Mateo 10:1-42
10 Jesuba idji ume nĩbabadarã doce panʉra ãbaa trʉ̃sia. Maʉ̃be ãdjirãa ʉɓʉada diasia jaida ãyã jʉretaɗamãrẽã, idjaɓa cacua biẽ́ ɓeada, cacua pua ɓea siɗa biabiɗamãrẽã.
2 Jesuba diabueɗarã doce panʉra naʉ̃gʉrã basía: Simoʉ̃, Pedro abadada; dji djaba Andre; Zebedeo warrarã Santiago idjaɓa Juaʉ̃;
3 Pelipe; Bartolomé; Tomá; Romanebema boro itea parata jʉrʉ pebari baɗa Mateo; Alpeo warra Santiago; Tadeo;*
4 idjaɓa Simoʉ̃ Cananeo.* Idjaɓa ɓasia Juda Iscariote, Jesu jidabiɗada.
5 Maʉ̃ doce ẽberãrãra Jesuba wãbigasia. Baribʉrʉ wãni naẽna idjia jarasia:
–Judiorãẽ́maa, Samaria puru ɓeaɗe biɗa wãrãnadua.
6 Ãtebʉrʉ judiorãmaa, israelerã oveja aduá ɓea quĩrãca panʉmaa wãnadua.
7 Bãrã wãbʉdaza jaraɗadua Ãcõrẽra jũẽsida jũmarã Boro bai carea.
8 Maʉ̃ bẽrã cacua biẽ́ ɓeara biabiɗadua, beupeɗaɗara ʉ̃rẽbabiɗadua, aiɗa bara ɓeara biabiɗadua, jaira ãyã jʉretaɗadua. Mãwã oɗamãrẽã mʉ̃a bãrãa ʉɓʉada bari diabʉrʉa. Maʉ̃ bẽrã ẽberãrãra bari carebaɗadua.
9 10:9-10 Bãrãba o panʉbari Ãcõrẽba ne diaya. Maʉ̃ carea orora, parata torrora ni maãrĩ biɗa ederãnadua. Bãrã wãbʉdaɗe buchacara ederãnadua. Bãrãba jʉ̃ panʉ awa edeɗadua. Jĩrũne jʉ̃badara, bardona siɗa ederãnadua.
11 Bãrã puru waiɓʉaɗe wa puru zaqueɗe jũẽbʉdaɗe bãrã bia edai ẽberãda jʉrʉɗadua. Maʉ̃ ẽberã deɗe pananadua aɓa puruɗeba ẽdrʉbʉdaɗaa.
12 Maʉ̃ deɗe eɗa wãbʉdaɗe Ãcõrẽ trʉ̃neba dji ẽberãrãa jaraɗadua necai pananamãrẽã.
13 Maʉ̃ deɗebemarãba bãrãda bia edaɗibʉrʉ, necai panania. Baribʉrʉ bia edaɗaẽ́bʉrʉ, necai pananaẽ́a.
14 Aɓaʉba bãrãda bia edaẽ́bʉrʉ, wa bãrã beɗeada ũrĩ quĩrĩãẽ́bʉrʉ, mamaʉba ẽdrʉɗadua. Ãdji deɗeba wa puruɗeba ẽdrʉbʉdaɗe egoro pora bãrã jĩrũne ɓʉra jãrãpetaɗadua.
15 Wãrã arada mʉ̃a jaraya: Ãcõrẽba cawa oi ewariɗe Sodoma, Gomorra puru cãyãbara maʉ̃ purura wetara cawa oya.*
Jesu ĩjã ɓea mĩgaɗiɗebema
Marco 13:9-13; Luca 21:12-19
16 Mʉ̃a bãrãra ẽberã cadjirua tãẽna diabuebʉrʉa. Ãdjirãba bãrãra biẽ́ oɗia usa cadrʉaba oveja orrabari quĩrãca. Maʉ̃ carea ãdjirã tãẽna panʉne dama quĩrãca crĩcha cawaaɗeba nĩbaɗadua, baribʉrʉ puchirã quĩrãca ʉ̃mʉ̃mʉ̃rʉ̃ã ɓeaɗadua.
