Mateo 20:1-34
20 Ãcõrẽba ẽberãrã pe eroɓʉra naʉ̃ quĩrãca ɓʉa. Néu djibarida ɓasia. Ewari aɓa diapeɗeɗa ẽberãrãda idji uva néuɗe trajaɗamãrẽã jʉrʉɗe wãsia.
2 Ʉ̃cʉrʉ ẽberãrã ume beɗea ɓʉsia ewari aɓaʉ carea paratada diaida. Maʉ̃be ãdjirãra idji uva néuɗaa trajaɗe wãbisia.
3 Ʉ̃mãdau ʉ̃tʉ ɓabʉrʉɗe djibarira wayacusa puruɗaa wãsia. Mama ẽberãrã bari ɓeada dewara unusia.
4 Ãdjirãa jarasia: “Bãrã siɗa mʉ̃ néuɗe trajaɗe wãnadua. Maʉ̃bari mʉ̃a paratada ariɗe diaya.” Ara maʉ̃da wãsiɗaa.
5 Umatipa idjaɓa ʉ̃mãdau buyaɗacarea djibariba aɓarica osia.
6 Maʉ̃be ʉ̃mãdau ɓaeboɗoɗe wayacusa puruɗaa wãsia. Ẽberãrã bari ɓeada dewara unupeɗa iwiɗisia: “¿Cãrẽ cãrẽã iɗi trajaɗaẽ́ panʉ?”
7 Ãdjirãba panusiɗaa: “Ni aɓaʉba daia trajuda diaɗaẽ́ panʉ bẽrã.” Maʉ̃ne idjia jarasia: “Bãrã siɗa mʉ̃ néuɗaa trajaɗe wãnadua. Maʉ̃bari mʉ̃a paratada ariɗe diaya.”*
8 Queuboɗoɗe djibariba trajuɗebema boroa jarasia: “Dji traja panʉra trʉ̃cuapeɗa ãdji trajapeɗaɗabari paratada diadua. Dji jĩrũare zepeɗaɗarãa naãrã diadua. Naãrã zepeɗaɗarãa jĩrũare diadua.”
9 Ʉ̃mãdau ɓaeboɗoɗe trajaɗe wã pananara dji boromaa zesiɗaa. Maʉ̃ne ãdjiza ewari aɓa daucha trajaɗa quĩrãca edasiɗaa.
10 Maʉ̃ bẽrã dji naãrã trajaɗe wã panana zesiɗaɗe crĩchasiɗaa parata waiɓʉara edaɗida baribʉrʉ aɓarica edasiɗaa.
11 Maʉ̃ carea néu djibari ume biẽ́ duanesiɗaa.
12 Nãwã jarasiɗaa: “Jãʉ̃ jĩrũare zepeɗaɗara hora aɓabe trajasiɗaa, baribʉrʉ bʉa dairãa diaɗa quĩrãca ãdjirãa biɗa diasia. Dairãdrʉ beseaɗe ewari daucha trajasiɗaa.”
13 Baribʉrʉ néu djibariba aɓaʉa jarasia: “Ache, mʉ̃a bʉra jipa o ɓʉa. ¿Bʉra mʉ̃ ume beɗea ɓʉsiẽ́ca ewari aɓabema parata carea trajaida?
14 Bʉ paratara edapeɗa wãdua. Mʉ̃a bʉ́a diaɗa quĩrãca dji jĩrũare traja pananaa dia quĩrĩã ɓʉa.
15 ¿Bʉmaarã mʉ̃ paratara mʉ̃djia o quĩrĩã ɓʉ quĩrãca oiẽ́ ɓʉca? Mʉ̃ra ẽberã bia bẽrã ¿bʉra biẽ́ nũmʉca?”
16 Ara maʉ̃ quĩrãca dji jĩrũarebemada dji nabemarãda ɓeaɗia, dji nabemarãda dji jĩrũarebemada ɓeaɗia.–*
Jesuba idji beaɗiɗebema waya jaraɗa
Marco 10:32-34; Luca 18:31-34
17 Jesu Jerusaleʉ̃naa wãbʉrʉɗe zocãrã ẽberãrãda idji ume wãsiɗaa. Maʉ̃ne idji ume nĩbabadarã doce panʉda jĩgabe edepeɗa ãdjirãa jarasia:
19 Maʉ̃be mʉ̃ra judiorãẽ́a diaɗia. Maʉ̃gʉrãba mʉ̃ra ipiɗa biẽ́ jaraɗapeɗa, uɗapeɗa cruɗe cachiɗia. Baribʉrʉ ewari ũbeaɗe mʉ̃ra ʉ̃rẽbaya.–
Zebedeo warrarãba iwiɗipeɗaɗa
Marco 10:35-45
20 Mãwãnacarea Zebedeo quimada, idji warrarã siɗa Jesumaa zesiɗaa. Maʉ̃ wẽrãba Jesua beɗea djuburiai carea idji quĩrãpita chĩrãboroɗe coɓesia.
