Mateo 15:1-39
15 Mãwãnacarea ʉ̃cʉrʉ pariseorãda, judiorã ley jaradiabada siɗa Jerusaleʉ̃ puruɗeba Jesumaa zeɗapeɗa iwiɗisiɗaa:
2 –Bʉ ume nĩbabadarãra jʉwa sʉgʉɗaẽ́ ne cobadaa. ¿Cãrẽ cãrẽã dadji drõãenabemaba jaradiapeɗaɗara igara panʉ?–*
3 Maʉ̃ne Jesuba panusia:
–Bãrã biɗa ¿cãrẽ cãrẽã ara bãdjia obadaɗeba Ãcõrẽba obi ɓʉ beɗeara igarabada?
4 Idjia nãwã jarasia: “Bʉ zezada, bʉ papa siɗa waya pananadua.”* Naʉ̃ siɗa jarasia: “Bariduaba idji zezada, idji papa siɗa biẽ́ jaraibʉrʉ, idjira beaɗida panʉa.”*
5 15:5-6 Baribʉrʉ bãrãba dji zeza wa dji papa careba amaaba nãwã jarabadaa: “Jũma mʉ̃a eroɓʉra Ãcõrẽa diaɗa bẽrã mʉ̃a bʉra poya carebaẽ́a.” Mãwã bãrã drõã naẽnabemaba jaradiapeɗaɗa ẽpẽ panʉneba Ãcõrẽ beɗeara igarabadaa.
6 –
7 Bãrã dji biaca ɓearã, Ãcõrẽneba beɗeabari Isaíaba bãrãnebemada ariɗe ɓʉsia. Nãwã jarasia:
8 Naʉ̃ puruba mʉ̃́a bia beɗeabaria, baribʉrʉ wãrãda ãdji soɗeba mʉ̃ma crĩchaɗacaa.
9 Ãdji quĩrĩãbe mʉ̃́a bia beɗeabadaa. Mʉ̃ beɗea cãyãbara ẽberã crĩchadrʉ jaradiabadaa.*
10 Maʉ̃be Jesuba ẽberãrã arima duanʉra trʉ̃peɗa nãwã jarasia:
–Mʉ̃ beɗeara ũrĩnadua cawaɗamãrẽã.
11 Dadjia cobadaba Ãcõrẽ quĩrãpita mititia ɓʉcaa. Ãtebʉrʉ iteɗeba ze ɓʉbʉrʉ dadjira Ãcõrẽ quĩrãpita mititia ɓʉbaria.–
12 Mãwãnacarea Jesu ume nĩbabadarãra caita zeɗapeɗa jarasiɗaa:
–¿Bʉa cawa ɓʉca pariseorãra soɗe biẽ́ duanʉda bʉa jãʉ̃ beɗea jaraɗa carea?–
13 Jesuba panusia:
–Mʉ̃ Zeza bajãne ɓʉba uɗaẽ́ra jũma ẽũta ɓatacuaya.
14 Maʉ̃ bẽrã pariseorã carea crĩcharãnadua. Ãdjirãra dauɓerrea ɓea quĩrãca panʉa. Ãdji ẽpẽbʉda siɗa dauɓerrea ɓea quĩrãca panʉa. Dauɓerrea ɓʉba dewara dauɓerrea ɓʉda eronĩbaibʉrʉ umena uriaɗe ɓaeɗia.–
15 Maʉ̃ne Pedroba Jesua jarasia:
–Dadjia cobadaɗebema bʉa jaradiaɗada dairãa cawa jaradua.–
16 Jesuba iwiɗisia:
–¿Bãrã biɗa waɗi adua panʉca?
17 ¿Dadjia cobadara ɓiteɗa wãpeɗa dajadaa ẽdrʉbarida cawaɗaẽ́ panʉca?
18 Baribʉrʉ ẽberã iteɗeba dajadaa ze ɓʉda soɗeba ze ɓʉa. Maʉ̃gʉba ẽberãra Ãcõrẽ quĩrãpita mititia ɓʉbaria.
19 Crĩcha cadjiruada, mĩã beaida, daunemaida, auɗua ɓaida, ne drʉaida, sewa o ɓaida, djãrã biẽ́ jarai siɗa soɗeba ze ɓʉa.
