Mateo 17:1-27
17 Sei ewari baɗacarea Jesuba Pedroda, Santiagoda, dji djaba Juaʉ̃ siɗa ãduɓa eya ʉ̃tʉ ɓʉmaa edesia.
2 Mama ãdji quĩrãpita Jesura quĩrã awara nũmesia. Idji quĩrãra ʉ̃mãdau quĩrãca dorrodorroa nũmesia. Idjia jʉ̃ ɓʉ siɗa ʉ̃naa quĩrãca totroa nũmesia.
3 Cawaẽ́ne ãdjia unusiɗaa Moiseda Elía siɗa Jesu ume beɗea panʉda.
4 Maʉ̃ carea Pedroba Jesua jarasia:
–Dai Boro, bia ɓʉa daira nama panʉda. Bʉa quĩrĩã ɓʉbʉrʉ daiba de zaqueda ũbea oɗia, aɓa bʉ itea, aɓa Moise itea, idjaɓa aɓa Elía itea.–
5 Pedro mãwã beɗea ɓʉɗe jʉ̃rãrã eradrʉ ɓʉda ãdji ʉ̃rʉ̃ zesia. Maʉ̃ jʉ̃rãrãba ãdji ãnã edasiɗe naʉ̃ beɗeada jĩgua ũrĩsiɗaa:
–Naʉ̃gʉra mʉ̃ Warra bio quĩrĩã ɓʉ́a. Mʉ̃ra idji carea ɓʉsriɗa ɓʉa. Idjia jara ɓʉra ũrĩnadua.–*
6 Maʉ̃ ũrĩsiɗaɗe ne wayaaba egode ɓarruɓari tapanesiɗaa.
7 Mãwã ɓʉɗe Jesura zepeɗa ãdjira tãsia. Maʉ̃be jarasia:
–Piradrʉɗadua. Ne wayarãnadua.–
8 Ãdjia wayacusa acʉbʉdaɗe Jesura iduɓa nũmʉda unusiɗaa.
9 Eyaɗeba eɗaa zesiɗaɗe Jesuba ãdjía nãwã jara ɓʉsia:
–Bãrãba unupeɗaɗara ni aɓaʉa jararãnadua aɓa mʉ̃, Naʉ̃ Djara Edaɗa ʉ̃rẽbabʉrʉɗaa.–
10 Maʉ̃ne ãdjia Jesua iwiɗisiɗaa:
–Mãwãra judiorã ley jaradiabadaba ¿cãrẽ cãrẽã jarabada Elíada naãrã zeida ɓʉda?–
11 Jesuba panusia:
–Wãrãda Elíara naãrã zeida ɓʉa ne jũmada bia ɓʉi carea.*
12 Baribʉrʉ mʉ̃a jaraya Elíara zesida. Mãwãmĩna ni aɓaʉba idjira cawaɗaẽ́ basía. Ãtebʉrʉ ẽberãrãba o quĩrĩã panana quĩrãca idjira osiɗaa.* Ara maʉ̃ quĩrãca mʉ̃, Naʉ̃ Djara Edaɗara ãdji jʉwaeɗa bia mĩgaya.–
13 Maʉ̃ne Jesu ume nĩbabadarãba cawasiɗaa idjia Borocuebari Juaʉ̃nebemada beɗea ɓasida.*
Jesuba warra jai bara ɓʉ biabiɗa
Marco 9:14-29; Luca 9:37-43
14 Ãdji eyaɗeba eɗaa zesiɗaɗe ẽberãrãda zocãrã ãbaa duanasiɗaa. Maʉ̃ne ẽberãda Jesumaa zesia. Maʉ̃ ẽberãra Jesu quĩrãpita chĩrãboroɗe coɓepeɗa jarasia:
16 Mʉ̃a idjira bʉ ume nĩbabadarãmaa enesia, mãwãmĩna poya biabiɗaẽ́ basía.–
17 Jesuba jarasia:
–¡Bãrãba Ãcõrẽra ĩjãnacaa! ¡Bãrãra dji cadjiruarãa! Bãrãba ĩjãnamãrẽã ¿aɓa sãʉ̃be mʉ̃a droai? Warrara namaa enenadua.–
