Numero 10:1-36
10 Ãcõrẽba Moisea jarasia:
2 –Paratada edaɗapeɗa cachiruda umé chĩ oɗaɗua. Maʉ̃ cachirura zaɗia puru ãbaa trʉ̃ni carea idjaɓa nocoɗaa wãbiɗi carea.
3 Cachiru umena dãrã jĩguabʉrʉɗe puruda jũmaena bʉ ume ãbaa dji jʉreɗida panʉa mʉ̃ wua deɗe eɗa wãbadama.
4 Cachiru aɓa dãrã jĩguabʉrʉɗe israelerã bororã awa bʉ ume ãbaa dji jʉreɗida panʉa.
5 Cachiru ara pichia jĩguabʉrʉɗe israelerã ʉ̃mãdau odjabariare duanʉra nocoɗaa wãnida panʉa.
6 Wayacusa ara maʉ̃ quĩrãca jĩguabʉrʉɗe israelerã jʉwa acʉare duanʉra wãnida panʉa. Ara maʉ̃ quĩrãca jĩguabʉrʉɗe israelerã jʉwa araare duanʉra, ʉ̃mãdau ɓaebariare duanʉ siɗa wãnida panʉa.
7 Israelerã ãbaa dji jʉreɗamãrẽã cachirura dãrã zaɗadua. Nocoɗaa wãnamãrẽã quĩrã awara zaɗadua.
8 Aaroʉ̃ warrarã sacerdoterãba maʉ̃ cachirura zaɗida panʉa. Iɗiba ʉ̃taa ãdjirãba, ãdji warrarãneba yõbʉdarã biɗa mãwã oɗida panʉa.
9 Bãrã druaɗe jũẽpeɗaɗacarea dji quĩrũda bãrã ume djõne zesiɗara, bãrã djõne wãbʉdaɗe cachirura zaɗadua. Mãwã mʉ̃a bãrãra quĩrãdoaẽ́a ãtebʉrʉ dji quĩrũnebemada ẽdrʉ edaya.
10 Maʉ̃ awara mʉ̃a jaraɗa ewari droma ɓea ɓʉsriɗaba obʉdaɗe, jeɗeco djiwiɗi ewari obʉdaɗe biɗa cachirura zaɗadua. Animarã babue diabʉdaɗe, mʉ̃ ume necai ɓai careabema animarã beabʉdaɗe biɗa cachirura zaɗadua. Maʉ̃ zabʉdaba mʉ̃́a bãrãnebemada quĩrãnebabi ɓaya. Mʉ̃ra bãrã Ãcõrẽa.
Israelerã Sinaiɗeba nocoɗaa wãpeɗaɗa
11 Israelerã Egiptoɗeba ẽdrʉpeɗaɗacarea poa aɓa ʉ̃rʉ̃ jeɗeco umé veinte ewari ɓʉɗe jʉ̃rãrã Ãcõrẽ wua de ʉ̃rʉ̃ ɓaɗara nocoɗaa wãsia.
12 Ara maʉ̃da israelerãra Sinai ẽjũã põãsa ewaraga ɓʉɗeba maʉ̃ jʉ̃rãrã caiɗu wãsiɗaa. Ʉ̃nãũ eda wãbʉdaɗe Paraʉ̃ ẽjũã põãsa ewaraga ɓʉɗe jũẽne wãsiɗaa. Mama jʉ̃rãrãra jira ɓesia.
13 Sinaiɗeba ẽdrʉsiɗaɗe israelerãra wãbʉrʉsiɗaa Ãcõrẽba Moisea jaraɗa quĩrãca.
14 Naãrã Judaɗeba yõna puruda ãdji bandera bara wãsia. Ãdji borora Aminadá warra Naasoʉ̃ basía.
15 Ãdjirã ume Isacarɗeba yõna puruda wãsia. Ãdji borora Zuá warra Natanael basía.
16 Idjaɓa Zabuloʉ̃neba yõna puru siɗa ãdjirã ume wãsia. Ãdji borora Heloʉ̃ warra Eliá basía.
17 Maʉ̃ ũbeaare Levi warra Gersoʉ̃neba yõpeɗaɗarãba, Levi warra Merariɗeba yõpeɗaɗarã biɗa Ãcõrẽ wua deda jũma ẽrãcuaɗapeɗa edesiɗaa.
