Numero 11:1-35
11 Mãwã nĩnane israelerãra ãdji bia mĩga panʉ carea Ãcõrẽ quĩrãpita biẽ́ beɗea duanesiɗaa. Maʉ̃ ũrĩsiɗe Ãcõrẽra quĩrũpeɗa tʉbʉ uruada ãdjirãmaa eradrʉbisia. Maʉ̃ tʉbʉ uruaba puru iquiɗabema deda ʉ̃cʉrʉ bácuasia.
2 Maʉ̃ carea israelerãba Moisea quĩrã djuburiada iwiɗisiɗaa. Ara maʉ̃da Moiseba ãdjirã carea Ãcõrẽa beɗea djuburiabʉrʉɗe tʉbʉ uruara quisia.
3 Mama trʉ̃ ɓʉsiɗaa Taberá, Ãcõrẽba tʉbʉ uruada ãdjirã tãẽna eradrʉbiɗa bẽrã.*
Ãcõrẽba põrã diabueɗa
4 Ʉ̃cʉrʉ ãĩbemarã israelerã ume nĩnaba ãdjia co panʉ awara dewara djicoda co quĩrĩã panasiɗaa.* Maʉ̃ bẽrã israelerã siɗa soɗe biẽ́ panenapeɗa nãwã jarasiɗaa:
–¡Ay, nedjarada cobʉdabara!
5 Dadjirãba quĩrãneba panʉa Egiptoɗe ɓedada bari co panabadjiɗada. Idjaɓa pepinoda, nejõda, ceboyada, puerroda, recao siɗa co panabadjiɗaa.
6 Baribʉrʉ iɗira aɓari co panʉba sẽ panʉa. Aɓabe naʉ̃ manádrʉ co tapanʉa.–
7 Manára culãdrʉ ta quĩrãca pichia querasia. Bedelio quĩrãca torroa cuaracuara ɓasia.*
8 11:8-9 Diamasiza ẽjũã cũrãsaba ɓeguea nũmebʉrʉɗe manára odjabadjia. Israelerãba manára jʉrʉ peɗapeɗa birajubadjiɗaa wa yuɗe ʉraɓabadjiɗaa. Maʉ̃gʉra djubadjiɗaa wa paʉ̃da obadjiɗaa. Dji warraara paʉ̃ olivo dragaɗaa oɗaca ɓasia.
10 Maʉ̃ne Moiseba ũrĩsia deza dji eɗa wãbadama israelerãra ãdjia co quĩrĩã panʉ carea jĩã panʉda. Maʉ̃ carea Ãcõrẽra ãdjirã ume bio quĩrũsia. Moise biɗa maʉ̃ra biẽ́ unusia.
11 Maʉ̃ carea Moiseba Ãcõrẽa jarasia:
–Mʉ̃ra bʉ nezocaa. Maʉ̃da ¿cãrẽ cãrẽã bʉa mʉ̃ra jãwã biẽ́ o ɓʉ? ¿Mʉ̃a cãrẽda bʉ quĩrãpita biẽ́ oɗa bẽrã bʉa jãwã naʉ̃ purura mʉ̃ jʉwaɗe ɓʉsi?
12 ¿Mʉ̃ra ãdji papaca? ¿Mʉ̃abʉrʉ ãdjirãra tocuasica? Mãwãra ¿cãrẽ cãrẽã jara ɓʉ ãdjirãra bʉa ãdji drõã naẽnabemarãa diai jaraɗa druaɗaa edemãrẽã daupẽbariba warra jʉwaɗe bara edebari quĩrãca?
13 Naʉ̃ ẽberãrã jĩã panʉba mʉ̃́a jara panʉa: “Dairãa nedjarada coɗi carea diadua.” Baribʉrʉ mʉ̃a ¿sãma nedjarada edai ãdjirãa diai carea?
