Numero 23:1-30
23 Balaaʉ̃ba Baláa jarasia:
–Nama animarã babue diabadada siete odua. Maʉ̃be paca dji umaquĩrãda siete idjaɓa oveja dji umaquĩrãda siete enedua Ãcõrẽa babue diaɗi carea.–
2 Ara maʉ̃da Balába osia Balaaʉ̃ba jaraɗa quĩrãca. Animarã babue diabadaza ãdji umérãba pacada aɓa idjaɓa ovejada aɓa Ãcõrẽa babue diasiɗaa.
3 Maʉ̃be Balaaʉ̃ba jarasia:
–Nama jʉ̃ãdua bʉa animarã Ãcõrẽa babue dia ɓʉma. Mʉ̃ra awuá wãya. Mama Ãcõrẽra mʉ̃ma odjaisicada. Idjia mʉ̃́a beɗeasira bʉ́a jaraɗe zeya.–
Mãwã jarapeɗa Balaaʉ̃ra eya zaque chirua neẽ́ ɓʉɗaa wãsia.
4 Mama Ãcõrẽra idjimaa zesia. Balaaʉ̃ba idjía jarasia:
–Mʉ̃a animarã babue diabadara siete obisia. Maʉ̃za mʉ̃a paca zaqueda aɓa idjaɓa ovejada aɓa bʉ́a babue diasia.–
5 Maʉ̃ne Ãcõrẽba Balaaʉ̃a cawabisia cãrẽda jaraida ɓʉda. Cawabipeɗa Balaaʉ̃a jarasia jẽda Balámaa jaraɗe wãmãrẽã.
6 Ara maʉ̃da jẽda wãsia. Jũẽbʉrʉɗe Balaaʉ̃ba unusia Balára, jũma Moab druaɗebema dji dromarã siɗa Ãcõrẽa animarã babue dia panʉ caita duanʉda.
7 Maʉ̃be Balaaʉ̃ra nãwã beɗeasia:
Moab druaɗebema boro Balába mʉ̃ra Araʉ̃ druaɗeba zebisia. Ʉ̃mãdau odjabariare ɓʉ drua eyaiɗa ɓʉmaʉba mʉ̃ra zebisia.
Idjia mʉ̃́a jarasia: “Mʉ̃ quĩrã djuburia israelerã biẽ́ jara ɓʉɗe zedua. Naʉ̃ Jacoboɗeba yõpeɗaɗarãra biẽ́ o ɓʉdua.”
8 Mãwãmĩna Ãcõrẽba bia jara ɓʉɗa ẽberãrãda ¿mʉ̃a sãwã biẽ́ jara ɓʉi? Ãcõrẽba bia o ɓʉɗa ẽberãrãda ¿mʉ̃a sãwã biẽ́ o ɓʉi?
9 Naʉ̃ eya mõgaraiɗa ɓʉɗeba mʉ̃a israelerãra unu ɓʉa. Naʉ̃ eya zaqueɗeba mʉ̃a ãdjirãra acʉ ɓʉa.Jãʉ̃ purura ãduɓa jĩga panabaria. Cawa panʉa ãdjirãra dewara puru quĩrãca panʉẽ́da.
10 Jacoboɗeba yõpeɗaɗarãra ĩbʉ quĩrãca zocãrã panʉ bẽrã ni aɓaʉba ãdjirãra poya juachaɗaẽ́a. ¿Caiba israelerãra maãrĩ poya juachai?*Jãʉ̃ ẽberãrã jipa ɓea beubʉdaɗe biɗa bia ɓeaɗia. Mʉ̃ beubʉrʉɗe ara ãdji quĩrãca ɓe quĩrĩã ɓʉa.
11 Balaaʉ̃ mãwã beɗeabʉrʉ carea Balába quĩrũbiɗeba jarasia:
–¿Bʉa cãrẽda jara ɓʉ? Mʉ̃a bʉra zebisia mʉ̃ ume dji quĩrũda biẽ́ jara ɓʉmãrẽã. Baribʉrʉ bʉa ãdjirãra bia jara ɓʉa.–
12 Balaaʉ̃ba panusia:
–Mãwãra ¿Ãcõrẽba jarabi ɓʉra mʉ̃a jaracara ɓʉca?–
13 Balába jarasia:
–Wãna. Dewara orroare wãnia. Mamaʉba bʉa israelerãra unuya jũma poya unuẽ́mĩna. Mamaʉba ãdjirãra biẽ́ jara ɓʉdua.–
14 Ara maʉ̃da Balába idjira Pisga eyaɗe ʉ̃taa edesia Zopiʉ̃ ẽjũãnaa. Mama Balába wayacusa animarã babue diabadada siete osia. Maʉ̃za paca dji umaquĩrãda aɓa idjaɓa oveja dji umaquĩrãda aɓa Ãcõrẽa babue diasia.
