Numero 27:1-23
27 Wẽrãrãda juesuma panasiɗaa: Maala, Noa, Hogla, Milca idjaɓa Tirsa. Ãdji zeza querasira Zelopeha basía. Idjira Jose warra Manaseɗeba yõna basía. Heper warra basía idjaɓa Gala wiuzaque basía. Galara Maqui warra basía. Maquira Manase warra basía.
2 Ewari aɓa Zelopeha querasi caurãra Ãcõrẽ wua deɗe eɗa wãbadamaa wãsiɗaa. Mama Moise quĩrãpita, sacerdote Eleaza quĩrãpita, puru quĩrãpita biɗa nũpanenapeɗa nãwã jarasiɗaa:
3 –Dai zezara ẽjũã põãsa ewaraga ɓʉɗe jaiɗasia. Coreba, idjiare ɓea biɗa Ãcõrẽ igarasiɗaɗe dai zezara beuẽ́ basía, ãtebʉrʉ idjia cadjirua oɗa carea jaiɗasia. Idjira umaquĩrã warra neẽ́ ɓasia.
4 Daimaarã biẽ́ ɓʉa maʉ̃ carea dai, idjiɗeba yõbʉdarãba ẽjũãda edaɗaẽ́da.* Dai zeza djabarãba edabʉda ẽjũãnebemada dairãa biɗa diaɗadua.–
5 Ãdjia beɗea djuburia panʉra Moiseba Ãcõrẽa jarasia.
6 Maʉ̃ne Ãcõrẽba panusia:
7 –Zelopeha caurãba ariɗe jara panʉa. Ãdji zeza djabarãba edabʉda ẽjũãnebemada diaɗadua ãdjiɗeba yõbʉdarãba eroɓeaɗamãrẽã.
8 Israelerãa nãwã jaradua: “Aɓaʉda umaquĩrã warra neẽ́ jaiɗaibʉrʉ, idji ẽjũãra dji caua diaɗadua.
9 Baribʉrʉ idjia cau siɗa neẽ́ ɓʉbʉrʉ, ẽjũãra idji djabarãa diaɗadua.
10 Djabarã siɗa neẽ́ ɓʉbʉrʉ, ẽjũãra idji zeza djabarãa diaɗadua.
11 Idji zeza biɗa djabarãda neẽ́ ɓʉbʉrʉ, idji ẽberãrãnebema dji caitaara ɓʉ́a diaɗadua maʉ̃gʉɗe bamãrẽã.” Israelerãba maʉ̃ leyra ẽpẽnida panʉa mʉ̃a bʉ́a jara ɓʉ quĩrãca.–
Moise cacuabari Josue ɓei jaraɗa
12 Maʉ̃be Ãcõrẽba Moisea jarasia:
–Abariʉ̃ eyaɗe ʉ̃taa wãdua. Mamaʉba mʉ̃a israelerãa diai druara acʉdua.
13 Maʉ̃ drua ununacarea bʉra jaiɗaya bʉ djaba Aaroʉ̃ jaiɗaɗa quĩrãca.*
14 Mãwã jaiɗaya bãrãba Ziʉ̃ ẽjũã põãsa ewaraga ɓʉɗe mʉ̃a jaraɗara ĩjã oɗaẽ́ basi bẽrã. Mama israelerãba quĩrũbiɗeba baido iwiɗisiɗaɗe bãrãba ãdjirãa mʉ̃ra wãrãda Ãcõrẽda cawabiɗaẽ́ basía.–
(Maʉ̃ra mãwãsia Ziʉ̃ ẽjũã põãsa ewaraga ɓʉɗe Cadé abadama. Mama Ãcõrẽba mõgaraɗeba baido weabiɗama trʉ̃ ɓʉsiɗaa “Meribá.”)*
15 Moiseba jarasia:
16 –Mʉ̃ Boro Ãcõrẽ, bʉɗeba jũmarãda zocai ɓeaa. Maʉ̃ bẽrã mʉ̃ cacuabari aɓa ɓʉdua naʉ̃ puru boro bamãrẽã.
17 Maʉ̃ ẽberãra puru na nĩbaida ɓʉa bia pe enibai carea. Mãwã bʉ purura oveja dji wagabari neẽ́ ɓʉ quĩrãca ɓaẽ́a.
18 27:18-19 Ãcõrẽba jarasia:
–Mãẽteara israelerã boro bamãrẽã Nuʉ̃ warra Josueda ɓʉdua. Idjia mʉ̃ Jaureda eroɓʉa.* Idjira sacerdote Eleaza quĩrãpita, puru quĩrãpita biɗa ededua. Mama bʉ jʉwara idji boro ʉ̃rʉ̃ ɓʉdua acʉbi carea idjira ãdji boroda ɓʉbʉrʉda.
20 Idjira ɓʉdua berara ne jũmane bʉa o ɓaɗa quĩrãca poya o ɓamãrẽã. Mãwã Israel puruba jũma idjia jarabʉrʉra ĩjã o panania.
21 Israelerã boro ɓeɗacarea Josuera sacerdote Eleazamaa wãida ɓʉa mʉ̃a quĩrĩã ɓʉra cawai carea. Mʉ̃ quĩrãpita ɓʉɗe Eleazaba Uriʉ̃ abadaɗeba mʉ̃a quĩrĩã ɓʉra cawaya.* Maʉ̃be idjia jarabʉrʉra Josueba, israelerã biɗa jũma ĩjã o pananida panʉa.*
22 Ara maʉ̃da Moiseba osia Ãcõrẽba jaraɗa quĩrãca. Josuera edesia sacerdote Eleaza quĩrãpita, puru quĩrãpita biɗa.
23 Mama idji jʉwara Josue boro ʉ̃rʉ̃ ɓʉsia acʉbi carea Josuera ãdjirã boroda ɓʉbʉrʉda Ãcõrẽba jaraɗa quĩrãca.
Beɗea eɗaare
^ 27:4 Biẽ́ ɓʉa dai, idjiɗeba yõbʉdarãba ẽjũãda edaɗaẽ́da. Hebreo beɗeaɗe nãwã ɓʉ́ ɓʉa: “Biẽ́ ɓʉa idji trʉ̃da nẽbaida idji ẽberãrãnebemada.”
^ 27:13-14 Numero 20:22-29
^ 27:14 Exodo 20:1-13
^ 27:18-19 Mʉ̃ Jaureda eroɓʉa. Hebreo beɗeaɗe jara ɓʉa idjira jaure bara ɓʉda. Ʉ̃cʉrʉmaarã maʉ̃ba nãwã jara ɓʉa: “Ẽberãrãra bio biya pe eniba cawa ɓʉa.”
^ 27:21 Uriʉ̃. Exodo 28:29-30.
^ 27:21 Josueba, israelerã biɗa jũma ĩjã o pananida panʉa. Hebreo beɗeaɗe jara ɓʉa: “Josuera, israelerã siɗa nocoɗaa wãnia idjaɓa jarabʉrʉɗe jẽda zeɗia.”
