Mateo 12:1-50
12 Ʉ̃nãũbada ewariɗe Jesura ẽjũã trigo uɗaɗe nĩbasia. Maʉ̃ne idji ume nĩbabadarã jarra panʉ bẽrã trigora tʉ edaɗapeɗa co nĩbasiɗaa.
2 Ãdjia mãwã o panʉra ʉ̃cʉrʉ pariseorãba ununapeɗa Jesua jarasiɗaa:
–Bʉ ume nĩbabadarãba ʉ̃nãũbada ewariɗe ocara panʉda jãwã o panʉa.–*
3 12:3-4 Maʉ̃ne Jesuba ãdjía jarasia:
–¿Bãrãba Ãcõrẽ Beɗeara acʉɗacaca? Davi, idji ume nĩbabadarã siɗa jarra panasiɗaɗe ¿sãwã osiɗa?* Davira Ãcõrẽ deɗe eɗa wãpeɗa Ãcõrẽ quĩrãpita ɓaɗa paʉ̃da edasia.* Maʉ̃ paʉ̃ra ¿aɓabe sacerdoterãba coɗida panasiɗaẽ́ca? Baribʉrʉ Daviba copeɗa idji ume nĩbabadarãa diasia.
4 –
5 Maʉ̃ awara Ãcõrẽba Moisea diaɗa leyɗe jara ɓʉa sacerdoterãra ʉ̃nãũbada ewariɗe Ãcõrẽ de dromane ne oɗida panʉda.* Mãwãmĩna ʉ̃nãũbada ewariɗebema ley igara panʉ carea beɗeaɗe panʉẽ́a. ¿Bãrãba maʉ̃gʉ siɗa acʉɗacaca?
6 Mʉ̃a jaraya: Ãcõrẽ de droma cãyãbara dji dromaara ɓʉda nama ɓʉa.
7 Ãcõrẽ Beɗeaɗe nãwã jara ɓʉa: “Animarã babue diaɗi cãyãbara mʉ̃a biara quĩrĩã ɓʉa bãrãba djãrã quĩrã djuburia pananida.”* Maʉ̃ beɗeaba jara ɓʉda bãrãba cawa pananabara, za beɗea neẽ́ ɓeada biẽ́ jaraɗaẽ́ bacasia.
8 Mʉ̃, Naʉ̃ Djara Edaɗara ʉ̃nãũbada ewari djibaria.–
Jesuba ʉ̃nãũbada ewariɗe ẽberã biabiɗa
Marco 3:1-6; Luca 6:6-11
9 Jesura mamaʉba judiorã dji jʉrebada deɗaa wãsia.
10 Mama ẽberã jʉwa beu ɓʉda ɓasia. Maʉ̃ne ʉ̃cʉrʉba Jesura biẽ́ jara quĩrĩã panasiɗaa ʉ̃nãũbada ewari ley igara ɓʉ carea. Maʉ̃ bẽrã idjía iwiɗisiɗaa:
–¿Bia ɓʉca cacua biẽ́ ɓʉda ʉ̃nãũbada ewariɗe biabida?–
11 Jesuba panusia:
–Bãrã ovejada ʉ̃nãũbada ewariɗe uriaɗe ɓaesira ¿jʉwaba ẽdrʉ edaẽ́ca? ¿Caiba mãwã oẽ́?
12 ¿Ẽberãda oveja cãyãbara biara ɓʉẽ́ca? Maʉ̃ bẽrã bia ɓʉa ʉ̃nãũbada ewariɗe bia oida.–
13 Maʉ̃be dji jʉwa beu ɓʉ́a jarasia:
–Jʉwara jiradua.–
Mãwã jirabʉrʉɗe idji jʉwara aɓeɗa biasia dewarabema jʉwa quĩrãca.
14 Ara maʉ̃da pariseorãra ẽdrʉɗapeɗa wãsiɗaa. Maʉ̃be Jesu beaɗi carea crĩcha jʉrʉsiɗaa.
Ãcõrẽba nezoca edaɗa
15 Jesuba maʉ̃nebema cawasiɗe ãyã wãsia. Zocãrã ẽberãrãda idji caiɗu wãsiɗaa. Maʉ̃ne Jesuba dji cacua biẽ́ ɓeara jũma biabicuasia.