18 Jesuba jai quẽã jʉretasiɗe warra cacuaɗebemada ẽdrʉsia. Ara maʉ̃da warrara biasia.
19 Mãwãnacarea Jesu ume nĩbabadarãra idjimaa wãnapeɗa ãduɓa iwiɗisiɗaa:
–¿Sãwãẽrã dairãba jãʉ̃ jaira poya ãyã jʉretaɗaẽ́ basi?–
20 Jesuba panusia:
–Bãrãba mãcua Ãcõrẽra ĩjãnaẽ́ panʉ bẽrã poyaɗaẽ́ basía. Wãrãda mʉ̃a jaraya: mostaza ta maãrĩ quiru quĩrãca bãrãba maãrĩ ĩjã panʉbara, naʉ̃ eyaa namabemada ãyã ɓaɗe wãduaɗa acasiɗaa, maʉ̃ne eyara ãyã ɓaɗe wãcasia. Mãwã ĩjã panʉbara bãrãba poya oɗaẽ́ra neẽ́ bacasia.
21 Baribʉrʉ jai naʉ̃ca ɓea ãyã jʉretaɗi carea Ãcõrẽa iwiɗiɗida panʉa idjaɓa ne coɗaca ewarida oɗida panʉa.–*
Jesuba waya idji beaɗiɗebema jaraɗa
Marco 9:30-32; Luca 9:43-45
22 Galilea druaɗe ãbaa panasiɗaɗe Jesuba idji ume nĩbabadarãa jarasia:
–Dãrãẽ́ne mʉ̃, Naʉ̃ Djara Edaɗara aɓaʉba ẽberãrãa jidabiya.
23 Ãdjirãba mʉ̃ra beaɗia, baribʉrʉ ewari ũbeaɗe mʉ̃ra ʉ̃rẽbaya.–
Maʉ̃ carea ãdjirãra bio sopuasiɗaa.
Jesuba parata Ãcõrẽ de droma carea diaɗa
24 Jesu, idji ume nĩbabadarã siɗa Capernauʉ̃ puruɗaa zesiɗaɗe Ãcõrẽ de droma carea parata jʉrʉ pebadarãda Pedromaa wãsiɗaa. Ãdjirãba iwiɗisiɗaa:
–¿Bãrãa Jaradiabariba Ãcõrẽ de droma carea paratara diabarica?–*
25 Pedroba panusia:
–Mãẽ, diabaria.–
Pedro idji deɗe eɗa wãsiɗe Jesuda naãrã beɗeasia. Nãwã iwiɗisia:
–Bʉa ¿sãwã crĩcha ɓʉ, Simoʉ̃? ¿Cairãba paratara naʉ̃ ẽjũãne ɓea bororãa diaɗida panʉ? ¿Ara ãdji ẽberãrãba wa ãĩbemarãba diaɗida panʉ?–
26 Pedroba panusia:
–Ãĩbemarãba diaɗida panʉa.–
Jesuba idjía jarasia:
–Mãẽ. Dji boro ẽberãrãba diaɗacaa.
27 Dadjira dadji Boro Ãcõrẽ ẽberãrãa, baribʉrʉ maʉ̃ paratara diaɗia ẽberãrãba biẽ́ crĩcharãnamãrẽã. Maʉ̃ bẽrã doeɗa ɓeda waɗe wãdua. Dji naãrã mĩbʉrʉ iteɗe acʉsira paratada unuya. Maʉ̃ paratara edapeɗa mʉ̃ carea, bʉ carea biɗa diadua.–
Beɗea eɗaare
^ 17:5. Deuteronomio 18:15; Isaía 42:1.
^ 17:11. Malaquia 3:1; 4:5-6.
^ 17:12. Marco 6:14-29.
^ 17:13. Mateo 11:14.
^ 17:21. Griego beɗeaɗe ʉ̃cʉrʉ cartaɗe maʉ̃ versículora neẽ́a.
^ 17:24. Judiorã dji umaquĩrã veinte poa ʉ̃taa ɓeaba poaza maʉ̃ paratara diaɗida panasiɗaa Ãcõrẽ de droma bia eropanani carea. Ewari umé trajaɗabari edaɗada diaɗida panasiɗaa. Exodo 30:13-16; 38:25-26; 2 Cronica 24:9-14; Nehemia 10:32.
