Mateo 28:1-20
28 Ʉ̃nãũbada ewari jõnacarea nabema ewari domianebema ara ʉ̃nadrʉbʉrʉɗe Maria Magdalenada, dewarabema Maria siɗa Jesu tʉɓaripeɗaɗamaa acʉɗe wãsiɗaa.
2 Maʉ̃ne cawaẽ́ne de uremiada dji cãbãyã uresia. Ãcõrẽ nezocada bajãneba zepeɗa uria jũãtrʉ coɓʉ mõgarara ãyã ɓʉpeɗa maʉ̃ ʉ̃rʉ̃ chũmesia.
3 Idji quĩrãra baa purewa edabari quĩrãca urua ɓasia. Idji cacuaɗe jʉ̃ ɓʉra bio totroa ɓasia.
4 Idjida bio wayaɗaẽrã sordaorãra ure nũpanenapeɗa aɓeɗa beuɗa quĩrãca tapanesiɗaa.
5 Baribʉrʉ bajãnebema nezocaba wẽrãrãa jarasia:
–Ne wayarãnadua. Mʉ̃a cawa ɓʉa bãrãba Jesu cruɗe cachipeɗaɗada jʉrʉ panʉda.
6 Idjira nama ɓʉẽ́a. Wãrãda ʉ̃rẽbasia idjia jaraɗa quĩrãca.* Idji tʉɓaripeɗaɗamaa acʉɗe zeɗadua.
7 Jãʉ̃be isabe wãnapeɗa idji ume nĩbapeɗaɗarãa nãwã jaraɗadua: “Idjira beu ɓaɗada ʉ̃rẽbasia. Idjira bãrã na wãya Galilea druaɗaa. Jãma idjira ununia.” Maʉ̃da mʉ̃a bãrãa jaraɗe zesia.–
8 28:8-9 Ara maʉ̃da wẽrãrãra Jesu tʉɓaripeɗaɗa uriaɗeba ne waya panʉmĩna bio ɓʉsriɗa pira wãsiɗaa. Jesu ume nĩbapeɗaɗarãa jaraɗe wãbʉdaɗe Jesuda odjapeɗa –¡Mẽrã!– asia. Maʉ̃be wẽrãrãra idjimaa zeɗapeɗa jĩrũne bʉrʉɗapeɗa idjía bia beɗeasiɗaa.
9 –
10 Mãwã panʉne Jesuba jarasia:
–Ne wayarãnadua. Djabarãa jaraɗe wãnadua Galilea druaɗaa wãnamãrẽã. Jãma ãdjirãba mʉ̃ra ununia.–
Sordaorãba jarapeɗaɗa
11 Wẽrãrã wãbʉdamisa ʉ̃cʉrʉ sordaorã Jesu tʉɓaripeɗaɗama jʉ̃ã pananada puruɗaa wãsiɗaa. Ãdjia unupeɗaɗada sacerdote bororãa jũma nẽbʉrʉsiɗaa.
12 Maʉ̃ carea sacerdote bororãda, judiorã dji dromarã ume ãbaa dji jʉresiɗaa. Beɗea auɗapeɗa sordaorãa paratada waiɓʉa diasiɗaa.
13 Diabʉdaɗe nãwã jarasiɗaa:
–Bariduaba iwiɗibʉrʉ, jaraɗadua bãrã cãĩ duanʉmisa Jesu ume nĩbabadarãda diamasi zeɗapeɗa idji cacuara drʉa edesiɗada.
14 Pilatoba bãrã cãĩsiɗada ũrĩbʉrʉ, dairãda idji ume bãrãare beɗeaɗia nẽbʉraɗe ɓearãnamãrẽã.–
15 Maʉ̃be sordaorãba paratara edaɗapeɗa jarasiɗaa Jesu ume nĩbapeɗaɗaba idji cacuara drʉa edesiɗada. Judiorãba iɗi biɗa mãwã jarabadaa.
Jesuba edaɗarãa idjida unubiɗa
Marco 16:14-18; Luca 24:36-49; Juaʉ̃ 20:19-23
16 Mãwãnacarea Jesu ume nĩbabadarã once panʉda Galilea druaɗaa wãsiɗaa Jesuba jaraɗa eyaɗaa.
17 Idji unusiɗaɗe idjía bia beɗeasiɗaa baribʉrʉ ʉ̃cʉrʉba mãcua ĩjãnaẽ́ basía.
18 Maʉ̃ne Jesura ãdjirã caita zepeɗa jarasia:
–Ãcõrẽba mʉ̃́a ʉɓʉada diasia bajãne, naʉ̃ ẽjũãne biɗa ne jũmada poya eroɓamãrẽã.*
19 Maʉ̃ carea jũma puru ɓeaza wãnapeɗa jaradiaɗadua mʉ̃da ẽpẽnamãrẽã. Ãdjirãra dji Zeza trʉ̃neba, dji Warra trʉ̃neba, Ãcõrẽ Jaure trʉ̃neba borocueɗadua.
20 Ãdjirãa jaradiaɗadua mʉ̃a bãrãa jaraɗada jũma ĩjã oɗamãrẽã. Maʉ̃ne mʉ̃ra bãrã ume ewariza ɓaya aɓa naʉ̃ ewari jõbʉrʉɗaa.–
