Numero 17:1-13
17 Maʉ̃be Ãcõrẽba Moisea jarasia:
2 –Israelerãa jaradua bacuruda doce enenamãrẽã. Israelɗeba yõna doce puruɗebema bororãba bacuruda aɓa aɓa diaɗida panʉa. Maʉ̃ bacuruɗe dji bororã trʉ̃da ɓʉdua.
3 Leviɗeba yõna puruba enena bacuruɗe Aaroʉ̃ trʉ̃da ɓʉdua. Israelɗeba yõna puruza bacuru aɓa diaɗida panʉa ãdji boro trʉ̃da ɓʉmãrẽã.
4 Maʉ̃ bacurura mʉ̃ wua deɗe baurude quĩrãpe ɓʉdua mʉ̃ bãrã ume beɗeabarima.
5 Nu bacuru aɓa quedua bara ɓaya. Maʉ̃ bacuru djibarira mʉ̃a edasia mʉ̃ sacerdote bamãrẽã. Maʉ̃ ununapeɗa israelerãba bãrãda waa biẽ́ jaraɗaẽ́a. Mãwã mʉ̃a ãdjirãra chupeabiya.–
6 Moiseba israelerãa mãwã jarasia. Ara maʉ̃da Israelɗeba yõna doce puruɗebema bororãba ãdji bacuru cawacawa Moisea diaɗe zesiɗaa. Doce bacurura diasiɗaa. Aaroʉ̃ne siɗa diasia.
7 Moiseba maʉ̃ bacurura Ãcõrẽ wua deɗe baurude quĩrãpe ɓʉsia.
8 Nurẽma Moise Ãcõrẽ wua deɗe eɗa wãbʉrʉɗe unusia Leviɗeba yõna Aaroʉ̃ bacurura pãwãrã quedua bara ɓʉda, põnõ bara ɓʉda, idjaɓa almendra tada zaupeɗa purea jira ɓʉda.
9 Moiseba bacurura Ãcõrẽ wua deɗeba dajada israelerãmaa jũma edesia. Israelerãba acʉɗapeɗa ãdjiɗe cawacawa edasiɗaa.
10 Maʉ̃be Ãcõrẽba Moisea jarasia:
–Aaroʉ̃ bacurura wayacusa mʉ̃ baurude quĩrãpe waga ɓʉdua. Maʉ̃ bacurura waga eropananida panʉa mʉ̃ igarabadarãba quĩrãnebaɗamãrẽã mʉ̃a Aaroʉ̃drʉ, idjiɗeba yõbʉdarã siɗa edasida mʉ̃ sacerdoterã ɓeaɗamãrẽã. Mãwã ãdjirãba mʉ̃ biẽ́ jara panʉda bʉa chupeabiya quinirãnamãrẽã.–
11 Ara maʉ̃da Moiseba jũma osia Ãcõrẽba idjía jaraɗa quĩrãca.
12 Maʉ̃be israelerãba Moisea jarasiɗaa:
–¡Dairãra beuɗia! ¡Aɓeɗa jũma quininia! ¡Jũma nẽbaɗia!
13 ¡Bariduada Ãcõrẽ wua de caita wãibʉrʉ beuya! ¡Dairãra jũma quininia!–
