Numero 24:1-25
24 Baribʉrʉ Balaaʉ̃ba cawasia idjia israelerã bia jara ɓʉra Ãcõrẽba bia unu ɓʉda. Maʉ̃ bẽrã idjia naãrã o ɓaɗa quĩrãca ãyã wãẽ́ basía Ãcõrẽba cãrẽda jarabi cawaya. Ãtebʉrʉ ẽjũã põãsa ewaraga ɓʉɗaa acʉ nũmesia.
2 Maʉ̃ne unusia Israelɗeba yõpeɗaɗa doce puruda duanʉda. Ãdjirã acʉ nũmʉne Ãcõrẽ Jaureɗeba ɓesia.
3 Maʉ̃ne nãwã beɗeasia:
Mʉ̃ra Beor warra Balaaʉ̃a. Mʉ̃a ẽsã unu ɓʉa. Mʉ̃ra nãwã beɗea ɓʉa.
4 Mʉ̃a ũrĩ ɓʉa Ãcõrẽba jara ɓʉda. Mʉ̃a ẽsã unu ɓʉa Ãcõrẽ jũma poya ɓʉba unubi ɓʉda.
Idji quĩrãpita chĩrãboroɗe coɓʉɗe mʉ̃ dauba ẽsã unu ɓʉa.
5 Israelerã, bãrã wua dera bio biya queɗeaa. Jacoboɗeba yõpeɗaɗarã, bãrã purura bio biya quirua.
6 Israel purura waiɓʉa ɓʉa do zaque drasoa ɓʉ quĩrãca.* Bio wari ɓʉa néu do icawa u taɓʉ quĩrãca.
Bio biya ɓʉa áloe bacuru Ãcõrẽba uɗa quĩrãca idjaɓa ogo do icawa nũmea quĩrãca.
7 Ãdjirãneba yõbʉdarãba baidoda aɗuba eropanania. Ãdji zocoɗeba baidoda wewezoaya.
Ãdji boroba amalecitarã boro Agáda poyaya. Ãdji boroba puruda zocãrã idji jʉwaeɗa eroɓaya.
8 Ãcõrẽba israelerãra Egiptoɗeba ẽdrʉ enesia. Idjiɗeba ãdjirãra bio ʉɓʉa ɓeaa, paca mẽã wariɗa quĩrãca.
Ãdji dji quĩrũra jũma poyaɗia imamaba animarã beapeɗa dji ɓʉwʉrʉra ɓʉagapeɗa jũma cobari quĩrãca. Ãdji dji quĩrũra chaba drʉ quenania.
9 Imamara egode chũmepeɗa ʉ̃nãũbaria. ¿Caiba idjira mĩã sẽi?
Ara maʉ̃ quĩrãca Israel puruba ẽberãrãra poyapeɗa ʉ̃nãũya, dewararãba wayaɗi bẽrã.
Jũma israelerã bia jara panʉ ẽberãrãra Ãcõrẽba carebaya.* Baribʉrʉ jũma ãdji biẽ́ jara panʉra Ãcõrẽba biẽ́ ɓʉya.
10 Balaaʉ̃ mãwã beɗeabʉrʉ carea Balára idji ume bio quĩrũsia. Quĩrũbiɗeba jʉwa tawepeɗa jarasia:
–¡Mʉ̃a bʉra zebisia mʉ̃ dji quĩrũra biẽ́ jara ɓʉmãrẽã! ¡Mãwãmĩna ɓarima ũbea ãdjirãra bia jara ɓʉsia!
11 ¡Bʉdji druaɗaa jẽda wãdua! Ãcõrẽba bʉ́a israelerãra idu biẽ́ jarabiẽ́ bẽrã parata waiɓʉa diayaɗa aɗara mʉ̃a diaẽ́a.
12 24:12-13 Balaaʉ̃ba panusia:–Bʉa mʉ̃maa diabueɗa ẽberãrãa mʉ̃a ebuɗa nãwã jarasia: “Balába idji de parataba idjaɓa oroba bira coɓʉda diabʉrʉ siɗa mʉ̃a ni cãrẽ siɗa oẽ́a Ãcõrẽba mãwã obiẽ́bʉrʉ.” Aɓabe Ãcõrẽba jarabi ɓʉdrʉ jaraida ɓʉaɗa asia.
