Numero 16:1-50
16 16:1-2 Izar warrada Core abadjiɗaa. Idjira Levi warra Coáɗeba yõna basía. Corera dewara ẽberãrã ũbea panʉ ume beɗea ausiɗaa Moise ãyã ɓʉɗi carea. Maʉ̃ ũbeabemara Rubeʉ̃neba yõpeɗaɗa basía; aɓa Eliá warra Dataʉ̃ basía, aɓa idji warra Abiraʉ̃ basía, idjaɓa aɓa Pele warra Oʉ̃ basía. Ãdjirãare israelerã bororãda 250 panasiɗaa. Maʉ̃ bororãra dji biara ɓeada puruba edaɗa basía.
3 Jũma maʉ̃ ẽberãrãra Moisemaa Aaroʉ̃maa biɗa wãnapeɗa nãwã jarasiɗaa:
–¡Aɓa iɗibe bãrãra dairã boro baɗia! Purura jũmaena Ãcõrẽba idji itea edasia. Idjira dairã ume biɗa ɓʉa. Mãwã ɓʉ bẽrã ¿cãrẽ cãrẽã jũma Ãcõrẽ puru cãyãbara bãrãra dji dromaara panʉda crĩcha panʉ?–
4 Maʉ̃ ũrĩsiɗe Moisera chĩrãboroɗe ɓarru coɓesia Ãcõrẽa beɗea djuburiai carea.*
5 Maʉ̃be Corea, idjiare panʉrãa biɗa jarasia:
–Nu diapeɗa Ãcõrẽba cawabiya caida idjiɗeda idjaɓa caida edasida idji sacerdote bamãrẽã. Idjia edaɗa ẽberãdrʉ idji caita idu wãbiya.
6 16:6-7 Core, bʉa, bʉare panʉrã biɗa nãwã oɗadua: bãdjiza quera babada epeɗecoda edaɗapeɗa nu tʉbʉdauda, quera baɗi careabema siɗa maʉ̃ epeɗecoɗe ɓʉɗadua. Maʉ̃da Ãcõrẽ quĩrãpita ɓʉɗe wãnadua. Maʉ̃ne Ãcõrẽba cawabiya caida edasida idji sacerdote bamãrẽã. ¡Bãrã levitarãra jũmawãyã beɗea panʉa. Ya ɓesia!–
8 Moiseba Corea idjaɓa jarasia:
–Bãrã levitarã, ũrĩnadua.
9 Dadji israelerã Ãcõrẽba bãrãdrʉ awara ɓʉsia idji caita poya wãnamãrẽã. Mãwã israelerãba Ãcõrẽa animarã babue diaɗe wãbʉdaɗe bãrãbʉrʉ ãdjirãra carebabadaa idjaɓa dadjirã nocoɗaa wãbʉdaɗe Ãcõrẽ wua dera edebadaa. ¿Ara maʉ̃ba bia ɓʉẽ́ca?
10 Core, Ãcõrẽba bʉra, waabema levitarã siɗa idji caita idu wãbibaria mãwã oɗamãrẽã. Baribʉrʉ bãrãmaarã maʉ̃gʉra bia ɓʉẽ́a ãtebʉrʉ Ãcõrẽ sacerdoterã ba quĩrĩã panʉa.
11 Maʉ̃ bẽrã bʉa, bʉare ɓea biɗa Ãcõrẽra igara panʉa. ¿Cãrẽ cãrẽã Aaroʉ̃ra biẽ́ jara panʉ? ¿Aaroʉ̃ra beɗeaɗe ɓʉca Ãcõrẽba idji sacerdote bamãrẽã ɓʉɗa bẽrã?–
12 Maʉ̃be Moiseba Eliá warrarã Dataʉ̃da, Abiraʉ̃ siɗa trʉ̃bisia. Baribʉrʉ ãdjia jarabisiɗaa:
–Daira bʉmaa wãnaẽ́a.