17 Ẽberãrã tãẽna quĩrãcuita ɓeaɗadua. Ãdjirãba bãrãra dji bororãmaa jida edeɗapeɗa dji jʉrebada deɗe u jidaɗia.
18 Mʉ̃ ĩjã panʉ carea bãrãra dji dromarã quĩrãpita, dji bororã quĩrãpita biɗa edeɗia. Maʉ̃ne bãrãba ãdjirã quĩrãpita, judiorãẽ́ quĩrãpita biɗa mʉ̃nebemada beɗeaɗia.
19 Bãrã jida edebʉdaɗe sopuarãnadua sãwã beɗeaɗida. Dji bororã quĩrãpita panʉne Ãcõrẽba cawabiya cãrẽda jaraɗida panʉda.
20 Maʉ̃ beɗeabʉdaɗe bãrã crĩchaɗeba beɗeaɗaẽ́a, ãtebʉrʉ bãrã Zeza Jaureda bãrãneba beɗeaya.
21 Aɓaʉba ara idji djabada beabiya mʉ̃ ĩjã ɓʉ carea. Dewaraba idji warrada beabiya idjaɓa warrarãda ãdji djibarirã ume biẽ́ panenapeɗa beabiɗia.
22 Jũmarãba bãrãra quĩrãmania mʉ̃ ĩjã panʉ carea. Baribʉrʉ bãrãba maʉ̃ ewari zareaɗe mʉ̃ ĩjã panʉda idu ɓʉɗaẽ́bʉrʉ, Ãcõrẽba ẽdrʉ edaya.
23 Puru aɓaʉɗe ẽberãrãba bãrãda biẽ́ oɗi carea ẽpẽnibʉrʉ, dewara puruɗaa mĩrũ wãnadua. Wãrãda mʉ̃a jaraya: bãrã Israelɗebema puru ɓeaza jũma pʉrrʉaɗi naẽna mʉ̃, Naʉ̃ Djara Edaɗara zeya.
24 10:24-25 Ne cawa quĩrĩã ɓʉra dji jaradiabari cãyãbara ne cawaara ɓʉẽ́a. Baribʉrʉ dji jaradiabari quĩrãca ɓaibʉrʉ, bia ɓʉa. Nezoca siɗa idji boro cãyãbara auɗuara ɓʉẽ́a. Baribʉrʉ idji boro quĩrãca ɓaibʉrʉ, bia ɓʉa. Mʉ̃ra jairã boro Beelzebú a panʉbʉrʉ, bãrãra ara maʉ̃ quĩrãca jaraɗia.*
26 Ẽberãrãda wayarãnadua. Ne jũma ebuɗa ɓʉẽ́ra mẽrã ɓeẽ́a. Dadjia cawaɗaẽ́ panʉra Ãcõrẽba ebuɗa cawabiya.
27 Mʉ̃a bãrãa pãĩmane jara ɓʉra ʉ̃naane jaraɗadua. Mʉ̃a bãrã cʉwʉrʉ caita jaraɗara de ʉ̃rʉ̃ba jĩgua jaraɗadua.
28 Ẽberãrãda wayarãnadua. Ãdjia naʉ̃ cacuada poya beaɗia baribʉrʉ dadji jaureda poya beaɗaẽ́a. Ãtebʉrʉ naʉ̃ cacua, dadji jaure tʉbʉ uruaɗe babueida ɓʉdrʉ wayaɗadua.
29 Ĩbana zaqueda umé nẽdoɗi carea parata pichida aɓa diabadaa. Baribʉrʉ bãrã Zeza bajãne ɓʉba iduaribiẽ́bʉrʉ, ni aɓaʉ ĩbanada beuẽ́a.
30 Maʉ̃ awara Ãcõrẽba cawa ɓʉa bãrãba buɗara jũmasãwã eropanʉda.
31 Ãcõrẽba bãrãra ĩbana zocãrã panʉ cãyãbara biara waga ɓʉ bẽrã ne wayaɗiẽ́ panʉa.
