Numero 22:1-41
22 Maʉ̃be israelerãra Moab drua jeweɗa ɓʉmaa wãbʉrʉsiɗaa. Mama Jordaʉ̃ do caita duanesiɗaa. Wa quĩrãrẽ ãdjirã quĩrãpe Jerico puruda ɓasia.
2 22:2-4 Maʉ̃ ewariɗe Zipor warra Baláda moabitarã boro basía. Maʉ̃ Balába cawasia israelerãba amorreorãda poyaɗapeɗa ãdji druara jãrĩsiɗada. Idjira, jũma moabitarã siɗa bio ne waya duanesiɗaa israelerã cãbana panʉ bẽrã. Maʉ̃ carea moabitarãba Madiaʉ̃nebema dji dromarãa jarasiɗaa:
–Naʉ̃ israelerãra cãbana panʉ bẽrã dadjirã druara jũma jãrĩnia pacaba chirua jũma cobari quĩrãca.–
5 Maʉ̃ bẽrã moabitarã boro Balába ʉ̃cʉrʉ diabuesia Beor warra Balaaʉ̃ trʉ̃ne. Maʉ̃ Balaaʉ̃ra Amav druaɗe ɓabadjia Petor puruɗe. Petor purura Euprate do icawa ɓasia.* Balába nãwã jarabisia: “Egiptoɗeba israelerãda mʉ̃ druaɗe cãbana duanane zesiɗaa. Ãdjirãba mʉ̃ druara aɓeɗa birasia.
6 Ãdjirãra dairã cãyãbara ʉɓʉara panʉa. Maʉ̃ bẽrã ãdjirã biẽ́ jara ɓʉɗe zedua. Mãwã mʉ̃a ãdjirãra poyapeɗa mʉ̃ druaɗebemada ãyã jʉrecuaisicada. Mʉ̃a cawa ɓʉa bʉa bariduada bia jara ɓʉibʉrʉ, maʉ̃gʉra bia ɓebaria. Idjaɓa bariduada biẽ́ jara ɓʉibʉrʉ, maʉ̃gʉra biẽ́ ɓebaria.”
7 Moab druaɗebema dji dromarãra, Madiaʉ̃nebema dji dromarã siɗa Balaaʉ̃maa wãsiɗaa. Paratada Balaaʉ̃a diaɗi carea edesiɗaa israelerã biẽ́ jara ɓʉɗe zemãrẽã. Balaaʉ̃ma jũẽsiɗaɗe jũma Balába jarabiɗada nẽbʉrʉsiɗaa.
8 Balaaʉ̃ba jarasia:
–Nama cãĩnadua. Nubʉrʉ mʉ̃a bãrãa jaraya Ãcõrẽba mʉ̃ra idu wãbida wa idu wãbiẽ́da.–
Mãwã jaraɗa bẽrã Moab druaɗebema dji dromarãra mama cãĩsiɗaa.
9 Maʉ̃ diamasi Ãcõrẽra Balaaʉ̃ma odjapeɗa nãwã iwiɗisia:
–¿Ẽberãrã bʉ deɗe panʉra cairãda jãwã panʉ?
10 Balaaʉ̃ba Ãcõrẽa panusia:
–Naʉ̃ ẽberãrãra moabitarã boro Zipor warra Balába nãwã jaraɗamãrẽã diabuesia:
11 “Egiptoɗeba ẽberãrãda cãbana mʉ̃ druaɗe jũẽsiɗaa. Mʉ̃ druara maʉ̃ ẽberãrãba aɓeɗa birasia. Maʉ̃ carea ãdjirã biẽ́ jara ɓʉɗe zedua. Mãwã mʉ̃a ãdjirãra poyapeɗa mʉ̃ druaɗebemada poya ãyã jʉrecuaisicada.”–
12 Ãcõrẽba Balaaʉ̃a jarasia:
–Naʉ̃ ẽberãrã ume wãrãdua. Ãdjia jara panʉ ẽberãrãra biẽ́ jara ɓʉrãdua mʉ̃a ãdjirãra careba ɓʉ bẽrã.–
13 Nurẽma Balaaʉ̃ra piraɓaripeɗa Balába diabueɗa dji dromarãa nãwã jarasia:
–Bãrã druaɗaa jẽda wãnadua. Ãcõrẽba mʉ̃ra bãrã ume idu wãbiẽ́a.–
14 Moab druaɗebema dji dromarãra jẽda Balámaa wãnapeɗa jarasiɗaa:
–Balaaʉ̃ra dairã ume ze quĩrĩãẽ́ basía.–
15 Maʉ̃ carea Balába wayacusa dewararãda Balaaʉ̃maa diabuesia. Maʉ̃gʉrãra dji naãrã wã panana cãyãbara dji dromaara ɓeasia idjaɓa cãbanaara wãsiɗaa.