13 Bʉa daira drua biaɗeba ẽdrʉ enesia. Maʉ̃ druaɗebʉrʉ baridua ne upeɗaɗara bia zaubaria. Bʉa daira naʉ̃ ẽjũã põãsa ewaraga ɓʉɗe jũma quinibibʉrʉa. Maʉ̃da ¿bʉra waɗibiɗa dai boroda ɓa quĩrĩã ɓʉca?
14 Bʉa drua biaɗaa edeyaɗa asia. Maʉ̃ druaɗe baridua ne upeɗaɗara bia zaubariaɗa asia. Baribʉrʉ bʉa daira mamaa edeẽ́ taɓʉa. Ẽjũãda, uva bara ɓʉ ẽjũã siɗa diaẽ́ taɓʉa. ¿Bʉa waɗibiɗa daira cũrũga quĩrĩã ɓʉca?* Daira bʉmaa wãnaẽ́a.–
15 Mãwã jara panʉ carea Moisera bio quĩrũpeɗa Ãcõrẽa jarasia:
–Ãdjia bʉ́a diabʉdara bia unurãdua. Mʉ̃ra ãdji boromĩna ãdji burroda, ni cãrẽ siɗa ãdjiɗera jãrĩẽ́ ɓʉa. Mʉ̃a ãdjira ni aɓa biɗa biẽ́ oẽ́ ɓʉa.–
16 Maʉ̃be Moiseba Corea jarasia:
–Nu bʉra, bʉare panʉrã siɗa Ãcõrẽ quĩrãpita wãnadua idji wua demaa. Aaroʉ̃ siɗa mama ɓaya.
17 Bʉare panʉ 250 ẽberãrãba ãdji quera babada epeɗecora edaɗapeɗa querara coa nũmʉnadua. Maʉ̃gʉra Ãcõrẽ wua demaa idji quĩrãpita edeɗadua. Bʉa, Aaroʉ̃ biɗa bãrã quera babada epeɗecora edeɗadua.–
18 Nurẽma ãdjirãza quera babada epeɗecoda edaɗapeɗa tʉbʉdauda eɗa ɓʉɗapeɗa querada coa nũmʉsiɗaa. Ãdjirãra, Moisera, Aaroʉ̃ siɗa Ãcõrẽ wua deɗe eɗa wãbada caita duanasiɗaa.
19 Coreba jũma Israel purura Ãcõrẽ wua deɗe eɗa wãbadamaa zebisia Moise, Aaroʉ̃ siɗa ãyã ɓʉɗi carea. Cawaẽ́ne Ãcõrẽ quĩrãwãrẽã dorrodorroada ãdjirã quĩrãpita ʉ̃naga dogosia.
20 Maʉ̃ne Ãcõrẽba Moisea, Aaroʉ̃a biɗa jarasia:
21 –Naʉ̃ ẽberãrã caitabemada ãyã wãnadua. Mʉ̃a ãdjirãra aɓeɗa jũma quinibiya.–
22 Baribʉrʉ Moisera Aaroʉ̃ siɗa chĩrãboroɗe ɓarru copanenapeɗa Ãcõrẽa nãwã beɗea djuburiasiɗaa:
–Ãcõrẽ, bʉɗeba ẽberãrãra jũma zocai ɓeaa. ¿Aɓaʉba cadjirua oɗa carea bʉra jũma naʉ̃ puru ume quĩrũ ɓaica?–
23 Ãcõrẽba Moisea jarasia:
24 –Purua jaradua Core wua de caitabemada, Dataʉ̃ wua de caitabemada, idjaɓa Abiraʉ̃ wua de caitabemada ãyã wãnamãrẽã.–
