapeɗaɗa quĩrãca oɗaẽ́ panʉ bẽrã ãdjira biẽ́ jarasiɗaa.*
3 (Pariseorãba, waabema judiorã biɗa jʉwara ɓarima zocãrã sʉgʉbadaa drõãenabemaba jaradiapeɗaɗa quĩrãca.* Mãwã sʉgʉɗaẽ́bʉrʉ ne coɗacaa.
4 Idjaɓa ne nẽdobuebadamaʉba diguiɗaa zeɗapeɗa drõãenabemaba jaradiapeɗaɗa quĩrãca sʉgʉɗaẽ́bʉrʉ, ne coɗacaa. Maʉ̃ awara ãdji sãũda, zocoda, cuguruda, cʉɗa siɗa quĩrãcuita sʉgʉbadaa.* Ne zocãrã quĩrãcuita obadaa drõãenabemaba jaradiapeɗaɗa ẽpẽni carea.)
5 Maʉ̃ne pariseorãba, judiorã ley jaradiabadarã biɗa Jesua iwiɗisiɗaa:
–Bʉ ume nĩbabadarãba jʉwa mititia ne cobadaa. ¿Cãrẽ cãrẽã dadji drõãenabemaba jaradiapeɗaɗara oɗaca?–
6 Jesuba panusia:
–Bãrã dji biaca ɓearã, Ãcõrẽneba beɗeabari Isaíaba bãrãnebemada nãwã ariɗe ɓʉsia:
Naʉ̃ puruba mʉ̃́a bia beɗeabaria, baribʉrʉ wãrãda ãdji soɗeba mʉ̃ma crĩchaɗacaa.
7 Ãdji quĩrĩãbe mʉ̃́a bia beɗeabadaa.
Mʉ̃ beɗea cãyãbara ẽberã crĩchadrʉ jaradiabadaa.*
8 Ara maʉ̃ quĩrãca Ãcõrẽba obi ɓʉ beɗeara bãrãba amabadaa drõãenabemarãba jaradiapeɗaɗa ẽpẽni carea.–*
9 Maʉ̃ awara Jesuba jarasia:
–Ara bãrãba obadaɗeba Ãcõrẽba obi ɓʉ beɗeara igarabadaa.
10 Moiseba nãwã jarasia: “Bʉ zezada, bʉ papa siɗa wayadua.”* Naʉ̃ siɗa jarasia: “Bariduaba idji zezada wa idji papada biẽ́ jaraibʉrʉ, maʉ̃gʉra beuida ɓʉa.”*
11 7:11-12 Baribʉrʉ bãrãba dji zeza wa dji papa careba amaaba aɓabe naʉ̃da jarabadaa: “Jũma mʉ̃a eroɓʉra Ãcõrẽa diaɗa bẽrã mʉ̃a bʉra poya carebaẽ́a.”*
13 Mãwã bãrã drõã naẽnabemaba jaradiapeɗaɗa ẽpẽ panʉneba Ãcõrẽ beɗeara igarabadaa. Bãrãba ne zocãrã maʉ̃ quĩrãca obadaa.–
14 Maʉ̃be Jesuba ẽberãrã arima duanʉra jũma trʉ̃peɗa nãwã jarasia:
–Jũmarãba mʉ̃ beɗeara ũrĩnadua cawaɗamãrẽã.
15 Dadjia cobadaba Ãcõrẽ quĩrãpita mititia ɓʉcaa. Ãtebʉrʉ soɗeba ze ɓʉbʉrʉ dadjira mititia ɓʉbaria.
16 Dji cʉwʉrʉ bara ɓʉba quĩrãcuita ũrĩdua.–*
17 Maʉ̃be Jesuba ẽberãrã arima duanʉra amepeɗa diguiɗaa wãsia. Mama idji ume nĩbabadarãba dadji mititia ɓʉbariɗebemada iwiɗisiɗaa.
18 7:18-19 Maʉ̃ne Jesuba jarasia:
–¿Bãrã biɗa waɗi adua panʉca? Ũrĩnadua: dadjia cobadaba Ãcõrẽ quĩrãpita mititia ɓʉcaa, dadji soɗe eɗa wãẽ́ ɓʉ bẽrã. Ãtebʉrʉ ɓiteɗa wãpeɗa dajadaa ẽdrʉbaria.–
Mãwã jara ɓʉɗeba Jesuba cawabisia ne jũma coɗira bia ɓʉda.
20 Maʉ̃bebʉrʉ jarasia:
–Eɗaʉba ze ɓʉba ẽberãra Ãcõrẽ quĩrãpita mititia ɓʉbaria.
21 7:21-22 Crĩcha cadjiruada, daunemaida, auɗua ɓaida, mĩã beaida, ne drʉaida, jũma eroɓa quĩrĩã ɓaida, ne cadjirua o ɓaida, djãrã cũrũgaida, peraẽ́ oida, djãrãba eroɓʉ carea biẽ́ ɓaida, ẽcarraare biẽ́ beɗeaida, djãrã cãyãbara biara ɓʉda crĩchaida, idjaɓa crĩcha neẽ́ ɓʉca o ɓai siɗa ẽberã soɗeba zebaria.
23 Jũma maʉ̃ cadjirua eɗaʉba ze ɓʉba ẽberãra Ãcõrẽ quĩrãpita mititia ɓʉbaria.–
Jesuba wẽrãcau biabiɗa
Mateo 15:21-28
24 Jesura mamaʉba Tiro druaɗaa wãpeɗa aɓaʉ ẽberã deɗe ɓesia.* Idji sãma ɓʉda ni aɓaʉa cawabi quĩrĩãẽ́ ɓasia. Mãwãmĩna cawasiɗaa.