18 Ãdjirãare Rubeʉ̃neba yõna puruda ãdji bandera bara wãsia. Ãdji borora Sedeu warra Elisu basía.
19 Ãdjirã ume Simeoʉ̃neba yõna puruda wãsia. Ãdji borora Zurisadai warra Selumiel basía.
20 Idjaɓa Gaɗeba yõna puru siɗa ãdjirã ume wãsia. Ãdji borora Deuel warra Eliasa basía.
21 Maʉ̃ ũbeaare Levi warra Coáɗeba yõpeɗaɗarãba Ãcõrẽ wua deɗe eɗabemada jũma edesiɗaa. Ãdji cãĩnima jũẽbʉdaɗe Ãcõrẽ wua de naẽna edepeɗaɗaba maʉ̃ dera o eropanabadjiɗaa.
22 Ãdjirãare Epraiʉ̃neba yõna puruda ãdji bandera bara wãsia. Ãdji borora Amiú warra Elisamá basía.
23 Ãdjirã ume Manaseɗeba yõna puruda wãsia. Ãdji borora Pedasu warra Gamaliel basía.
24 Idjaɓa Benjamiʉ̃neba yõna puru siɗa ãdjirã ume wãsia. Ãdjirã borora Gedeoni warra Abidaʉ̃ basía.
25 Jĩrũare Daʉ̃neba yõna puruda ãdji bandera bara wãsia. Ãdjirãra panasiɗaa dji quĩrũba ẽpẽsiɗara maʉ̃ ẽberãrã ume djõni carea. Ãdji borora Amisadai warra Ajieze basía.
26 Ãdjirã ume Aserɗeba yõna puruda wãsia. Ãdji borora Ocraʉ̃ warra Pagiel basía.
27 Idjaɓa Neptaliɗeba yõna puru siɗa ãdjirã ume wãsia. Ãdji borora Enaʉ̃ warra Ahira basía.
28 Israelerã nocoɗaa wãbʉdaza ara maʉ̃ quĩrãca wãbadjiɗaa.
Hobá ãdjirã ume wãmãrẽã Moiseba jaraɗa
29 Israelerã Sinaiɗeba ẽdrʉɗi naẽna Moisera Hobá ume beɗeasia. Hobára Moise zãwãrẽ Reuel warra basía.* Madiaʉ̃ druaɗebema basía. Moiseba Hobáa jarasia:
–Dairãra wãbʉrʉɗia Ãcõrẽba diai jaraɗa druaɗaa. Dairã ume wãdua. Ãcõrẽba dai israelerãa ne biada diayaɗa asia. Maʉ̃ bẽrã dairãba bʉ́a ne biada waiɓʉa diaɗia.–
30 Hobába panusia:
–Mʉ̃ra wãẽ́a. Mʉ̃ druaɗaa jẽda wãya mʉ̃ ẽberãrãmaa.–
31 Maʉ̃ne Moiseba jarasia:
–Mʉ̃ quĩrã djuburia jẽda wãrãdua. Bʉa bio cawa ɓʉa sãma ẽjũã põãsa ewaraga ɓʉɗe dairãra cãĩnida panʉda. Bʉa dairãra poya jipa pe edeya.*
32 Bʉda dairã ume wãibʉrʉ, ne jũma bia Ãcõrẽba dairãa diabʉrʉɗebemada bʉ́a diaɗia.–
33 Mãwã beɗeaɗacarea israelerãra Sinai eya Ãcõrẽ eya abadaɗeba wãsiɗaa. Ewari ũbea nĩbasiɗaa. Mãwã nĩnane Ãcõrẽ baurudera ãdjirã na eronĩbasiɗaa cawabimãrẽã sãma ʉ̃nãũnida.
34 Ãsa israelerã nocoɗaa wãbʉdaɗe Ãcõrẽ jʉ̃rãrãra ãdjirã ʉ̃rʉ̃ wãbadjia.
35 Ãcõrẽ baurude nocoɗaa edebʉdaza Moiseba nãwã jarabadjia:
Ãcõrẽ, na wãdua. Bʉ ume dji quĩrũra ãyã jʉrecuadua. Bʉ quĩrĩãnacara ãyã mĩrũ wãbicuadua.
36 Ãcõrẽ baurude ãdji cãĩnima jũẽbibʉdaɗe Moiseba nãwã jarabadjia:
Ãcõrẽ, jẽda zedua dai israelerã zocãrã duanʉmaa.*
