Marco 9:1-50
9 Idjaɓa Jesuba jarasia:
–Mʉ̃a wãrãda jaraya: ʉ̃cʉrʉ nama panʉ beuɗi naẽna ebuɗa ununia Ãcõrẽba mʉ̃, jũmarã Boro ɓʉɗara ʉɓʉa bara zebʉrʉda.–*
Jesu quĩrã awara nũmena
Mateo 17:1-13; Luca 9:28-36
2 Sei ewari baɗacarea Jesuba Pedroda, Santiagoda, Juaʉ̃ siɗa ãduɓa eya ʉ̃tʉ ɓʉmaa edesia. Mama ãdji quĩrãpita Jesura quĩrã awara nũmesia.
3 Idjia cacuaɗe jʉ̃ ɓʉra bio totroa ɓesia. Naʉ̃ ẽjũãnebemaba tãtobʉda siɗa maʉ̃ quĩrãca poya totroa oɗaẽ́a.
4 Maʉ̃ne ãdjia unusiɗaa Elíada, Moise siɗa Jesu ume beɗea panʉda.
5 Maʉ̃ carea Pedroba Jesua jarasia:
–Jaradiabari, bia ɓʉa daira nama panʉda. Daiba de zaqueda ũbea oɗia; aɓa bʉ itea, aɓa Moise itea, idjaɓa aɓa Elía itea.–
6 Pedrora mãwã beɗeasia ni cãrẽ siɗa cawaẽ́ bẽrã. Ãdjira wãrãda dauperasiɗaa.
7 Mãwã ɓʉɗe jʉ̃rãrãda ãdji ʉ̃rʉ̃ zesia. Maʉ̃ jʉ̃rãrãneba naʉ̃ beɗeada jĩgua ũrĩsiɗaa:
–Naʉ̃gʉra mʉ̃ Warraa. Idjira mʉ̃a bio quĩrĩã ɓʉa. Idjia jara ɓʉra ũrĩnadua.–
8 Wayacusa acʉbʉdaɗe waabemarãda ununaẽ́ basía. Aɓabe Jesudrʉ ãdjirã ume ɓasia.
9 Maʉ̃be eyaɗeba eɗaa zebʉdaɗe Jesuba ãdjía bio jara ɓʉsia eyaɗe unupeɗaɗara ni aɓaʉa jararãnamãrẽã aɓa Naʉ̃ Djara Edaɗa ʉ̃rẽbabʉrʉɗaa.
10 Maʉ̃gʉra ara ãdji crĩchaɗe eropanesiɗaa. Ãdjiduɓa maʉ̃ ʉ̃rẽbaiɗebemada iwiɗidruabadjiɗaa.
11 Maʉ̃be Jesua iwiɗisiɗaa:
–Mãwãra judiorã ley jaradiabadarãba ¿cãrẽ cãrẽã jarabada Elíada naãrã zeida ɓʉda?–
12 Jesuba panusia:
–Wãrãda Elíara naãrã zeida ɓʉa ne jũmada bia ɓʉi carea.* Baribʉrʉ ¿cãrẽ cãrẽã Ãcõrẽ Beɗeaɗe ɓʉ́ ɓʉ Naʉ̃ Djara Edaɗara bia mĩgaida ɓʉda idjaɓa ẽberãrãba igaraɗida?
13 Mʉ̃a bãrãa jaraya: Elíara wãrãda zesia.* Mãwãmĩna Ãcõrẽ Beɗeaɗe ɓʉ́ ɓʉ quĩrãca ẽberãrãba o quĩrĩã pananara idji ume osiɗaa.*
Jesuba warra jai bara ɓʉ biabiɗa
Mateo 17:14-21; Luca 9:37-43
14 Jesura, Pedrora, Santiagora, Juaʉ̃ siɗa waabema Jesu ume nĩbabadarã duanʉmaa zesiɗaa. Maʉ̃ne unusiɗaa zocãrã ẽberãrãda ãdjirãma powua nũmʉda. Ʉ̃cʉrʉ judiorã ley jaradiabadarãda ãdjirã ume caicaya duanasiɗaa.
15 Jesu unusiɗaɗe jũmarãba bio cawa crĩchaɗaẽ́ basía. Ara maʉ̃da idjimaa pira wãnapeɗa audiaɓarisiɗaa.
16 Jesuba ãdjirãa iwiɗisia:
–¿Cãrẽ cãrẽã caicaya duanʉ?–
17 Maʉ̃ powua nũmʉneba aɓaʉba panusia:
–Jaradiabari, mʉ̃ warrada enesia bʉa biabimãrẽã. Idjira jai bara ɓʉa. Maʉ̃ jaiba idjira quĩrãme cara eroɓʉa.