14 Mʉ̃ druaɗaa jẽda wãya. Baribʉrʉ wãi naẽna mʉ̃a jaraya israelerãba jĩrũarebema ewariɗe bʉ purura sãwã oɗida.–
15 Ara maʉ̃da Balaaʉ̃ra nãwã beɗeasia:
Mʉ̃ra Beor warra Balaaʉ̃a. Mʉ̃a ẽsã unu ɓʉa. Mʉ̃ra nãwã beɗea ɓʉa.
16 Ãcõrẽba jara ɓʉra mʉ̃a ũrĩ ɓʉa. Ãcõrẽ dji Dromaara ɓʉ necawaada mʉ̃a eroɓʉa.
Ãcõrẽ jũma poya o ɓʉba unubi ɓʉra mʉ̃a ẽsã unu ɓʉa. Idji quĩrãpita chĩrãboroɗe coɓʉɗe mʉ̃ dauba ẽsã unu ɓʉa.
17 Jĩrũarebema ewariɗe cãrẽda sãwãida mʉ̃a ẽsã unu ɓʉa. Mʉ̃a unu ɓʉra ara nawenabemaẽ́a.
Jacoboɗeba dji dromada zeya chĩdau ebuɗa odjabari quĩrãca. Israelɗeba dji boroda zeya.
Maʉ̃ba moabitarã borora jũma berradʉgaya. Séɗeba yõpeɗaɗarã siɗa jũma quenaya.
18 Idji dji quĩrũ Edoʉ̃nebemarãda poyaya. Ãdji drua Seír abadara idji jʉwaeɗa eroɓaya. Maʉ̃ne Israel purura ʉɓʉara wariya.
19 Jacoboɗeba yõna dji dromaba naʉ̃ Ar puruɗe panenara jũma quenaya.*
20 Mãwã beɗeaɗacarea Balaaʉ̃ba Amale purura ẽsã unupeɗa nãwã beɗeasia:
Amale purura dji dromaara ɓʉa. Baribʉrʉ ewari aɓa nẽbaya.
21 Mãwã beɗeaɗacarea Balaaʉ̃ba quenitarãda ẽsã unupeɗa nãwã beɗeasia:*
Quenitarã, bãrã dera bio o eropanʉa nejõbʉba idji de mõgara eya ʉ̃tʉ ɓʉɗe o eroɓʉ quĩrãca.
22 Mãwãmĩna bãrãra nẽbaɗia asiriarãba jũma ãyã jida edebʉdaɗe.
23 Maʉ̃ awara Balaaʉ̃ra nãwã beɗeasia:
Ay, ¿caida zocai ɓei Ãcõrẽba jũma nãwã obʉrʉɗe?*
24 Chipreɗeba barcoda zeɗia. Maʉ̃ barcoɗe zebʉdaba Asiria druara, Hebere ẽberãrã siɗa jũma poyaɗia.
Baribʉrʉ jĩrũare maʉ̃ barcoɗe zepeɗaɗa siɗa nẽbaɗia.
25 Mãwã jaraɗacarea Balaaʉ̃ra idji druaɗaa jẽda wãsia. Balá siɗa idji oɗe jẽda wãsia.
Beɗea eɗaare
^ 24:6 Israel purura waiɓʉa ɓaya do zaque drasoa ɓʉ quĩrãca. Maʉ̃ beɗeara idjaɓa nãwã jaraida ɓʉa: “Israel purura waiɓʉa ɓaya uruta ẽjũã waiɓʉa ẽsa taɓabari quĩrãca.”
^ 24:9 Genesi 12:3.
^ 24:19 Naʉ̃ Ar puruɗe panenara. Hebreo beɗeaɗe aɓabe jara ɓʉa “puruɗe panenara.”
^ 24:21 Quenitarãnebemada Juece 4:11ɗe ɓʉ́ ɓʉa.
^ 24:23 Hebreo beɗeaɗe maʉ̃ versículora ebuɗa ɓʉẽ́a.
