Marco 8:1-38
8 Maʉ̃ ewariɗe wayacusa ẽberãrãra Jesuma zocãrã powuasiɗaa. Ãdjirãba coɗira neẽ́ panasiɗaa. Maʉ̃ bẽrã Jesuba idji ume nĩbabadarãra trʉ̃peɗa jarasia:
2 –Mʉ̃a naʉ̃ ẽberãrãra mĩã djuburi unu ɓʉa. Mʉ̃ ume duanʉda ewari ũbea babʉrʉa. Ãdjia coɗi carea eropananara jõsia.
3 Mʉ̃a ãdjirãra ne coɗaẽ́ diguiɗaa wãbigaibʉrʉ, ota cacua norraɓariɗia. Ʉ̃cʉrʉ wãrãda tʉmʉba ze panʉa.–
4 Idji ume nĩbabadarãba iwiɗisiɗaa:
–Nama ẽberã neẽ́ma ¿sãma jãʉ̃ ẽberãrã itea coɗira edaɗi?–
5 Maʉ̃ne Jesuba iwiɗisia:
–¿Bãrãba paʉ̃da jũmasãwã eropanʉ?–
Ãdjia panusiɗaa:
–Sietebe.–
6 Maʉ̃be Jesuba ẽberãrãra jũma egode chũmebicuasia. Maʉ̃ siete paʉ̃ra idji jʉwaɗe edapeɗa Ãcõrẽa bia ɓʉaɗa asia. Maʉ̃be paʉ̃ra cõrãcuapeɗa idji ume nĩbabadarãa diasia jeɗecaɗamãrẽã. Ara maʉ̃da jeɗecasiɗaa.
7 Idjaɓa ɓeda zaqueda zocãrãẽ́be eropanasiɗaa. Jesuba maʉ̃ carea Ãcõrẽa bia jarapeɗa ẽberãrãa jeɗecabisia.
8 Ara maʉ̃da jũmarãba coɗapeɗa jãwũãcuasiɗaa. Dji aɗubaɗa jʉrʉ pesiɗaɗe siete jamara birasiɗaa.
9 Mama ne copeɗaɗara mil quĩmãrẽ duanasiɗaca ɓʉa. Mãwãnacarea Jesuba ẽberãrãra wãbigasia.
10 Maʉ̃be idjira, idji ume nĩbabadarã siɗa jãbaɗe ɓadoɗapeɗa Dalmanuta druaɗaa wãsiɗaa.
Pariseorãba Jesua ne ununaca obi panana
Mateo 16:1-4; Luca 12:54-56
11 Maʉ̃ ewariɗe pariseorãda zeɗapeɗa Jesu ume ijara panasiɗaa. Ãdjia cawa quĩrĩã panasiɗaa idjira wãrãda bajãneba ze ɓʉ cawaya. Maʉ̃ bẽrã ãdjia Jesua iwiɗisiɗaa ne ununacada omãrẽã.
12 Ãdjia mãwã mĩã sẽ panʉ bẽrã Jesura ʉ̃yãba drasoa ʉ̃yãbapeɗa jarasia:
–Iɗibema ẽberãrãba ¿cãrẽ cãrẽã ne ununacada unu quĩrĩã panʉ? Wãrã arada mʉ̃a jaraya: mʉ̃ra Ãcõrẽneba ze ɓʉda cawaɗamãrẽã mʉ̃a ne ununacada oẽ́a.–
13 Mãwã jarapeɗa pariseorãra amesia. Jesura idji ume nĩbabadarã siɗa jãbaɗe ɓadosiɗaa wayacusa amene droma quĩrãrã chãni carea.
