Numero 14:1-45
14 Maʉ̃ ũrĩsiɗaɗe israelerã jũmarãda ɓʉga nũmesia idjaɓa maʉ̃ diamasi jĩã panʉda ʉ̃nadrʉsiɗaa.
2 Puruba Moiseda, Aaroʉ̃ siɗa biẽ́ jaraɗapeɗa ãdjía nãwã jarasiɗaa:
–¡Dairãra Egiptoɗe beupeɗaɗabara biara ɓacasia! ¡Naʉ̃ ẽjũã põãsa ewaraga ɓʉɗe biɗa beupeɗaɗabara biara ɓacasia!
3 ¿Ãcõrẽba cãrẽ cãrẽã dairãra maʉ̃ druaɗaa edebʉrʉ? ¿Mama djõ panʉne maʉ̃ druaɗebemarãba dairãra quenanamãrẽã edebʉrʉca? ¿Dai wẽrãrãra, warrarã siɗa maʉ̃ ẽberãrãba ara ãdjirã itea jidaɗamãrẽã edebʉrʉca? ¿Egiptoɗaa jẽda wãnida biara ɓʉẽ́ca?–
4 Maʉ̃be ãdjiduɓa jara duanesiɗaa:
–Aɓa edaɗia dadjirã boro bamãrẽã. Maʉ̃be Egiptoɗaa jẽda wãnia.–
5 Maʉ̃ ũrĩsiɗaɗe Moisera, Aaroʉ̃ siɗa jũma israelerã quĩrãpita chĩrãboroɗe ɓarru copanesiɗaa.*
6 Maʉ̃ne Nuʉ̃ warra Josueba, Jepone warra Cale biɗa ãdjia cacuaɗe jʉ̃ panʉda sopuaba cõãtasiɗaa. Maʉ̃ umébemara Canaaʉ̃ drua acʉɗe wã panananebema basía.
7 Ãdjia israelerãa jarasiɗaa:
–Dairãba acʉɗe wã panana ẽjũãra bio bia ɓʉa.
8 Maʉ̃ druaɗe baridua ne upeɗaɗara bia zaubaria. Ãcõrẽba dadjirãda bia unu ɓʉbʉrʉ maʉ̃ druaɗaa edepeɗa jũma diaya.
9 Maʉ̃ bẽrã Ãcõrẽra igararãnadua. Idjaɓa maʉ̃ druaɗebemarãda wayarãnadua. Dadjirãba poyaɗia, ãdjirãra caiba carebai neẽ́ panʉ bẽrã. Baribʉrʉ Ãcõrẽda dadjirã ume ɓʉa. Maʉ̃ bẽrã ãdjirãra wayarãnadua.–
10 Mãwã jara pananamĩna puruba ãdjira mõgaraba taɓari beaɗiaɗa asiɗaa. Mãwã duanʉne cawaẽ́ne ãdjirãba unusiɗaa Ãcõrẽ quĩrãwãrẽã dorrodorroada idji wua deɗe ʉ̃naga dogoda.
11 Maʉ̃ne Ãcõrẽba Moisea jarasia:
–¡Naʉ̃ ẽberãrãba baridua carea mʉ̃ra igarabadaa! ¡Mʉ̃a ãdjirã tãẽna ne ununaca waiɓʉa ɓeada oɗamĩna waɗibiɗa mʉ̃ra ĩjã amabadaa!
12 Maʉ̃ carea mʉ̃a ãdjirãra quinibiya. Baribʉrʉ bʉɗeba mʉ̃a ãdjirã cãyãbara puru waiɓʉara ɓʉda idjaɓa ʉɓʉara ɓʉda yõbiya.–
Moiseba israelerã carea Ãcõrẽa beɗea djuburiaɗa
13 14:13-14 Moiseba Ãcõrẽa jarasia:
–Bʉ ʉɓʉaɗeba naʉ̃ ẽberãrãra Egiptoɗeba ẽdrʉ enesia. Maʉ̃da bʉa ãdjirãda quinibibʉrʉ egiptorãba ũrĩnapeɗa Canaaʉ̃ druaɗebemarãa nẽbʉrʉɗia. Mʉ̃ Boro, Canaaʉ̃nebemarãba naẽna ũrĩsiɗaa bʉra dairã ume ɓʉda, dairãma ebuɗa odjasida, bʉ jʉ̃rãrãda dairã ʉ̃rʉ̃ nĩbabarida, ãsa bʉra jʉ̃rãrã ʉ̃tʉba eɗaa drasoa jira ɓʉɗe dairã na wãbarida idjaɓa diamasi ara maʉ̃ jʉ̃rãrãda tʉbʉ quĩrãca eradrʉ nũmabarida.
15 Bʉa naʉ̃ ẽberãrãda jũma quinibibʉrʉ, bʉa o ɓʉ ũrĩpeɗaɗaba nãwã jaraɗia:
16 “Ãcõrẽba israelerãra idjia diai jaraɗa ẽjũãnaa poya edeẽ́ basía. Maʉ̃ bẽrã ãdjirãra ẽjũã põãsa ewaraga ɓʉɗe jũma quinibisia.”