25 Ara maʉ̃da Moisera piradrʉpeɗa Dataʉ̃ ɓʉmaa idjaɓa Abiraʉ̃maa biɗa wãsia. Israelerã bororã siɗa Moise caiɗu wãsiɗaa.
26 Maʉ̃ne Moiseba purua jarasia:
–Jãʉ̃ cadjirua obadarã wua de caitabemada ãyã wãnadua. Ãdjia eropanʉnebemada tãrãnadua. Tãnibʉrʉ bãrã siɗa beuɗia jũma ãdjia cadjirua opeɗaɗa carea.–
27 Ara maʉ̃da israelerãra Core wua de caitabemada, Dataʉ̃ wua de caitabemada idjaɓa Abiraʉ̃ wua de caitabemada ãyã wãsiɗaa. Maʉ̃ne Dataʉ̃ra, Abiraʉ̃ siɗa ãdji wua de dajada zeɗapeɗa ãdji deɗe eɗa wãbada caita ʉ̃ta nũmeasia. Ãdji ume dji quimada, jũma ãdji warrarã siɗa nũpanasiɗaa.
28 Maʉ̃ne Moiseba jarasia:
–Nãwã bãrãba cawaɗia ara mʉ̃djia quĩrĩã ɓʉɗeba bãrã boroda ɓeẽ́ basida, ãtebʉrʉ Ãcõrẽbʉrʉ mʉ̃ra ɓʉsida:
29 naʉ̃ ẽberãrãda dadji beubada quĩrãca beuɗibʉrʉ, bãrãba cawaɗia Ãcõrẽba mʉ̃ra ɓʉẽ́ basida bãrã boro bamãrẽã.
30 Baribʉrʉ Ãcõrẽba egoroda cawaẽ́ne yã dogobipeɗa ãdjira, jũma ãdjia eropanʉ siɗa egoroba mĩbʉrʉ, ãdjirã zocai panʉne beuɗarã jaure panabadamaa wãnibʉrʉ, bãrãba cawaɗia ãdjiabʉrʉ Ãcõrẽda igarasiɗada. Mãwã cawaɗia, ẽberãrã maʉ̃ quĩrãca beubʉdada dadjirãba waɗibiɗa ununaca bẽrã.
31 Moiseba mãwã jarabʉrʉɗe Dataʉ̃ ɓʉmaʉba aɓa Abiraʉ̃ ɓʉmaa egorora yã dogosia.
32 Maʉ̃ne egoroba ãdjira, ãdji ẽberãrãra, Corera, idji ẽberãrãra, idjaɓa jũma ãdjia eropanana siɗa mĩsia.
33 Ãdjirã mĩpeɗa egorora wayacusa araa catʉ dogosia. Mãwã zocai panʉne maʉ̃ ẽberãrãra jũma ãdjia eropanana siɗa beuɗarã jaure panabadamaa wãsiɗaa. Israelerã tãẽnabemada nẽbasiɗaa.
34 Egoroba mĩbʉrʉɗe maʉ̃ ẽberãrã ɓiabʉda carea ãdjirã caita duanʉra ãyã pira wãsiɗaa. Maʉ̃ne nãwã ɓiasiɗaa:
–¡Egoroba dadjirã siɗa mĩcuaya!–
35 Maʉ̃ awara Ãcõrẽba tʉbʉ uruada idji ɓʉmaʉba quera bá dia panʉ ẽberãrãmaa eradrʉbisia. Mãwã eradrʉbʉrʉba maʉ̃ 250 ẽberãrãra jũma bá quenasia.
36 Maʉ̃be Ãcõrẽba Moisea jarasia:
37 16:37-38 –Sacerdote Aaroʉ̃ warra Eleazaa jaradua quera babada epeɗecora tʉbʉ cowa nũmʉnebemada jʉrʉ pemãrẽã. Tʉbʉdau epeɗecoɗe waɗi ɓʉra ãyã tʉmʉ peabueida ɓʉa. Maʉ̃ epeɗecoɗe mʉ̃́a querada bá diasiɗa bẽrã epeɗecora mʉ̃ itea ɓesia. Jãʉ̃ ẽberãrãba cadjiruada opeɗaɗa bẽrã beusiɗaa. Maʉ̃ bẽrã ãdji epeɗecora peweɗea berrachiɗapeɗa animarã babue diabadaɗe cara ɓʉɗadua israelerãba quĩrãnebaɗamãrẽã baridua ẽberãba querada mʉ̃́a bá diacara ɓʉda.–
39 Ara maʉ̃da sacerdote Eleazaba ẽberãrã tʉbʉba bá beupeɗaɗa quera babada epeɗecora jʉrʉ pesia. Jʉrʉ pepeɗa maʉ̃ epeɗeco bronce oɗara peweɗea berrachibisia animarã babue diabadaɗe cara ɓʉi carea.