18 Jaiba jidabʉrʉɗe ɓaebibaria, yeɗaa cõpepeabibaria, quiɗa cʉrrʉabibaria, idjaɓa cacua ʉɓʉa taɓʉbaria. Mʉ̃a bʉ ume nĩbabadarãa jarasia jãʉ̃ jaira ãyã jʉretaɗamãrẽã. Mãwãmĩna poyaɗaẽ́ basía.–
19 Jesuba jarasia:
–¡Bãrãba Ãcõrẽra ĩjãnacaa! Ĩjãnamãrẽã ¿aɓa sãʉ̃be mʉ̃a droai? Warrara namaa enenadua.–
20 Ara maʉ̃da warrara Jesumaa edesiɗaa. Dji jaiba Jesu unubʉrʉɗe warrara wawabisia. Warrara egode ɓaepeɗa bʉraɓari taɓesia, idjaɓa iteɗaa cõpepea taɓesia.
21 Jesuba dji zezaa iwiɗisia:
–¿Dãrãbʉrʉca jãwã ɓʉra?–
Dji zezaba panusia:
–Caibe eɗaʉba jãwã ɓʉa.
22 Jaiba idjira bea quĩrĩã ɓʉa. Ɓarima zocãrã idjira tʉbʉɗe ɓaebibaria idjaɓa eɗauɗe doeɗa ɓaebibaria. Daira quĩrã djuburiadua. Poya carebaibʉrʉ, carebadua.–
23 Maʉ̃ne Jesuba jarasia:
–Bʉa ¿sãwã mʉ̃a poya carebaibʉrʉ a ɓʉ? Bʉa ĩjãida ɓʉa mʉ̃a poya carebaida. Mãwã ĩjãbʉrʉ itea Ãcõrẽba ne jũmada oida ɓʉa.–
24 Ara maʉ̃da dji zezaba jĩgua jarasia:
–Mʉ̃a ĩjã ɓʉa baribʉrʉ carebadua biara ĩjãi carea.–
25 Jesuba ẽberãrãda araa powuabʉrʉda ununa bẽrã dji jaira nãwã quẽãsia:
–Quĩrãme carabibari jai, cʉwʉrʉ quibibari jai, mʉ̃a bʉ́a jaraya: naʉ̃ warra cacuaɗebemada ãyã wãdua. Waa idji cacuaɗe eɗa zerãdua.–
26 Ara maʉ̃da dji jaira ɓiapeɗa wayacusa warrara biara wawabisia. Maʉ̃be idji cacuaɗebemada ẽdrʉsia baribʉrʉ warrara aɓeɗa beuɗa quĩrãca taɓesia. Maʉ̃ bẽrã dji arima duanʉba jara duanesiɗaa:
–¡Ay, jãʉ̃ warrara jaiɗaɓarisia!–
27 Baribʉrʉ Jesuba warra jʉwaɗe jidapeɗa piradrʉbisia. Maʉ̃ne warrara ʉ̃ta nũmesia.
28 Jesura diguiɗaa wãnacarea idji ume nĩbabadarãba ãduɓa iwiɗisiɗaa:
–¿Sãwãẽrã dairãba jãʉ̃ jaira poya ãyã jʉretaɗaẽ́ basi?–
29 Jesuba panusia:
–Jai naʉ̃ca ɓea ãyã jʉretaɗi carea Ãcõrẽa iwiɗiɗida panʉa idjaɓa ne coɗaca ewarida oɗida panʉa.–*
Jesuba idji beaɗiɗebema waya jaraɗa
Mateo 17:22-23; Luca 9:44-45
30 9:30-31 Mamaʉba Galilea druaɗe pʉrrʉa wãsiɗaa. Jesuba idji ume nĩbabadarãa jaradia ɓʉ bẽrã sãma panʉda ni aɓaʉa cawabi quĩrĩãẽ́ ɓasia. Maʉ̃ne ãdjirãa jarasia:
–Mʉ̃, Naʉ̃ Djara Edaɗara aɓaʉba ẽberãrãa jidabiya. Ãdjirãba mʉ̃ra beaɗia, baribʉrʉ ewari ũbeaɗe mʉ̃ra ʉ̃rẽbaya.–
32 Mãwã jaraɗara idji ume nĩbabadarãba poya cawaɗaẽ́ basía. Idjía iwiɗiɗida waya panasiɗaa.
¿Caida dji dromaara ɓʉ?
Mateo 10:42; 18:1-9; Luca 9:46-50; 17:1-2
33 Maʉ̃be Capernauʉ̃ puruɗaa jẽda zesiɗaa. Diguiɗa panenacarea Jesuba iwiɗisia:
–¿Cãrẽ cãrẽã oɗe caicaya zesiɗa?–
34 Ãdjirãra chupea panesiɗaa wãrãda caicaya zepeɗaɗa bẽrã. Ãdjirãra ijara panasiɗaa caida dji dromaara ɓai cawaya.
