Numero 21:1-35
21 Arad puruɗebema borora cananeo basía. Negue ẽjũã põãsa ewaraga ɓʉra idji drua basía. Idjia ũrĩsia israelerãra Atariʉ̃naa wãbada oɗe zebʉdada. Maʉ̃ bẽrã idji sordaorãda israelerã ume djõne edesia. Djõ panʉne ãdjirãba ʉ̃cʉrʉ israelerãra jida edesiɗaa.
2 Maʉ̃ bẽrã israelerãba Ãcõrẽa wãrãneba nãwã jarasiɗaa: “Dairãba naʉ̃ ẽberãrã poyaɗamãrẽã bʉa carebaibʉrʉ, ãdji purura jũma ãrĩcuaɗapeɗa babueɗia.”*
3 Israelerãba wãrãneba jarapeɗaɗara Ãcõrẽba bia ũrĩsia. Idjia carebasia ãdjirãba maʉ̃ cananeorãda poyaɗamãrẽã. Israelerãba jũma quenanapeɗa ãdji purura jũma ãrĩnapeɗa babuesiɗaa. Maʉ̃ bẽrã mama trʉ̃ ɓʉsiɗaa Hormá.*
Moiseba bronce dama oɗa
4 Hor eyaɗeba israelerãra Pusa Purruɗaa wãbada óare wãsiɗaa Edoʉ̃ drua auɗu pʉrrʉgaɗi carea. Mãwã wãnane sẽ panesiɗaa.
5 Maʉ̃ carea Ãcõrẽda, Moise siɗa nãwã biẽ́ jara duanesiɗaa:
–¿Bʉa dairãra Egiptoɗeba ẽdrʉ enesica naʉ̃ ẽjũã põãsa ewaraga ɓʉɗe quininamãrẽã? Coɗira neẽ́a. Baido siɗa neẽ́a. Idjaɓa naʉ̃ maná warraẽ́ taɓʉ co panʉba sẽ panʉa.–
6 Maʉ̃gʉ carea Ãcõrẽba israelerãmaa dama dji arada zocãrã diabuesia. Maʉ̃ damaba israelerãra cácuaɗapeɗa zocãrã quinisiɗaa.
7 Maʉ̃ bẽrã israelerãra Moisemaa wãnapeɗa jarasiɗaa:
–Dairãba cadjiruada osiɗaa Ãcõrẽda, bʉ siɗa biẽ́ jarasiɗa bẽrã. Dai quĩrã djuburia Ãcõrẽa iwiɗidua naʉ̃ damara ãyã wãbicuamãrẽã.–
Ara maʉ̃da Moiseba ãdjirã carea Ãcõrẽa beɗea djuburiasia.
8 Maʉ̃ne Ãcõrẽba Moisea jarasia:
–Bronceda dama quĩrãca aɓa opeɗa bacuru eraɗaɗe ʉ̃tʉ jira ɓʉdua. Damaba aɓaʉda casira, maʉ̃ ẽberãba bronce oɗa damada acʉibʉrʉ biaya.–
9 Ara maʉ̃da Moiseba bronceda dama quĩrãca opeɗa bacuru eraɗaɗe ʉ̃tʉ jira ɓʉsia. Damaba aɓa cabʉrʉɗe maʉ̃ ẽberãba bronce oɗa damada acʉsira biabadjia.
Israelerã Moab druaɗe jũẽpeɗaɗa
10 Mamaʉba wãnapeɗa israelerãra Obot abadaɗe duanesiɗaa.
11 Mamaʉba wãnapeɗa Ije-Abariʉ̃ne duanesiɗaa. Maʉ̃ra Moab druaɗeba ʉ̃mãdau odjabariare ẽjũã põãsa ewaraga ɓʉɗe ɓʉa.
12 Mamaʉba wãnapeɗa Zared do jeweɗaɗe duanesiɗaa.
13 Mamaʉba wãnapeɗa Arnoʉ̃ do quĩrãrẽ duanesiɗaa ẽjũã põãsa ewaraga ɓʉɗe. Maʉ̃ ẽjũãra amorreorã druaɗe ɓʉa. Arnoʉ̃ dora Moab drua idjaɓa amorreorã drua ẽsi ɓʉa.
14 21:14-15 Maʉ̃ bẽrã carta Ãcõrẽ Djõna abadaɗe nãwã ɓʉ́ ɓʉa:
Vaheb puru Supa druaɗe ɓʉare, Arnoʉ̃ do jʉwateare biɗa wãyã wãsiɗaa.
Do zaque ɓea caita Ar abadaɗaa wãsiɗaa Moab drua orrocawa.*
16 Mamaʉba israelerãra baido juebada uria Beer abadaɗaa wãsiɗaa. Mama Ãcõrẽba Moisea nãwã jarasia:
–Purura ãbaa jʉredua. Mʉ̃a ãdjirãa baidoda diaya.–
17 Maʉ̃ne israelerãra nãwã trʉ̃ãsiɗaa:
Baido juebada uriara bogadrʉ ɓadua. Maʉ̃ baido carea trʉ̃ãnia.
18 Dadjirã bororãba ãdji bacuruba naʉ̃ baido juebada uriara corosiɗaa. Dji dromarãba ãdji bardonaba corosiɗaa.
Mama ẽjũã põãsa ewaraga ɓʉɗeba Matanánaa wãsiɗaa.
19 Mamaʉba Najalielɗaa wãsiɗaa. Mamaʉba Bamoɗaa wãsiɗaa.
20 Mamaʉba jeweɗa Moab druaɗe ɓʉɗe jũẽne wãnapeɗa Pisga eyaɗe duanesiɗaa. Pisga eyaɗeba Jesimoʉ̃ ẽjũã põãsa ewaraga ɓʉra unubaria.