20 Jũma maʉ̃gʉba ẽberãra Ãcõrẽ quĩrãpita mititia ɓʉbaria, baribʉrʉ jʉwa sʉgʉẽ́ ne cobʉrʉba dadjira mititia ɓʉcaa.–
Jesuba cananeo wẽrãcau biabiɗa
Marco 7:24-30
21 Jesura mamaʉba Tiro druaɗe idjaɓa Sidoʉ̃ druaɗe pʉrrʉa wãsia.
22 Maʉ̃ne cananeo wẽrã maʉ̃ druaɗebemada Jesu nĩmaa zesia. Maʉ̃ wẽrãba nãwã jĩgua beɗea nũmesia:
–¡Mʉ̃ Boro, Daviɗeba zeɗa, mʉ̃ra quĩrã djuburiadua! Mʉ̃ cauda jaiba bio bia mĩga eroɓʉa.–
23 Baribʉrʉ Jesuba panuẽ́ basía. Maʉ̃ne idji ume nĩbabadarãra caita wãnapeɗa idjía nãwã beɗea djuburiasiɗaa:
–Jãʉ̃ wẽrãra dadjirã caiɗu ɓia nĩa. Idjía jaradua ãyã wãmãrẽã.–
24 Wẽrãra cananeo bẽrã Jesuba idjía jarasia:
–Ãcõrẽba mʉ̃ra Israelɗebema dji adua ɓeamaa diabuesia.–
25 Maʉ̃ne wẽrãra Jesu quĩrãpita chĩrãboroɗe coɓepeɗa jarasia:
–Mʉ̃ Boro, ¡carebadua!–
26 Jesuba panusia:
–Biẽ́ ɓʉa warrarãba co panʉda jãrĩda usaa diai carea.–
27 Maʉ̃ne wẽrãba jarasia:
–Bʉa jara ɓʉra wãrãa, mʉ̃ Boro, baribʉrʉ usaba djibari mesa edre djico jurruzoaɗada cobaria.–
28 Jesuba jarasia:
–Wẽrã, bʉa wãrãda ĩjã ɓʉa mʉ̃a bʉ cauda poya biabida. Maʉ̃ bẽrã bʉa quĩrĩã ɓʉ quĩrãca mʉ̃a oya.–
Ara maʉ̃da dji caura biasia.
Jesuba cuatro mil ẽberãrã ne cobiɗa
Marco 8:1-10
29 Mamaʉba Jesura amene droma Galileaɗaa wãsia. Eyaɗe ʉ̃tʉ wãpeɗa mama chũmesia.
30 Maʉ̃be ẽberãrã zocãrã idji ɓʉmaa zesesiɗaa. Ãdjirãba jĩrũ biẽ́ ɓeada, dauɓerrea ɓeada, quĩrãme cara ɓeada, jʉwa biẽ́ ɓeada, quĩrãtanoa cacua biẽ́ ɓea siɗa zocãrã enesiɗaa. Maʉ̃gʉrãra Jesu caita ɓʉsiɗaa. Maʉ̃be Jesuba jũma biabicuasia.
31 Ẽberã arima duanʉba unusiɗaa dji quĩrãme cara ɓeaɗara beɗea panʉda, dji jʉwa biẽ́ ɓeaɗara bia panʉda, jĩrũ biẽ́ ɓeaɗara bia nĩnada, idjaɓa dauɓerrea ɓeaɗaba unu panʉda. Jũmarãba cawa crĩchaɗaẽ́ bẽrã israelerã Ãcõrẽa bia beɗeasiɗaa.
32 Mãwã panʉne Jesuba idji ume nĩbabadarãra trʉ̃peɗa jarasia:
–Mʉ̃a naʉ̃ ẽberãrãra mĩã djuburi unu ɓʉa. Mʉ̃ ume duanʉda ewari ũbea babʉrʉa. Ãdjia coɗi carea eropananara jõsia. Mʉ̃a ãdjirãra ne coɗaẽ́ diguiɗaa wãbigaẽ́a ota cacua norraɓarirãnamãrẽã.–
33 Baribʉrʉ idji ume nĩbabadarãba iwiɗisiɗaa:
–Nama ẽberãrã neẽ́ma ¿sãma coɗira edaɗi zocãrã nũmʉ itea?–
34 Maʉ̃ne Jesuba iwiɗisia:
–¿Bãrãba paʉ̃da jũmasãwã eropanʉ?–
Ãdjia panusiɗaa:
–Sietebe eropanʉa, idjaɓa ɓeda zaqueda zocãrãẽ́be eropanʉa.–
35 Maʉ̃be Jesuba ẽberãrãra jũma egode chũmebisia.
36 Maʉ̃ siete paʉ̃ra, ɓeda siɗa idji jʉwaɗe edapeɗa Ãcõrẽa bia ɓʉaɗa asia. Mãwãpeɗa ɓedara paʉ̃ siɗa cõrãcuapeɗa idji ume nĩbabadarãa diasia jeɗecaɗamãrẽã. Ara maʉ̃da jeɗecasiɗaa.
37 Jũmarãba coɗapeɗa jãwũãcuasiɗaa. Dji aɗubaɗa jʉrʉ pesiɗaɗe siete jamara birasiɗaa.
38 Mama ne copeɗaɗara dji umaquĩrã awa mil quĩmãrẽ panasiɗaca ɓʉa, wẽrãrãda warrarã siɗa juachaɗaẽ́.
39 Maʉ̃be ẽberãrã wãbigapeɗa Jesura jãbaɗe ɓadopeɗa Magadaʉ̃ druaɗaa wãsia.*
Beɗea eɗaare
^ 15:2. Levitico 22:4-8ɗe jara ɓʉa sacerdoterãra cuiɗida panʉnebemada, baribʉrʉ Jesu ewariɗe pariseorãba jaradiabadjiɗaa jũmarãba jʉwa sʉgʉɗida panʉda drõãenabemarãba jarapeɗaɗa quĩrãca.
^ 15:4. Exodo 20:12.
^ 15:4. Exodo 21:17.
^ 15:9. Isaía 29:13.
^ 15:39. Magadaʉ̃. Griego beɗeaɗe ʉ̃cʉrʉ cartaɗe “Magdala” ɓʉ́ ɓʉa.