Jesu carea quĩrã peraiẽ́ ɓʉ
Luca 12:8-9
32 Aɓaʉba ẽberãrã quĩrãpita mʉ̃da ĩjã ɓʉaɗa aibʉrʉ, mʉ̃ Zeza bajãne ɓʉ quĩrãpita mʉ̃a idjira mʉ̃reana aya.
33 Ara maʉ̃ quĩrãca aɓaʉba ẽberãrã quĩrãpita mʉ̃da adua ɓʉaɗa aibʉrʉ, mʉ̃a biɗa mʉ̃ Zeza bajãne ɓʉ quĩrãpita idjira adua ɓʉaɗa aya.
¿Caida biara quĩrĩãnida panʉ?
Luca 12:51-53; 14:26-27
34 Crĩcharãnadua mʉ̃ra naʉ̃ ẽjũãnaa zesida ẽberãrã ãbaa necai ɓʉi carea. Mʉ̃ra maʉ̃ carea zeẽ́ ɓʉa, ãtebʉrʉ ze ɓʉa ẽberãrãda ãbaa bia panarãnamãrẽã.
35 Mʉ̃ra zesia warrada dji zeza ume biẽ́ ɓʉi carea, cauda dji papa ume biẽ́ ɓʉi carea, idjaɓa ãĩguda dji pãcõrẽ ume biẽ́ ɓʉi carea.
36 Bãrãba mʉ̃ ĩjã panʉ carea ara bãdji diguiɗa dji quĩrũda ɓeaɗia.*
37 Aɓaʉba dji zezada wa dji papada mʉ̃ cãyãbara biara quĩrĩã ɓʉbʉrʉ, maʉ̃gʉra mʉ̃ ume poya nĩbaẽ́a. Aɓaʉba dji warrada wa dji cauda mʉ̃ cãyãbara biara quĩrĩã ɓʉbʉrʉ, maʉ̃gʉra mʉ̃ ume poya nĩbaẽ́a.
38 Bia mĩgai carea ɓʉẽ́bʉrʉ, poya mʉ̃ ume nĩbaẽ́a.
39 Aɓaʉda naʉ̃ ẽjũãne bia ɓeibʉrʉ, jĩrũare bia ɓaẽ́a. Baribʉrʉ aɓaʉda mʉ̃ carea beuibʉrʉ Ãcõrẽ ume ewariza zocai ɓaya.
Ãcõrẽneba nebia edaɗiɗebema
Marco 9:41
40 Bãrã bia edabʉrʉba mʉ̃da bia edabʉrʉa. Mʉ̃ bia edabʉrʉba mʉ̃ Diabueɗada bia edabʉrʉa.
41 Aɓaʉba Ãcõrẽneba beɗeabarida cawapeɗa bia edaibʉrʉ, Ãcõrẽba idjiɗeba beɗeabaría nebia diabari quĩrãca maʉ̃ ẽberãa diaya. Ẽberã jipa ɓʉda aɓaʉba cawapeɗa bia edaibʉrʉ, Ãcõrẽba ẽberã jipa ɓʉ́a nebia diabari quĩrãca maʉ̃ ẽberãa diaya.
42 Mʉ̃a jaraya: aɓaʉba mʉ̃ ume nĩbabadarã dji eɗaara ɓearã siɗa cawapeɗa baido cũrãsada diaibʉrʉ, Ãcõrẽba wãrãda maʉ̃ ẽberãa nebiada diaya.–
Beɗea eɗaare
^ 10:3. Tadeo. Griego beɗeaɗe ʉ̃cʉrʉ cartaɗe maʉ̃ trʉ̃ cãyãbara ɓʉ́ ɓʉa “Lebeo, Tadeo abada.” Maʉ̃ Tadeora Santiago warra Judaca ɓʉa.
^ 10:4. Simoʉ̃ Cananeo. Luca 6:15ɗe “Simoʉ̃ Zelote” ɓʉ́ ɓʉa.
^ 10:15. Sodoma, Gomorra puru. Genesi 19:1-29.
^ 10:24-25. Griego beɗeaɗe nãwã ɓʉ́ ɓʉa: “De djibarida jairã boro Beelzebú a panʉbʉrʉ, idji ẽberãrãra ara maʉ̃ quĩrãca jaraɗia.”
^ 10:36. Miquea 7:6.