16 Idjia ãdjirãa bio jara ɓʉsia idjiɗebemada ebuɗa jararãnamãrẽã.
17 Maʉ̃gʉra mãwãsia Ãcõrẽneba beɗeabari Isaíaba jaraɗa quĩrãca.
18 Nãwã jarasia:
Naʉ̃gʉra mʉ̃a edaɗa nezocaa. Mʉ̃a idjira quĩrĩã ɓʉa. Idji carea mʉ̃ra wãrãda bio ɓʉsriɗa ɓʉa.
Mʉ̃ Jaurera idjía diaya. Idjia puru ɓeaza mʉ̃a jipa oiɗebemada jaraya.
19 Idjira ijaraẽ́a idjaɓa quĩrũbiɗeba ɓiaẽ́a. Maʉ̃ bẽrã ni aɓaʉba idji beɗeabʉrʉda puruɗe ũrĩnaẽ́a.
20 Cha cõrãicha quirura idjia cõrãtaẽ́a. Ĩbĩrã maãrĩ urua quirura idjia quiaẽ́a.
Ara maʉ̃ quĩrãca dji ʉɓʉaẽ́ ɓeara jipa o ɓaya aɓa ne jũmane poyabʉrʉɗaa.
21 Maʉ̃ne puru ɓeaza idjira jʉ̃ãnia ẽdrʉ edamãrẽã.*
Jesu biẽ́ jarapeɗaɗa
Marco 3:20-30; Luca 11:14-23; 12:10; 6:43-45
22 Maʉ̃be ʉ̃cʉrʉba jai bara ɓʉ ẽberãda Jesumaa edesiɗaa. Maʉ̃ ẽberãra dauɓerrea ɓasia idjaɓa quĩrãme cara ɓasia. Jesuba idjira biabisia beɗeamãrẽã idjaɓa unu ɓemãrẽã.
23 Jũmarãba cawa crĩchaɗaẽ́ bẽrã iwiɗisiɗaa:
–Daviɗeba zeida ɓʉra ¿naʉ̃gʉ Jesuca?–
24 Baribʉrʉ ãdjirãba mãwã jara panʉra pariseorãba ũrĩsiɗaa. Maʉ̃gʉrãba jarasiɗaa:
–Jãʉ̃ ẽberãba jaira ãyã jʉretabaria, jairã boro Beelzebúba maʉ̃ ʉɓʉada diaɗa bẽrã.–
25 Baribʉrʉ ãdjia crĩcha panʉra Jesuba cawaɗa bẽrã jarasia:
–Aɓari druaɗebemarãda ara ãdjiduɓa djõ pananibʉrʉ, ãduɓa dji quininia. Aɓari puruɗe wa aɓari deɗe dji ẽberãrãda ara ãdjiduɓa djõ pananibʉrʉ, dãrã pananaẽ́a.
26 Ara maʉ̃ quĩrãca Satanaba ara idji jaida ãyã jʉretaibʉrʉ, ara idji ume djõ ɓʉa. ¿Sãwã idjia poya ɓʉra dãrã eroɓai?
27 Bãrãmaarã mʉ̃a Beelzebúɗeba jairãda ãyã jʉreta ɓʉa. Mãwãra bãrã ẽpẽ ɓeaba ¿caiɗeba jaira ãyã jʉretabada? Ãdjirãba cawabiɗia bãrãba ãĩ crĩcha panʉda.