14 Mʉ̃duɓaʉba naʉ̃ purura poya edeẽ́a. Mãwã edeira jũmawãyã zarea ɓʉa.
15 Bʉa naʉ̃ puruda mʉ̃duɓaʉa edebibʉrʉ biara ɓʉa mʉ̃ra beaida. Bʉa wãrãda mʉ̃da bia unu ɓʉbʉrʉ, mʉ̃ra beadua waa bia mĩgarãmãrẽã.–
16 Ãcõrẽba panusia:
–Israelerã bororã bʉa bio cawa ɓʉda setenta edapeɗa mʉ̃ wua de caita ededua. Mama bʉ ume jʉ̃ãnida panʉa.
17 Maʉ̃ne mʉ̃ra mama eɗaa zepeɗa bʉ ume beɗeaya. Mʉ̃a bʉ́a diaɗa Jaureda ãdjirãa biɗa diaya naʉ̃ puruda careba edeɗamãrẽã. Mãwã bʉduɓaʉba naʉ̃ purura edeẽ́a.
18 Israelerãa jaradua nedjarada nu coɗi bẽrã nane ãdjirãba oɗida panʉa nu mʉ̃ quĩrãpita bia duanani carea.* Mʉ̃a ũrĩsia ãdjirã jĩã panʉba nãwã jara panʉda: “¡Ay, nedjarada cobʉdabara! ¡Dadjirãra Egiptoɗe biara duanabadjiɗaa!” Mãwã jara panʉ bẽrã mʉ̃a ãdjirãa nedjarada diaya coɗamãrẽã.
19 11:19-20 Maʉ̃ nedjarara ãdjirãba ewari aɓabe, ewari umé, ewari juesuma, die ewari, veinte ewari biɗa coɗaẽ́a, ãtebʉrʉ jeɗeco aɓa coɗia aɓa nedjaraba jaitabʉdaɗaa.* Mãwã oya mʉ̃ra bãrã ume ɓʉmĩna. Ãdjirãba mʉ̃da igaraɗapeɗa jĩã panʉba mʉ̃ quĩrãpita nãwã jara panʉa: “¿Dadjirãra cãrẽ cãrẽã Egiptoɗeba ẽdrʉsiɗa?”–
21 Moiseba jarasia:
–Umaquĩrãrã awa mʉ̃ ume seisciento mil panʉa. Maʉ̃da bʉa jara ɓʉa jeɗeco aɓa nedjarada dairãba coɗamãrẽã diaida.
22 Dai ovejada, pacada jũma beabʉda siɗa jũmarã itea araẽ́a. ¡Pusaɗebema ɓeda jũma beabʉda siɗa araẽ́a!–
23 Ãcõrẽba Moisea jarasia:
–¿Mʉ̃a jũma poya oẽ́ca? Iɗi bʉa unuya mʉ̃a jaraɗara poya oida wa poya oẽ́da.–
24 Ãcõrẽ ume beɗea ɓaɗara Moiseba israelerãa jaraɗe wãsia. Maʉ̃ne israelerã bororãda setenta edapeɗa Ãcõrẽ wua de caita pe edesia.
25 Mama Ãcõrẽra jʉ̃rãrãne eɗaa zepeɗa Moise ume beɗeasia. Idjia Moisea diaɗa Jaureda maʉ̃ setenta israelerã bororãa biɗa diasia. Maʉ̃ Jaurera ãdjirãmaa zepeɗa cawaẽ́ne Ãcõrẽneba beɗea duanesiɗaa.* Mãwãnacarea waa ara maʉ̃ quĩrãca beɗeaɗaẽ́ basía.
26 Maʉ̃ne Moiseba setenta bororã edaɗaɗebemada umé Ãcõrẽ wua demaa wãnaẽ́ basía, ãtebʉrʉ israelerã duanʉma panesiɗaa. Aɓara Eldá basía. Dewarabemara Medá basía. Ãcõrẽ wua demaa wãnaẽ́ baɗamĩna Ãcõrẽba diaɗa Jaurera ãdjia biɗa edasiɗaa. Maʉ̃ bẽrã ãdji siɗa cawaẽ́ne Ãcõrẽneba beɗea panesiɗaa israelerã duanʉma.