17 Mʉ̃ Boro, mãwã jararãnamãrẽã mʉ̃ quĩrã djuburia bʉ ʉɓʉara unubidua ara bʉa jaraɗa quĩrãca.
18 Bʉa jarasia bʉra baridua quĩrũcada idjaɓa ẽberãrãra bio quĩrĩã ɓʉda. Maʉ̃ awara jarasia ãdjia cadjirua obadara, bʉ beɗea igarabada siɗa bʉa quĩrãdoabarida. Mãwãmĩna dji beɗeaɗe ɓʉra bʉa cawa obariaɗa asia. Dji zezaba cadjirua oɗa carea idjida, idji warrarãda, idji wiuzaquerãda, ãdjirã warrarã siɗa cawa o ɓabariaɗa asia.*
19 Maʉ̃ bẽrã bʉ quĩrĩã waiɓʉa ɓʉɗeba naʉ̃ ẽberãrãba cadjirua opeɗaɗara quĩrãdoadua ãdji Egiptoɗeba ẽdrʉpeɗaɗa ewariɗeba aɓa iɗiɗaa bʉa quĩrãdoaɗa quĩrãca.–
20 Ãcõrẽba jarasia:
–Ãdjia cadjirua opeɗaɗara mʉ̃a quĩrãdoasia bʉa beɗea djuburiaɗa bẽrã.
21 Mãwãmĩna mʉ̃ra wãrãda zocai ɓʉ bẽrã, idjaɓa wãrãda jũma naʉ̃ ẽjũãne dji dromaara ɓʉ bẽrã, wãrãda nãwã cawa oya.
22 14:22-23 Naʉ̃ ẽberãrã ni aɓaʉda mʉ̃a ãdji drõã naẽnabemarãa diai jaraɗa ẽjũãne idu jũẽbiẽ́a. Ãdjirãba mʉ̃ quĩrãwãrẽã dorrodorroada unupeɗaɗamĩna idjaɓa Egiptoɗe, ẽjũã põãsa ewaraga ɓʉɗe biɗa mʉ̃a ne ununaca o ɓʉda unupeɗaɗamĩna mʉ̃ra ĩjãnaẽ́ basía. Ãtebʉrʉ mʉ̃a poya oẽ́ quĩrãca ɓarima zocãrã biẽ́ beɗeasiɗaa.* Mʉ̃da igarapeɗaɗa bẽrã ãdjirã ni aɓaʉda Canaaʉ̃ druaɗe jũẽnaẽ́a.
24 Baribʉrʉ mʉ̃ nezoca Cale crĩchara awara ɓʉa. Idjiabʉrʉ mʉ̃ra ne jũmane bia ẽpẽbaria. Maʉ̃ bẽrã idjia acʉɗe wã ɓaɗa ẽjũãne mʉ̃a idjira jũẽbiya. Idjia, idjiɗeba yõbʉdarã biɗa maʉ̃ ẽjũãra edaɗia.
25 Baribʉrʉ nu bãrãra Pusa Purruɗaa wãbada oɗe jẽda wãnadua ẽjũã põãsa ewaraga ɓʉɗaa. Ara nawena amalecitarãda cananeorã siɗa Canaaʉ̃ drua jeweɗaɗe duanʉa.–
26 Idjaɓa Ãcõrẽba Moisea, Aaroʉ̃a biɗa nãwã jarasia:
27 –¿Aɓa sãʉ̃be naʉ̃ puru cadjiruaba mʉ̃ra biẽ́ jara panani? Mʉ̃a ũrĩ ɓʉa ãdjia mʉ̃da biẽ́ jara panabadada.
28 Maʉ̃ bẽrã ãdjirãa nãwã jaraɗe wãnadua: “Ãcõrẽba nãwã jara ɓʉa: mʉ̃ra wãrãda zocai ɓʉ bẽrã bãrãba jarapeɗaɗa quĩrãca wãrãda oya.
29 Jũma bãrã veinte poa auɗu ɓea mʉ̃a juachabiɗaba mʉ̃da biẽ́ jarapeɗaɗa bẽrã naʉ̃ ẽjũã põãsa ewaraga ɓʉɗe beuɗia.
30 Bãrãnebema ni aɓaʉda mʉ̃a wãrãneba bãrãa diai jaraɗa ẽjũãnaa jũẽne wãnaẽ́a. Aɓabe Jepone warra Caledrʉ, Nuʉ̃ warra Josue siɗa maʉ̃ ẽjũãne jũẽne wãnia.
31 Bãrãba jarasiɗaa maʉ̃ druaɗebemarãba bãrã warrarãra ara ãdji itea jida edeɗida. Baribʉrʉ maʉ̃ drua bãrãba igarapeɗaɗara mʉ̃a bãrã warrarãa diaya. Maʉ̃be ãdjirãra maʉ̃ druaɗe bia panania.