28 Baribʉrʉ mʉ̃a Ãcõrẽ Jaureɗeba jairãda ãyã jʉreta ɓʉbʉrʉ, Ãcõrẽba unubi ɓʉa idjira jũẽsida bãrã Boro bai carea.
29 Ẽberã mẽsrã ɓʉra naãrã jʉ̃ chũmʉnaẽ́bʉrʉ, ¿sãwã idji deɗe eɗa ne drʉaɗe wãni? Aɓa mãwã jʉ̃ chũmʉsiɗara poya idji nebiada drʉaɗida panʉa.*
30 Aɓaʉda mʉ̃are ɓʉẽ́bʉrʉ mʉ̃ ume dji quĩrũa. Aɓaʉba mʉ̃ ume ẽberãrãda Ãcõrẽmaa eneẽ́bʉrʉ ãyã jʉrecuabaria.
31 Maʉ̃ carea mʉ̃a bãrãa jaraya: ẽberãrãba cadjirua obadara, biẽ́ beɗeabada siɗa Ãcõrẽba jũma quĩrãdoaya. Baribʉrʉ aɓaʉba Ãcõrẽ Jaureba oɗada diauruba jãwã osiaɗa aibʉrʉ, Ãcõrẽba maʉ̃ra quĩrãdoaẽ́a.
32 Aɓaʉba mʉ̃, Naʉ̃ Djara Edaɗada biẽ́ jaraibʉrʉ Ãcõrẽba maʉ̃ra quĩrãdoaya. Baribʉrʉ aɓaʉba Ãcõrẽ Jaureda biẽ́ jaraibʉrʉ, Ãcõrẽba maʉ̃ra quĩrãdoaẽ́a. Naʉ̃ ewariɗe, ewari ze nũmʉza quĩrãdoaẽ́ ɓaya.
33 Nejõ biada zauibʉrʉ cawa panʉa bacuru biada. Baribʉrʉ dji biaẽ́da zauibʉrʉ cawa panʉa bacuru cadjiruada. Nejõza idji zau ɓʉɗeba cawa panʉa.
34 ¡Dama ẽberãrã! ¿Bãrã dji cadjiruarãba sãwã ne biada beɗeaɗi? Ẽberãba idji soɗe crĩcha ɓʉ quĩrãca beɗeabaria.
35 Ẽberã biaba idji soɗe ne bia eroɓʉɗeba ne biada jarabaria. Baribʉrʉ ẽberã cadjiruaba idji soɗe ne cadjirua eroɓʉɗeba ne cadjiruada jarabaria.
36 12:36-37 Bʉa ne biada jaraibʉrʉ Ãcõrẽba bʉra bia ɓʉya. Baribʉrʉ ne biaẽ́da jaraibʉrʉ cawa oya. Mʉ̃a bãrãa jaraya: Ãcõrẽba cawa oi ewariɗe jũmarãba idjía jaraɗida panʉa cãrẽ cãrẽã ãdji beɗeaɗeba djãrã crĩcha ãrĩsiɗada.
38 Mãwãnacarea ʉ̃cʉrʉ judiorã ley jaradiabadaba, pariseorã biɗa Jesua jarasiɗaa:
–Jaradiabari, dairãba quĩrĩã panʉa bʉa ne ununacada oida. Mãwãra cawaɗia bʉra bajãneba ze ɓʉda.–
39 Baribʉrʉ Jesuba jarasia:
–Bãrã dji cadjiruarãba Ãcõrẽra ĩjã ama panʉa. Bãrãba mʉ̃ra bajãneba ze ɓʉda cawaɗi carea quĩrĩã panʉa mʉ̃a ne ununacada oida. Baribʉrʉ mʉ̃a ne ununacada oẽ́a. Bãrãba aɓabe Ãcõrẽneba beɗeabari Joná mãwãna quĩrãca ununia.
40 Jonára ɓeda droma ɓiteɗa ewari ũbea ãsa, diamasi biɗa ɓaɗa quĩrãca mʉ̃, Naʉ̃ Djara Edaɗara ewari ũbea ãsa, diamasi biɗa egoroɗe ɓaya.*
41 Maʉ̃ awara Ãcõrẽba jũmarã cawa oi ewariɗe Ninive puruɗebemarãda piradrʉɗapeɗa bãrãra biẽ́ jaraɗia. Jonába Ãcõrẽba cawa oyaɗa asiɗe ãdjia cadjirua obadara igarasiɗaa.* Baribʉrʉ Joná cãyãbara dji dromaara ɓʉda nama ɓʉmĩna bãrãba ĩjãnaẽ́ panʉa.
