Numero 25:1-18
25 Israelerã Sitiʉ̃ne duanasiɗaɗe ʉ̃cʉrʉ umaquĩrãrãba moabitarã wẽrãrã ume cadjiruada o duanesiɗaa.
2 Maʉ̃ wẽrãrãba dji umaquĩrãrãra eɗobadjiɗaa moabitarãba ãdji ãcõrẽa animarã babue diabʉdaɗe. Maʉ̃ne umaquĩrãrãra ne coɗapeɗa maʉ̃ ãcõrẽ quĩrãpita chĩrãboroɗe copanenapeɗa bia beɗeabadjiɗaa.
3 Mãwã israelerãba moabitarã ãcõrẽ Baal-peor abadada ẽpẽ panesiɗaa. Maʉ̃ carea Ãcõrẽra israelerã ume bio quĩrũpeɗa quinibibʉrʉ basía.
4 Maʉ̃ne Ãcõrẽba Moisea jarasia:
–Jũma Baal-peor ẽpẽ panʉ dji bororãda jidaɗapeɗa beaɗadua. Mʉ̃ quĩrãpita ãsa ãdjirãra bacuru cũmiane ʉ̃tʉ su jira ɓʉɗadua jũmarãba acʉɗamãrẽã. Mãwãbʉrʉ mʉ̃ quĩrũbira bãrã israelerã ume ɓʉda tumaya.–
5 Ara maʉ̃da Moiseba israelerã bororãa jarasia:
–Bãrã jʉwaeɗa ɓearã dji Baal-peor ẽpẽ ɓeada jũma beaɗadua.–
6 Maʉ̃ne Moisera puru siɗa Ãcõrẽ wua deɗe eɗa wãbada caita sopuaba jĩã duanasiɗaa. Moiseba acʉ ɓʉɗe, puruba acʉ ɓʉɗe biɗa Israelɗebema aɓaʉba madianita wẽrãda diguiɗaa edesia.*
7 Maʉ̃ unusiɗe Eleaza warra Pinéra israelerã ãbaa dji jʉre panʉmaʉba idji mĩãsu edaɗe wãsia. (Pinéra sacerdote Aaroʉ̃ wiuzaque basía.)
8 Idji mĩãsura edapeɗa dji ẽberã caiɗu wãsia. Maʉ̃ ẽberã wua deɗe eɗa wãpeɗa dji umaquĩrãra dji wẽrã ume ãbaa ɓiɗe su beasia. Mãwã beaɗa bẽrã israelerã quini nũmanara waa quininaẽ́ basía.
9 Mãwãbʉrʉbara 24,000 ẽberãrãra quininoasiɗaa.
10 Maʉ̃be Ãcõrẽba Moisea jarasia:
11 –Mʉ̃a quĩrĩã ɓʉa israelerãba aɓabe mʉ̃drʉ ẽpẽnida. Maʉ̃ carea Baal-peor ẽpẽsiɗaɗe mʉ̃ quĩrũbiɗeba ãdjirãra jũma quinibi basía. Baribʉrʉ Eleaza warra Pinéba mʉ̃ quĩrũbira tumabisia. Idjia oɗaɗeba unubisia idjia biɗa quĩrĩã ɓʉda ẽberãrãba aɓabe mʉ̃drʉ ẽpẽnida. Idjia oɗa carea mʉ̃a israelerãra jũma quinibiẽ́ basía. (Pinéra sacerdote Aaroʉ̃ wiuzaque basía.)
12 Pinéa jaradua idjia oɗa carea mʉ̃ra idji ume beɗea ɓʉbʉrʉda idji ume necai ɓai carea.
13 Mʉ̃a beɗea ɓʉbʉrʉba jara ɓʉa idjira, idjiɗeba yõbʉdarã siɗa iɗiba ʉ̃taa mʉ̃ sacerdoterãda ɓeaɗida. Mãwã obʉrʉa idjia quĩrĩã ɓʉ bẽrã ẽberãrãba aɓabe mʉ̃drʉ ẽpẽnida. Mʉ̃ igara ɓʉda beaɗa bẽrã israelerãba cadjirua opeɗaɗara mʉ̃́a quĩrãdoabisia.–
14 Ẽberã madianita wẽrã ume ãbaa beuɗara Zimri abadjiɗaa. Idjira Salu warra basía. Simeoʉ̃neba yõna puruɗebema dji droma basía.
15 Dji madianita wẽrã trʉ̃ra Cozbi abadjiɗaa. Idjira Zu cau basía. Zura Madiaʉ̃nebema dji droma basía.
16 Maʉ̃be Ãcõrẽba Moisea jarasia:
17 –Madianitarãda quenane wãnadua.
18 Mãwã oɗaɗua ãdjirãba bãrãra quinibisiɗa bẽrã. Cũrũga panʉneba bãrãa ãdji ãcõrẽ Baal-peor abadada ẽpẽbisiɗaa mʉ̃a bãrãra quinibimãrẽã. Cozbiba oɗa carea biɗa mʉ̃a bãrãra quinibibʉrʉ basía. Baal-peor ẽpẽ panʉ carea bãrã quinibʉda basiɗe Pinéba maʉ̃ wẽrãra beasia.– (Cozbira Madiaʉ̃nebema dji droma cau basía.)
Beɗea eɗaare
^ 25:6 Diguiɗaa. Hebreo beɗeaɗe ɓʉ́ ɓʉa: “Idji djabarãmaa.”