Israelerãba amorreorã poyapeɗaɗa
21 Maʉ̃be israelerãba amorreorã boro Sehoʉ̃ abadamaa ʉ̃cʉrʉ diabuesia nãwã jaraɗamãrẽã:
22 –Dai quĩrã djuburia bʉ druaɗe idu wãyã wãbidua. Dairãra bãrã néuɗe eɗa wãnaẽ́a, bãrã uva ẽjũãne biɗa eɗa wãnaẽ́a, ni bãrã baido juebada uriaɗebemada doɗaẽ́a. Ẽberãrã Boro abada oɗe quĩrãipa wãnia.–
23 Baribʉrʉ Sehoʉ̃ba israelerãra idji druaɗe idu wãbiẽ́ basía. Idji sordaorãra jũma trʉ̃cuapeɗa ẽjũã põãsa ewaraga ɓʉɗe israelerãmaa wãnapeɗa Jahaza puru caita djõsiɗaa.
24 Baribʉrʉ israelerãba ãdjirãra poyaɗapeɗa ãdji druara jãrĩsiɗaa Arnoʉ̃ doɗeba aɓa Jabó doɗaa amonitarã drua daucha. Amonitarãba ãdji druara bio waga eropanasiɗaa.
25 Israelerãba amorreorã puru ɓeada jũma poyasiɗaa; dji puru droma Hesboʉ̃ abadara, puru zaquerã siɗa. Poyaɗapeɗa maʉ̃ puruɗe panesiɗaa.
26 Amorreorã boro Sehoʉ̃ra Hesboʉ̃ puruɗe ɓabadjia. Naẽna idjira moabitarã boro ume djõpeɗa ãdji druara jũma jãrĩsia aɓa Arnoʉ̃ do daucha.
27 Maʉ̃ carea nãwã jarabadaa:
¡Hesboʉ̃ purura wayacusa oɗe zeɗadua! Sehoʉ̃ purura idji ɓaɗa quĩrãca bia oɗia.
28 Sehoʉ̃ sordaorãra Hesboʉ̃ puruɗeba wãsiɗaa. Tʉbʉ urua eradrʉbʉrʉ quĩrãca Sehoʉ̃ puruɗeba wãsiɗaa.
Maʉ̃ne Ar puru Moab druaɗe ɓʉra babuesiɗaa. Arnoʉ̃ do icawa eyaɗe ɓea puru siɗa jũma babuesiɗaa.*
29 ¡Ay, moabitarã! ¡Bãrãra mĩã djuburi ɓeaa! Bãrã ãcõrẽ Quemo ẽpẽbadara beusiɗaa.
Amorreorã boro Sehoʉ̃ba bãrã warrarãra memenebisia. Bãrã caurãra jida edesia.
30 Baribʉrʉ dadjirãba ãdjira jũma poyasiɗaa.* Hesboʉ̃ puruɗeba aɓa Diboʉ̃ puruɗaa jũma quenasiɗaa.
Nopa puruɗeba aɓa Medebá puruɗaa jũma ãrĩnapeɗa babuesiɗaa.
Israelerãba Basaʉ̃nebema boro Og poyapeɗaɗa
31 Mãwã israelerãra amorreorã druaɗe panesiɗaa.
32 Maʉ̃ne Moiseba ʉ̃cʉrʉ diabuesia Jazer drua acʉɗamãrẽã. Israelerãba puru maʉ̃ druaɗe ɓeara poyaɗapeɗa amorreorãra ãyã jʉretasiɗaa. Mama biɗa israelerãra panesiɗaa.
33 Mamaʉba israelerãra Basaʉ̃naa wãbada oɗe wãsiɗaa. Maʉ̃ne Basaʉ̃nebema boro Og abadaba idji sordaorãda Edrei puru ɓʉmaa edesia israelerã ume djõni carea.
34 Mãwã panʉne Ãcõrẽba Moisea jarasia:
–Ne wayarãdua. Mʉ̃a idjida, idji sordaorã siɗa bãrãa jũma poyabiya. Idji drua siɗa mʉ̃a bãrãa diaya. Bãrãba Hesboʉ̃ne ɓaɗa amorreorã boro Sehoʉ̃ beapeɗaɗa quĩrãca idji siɗa beaɗadua.–
35 Ara maʉ̃da israelerãba Basaʉ̃nebema boro Og abadara, idji warrarãra, idji sordaorã siɗa jũma quenasiɗaa. Ni aɓaʉda zocai ɓʉɗaẽ́ basía. Maʉ̃be idji druara jũma edasiɗaa.
Beɗea eɗaare
^ 21:2 Hebreo beɗeaɗe naʉ̃ crĩchada dia ɓʉa: “Dji quĩrũra poyaɗapeɗa jũma idjia eroɓʉra Ãcõrẽ itea ɓeya. Maʉ̃ bẽrã jũma ãrĩnapeɗa babueɗia ni aɓaʉba ara idji itea edarãnamãrẽã.”
^ 21:3 Hebreo beɗeaɗe Hormá trʉ̃ba jara ɓʉa “jũma ãrĩpeɗaɗa.”
^ 21:14-15 Hebreo beɗeaɗe jũma maʉ̃ versículora ebuɗa ɓʉẽ́a.
^ 21:28 Do icawa eyaɗe ɓea puru. Hebreo beɗeaɗe maʉ̃ra ebuɗa ɓʉẽ́a.
^ 21:30 Dadjirãba ãdjira jũma poyasiɗaa. Hebreo beɗeaɗe mãwã ɓʉ́ ɓʉa. Griego beɗeaɗe jara ɓʉa “ãdjia eropananara jũma ãrĩsiɗaa.”