Pariseorã harina ẽsãbibari
Mateo 16:5-12
14 Maʉ̃ chã wãbʉdaɗe Jesu ume nĩbabadarãba cawasiɗaa paʉ̃da quĩrãdoasiɗada. Jãbaɗe paʉ̃da aɓabe eropanasiɗaa.
15 Maʉ̃ne Jesuba jarasia:
–Pariseorã harina ẽsãbibarida, Herodeɗe siɗa quĩrãcuitaɗadua.–
16 Jesu ume nĩbabadarãra ãduɓa nãwã beɗeasiɗaa:
–Idjia mãwã jarasia dadjirãba paʉ̃da enepeɗaɗaẽ́ bẽrã.–
17 Jesuba cawa ɓasia cãrẽnebemada beɗea panʉda. Maʉ̃ carea jarasia:
–¿Cãrẽ cãrẽã paʉ̃ra neẽ́ana a panʉ? ¿Mʉ̃a oɗara bãrãba unusiɗamĩna cawaɗaẽ́ aída? ¿Aɓeɗa poya cawaɗaẽ́ca? ¿Adua panʉca mʉ̃ra aída?
18 ¿Bãrãra dau bara ɓeamĩna ununacaca? ¿Cʉwʉrʉ bara ɓeamĩna ũrĩnacaca? Mʉ̃a oɗara ¿quĩrãdoasiɗaca?
19 Mʉ̃a paʉ̃ juesumaneba ẽberãrã mil juesuma ne cobigaɗacarea bãrãba dji aɗubaɗa jʉrʉ pesiɗaɗe ¿jamara jũmasãwã birasiɗa?–
Ãdjirãba panusiɗaa:
–Doce.–
20 Jesuba jarasia:
–Idjaɓa mʉ̃a siete paʉ̃ba ẽberãrã mil quĩmãrẽ ne cobigaɗacarea bãrãba dji aɗubaɗa jʉrʉ pesiɗaɗe ¿jamara jũmasãwã birasiɗa?–
Ãdjirãba panusiɗaa:
–Siete.–
21 Maʉ̃be Jesuba ãdjirãa iwiɗisia:
–¿Sãwãẽrã bãrãba waɗibiɗa cawaɗaẽ́?–
Jesuba ẽberã dauɓerrea ɓʉ biabiɗa
22 Betsaidá puruɗe jũẽsiɗaɗe ʉ̃cʉrʉba ẽberã dauɓerrea ɓʉda Jesuma enenapeɗa beɗea djuburiasiɗaa biabimãrẽã.
23 Jesuba maʉ̃ dauɓerrea ɓʉra jʉwaɗe jidapeɗa puru ãyã edesia. Maʉ̃be dji ẽberã dauɗe iɗosia. Idji jʉwara ʉ̃rʉ̃ ɓʉpeɗa iwiɗisia unubʉrʉ cawaya.
24 Maʉ̃ne ẽberãba acʉpeɗa jarasia:
–Mʉ̃a ẽberãrãda unu ɓʉa baribʉrʉ bacuru quĩrãca nĩnada unu ɓʉa.–
25 Jesuba wayacusa idji jʉwara ẽberã dau ʉ̃rʉ̃ ɓʉsia. Maʉ̃ne ẽberãba bio unu ɓesia idji daura biaɗa bẽrã. Tʉmʉ ne jũmada ẽsã unu ɓesia.
26 Jesuba idjía nãwã jarasia:
–Diguiɗaa wãbʉrʉɗe puruɗe eɗa wãrãdua. Mʉ̃a oɗara ni aɓaʉa jararãdua.–*
Pedroba Jesuɗebema jaraɗa
Mateo 16:13-20; Luca 9:18-21
27 Mãwãnacarea Jesura idji ume nĩbabadarã siɗa Cesarea-Pilipo druaɗe puru zaque ɓeaza pʉrrʉaɗe wãsiɗaa. Oɗe nĩnane Jesuba idji ume nĩbabadarãa iwiɗisia:
–Ẽberãrãba mʉ̃ra ¿caida crĩcha panʉ?–
28 Ãdjirãba panusiɗaa:
–Ʉ̃cʉrʉba jara panʉa bʉra Borocuebari Juaʉ̃da. Dewararãba jara panʉa bʉra Elíada. Dewararãba jara panʉa bʉra Ãcõrẽneba beɗeabarida.–
29 Maʉ̃ne Jesuba iwiɗisia:
–Baribʉrʉ bãrãba mʉ̃ra ¿caida crĩcha panʉ?–
Pedroba panusia:
–Bʉra Ãcõrẽba ẽdrʉ edabari diai jaraɗaa.–*
30 Jesuba ãdjirãa bio jara ɓʉsia maʉ̃gʉra ni aɓaʉa jararãnamãrẽã.
Jesuba idji beaɗiɗebema jaraɗa
Mateo 16:21-28; Luca 9:22-27
31 Mamaʉba ʉ̃taa Jesuba idji ume nĩbabadarãa jarabadjia idjira bia mĩgaida ɓʉda. Nãwã jarasia:
–Puruɗebema bororãba, sacerdote bororãba, judiorã ley jaradiabada biɗa mʉ̃, Naʉ̃ Djara Edaɗada igaraɗapeɗa beabiɗia. Baribʉrʉ mʉ̃ra ewari ũbeaɗe ʉ̃rẽbaya.–
32 Jesuba maʉ̃gʉra ebuɗa jarasia. Maʉ̃ carea Pedroba idjira jĩgabe edepeɗa quẽã ɓʉ quĩrãca mãwã beɗearãduaɗa asia.
33 Baribʉrʉ Jesuba jẽda idji ume nĩbabadarãmaa acʉbʉrʉɗe Pedrora nãwã quẽãsia:
–Satana, mʉ̃ caitabemada ãyã wãdua. Bʉa Ãcõrẽ quĩrãca crĩchaẽ́ ɓʉa. Ãtebʉrʉ ẽberã quĩrãca crĩcha ɓʉa.–
34 Jesuba idji ume nĩbabadarãra, dewararã siɗa trʉ̃peɗa jarasia:
–Aɓaʉba mʉ̃da ẽpẽ quĩrĩã ɓʉbʉrʉ, idjia o quĩrĩã ɓʉra igarapeɗa bia mĩgai carea ɓaida ɓʉa.* Maʉ̃be mʉ̃ra ẽpẽida ɓʉa.
35 Aɓaʉba naʉ̃ ẽjũãne bia ɓaida jʉrʉ ɓaibʉrʉ, jĩrũare bia ɓaẽ́a. Baribʉrʉ aɓaʉda mʉ̃ carea beuibʉrʉ wa beɗea bia mʉ̃nebema jara ɓʉ carea beuibʉrʉ, Ãcõrẽ ume ewariza zocai ɓaya.
36 Ẽberãda naʉ̃ ẽjũãne ne jũma eroɓʉɗe beuibʉrʉ, ¿idjia eroɓʉba carebaica?
37 Beu amaaba idjia eroɓʉɗebemada ¿jũmasãwã poya diai?
38 Aɓaʉba naʉ̃ ẽjũãne cadjirua o ɓea tãẽna mʉ̃ra, mʉ̃ beɗea siɗa adua ɓʉaɗa aibʉrʉ, mʉ̃, Naʉ̃ Djara Edaɗa ʉɓʉa bara zebʉrʉɗe maʉ̃ ẽberãra adua ɓʉaɗa aya. Maʉ̃ ewariɗe mʉ̃ Zeza Ãcõrẽ ʉɓʉa bara idjaɓa idji bajãnebema nezocarã ʉɓʉa bara zeya.–
Beɗea eɗaare
^ 8:26. Mʉ̃a oɗara ni aɓaʉa jararãdua. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 8:29. Ãcõrẽba ẽdrʉ edabari diai jaraɗada. Maʉ̃ra griego beɗeaɗe “Crito” ɓʉ́ ɓʉa. Critora trʉ̃ẽ́a. Jara ɓʉa “Ãcõrẽba ẽdrʉ edabari diai jaraɗada” wa “Ãcõrẽba dadjirã Boroda ɓʉɗada.” Arameo beɗeaɗe jarabadaa “Mesías.”
^ 8:34. Bia mĩgai carea ɓaida ɓʉa. Griego beɗeaɗe nãwã ɓʉ́ ɓʉa: “Idji crura atau edeida ɓʉa.”