35 Maʉ̃be Jesura chũmepeɗa idjia edaɗa doce panʉra caitaara trʉ̃peɗa jarasia:
–Aɓaʉda dji dromaara ɓa quĩrĩã ɓʉbʉrʉ, jũmarã cãyãbara eɗaara ɓaida ɓʉa. Waabemarã nezocada ɓaida ɓʉa.–
36 Maʉ̃ carea warra zaqueda edapeɗa ãdjirã ẽsi nũmʉsia. Maʉ̃be idji jʉwaɗe bara edapeɗa jarasia:
38 Maʉ̃ne Juaʉ̃ba Jesua jarasia:
–Jaradiabari, daiba unusiɗaa ẽberãba bʉ trʉ̃neba jaida ãyã jʉrecua ɓʉda. Baribʉrʉ idjira dadjirã ume nĩẽ́ bẽrã daiba jarasiɗaa waa mãwã orãmãrẽã.–
39 Maʉ̃ne Jesuba jarasia:
–Mãwã orãnadua. Mʉ̃ trʉ̃neba ne ununaca o ɓʉba mʉ̃nebemada poya biẽ́ beɗeaẽ́a.
40 Dadjirã ume dji quĩrũẽ́ra dadjirãare ɓʉa.
41 Wãrã arada mʉ̃a jaraya: bãrãra mʉ̃re bẽrã bariduaba bãrãa baidoda dawaibʉrʉ, Ãcõrẽba wãrãda maʉ̃ ẽberãa nebiada diaya.
42 Bariduaba mʉ̃ ĩjã ɓea dji dromaẽ́ queɗeada cadjiruaɗe ɓaebibʉrʉ, Ãcõrẽba maʉ̃ ẽberãra bio cawa oya. Maʉ̃ cawa oira bio zarea ɓai bẽrã, biara ɓʉa maʉ̃ ẽberã ochiruɗe yuda jʉ̃napeɗa pusaɗe ɓatabueɗida.
43 9:43-44 Bʉ jʉwaba bʉ́a cadjiruada obibʉrʉ, maʉ̃ cadjirua o amaaba ɓʉá tutadua. Bʉa jʉwa aɓabe eroɓaimĩna ewariza Ãcõrẽ ume ɓaya. Maʉ̃da biara ɓʉa jʉwa umé eroɓʉda tʉbʉ urua quicamaa wãi cãyãbara.*
45 9:45-46 Ara maʉ̃ quĩrãca bʉ jĩrũba bʉ́a cadjiruada obibʉrʉ, maʉ̃ cadjirua o amaaba ɓʉá tutadua. Bʉa jĩrũ aɓabe eroɓaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba bʉra jĩrũ umé eroɓʉda tʉbʉ urua quicamaa ɓatabuei cãyãbara.*
47 Idjaɓa bʉ dauba bʉ́a cadjiruada obibʉrʉ, maʉ̃ cadjirua o amaaba ẽũtadua. Bʉa dau aɓabe eroɓaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba bʉra dau umé eroɓʉda tʉbʉ urua quicamaa ɓatabuei cãyãbara.
48 Mama qui beuɗacada baraa, idjaɓa dji eradrʉ nũmʉ siɗa quicaa.*
49 Dadjirãra bia mĩga panʉneba Ãcõrẽ itea bia ɓeaɗia.*
50 Tãda bia ɓʉa baribʉrʉ cʉyada jõibʉrʉ ¿sãwã wayacusa cʉya ɓei? Maʉ̃ bẽrã Ãcõrẽ itea bia ɓeaɗadua.* Idjaɓa ãbaa necai ɓeaɗadua.–
Beɗea eɗaare
^ 9:1. Ununia Ãcõrẽba mʉ̃, jũmarã Boro ɓʉɗara ʉɓʉa bara zebʉrʉda. Ebuɗa ɓʉẽ́a cãrẽda ununida. Ʉ̃cʉrʉmaarã jara ɓʉa Jesu quĩrã awara nũmeinebemada ununida. Dewararãmaarã jara ɓʉa Jesu ʉ̃rẽbaiɗebemada, idji bajãnaa wãinebemada, wa Ãcõrẽ Jaure zeiɗebemada ununida.
^ 9:12. Malaquia 3:1; 4:5-6.
^ 9:13. Mateo 11:14; 17:11-12; Luca 1:16-17.
^ 9:13. Marco 6:14-29.
^ 9:29. Idjaɓa ne coɗaca ewarida oɗida panʉa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 9:43-44. Griego beɗeaɗe ʉ̃cʉrʉ cartaɗe idjaɓa nãwã ɓʉ́ ɓʉa: “Mama qui beuɗacada baraa, idjaɓa dji eradrʉ nũmʉ siɗa quicaa.”
^ 9:45-46. Griego beɗeaɗe ʉ̃cʉrʉ cartaɗe idjaɓa nãwã ɓʉ́ ɓʉa: “Mama qui beuɗacada baraa, idjaɓa dji eradrʉ nũmʉ siɗa quicaa.”
^ 9:48. Isaía 66:24.
^ 9:49. Maʉ̃ versículora aɓeɗa ebuɗa ɓʉẽ́a. Griego beɗeaɗe ɓʉ́ ɓʉa: “Jũmarãda tʉbʉ uruaba cʉya ɓeaɗia.”
^ 9:50. Maʉ̃ bẽrã Ãcõrẽ itea ɓeaɗadua. Maʉ̃ra griego beɗeaɗe ebuɗa ɓʉẽ́a. Nãwã ɓʉ́ ɓʉa: “Tãda ara bãdjiɗe eɗa eroɓeaɗadua.”
