Mateo 1:1-25
1 Naʉ̃ cartara Jesucritoɗebemaa. Jesucritora dadji drõãenabemarã Abrahaʉ̃neba idjaɓa Daviɗeba nãwã zesia.*
2 Abrahaʉ̃ba warra Isada unusia. Maʉ̃be Isaɗeba Jacoboda yõsia. Jacoboɗeba Judada, idji djabarã siɗa yõsiɗaa.
3 Judaɗeba Paréda, Zará siɗa yõsiɗaa. Ãdji papara Tamará basía. Paréɗeba Esroʉ̃da yõsia. Esroʉ̃neba Araʉ̃da yõsia.
4 Araʉ̃neba Aminadáda yõsia. Aminadáɗeba Naasoʉ̃da yõsia. Naasoʉ̃neba Salmoʉ̃da yõsia.
5 Salmoʉ̃neba Booda yõsia. Boo papara Rahá basía. Booɗeba Obéda yõsia. Obé papara Rut basía. Obéɗeba Jeséda yõsia.
6 Maʉ̃be Jeséɗeba dadji israelerã boro Davira yõsia.
Daviɗeba Salomoʉ̃da yõsia. Salomoʉ̃ papara naẽna Uríaba eroɓasia.*
7 Maʉ̃be Salomoʉ̃neba Roboaʉ̃da yõsia. Roboaʉ̃neba Abíada yõsia. Abíaɗeba Asada yõsia.
8 Asaɗeba Josapada yõsia. Josapaɗeba Joraʉ̃da yõsia. Joraʉ̃neba Uzíada yõsia.
9 Uzíaɗeba Jotaʉ̃da yõsia. Jotaʉ̃neba Acáda yõsia. Acáɗeba Ezequiada yõsia.
10 Ezequiaɗeba Manaseda yõsia. Manaseɗeba Amoʉ̃da yõsia. Amoʉ̃neba Josíada yõsia.
11 Josíaɗeba Jeconiada, idji djabarã siɗa yõsiɗaa.* Maʉ̃ ewariɗe Babilonianebemarãba israelerãra poyaɗapeɗa ãdji druaɗaa jida edesiɗaa.*
12 Babilonia druaɗe panenacarea Jeconianeba Salatielda yõsia. Salatielɗeba Zorobabelda yõsia.
13 Zorobabelɗeba Abiuda yõsia. Abiuɗeba Eliaquiʉ̃da yõsia. Eliaquiʉ̃neba Azoda yõsia.
14 Azoɗeba Sadoda yõsia. Sadoɗeba Aquiʉ̃da yõsia. Aquiʉ̃neba Eliuda yõsia.
15 Eliuɗeba Eleazada yõsia. Eleazaɗeba Mataʉ̃da yõsia. Mataʉ̃neba Jacoboda yõsia.
16 Jacoboɗeba Joseda yõsia. Jose quimara Maria basía. Idjaɓa Mariaba Jesuda tosia. Ara maʉ̃ Jesura Ãcõrẽba diai jaraɗa ẽdrʉ edabari abadaa.
17 Mãwã Abrahaʉ̃neba aɓa Daviɗaa catorce drõãenabemarãda panasiɗaa. Davi ewariɗeba aɓa Babilonia druaɗaa jida edepeɗaɗaɗaa catorce drõãenabemarãda panasiɗaa. Idjaɓa Babilonia druaɗaa jida edepeɗaɗaɗeba aɓa Ãcõrẽba ẽdrʉ edabari diai jaraɗa zeɗaa catorce drõãenabemarãda panasiɗaa.
Jesucrito toɗa
Luca 2:1-7
18 Jesucrito toɗara nãwã ɓasia: dji papa Mariara Jose ume dji edaɗi carea beɗea bia panasiɗaa. Baribʉrʉ dji edaɗi naẽna Mariara Ãcõrẽ Jaureɗeba ɓiogoa ɓesia.
19 Dji quima Josera ẽberã jipa ɓasia. Maʉ̃ bẽrã Mariara jũmarã quĩrãpita biẽ́ jara amaaba chupea igara quĩrĩã ɓasia.
20 Mãwã crĩcha ɓʉɗe bajãnebema nezocada cãĩmocaraɗeba Josemaa zepeɗa nãwã jarasia:
–Jose, Daviɗeba zeɗa, Maria edaira wayarãdua, idjira Ãcõrẽ Jaureɗebabʉrʉ ɓiogoa ɓʉ bẽrã.
21 Mariaba warrada toya. Maʉ̃ warraba idji purura ãdji cadjiruaɗebemada ẽdrʉ edaya. Maʉ̃ bẽrã idjira trʉ̃ ɓʉdua Jesu.–
22 Jũma maʉ̃gʉra mãwãsia Ãcõrẽba naẽna jaraɗa quĩrãca. Idjiɗeba beɗeabariba nãwã jarasia:
23 Wẽrã umaquĩrã adua ɓʉda ɓiogoa ɓepeɗa warrada toya.
Ẽberãrãba dji warrara Emanuel aɗia.*
(Maʉ̃ trʉ̃ba jara ɓʉa “Ãcõrẽra dadjirã ume ɓʉda.”)
24 Maʉ̃ne Josera cãĩmocara nũmanada ʉ̃rʉ̃mapeɗa Ãcõrẽ nezoca bajãnebemaba jaraɗa quĩrãca osia. Mariara edasia.
25 Baribʉrʉ ãbaa cãĩnaca basía aɓa maʉ̃ warra iwina tobʉrʉɗaa.* Toɗacarea Joseba idjira trʉ̃ ɓʉsia Jesu.