27 Maʉ̃ carea cũdra aɓa Moisemaa pira wãpeɗa nãwã jarasia:
–¡Eldáda, Medá siɗa Ãcõrẽneba beɗea panʉa israelerã duanʉma!–
28 Maʉ̃ne Nuʉ̃ warra Josueba jarasia:
–Mʉ̃ boro Moise, ãdjía idu mãwã beɗeabirãdua.– (Josuera cũdra eɗaʉba Moise carebabari basía.)
29 Moiseba jarasia:
–¿Bʉa crĩcha ɓʉca aɓabe mʉ̃abʉrʉ Ãcõrẽ Jaurera eroɓaida ɓʉda? Mʉ̃maarã bia ɓacasia Ãcõrẽba idji Jaureda jũmarãa diabʉrʉbara idjaɓa jũmarãda idjiɗeba beɗeabʉdabara.–
30 Mãwãnacarea Moisera, israelerã bororã siɗa jẽda wãsiɗaa israelerã duanʉmaa.
31 Maʉ̃be Ãcõrẽba nãũrãda pusaareba tʉbisia. Maʉ̃ nãũrãba põrãda zocãrã enesia israelerã duanʉmaa. Israelerã duanʉmaʉba ewari aɓa wãida ɓʉ quĩrãca maʉ̃ põrãra jeweɗa jãrẽɓaribusi ɓasia. Egoroɗeba dji ʉ̃tʉara dadji ɓacara daucha ɓasia.
32 Maʉ̃ ewariɗe ãsa, diamasi, nurẽma biɗa israelerãba põrãra quenabadjiɗaa. Dji maãrĩara beaɗaba ẽda cincuenta birasia.* Maʉ̃gʉra beseaɗe pae duanasiɗaa ãdjirã duanʉma.
33 Maʉ̃ põrã djara jũma coɗi naẽna Ãcõrẽra ãdjirã ume quĩrũsia.* Maʉ̃ bẽrã israelerãra zocãrã quinibisia.
34 Dji zocai panenaba maná awara co quĩrĩã pananara joucuasiɗaa. Maʉ̃ carea maʉ̃ ẽjũãra trʉ̃ ɓʉsiɗaa Kibro-hataava.*
35 Kibro-hataavaɗeba israelerãra Hazeroɗaa wãnapeɗa mama duanesiɗaa.
Beɗea eɗaare
^ 11:3 Hebreo beɗeaɗe Taberá trʉ̃ba jara ɓʉa “tʉbʉ urua.”
^ 11:4 Ʉ̃cʉrʉ ãĩbemarãra israelerã ume Egipto druaɗeba ẽdrʉsiɗaa. Exodo 12:38.
^ 11:7 Bedeliora bacuru ɓaa.
^ 11:18 Ãcõrẽ quĩrãpita bia duanani carea ãdjirãra cuiɗapeɗa wua tãtoɗada jʉ̃nida panasiɗaa. Idjaɓa ãdji quima ume jipa cãĩnida panasiɗaa.
^ 11:19-20 Aɓa nedjaraba jaitabʉdaɗaa. Hebreo beɗeaɗe ɓʉ́ ɓʉa: “Aɓa ãdji quẽbʉɗe odjabʉrʉɗaa.”
^ 11:25 Hebreo beɗeaɗe ebuɗa ɓʉẽ́a sãwã beɗeasiɗada. Zocãrãmaarã ãdjia cawaɗaẽ́ne Ãcõrẽ beɗeada mĩã cawaiẽ́ jara duanesiɗaa waa dadjia ũrĩnaca beɗeaɗe beɗea duanesiɗaa.
^ 11:32 Ẽda cincuenta. Hebreo beɗeaɗe ɓʉ́ ɓʉa “diez homeres.”
^ 11:33 Ebuɗa ɓʉẽ́a cãrẽ cãrẽã Ãcõrẽra ãdjirã ume quĩrũsia. Ʉ̃cʉrʉmaarã israelerã jũmawãyã ne co panʉ carea quĩrũsia idjaɓa dewararãmaarã ãdjia biẽ́ beɗeapeɗaɗa carea quĩrũsia.
^ 11:34 Hebreo beɗeaɗe maʉ̃ trʉ̃ba jara ɓʉa: “Nedjara awua panʉ carea beupeɗaɗa joubada ẽjũã.”
