Mateo 4:1-25
4 Mãwãnacarea Ãcõrẽ Jaureba Jesura ẽjũã põãsa ewaraga ɓʉɗaa edesia. Maʉ̃be diauruba idjira mĩã sẽsia Ãcõrẽra igarabi carea.
2 Jesura cuarenta ewari ãsa, diamasi biɗa ne coẽ́ ɓaɗa bẽrã jarra ɓesia.
3 Mãwã ɓʉɗe mĩã sẽbarira zesia. Idjia jarasia:
–Bʉda wãrãda Ãcõrẽ Warrabʉrʉ, jaradua za taɓea mõgaraa paʉ̃ bamãrẽã.–
4 Baribʉrʉ Jesuba panusia:
–Ãcõrẽ Beɗeaɗe nãwã ɓʉ́ ɓʉa: aɓabe ne co ɓʉɗeba ẽberãra zocai ɓaẽ́a, ãtebʉrʉ jũma Ãcõrẽba jara ɓʉ ĩjã ɓʉɗeba zocai ɓaya.–*
5 Mãwãnacarea diauruba Jesura Jerusaleʉ̃, Ãcõrẽ itea ɓʉ puruɗaa edesia. Mama Ãcõrẽ de droma boro ʉ̃tʉara ɓʉmaa edesia.
6 Maʉ̃be diauruba jarasia:
–Bʉda wãrãda Ãcõrẽ Warrabʉrʉ, namaʉba uɗu jʉ̃drʉdua. Ãcõrẽ Beɗeaɗe nãwã ɓʉ́ ɓʉa:
Ãcõrẽba idji bajãnebema nezocarãda diabueya bʉ carebamãrẽã.
Bʉra ãdji jʉwaɗe edaɗia bʉ jĩrũra mõgaraba puarãmãrẽã.*
7 Maʉ̃ne Jesuba diaurua jarasia:
–Ãcõrẽ Beɗeaɗe idjaɓa jara ɓʉa: “Bariduada orãdua bãrã Boro Ãcõrẽba carebai cawaya.”–*
8 Mãwãnacarea diauruba Jesura eya ʉ̃tʉ ɓʉɗe edesia. Mamaʉba Jesua jũma naʉ̃ ẽjũãne ɓea puruda, puruza ne bia queɗea siɗa acʉbisia.
9 Maʉ̃be diauruba jarasia:
–Bʉda chĩrãboroɗe coɓepeɗa mʉ̃́a bia beɗeaibʉrʉ, naʉ̃gʉra jũma mʉ̃a bʉ́a diaya bʉ jʉwaeɗa eroɓamãrẽã.–
10 Maʉ̃ne Jesuba diaurua jarasia:
–Satana, ãyã wãdua. Ãcõrẽ Beɗeaɗe nãwã ɓʉ́ ɓʉa: “Bʉ Boro Ãcõrẽabʉrʉ bia beɗeadua. Aɓa idjidrʉ ĩjã ɓadua.”–*
11 Ara maʉ̃da diaurura Jesu caitabemada ãyã wãsia. Maʉ̃ne Ãcõrẽ nezoca bajãnebemarãda Jesumaa zeɗapeɗa idjira ne cobisiɗaa.
Jesuba jaradia ɓeɗa
Marco 1:14-15; Luca 4:14-15
12 Borocuebari Juaʉ̃ preso ɓʉ ũrĩsiɗe Jesura jẽda Galilea druaɗaa wãsia.
13 Baribʉrʉ Nazare puruɗe ɓeẽ́ basía, ãtebʉrʉ Capernauʉ̃ puruɗe ɓaɗe wãsia. Maʉ̃ purura amene droma icawa ɓʉa. Neptaliɗeba yõpeɗaɗa israelerã ẽjũãne ɓʉa idjaɓa Zabuloʉ̃neba yõpeɗaɗarã ẽjũã caita ɓʉa.