21 Maʉ̃ne Jesuba iwiɗisia:
–Bʉa ¿cãrẽda quĩrĩã ɓʉ?–
Idjia panusia:
–Bʉ jũmarã boroda ɓebʉrʉɗe za mʉ̃ warrarã umé panʉda aɓa bʉ jʉwa araare, aɓa bʉ jʉwa acʉare ɓʉdua.–
22 Maʉ̃ne Jesuba jarasia:
–Bãrãba adua panʉa cãrẽda iwiɗi panʉda. Mʉ̃ra bio bia mĩgaya. ¿Bãrã siɗa ara maʉ̃ quĩrãca bia mĩgaɗi carea panʉca?–*
Ãdjia panusiɗaa:
–Mãẽ, bia mĩgaɗi carea panʉa.–
23 Maʉ̃ne Jesuba jarasia:
–Bãrã siɗa wãrãda mʉ̃ quĩrãca bia mĩgaɗia.* Baribʉrʉ mʉ̃ jʉwa araare, mʉ̃ jʉwa acʉare chũpananida mʉ̃a poya diaẽ́a. Mʉ̃ Zezabʉrʉ mama chũpananida eroɓʉa.–
24 Santiagoba, Juaʉ̃ ume iwiɗipeɗaɗada waabema die panʉba ũrĩsiɗaɗe ãdji ume quĩrũsiɗaa.
25 Maʉ̃ne Jesuba ãdjirã trʉ̃cuapeɗa jarasia:
–Bãrãba cawa panʉa naʉ̃ ẽjũãnebema bororãba ãdji ẽberãrãra jũmawãyã zocabadada. Ãdjirãba unubibadaa ãdjia jarabʉdara jũmarãba ĩjã oɗida panʉda.
26 Baribʉrʉ bãrãra mãwã ɓeaɗiẽ́ panʉa. Bãrãnebemada dji dromada ɓa quĩrĩã ɓʉbʉrʉ waabemarã nezocada ɓaida ɓʉa.
27 Dji dromaara ɓa quĩrĩã ɓʉra jũmarã cãyãbara eɗaara ɓaida ɓʉa.
28 Maʉ̃ quĩrãca mʉ̃, Naʉ̃ Djara Edaɗara zeẽ́ ɓʉa ẽberãrã mʉ̃ nezocarãda ɓeaɗamãrẽã. Ãtebʉrʉ ze ɓʉa ẽberãrã nezocada ɓai carea. Mãwã mʉ̃ra beuya zocãrã ẽberãrãda ẽdrʉ ɓʉi carea.–
Jesuba dauɓerrea ɓea umé biabiɗa
Marco 10:46-52; Luca 18:35-43
29 Jerico puruɗeba ẽdrʉsiɗaɗe Jesu caiɗu ẽberãrãda zocãrã wãsiɗaa.
30 Mãwã wãnane dauɓerrea panʉda umé o icawa chũpanasiɗaa. Jesu ãdji caita wãbʉrʉda ũrĩsiɗaɗe nãwã ɓiasiɗaa:
–¡Dai Boro, Daviɗeba zeɗa, daira quĩrã djuburiadua!–
31 Maʉ̃ne ẽberãrãba ãdjira chupeaɗamãrẽã quẽãsiɗaa, baribʉrʉ ãdjia wetara ɓiasiɗaa:
–¡Dai Boro, Daviɗeba zeɗa, daira quĩrã djuburiadua!–
32 Maʉ̃be Jesura nũmesia. Ãdjira trʉ̃peɗa iwiɗisia:
–¿Cãrẽda quĩrĩã panʉ mʉ̃a oida?–
33 Ãdjia jarasiɗaa:
–Dai Boro, quĩrĩã panʉa dai dauba unu ɓeida.–
34 Jesuba ãdjira mĩã djuburi ununa bẽrã ãdji daura tãsia. Ara maʉ̃da unu panenapeɗa Jesu ume wãsiɗaa.
Beɗea eɗaare
^ 20:7. Maʉ̃bari mʉ̃a paratada ariɗe diaya. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 20:16. Griego beɗeaɗe ʉ̃cʉrʉ cartaɗe idjaɓa ɓʉ́ ɓʉa: “Ãcõrẽba zocãrã trʉ̃ ɓʉa, mãwãmĩna zocãrãẽ́be edaya.”
^ 20:22. Griego beɗeaɗe nãwã ɓʉ́ ɓʉa: “¿Bãrãra mʉ̃ borocueɗi quĩrãca borocueɗica? ¿Mʉ̃a doida ɓʉra bãrã biɗa poya doɗica?”
^ 20:23. Jesuba jaraɗa quĩrãca wãrãda mãwãsia. Hecho 12:1-3; Apocalipsi 1:9.