25 Maʉ̃ druaɗe wẽrãda ɓasia. Idji caura jai bara ɓasia. Maʉ̃ wẽrãba Jesuɗebema ũrĩsiɗe idji ɓʉmaa wãpeɗa idji jĩrũ caita chĩrãboroɗe coɓesia.
26 Maʉ̃ne beɗea djuburiasia Jesuba jaira idji cau cacuaɗebemada ãyã jʉretamãrẽã. Baribʉrʉ wẽrãra judioẽ́ basía.* Siropenicia druaɗebema basía.
27 Maʉ̃ carea Jesuba idjía jarasia:
–Warrarãda na aída cobida ɓʉa. Biẽ́ ɓʉa warrarãba co panʉda jãrĩda usaa diai carea.–
28 Maʉ̃ne wẽrãba panusia:
–Bʉa jara ɓʉra wãrãa, mʉ̃ Boro, baribʉrʉ warrarãba djico jurruzoabiɗada usaba mesa edre cobaria.–
29 Maʉ̃ ũrĩpeɗa Jesuba jarasia:
–Bʉa mãwã bia panuna bẽrã necai diguiɗaa wãdua. Bʉ cau cacuaɗe ɓaɗa jaira ãyã wãsia.–
30 Wẽrã idji deɗe jũẽsiɗe idji caura cʉɗaɗe necai ɓʉda unusia. Dji jaira wãrãda ãyã wãsia.
Jesuba ẽberã cʉwʉrʉ qui ɓʉ biabiɗa
Mateo 15:29-31
31 Jesura Tiro druaɗe ɓaɗada jẽda wãsia. Sidoʉ̃ druaɗe jũẽne wãpeɗa Decapoli druaareba Galilea amene dromanaa wãsia.
32 Mama ẽberãrãba cʉwʉrʉ qui ɓʉda Jesumaa enesiɗaa. Maʉ̃ ẽberãra idjaɓa quĩrãme cara ɓasia. Ãdjirãba Jesua beɗea djuburiasiɗaa idji jʉwara maʉ̃ ẽberã ʉ̃rʉ̃ ɓʉpeɗa biabimãrẽã.
33 Ara maʉ̃da Jesuba cʉwʉrʉ qui ɓʉra jĩga edesia. Maʉ̃be idji jʉwa jĩwĩnĩra dji ẽberã cʉwʉrʉ uriaza berajusia. Mãwã opeɗa ara idji jʉwa quẽbʉɗe iɗosia. Ẽberã quĩrãmene iɓaba maãrĩ wara edasia.
34 Maʉ̃be bajãnaa acʉpeɗa ʉ̃yãba drasoa ʉ̃yãbapeɗa arameo beɗeaɗe jarasia: “¡Epata!” Maʉ̃ beɗeaba jara ɓʉa “ogadrʉdua.”
35 Ara maʉ̃da ẽberã cʉwʉrʉra ogadrʉpeɗa bia ũrĩ ɓesia. Idji quĩrãmera biaɗa bẽrã bia beɗea ɓesia.
36 Jesuba ãdjirãa jarasia maʉ̃nebemada ni aɓaʉa jararãnamãrẽã. Mãwãmĩna wetara nẽbʉrʉbadjiɗaa.
37 Dji arima panʉba bio cawa crĩchaɗaẽ́ panesiɗaa. Nãwã jarasiɗaa:
–Jesuba ne jũmada bia o ɓʉa. Cʉwʉrʉ qui ɓeara ũrĩbibaria, quĩrãme cara ɓeara beɗeabibaria.–
Beɗea eɗaare
^ 7:2. Ãdjira biẽ́ jarasiɗaa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 7:3. Levitico 22:4-8ɗe sacerdoterã cuiɗida panʉnebemada ɓʉ́ ɓʉa, baribʉrʉ Jesu ewariɗe pariseorãba jarabadjiɗaa jũmarãba mãwã oɗida panʉda.
^ 7:4. Cʉɗa. Maʉ̃ba jaraẽ́ ɓʉa boroɓada ãtebʉrʉ ãdji ne coɗi carea chũmebadada. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 7:7. Isaía 29:13.
^ 7:8. Griego beɗeaɗe ʉ̃cʉrʉ cartaɗe idjaɓa nãwã ɓʉ́ ɓʉa: “Bãrãba zocoda, sãũ siɗa quĩrãcuita sʉgʉbadaa. Bãrãba ne zocãrã maʉ̃ quĩrãca obadaa.”
^ 7:10. Exodo 20:12.
^ 7:10. Exodo 21:17.
^ 7:11-12. Mʉ̃a eroɓʉra Ãcõrẽa diaɗa. Griego beɗeaɗe ɓʉ́ ɓʉa: “Naʉ̃gʉra Corbaʉ̃a.”
^ 7:16. Griego beɗeaɗe ʉ̃cʉrʉ cartaɗe maʉ̃ versículora neẽ́a.
^ 7:24. Tiro. Griego beɗeaɗe ʉ̃cʉrʉ cartaɗe maʉ̃ awara “idjaɓa Sidoʉ̃” ɓʉ́ ɓʉa.
^ 7:26. Judioẽ́. Griego beɗeaɗe ɓʉ́ ɓʉa “griego.”