16 Ãdjirãra Balaaʉ̃ma jũẽnapeɗa jarasiɗaa:
–Zipor warra Balába nãwã jarabisia: “Mʉ̃ quĩrã djuburia bʉra mʉ̃maa ze ama ɓarãdua.
17 Mʉ̃a bʉ́a paratada waiɓʉa diaya. Idjaɓa jũma bʉa jarabʉrʉ quĩrãca mʉ̃a oya. Maʉ̃ bẽrã mʉ̃ quĩrã djuburia naʉ̃ ẽberãrãra biẽ́ jara ɓʉɗe zedua.”–
18 Baribʉrʉ Balaaʉ̃ba panusia:
–Balába idji de parataba idjaɓa oroba bira coɓʉda diabʉrʉ siɗa mʉ̃a ni cãrẽ siɗa oẽ́a mʉ̃ Boro Ãcõrẽba mãwã obiẽ́bʉrʉ.
19 Mʉ̃ djuburia bãrã siɗa iɗi nama cãĩnadua. Naʉ̃ diamasi Ãcõrẽba mʉ̃́a quĩrã awara jaraisicada.–
20 Maʉ̃ diamasi Ãcõrẽra Balaaʉ̃ma odjapeɗa nãwã jarasia:
–Naʉ̃ ẽberãrãba bʉ jʉrʉɗe ze panʉ bẽrã ãdjirã ume wãdua. Baribʉrʉ aɓabe odua mʉ̃a bʉ́a jarabʉrʉ quĩrãca.–
Balaaʉ̃ Balámaa wãna
21 Nurẽma Balaaʉ̃ra piraɓaripeɗa idji burro ʉ̃rʉ̃ chũmebarira jʉ̃peɗa Moab druaɗebema dji dromarã ume wãsia.
22 Balaaʉ̃ nezocarãda umé idji ume wãsiɗaa. Idjira burro ʉ̃rʉ̃ nĩbasia. Baribʉrʉ idji wãbʉrʉ carea Ãcõrẽra bio quĩrũsia. Maʉ̃ bẽrã Ãcõrẽ nezoca bajãnebemada idji nocoɗaa wãrãmãrẽã o ẽsidra nũmesia.
23 Djõbada necoda idji jʉwaɗe eroɓasia. Balaaʉ̃ burroba idjira o ẽsidra nũmʉda unusiɗe o ãyã wãsia. Maʉ̃ carea Balaaʉ̃ba idji burrora ubadjia wayacusa oɗaa wãmãrẽã.
24 Nocoɗaa wãbʉdaɗe uva ẽjũãne jũẽsiɗaa. Dji ora maʉ̃ ẽjũã ẽsi wãbadjia. Orroza ẽjũãra mõgaraba auɗu jũrã ca ɓasia. Mama pẽsua wãbadjiɗaa maʉ̃ mõgaraba auɗu jũrã ca ɓʉ ẽsi. Maʉ̃be Ãcõrẽ nezoca bajãnebemara wayacusa o ẽsidra nũmesia Balaaʉ̃ nocoɗaa wãrãmãrẽã.
25 Balaaʉ̃ burroba Ãcõrẽ nezoca bajãnebema unusiɗe dji mõgaraba auɗu jũrã ca ɓʉɗaa catʉ ʉra nĩbaɗe wãsia. Maʉ̃ba Balaaʉ̃ jĩrũra catʉ ʉrratʉ edesia. Maʉ̃ carea Balaaʉ̃ba idji burrora wayacusa u jidasia.
26 Maʉ̃be o pẽsua wãbadaɗe Ãcõrẽ nezoca bajãnebemara ãdji nocoare nũmane wãsia. Mama poya ãyã wãẽ́ ɓasia.
27 Mama Balaaʉ̃ burroba Ãcõrẽ nezoca bajãnebema waya unusiɗe aɓeɗa egode taɓesia. Maʉ̃ carea Balaaʉ̃ra bio quĩrũpeɗa idji burrora bacuruba wayacusa u jidasia.