32 Baribʉrʉ bãrã dji drõãrãra naʉ̃ ẽjũã põãsa ewaraga ɓʉɗe beuɗia.
33 Bãrã warrarãra bãrã ume naʉ̃ ẽjũã põãsa ewaraga ɓʉɗe cuarenta poa pʉrrʉa nĩbaɗia oveja wagabari pʉrrʉa nĩbabari quĩrãca. Bãrãba mʉ̃ra igarapeɗaɗa bẽrã, bãrã warrarãra bia mĩga panania aɓa bãrã jũma beubʉdaɗaa.
34 Canaaʉ̃ drua acʉɗe wã panana ẽberãrãra cuarenta ewari mama panasiɗa bẽrã, bãrãra cuarenta poa bia mĩga pananida panʉa mʉ̃ igarapeɗaɗa carea. Mãwã bãrãba cawaɗia mʉ̃ quĩrũbira sãwãbʉrʉ ɓʉda.”
35 Mʉ̃ra Ãcõrẽa. Mʉ̃a jaraɗara wãrãda oya. Naʉ̃ puru dji cadjiruada mʉ̃a cawa oya jũmarãba mʉ̃da igarapeɗaɗa bẽrã. Naʉ̃ ẽjũã põãsa ewaraga ɓʉɗe beuɗia.–
36 14:36-37 Maʉ̃be Moiseba Canaaʉ̃ drua acʉɗe diabueɗarãra Ãcõrẽba cawaẽ́ne quinibisia. Mãwã quinibisia Canaaʉ̃ druaɗeba jẽda zeɗapeɗa israelerãa idjida biẽ́ jarabisiɗa bẽrã idjaɓa sewaɗeba maʉ̃ ẽjũãra biẽ́ taɓʉaɗa asiɗa bẽrã.
38 Canaaʉ̃ drua acʉɗe wã panananebemada umébe beuɗaẽ́ basía; Nuʉ̃ warra Josueda idjaɓa Jepone warra Cale siɗa.
Canaaʉ̃ druaɗebemarãba israelerã poyapeɗaɗa
39 Moiseba jũma Ãcõrẽba jaraɗara israelerãa jarasia. Maʉ̃ carea ãdjirãra sopuaɗeba bio jĩã duanesiɗaa.
40 Maʉ̃ bẽrã nurẽma diapeɗeɗa ãdjirãra piradrʉɗapeɗa Canaaʉ̃ druaɗe eyaiɗa ɓʉmaa wãni carea panasiɗaa. Nãwã jarasiɗaa:
–Dairãba cadjiruada osiɗaa maʉ̃ druara poya edaɗaẽ́ana asiɗaɗe. Dairãra wãnia Ãcõrẽba diai jaraɗa druaɗaa.–
41 Baribʉrʉ Moiseba jarasia:
–¿Bãrãba cãrẽ cãrẽã Ãcõrẽba jaraɗara ĩjãnaẽ́? Bãrãda Canaaʉ̃ druaɗaa wãnibʉrʉ, bia wãnaẽ́a.
42 Mama wãrãnadua. Ãcõrẽra bãrã ume wãẽ́ bẽrã dadjirã dji quĩrũba bãrãra quenania.
43 Bãrãba Ãcõrẽra igarasiɗa bẽrã idjira bãrã ume ɓaẽ́a. Maʉ̃ bẽrã amalecitarã ume idjaɓa cananeorã ume djõbʉdaɗe ãdjirãba bãrãra quenania.–
44 Mãwã jaraɗamĩna israelerãba ĩjãnaẽ́ basía. Canaaʉ̃ druaɗe eyaiɗa ɓʉare wãsiɗaa. Baribʉrʉ Moisera wãẽ́ basía. Ãcõrẽ baurude siɗa israelerã wua de eropanʉma ɓesia.
45 Maʉ̃ne eyaɗe panʉ amalecitarãra, cananeorã siɗa israelerã ume djõne zesiɗaa. Israelerãra poyaɗapeɗa ãdjirã caiɗu ẽpẽ quena wãsiɗaa aɓa Hormá abadaɗaa.*
Beɗea eɗaare
^ 14:5 Ʉ̃cʉrʉmaarã ãdjira chĩrãboroɗe ɓarru copanesiɗaa Ãcõrẽa beɗea djuburiaɗi carea idjaɓa ʉ̃cʉrʉmaarã mãwã osiɗaa puru jẽda wãrãnamãrẽã beɗea djuburiaɗi carea.
^ 14:18 Exodo 34:6-7
^ 14:22-23 Ɓarima zocãrã. Hebreo beɗeaɗe jara ɓʉa “ɓarima die.”
^ 14:45 Hebreo beɗeaɗe Hormá trʉ̃ba jara ɓʉa “jũma ãrĩpeɗaɗa.”