42 Maʉ̃ awara Salomoʉ̃ ewariɗe Sabá druaɗebema borora wẽrã basía. Idjira drua tʉmʉba zesia Salomoʉ̃ necawaa ũrĩ carea.* Baribʉrʉ naʉ̃ ewariɗe Salomoʉ̃ cãyãbara dji dromaara ɓʉda nama ɓʉmĩna bãrãba ĩjãnaẽ́ panʉa. Maʉ̃ carea Ãcõrẽba cawa oi ewariɗe maʉ̃ wẽrãba piraɓaripeɗa bãrãra biẽ́ jaraya.–
Jai jẽda zeɗa
Luca 11:24-26
43 Ẽberã cacuaɗebemada ẽdrʉɗacarea jaira ẽjũã põãsa ewaraga ɓʉɗe ʉ̃nãũi carea jʉrʉ ɓabaria baribʉrʉ sãma ʉ̃nãũida unucaa.*
44 Maʉ̃ bẽrã idjiduɓa nãwã jarabaria: “Mʉ̃dji ɓaɗamaa jẽda wãya.” Jũẽbʉrʉɗe maʉ̃ ẽberã sora de bari ɓʉ quĩrãca unubaria. Bia ima nũmʉda idjaɓa ne jũma bia nũmeada unubaria.
45 Maʉ̃be siete jai idji cãyãbara cadjiruaara ɓeada maʉ̃ ẽberãmaa enepeɗa dji ẽberã soɗe eɗa panebadaa. Maʉ̃ bẽrã dji ẽberãra idji naãrã ɓaɗa cãyãbara wetara biẽ́ ɓebaria. Ara maʉ̃ quĩrãca mʉ̃ ĩjãẽ́ panʉ carea bãrã, dji cadjiruarãda naẽna panana cãyãbara biẽ́ara panania.–
Jesu ẽberãrã idjimaa zepeɗaɗa
Marco 3:31-35; Luca 8:19-21
46 Jesuba waɗibiɗa ẽberãrãa beɗea ɓʉɗe dji papa, dji djabarã siɗa dajada panʉda idji ume beɗea quĩrĩã panasiɗaa.
47 Aɓaʉba Jesua jarasia:
–Bʉ papada, bʉ djabarã siɗa dajadaare panʉa. Ãdjira bʉ ume beɗea quĩrĩã panʉa.–
48 Baribʉrʉ Jesuba maʉ̃ ẽberãa jarasia:
–Bʉmaarã ¿cairãda mʉ̃ papa idjaɓa mʉ̃ djabarã?
49 Maʉ̃be idji ume nĩbabadarãmaa jʉwa supeɗa jarasia:
–Naʉ̃gʉrãda mʉ̃ papaa idjaɓa mʉ̃ djabarãa.
50 Mʉ̃ Zeza bajãne ɓʉba quĩrĩã ɓʉ o ɓeadrʉ mʉ̃ djabaa, mʉ̃ djabawẽrãa, idjaɓa mʉ̃ papaa.–
Beɗea eɗaare
^ 12:2. Exodo 34:21; Deuteronomio 23:25.
^ 12:3-4. 1 Samuel 21:1-6.
^ 12:3-4. Exodo 35:12-13; Levitico 24:5-9.
^ 12:5. Numero 28:9-10; Ezequiel 46:4-5.
^ 12:7. Osea 6:6.
^ 12:21. Isaía 42:1-4.
^ 12:29. Maʉ̃ versículoɗe Jesuba jara ɓʉa ẽberã mẽsrã ɓʉ jʉ̃ chũmʉ quĩrãca idjia diaurura poyabaria jaira jʉretacuai carea.
^ 12:40. Joná 1:17.
^ 12:41. Joná 3:5-10.
^ 12:42. 1 Reye 10:1-13.
^ 12:43. Israelerãba jarabadjiɗaa jairãra ẽjũã põãsa ewaraga ɓʉɗe ɓeabadada. Isaía 34:14.