28 Maʉ̃ne Ãcõrẽba Balaaʉ̃ burrora beɗeabisia. Dji burroba iwiɗisia:
–¿Mʉ̃a cãrẽda oɗa bẽrã bʉa mʉ̃ra jãwã ɓarima ũbea usí?–
29 Balaaʉ̃ba panusia:
–Jãwã o ɓʉa bʉa mʉ̃ra mĩã sẽ ɓʉ bẽrã. ¡Necoda mʉ̃ jʉwaɗe eroɓʉbara ara nawena bʉra beatacasia!–
30 Maʉ̃ne burroba jarasia:
–Mʉ̃ra bʉ burroa. Bʉa mʉ̃ edaɗa ewariɗeba mʉ̃ ʉ̃rʉ̃ nĩbabaria. Bʉa bio cawa ɓʉa naʉ̃ naẽna mʉ̃ra bʉ ume jãwã nĩbaca basida.–
Balaaʉ̃ba jarasia:
–Wãrãda mãwã ɓʉa.–
31 Maʉ̃be Ãcõrẽba idji nezoca bajãnebemara o ẽsidra nũmʉda Balaaʉ̃a unubisia. Djõbada neco idji jʉwaɗe eroɓʉ siɗa unusia. Maʉ̃ne Balaaʉ̃ra chĩrãboroɗe ɓarru coɓesia.
32 Ãcõrẽ nezoca bajãnebemaba Balaaʉ̃a jarasia:
–¿Bʉa cãrẽ cãrẽã bʉ burrora ɓarima ũbea usí? Mʉ̃abʉrʉ ora jũãtrʉ eroɓʉa bʉ nocoɗaa wãrãmãrẽã. Bʉa oɗe wãbʉrʉra mʉ̃a quĩrĩãẽ́a.*
33 Bʉ burroba mʉ̃da ɓarima ũbea unupeɗa mʉ̃ caita zeẽ́ basía. Mʉ̃ caita zeɗabara mʉ̃a bʉra beacasia baribʉrʉ bʉ burrora zocai ɓʉcasia.–
34 Balaaʉ̃ba panusia:
–Mʉ̃a cadjiruada osia. Adua ɓasia bʉdrʉ o ẽsidra nũmʉda mʉ̃ nocoɗaa wãrãmãrẽã. Bʉmaarã mʉ̃da Balámaa wãida biẽ́ ɓʉbʉrʉ, jẽda wãya.–
35 Ãcõrẽ nezoca bajãnebemaba jarasia:
–Naʉ̃ ẽberãrã ume bʉra wãida ɓʉa, baribʉrʉ aɓabe mʉ̃a jarabi ɓʉdrʉ jaradua.–
Ara maʉ̃da Balaaʉ̃ra Balába diabueɗa dji dromarã ume wãsia.
Balába Balaaʉ̃ audiaɓariɗa
36 Balába Balaaʉ̃ zebʉrʉ cawasiɗe Ar puruɗaa audiaɓariɗe wãsia. Ar purura Arnoʉ̃ do icawa ɓʉa Moab drua daucha.
37 Balaaʉ̃ jũẽsiɗe Balába idjía jarasia:
–Mʉ̃a bʉ naãrã trʉ̃bisiɗe ¿cãrẽ cãrẽã isabe zeẽ́ basi? ¿Mʉ̃a paratada waiɓʉa poya diaẽ́da crĩcha ɓasica?–
38 Balaaʉ̃ba panusia:
–Bʉa trʉ̃bueɗa bẽrã mʉ̃ra nama ɓʉa. Baribʉrʉ mʉ̃a bariduada jaracara ɓʉa. Aɓabe Ãcõrẽba jarabi ɓʉdrʉ jaraida ɓʉa.–
39 Maʉ̃be Balaaʉ̃ra Balá ume Quiriat-huzot puruɗaa wãsiɗaa.
40 Mama Balába pacada, oveja siɗa beapeɗa dji dragada Ãcõrẽa babue diasia. Dji djarada Balaaʉ̃a, idji ume panʉ dji dromarãa biɗa coɗamãrẽã diasia.
41 Nurẽma diapeɗeɗa Balába Balaaʉ̃ra eya Bamo-baal abadaɗe ʉ̃taa edesia. Mamaʉba israelerã caitaara panʉra unusia.