14 Maʉ̃gʉra mãwãsia Ãcõrẽneba beɗeabari Isaíaba ɓʉɗa quĩrãca. Nãwã ɓʉsia:
15 Bãrã Zabuloʉ̃ idjaɓa Neptali ẽjũãne ɓearã, judiorãẽ́ Galileaɗe ɓearã,
amene dromanaa wãbada o caita ɓearã, Jordaʉ̃ do icawa ɓearã:
16 Bãrãra pãĩmane duanasiɗaa Ãcõrẽ adua panana bẽrã.
Baribʉrʉ iɗira ʉ̃naane duanʉa Ãcõrẽnebemada cawa panʉ bẽrã.
Bãrãra zocai panʉmĩna beuɗa quĩrãca duanabadjiɗaa.
Baribʉrʉ iɗira ʉ̃mãdau odjabʉrʉ quĩrãca Ãcõrẽba ara idjiɗebemada bãrãa cawabi ɓʉa.*
17 Maʉ̃ ewariɗeba ʉ̃taa Jesuba nãwã jara nĩbasia:
–Ãcõrẽra bãrã Boro bai carea zebʉrʉa.* Maʉ̃ carea bãrãba cadjirua obadara igaraɗapeɗa idjimaa zeɗadua.–
Jesuba ɓeda ɓaribadarã trʉ̃na
Marco 1:16-20; Luca 5:1-11
18 Jesura Galilea amene droma icawa nĩne ẽberãda umé unusia. Aɓara Simoʉ̃ basía, Pedro abadada. Dewarabemara dji djaba Andre basía. Maʉ̃ ẽberãrãra ɓeda beabadarã basía. Ãdjira doeɗa ɓeda ɓari panasiɗaa.
19 Jesuba ãdjía jarasia:
–Mʉ̃ ume zeɗadua. Bãrãba ɓeda ɓaribada quĩrãca mʉ̃a bãrãa jaradiaya ẽberãrãda mʉ̃maa enenamãrẽã.–
20 Ara maʉ̃da ãdji ɓeda ɓaribadara amenapeɗa Jesu ume wãsiɗaa.
21 Nocoɗaa wãbʉrʉɗe Jesuba dewara ẽberãda umé unusia. Aɓara Zebedeo warra Santiago basía. Dewarabemara dji djaba Juaʉ̃ basía. Ãdji zeza ume jãbaɗe ɓeda ɓaribada cõã ɓeada ca panasiɗaa. Maʉ̃be Jesuba ãdjira trʉ̃sia idji ume wãnamãrẽã.
22 Ara maʉ̃da ãdji jãbara, ãdji zeza siɗa amenapeɗa Jesu ume wãsiɗaa.
Jesu Galilea druaɗe pʉrrʉaɗa
Luca 6:17-19
23 Jesura jũma Galilea druaɗe pʉrrʉa wãsia. Judiorã dji jʉrebada deza jaradiabadjia Ãcõrẽra ãdji Boro bai carea zebʉrʉda. Maʉ̃ beɗea bia jaradiaɗe wãbʉrʉza jũma ẽberãrã cacua biẽ́ ɓeada biabicuasia.
24 Maʉ̃ bẽrã idjira jũma Siria druaɗe trʉ̃ ɓʉgasia. Maʉ̃ carea ẽberãrãba jũma quĩrãtanoaneba cacua biẽ́ ɓeada, cacua pua bara ɓeada, jai bara ɓeada, wawa ɓeada, ɓʉradrʉ ɓea siɗa idjimaa enebadjiɗaa. Jesuba ãdjirãra jũma biabibadjia.
25 Maʉ̃ carea zocãrã Galileaɗebemarãda, Decapoli druaɗebemarãda, Jerusaleʉ̃nebemarãda, Judeaɗebemarãda, Jordaʉ̃ do quĩrãrẽbemarã siɗa Jesu caiɗu wãsiɗaa.