15 Maʉ̃be Balaaʉ̃ba idjía jarasia:
–Nama jʉ̃ãdua bʉa animarã Ãcõrẽa babue dia ɓʉmaa. Mʉ̃ra awuá wãya Ãcõrẽ ume beɗeai carea.–
16 Mama Ãcõrẽra Balaaʉ̃maa zepeɗa cawabisia cãrẽda jaraida ɓʉda. Cawabipeɗa Balaaʉ̃a jarasia jẽda Balámaa jaraɗe wãmãrẽã.
17 Ara maʉ̃da Balaaʉ̃ra jẽda wãsia. Jũẽbʉrʉɗe unusia Balára jũma Moab druaɗebema dji dromarã siɗa Ãcõrẽa animarã babue dia panʉ caita duanʉda. Balába idjía iwiɗisia:
–¿Ãcõrẽba cãrẽda jarasi?–
18 Maʉ̃ne Balaaʉ̃ra nãwã beɗeasia:
Zipor warra Balá, mʉ̃a jara ɓʉra bio quĩrãcuita ũrĩdua.
19 Ãcõrẽra ẽberã quĩrãca ɓʉẽ́a. Idjira sewa ocaa. Idjia jaraɗada quĩrã awara ocaa.Idjia jarabʉrʉra obaria. Idjia wãrãneba jaraɗara obaria.
20 Idjia mʉ̃́a jarasia israelerã bia jara ɓʉmãrẽã. Bia jara ɓʉduaɗa aɗa bẽrã mʉ̃a quĩrã awara jaracara ɓʉa.
21 Ãcõrẽba Jacoboɗeba yõpeɗaɗara idu bia mĩgabiẽ́a. Idjia israelerãra idu sopuabiẽ́a.*Ãcõrẽra ãdjirã ume ɓʉa. Maʉ̃ bẽrã ɓʉsriɗa jara panʉa idjira ãdjirã boroda.
22 Ãcõrẽba ãdjirãra Egiptoɗeba ẽdrʉ enesia. Idjiɗeba ãdjirãra bio ʉɓʉa ɓeaa, paca mẽã wariɗa quĩrãca.
23 Ni aɓaʉba Jacoboɗeba yõpeɗaɗara poya ne ãĩ oɗaẽ́a. Ni aɓaʉba israelerãra poya biẽ́ ɓʉɗaẽ́a.Ẽberãrãba nãwã jaraɗia: “Acʉdua sãwã Ãcõrẽba israelerãra bio careba ɓʉda.”
24 Israelerãra imama quĩrãca panʉa. Jarra ɓʉɗe imamara ʉ̃nãũcaa, ãtebʉrʉ ne beapeɗa jũma cobaria. Dji oa siɗa jũma senebaria.Ara maʉ̃ quĩrãca israelerãra ʉ̃nãũnaẽ́a aɓa naʉ̃ druaɗebema ẽberãrã jũma poyabʉdaɗaa.
25 Balaaʉ̃ mãwã beɗeabʉrʉ carea Balába quĩrũbiɗeba nãwã jarasia:
–¡Bʉa naʉ̃ ẽberãrãda poya biẽ́ jara ɓʉẽ́bʉrʉ chupeadua! ¡Ãdjirãra waa bia jara ɓʉrãdua!
26 Maʉ̃ne Balaaʉ̃ba panusia:
–¿Mʉ̃a aɓabe Ãcõrẽba jarabiɗadrʉ jaraida ɓʉaɗa asiẽ́ca?
27 Maʉ̃be Balába idjía jarasia:
–Wãna. Mʉ̃a bʉra dewara orroare edeya. Ãĩbẽrã mamabʉrʉ Ãcõrẽba bʉ́a israelerãra idu biẽ́ jarabisicada.–
28 Ara maʉ̃da Balába idjira Peor eya boroɗaa edesia. Mamaʉba ẽjũã põãsa ewaraga ɓʉra jũma unubaria.
29 Mama Balaaʉ̃ba jarasia:
–Nama animarã babue diabadada siete odua. Paca dji umaquĩrãda siete idjaɓa oveja dji umaquĩrãda siete enedua Ãcõrẽa babue diaɗi carea.–
30 Ara maʉ̃da Balába osia Balaaʉ̃ba jaraɗa quĩrãca. Maʉ̃be animarã babue diabadaza pacada aɓa idjaɓa ovejada aɓa Ãcõrẽa babue diasia.
Beɗea eɗaare
^ 23:10 Maãrĩ poya juachai. Hebreo beɗeaɗe ɓʉ́ ɓʉa: “El número de la cuarta parte.”
^ 23:21 Ãcõrẽba Jacoboɗeba yõpeɗaɗara idu bia mĩgabiẽ́a. Idjia israelerãra idu sopuabiẽ́a. Maʉ̃ beɗeara idjaɓa nãwã traducida ɓʉa: “Ãcõrẽba unuẽ́ ɓʉa Jacoboɗeba yõpeɗaɗarãba cadjirua obadada. Unuẽ́ ɓʉa israelerãba ãĩ obadada.”