40 Maʉ̃ra cara ɓʉsia israelerãba quĩrãnebaɗamãrẽã Aaroʉ̃ idjaɓa idjiɗeba yõbʉdarã awara ni aɓaʉba querada Ãcõrẽa bá diacara ɓʉda Ãcõrẽba Moisea jaraɗa quĩrãca. Ãdjirã awara bariduaba Ãcõrẽa querada bá diaibʉrʉ, maʉ̃ ẽberã siɗa beuya, Core, idjiare panana siɗa beupeɗaɗa quĩrãca.
41 Nurẽma jũma israelerãba wayacusa Moiseda Aaroʉ̃ siɗa nãwã biẽ́ jara duanesiɗaa:
–¡Bãrãba Ãcõrẽ ẽberãrãra beasiɗaa!–
42 Mãwã biẽ́ jara panʉra Moisema, Aaroʉ̃ma biɗa powua nũmasia. Maʉ̃ne Ãcõrẽ wua demaa acʉbʉɗaɗe cawaẽ́ne jʉ̃rãrãba dera ãnã edapeɗa Ãcõrẽ quĩrãwãrẽã dorrodorroada ʉ̃naga dogosia.
43 Ara maʉ̃da Moisera Aaroʉ̃ siɗa Ãcõrẽ wua de quĩrãpe wãsiɗaa.
44 Maʉ̃ne Ãcõrẽba Moisea jarasia:
45 –¡Naʉ̃ puru caitabemada ãyã wãnadua! ¡Mʉ̃a ãdjirãra aɓeɗa jũma quinibiya!–
Ara maʉ̃da Moisera Aaroʉ̃ siɗa chĩrãboroɗe ɓarru copanesiɗaa.
46 Moiseba Aaroʉ̃a jarasia:
–Bʉ quera babada epeɗecora isabe enedua. Animarã babue diabadaɗe ɓʉ tʉbʉdauda eɗa ɓʉpeɗa incienso querada coa nũmʉdua. Maʉ̃be israelerã duanʉmaa isabe wãpeɗa Ãcõrẽa diadua ãdjirãba cadjirua opeɗaɗara quĩrãdoamãrẽã. Ãcõrẽra bio quĩrũ ɓʉ bẽrã ãdjirãra quinibʉdaa.–
47 Ara maʉ̃da Aaroʉ̃ba osia Moiseba jaraɗa quĩrãca. Idji quera babada epeɗecora edapeɗa israelerã duanʉmaa pira wãsia. Jũẽbʉrʉbara israelerãra ʉ̃cʉrʉ beucuaɗoasia. Maʉ̃ne idjia querada coa nũmʉsia ãdjirãba cadjirua opeɗaɗara Ãcõrẽba quĩrãdoamãrẽã.
48 Idjira nũmesia dji quinipeɗaɗa taɓea, dji zocai panʉ ẽsi. Mãwã ãdjirãra waa quininaẽ́ basía.
49 Maʉ̃ ewariɗe 14,700 ẽberãrãra quinisiɗaa Coreare ɓeaɗa naẽna quinipeɗaɗa juachaɗaẽ́.
50 Ẽberãrãra waa quininaẽ́ bẽrã Aaroʉ̃ra Moisemaa wãsia Ãcõrẽ wua deɗe eɗa wãbada caita.
