Numero 32:1-42
32 Rubeʉ̃neba yõpeɗaɗaba, Gaɗeba yõpeɗaɗa biɗa pacada, oveja siɗa zocãrã eropanasiɗaa. Ãdjirãba cawasiɗaa Jazer ẽjũãra Gala ẽjũã siɗa animarã daupẽni carea bia ɓʉda.
2 Maʉ̃ bẽrã Moisemaa, sacerdote Eleazamaa, israelerã dji dromarãmaa biɗa wãnapeɗa nãwã jarasiɗaa:
3 32:3-4 –Ãcõrẽba dadjirãa naʉ̃ puru ɓeada poyabisia: Atarot, Diboʉ̃, Jazer, Nimra, Hesboʉ̃, Eleale, Sebaʉ̃, Nebo, Beoʉ̃ siɗa. Maʉ̃ ẽjũãra bio bia ɓʉa animarã daupẽni carea. Dairãba animarãda zocãrã eropanʉa.
5 Maʉ̃ bẽrã dai quĩrã djuburia maʉ̃ ẽjũãra dairãa diaɗadua. Dairãra Jordaʉ̃ do wa quĩrãrã wãbirãnadua.–
6 Baribʉrʉ Moiseba panusia:
–Mãwãra dewararã nocoɗaa djõne wãbʉdaɗe ¿bãrãra nama panenica?
7 Bãrãda nama panesiɗara ¿dewararã siɗa Ãcõrẽba diaɗa ẽjũãnaa wãna ama panenaẽ́ca?
8 ¿Ara maʉ̃ quĩrãca bãrã drõã naẽnabemarãba osiɗaẽ́ca mʉ̃a ãdjirã Cadé-barneaɗeba Canaaʉ̃ drua acʉɗe diabuesiɗe?
9 Jũma maʉ̃ drua pʉrrʉa acʉɗapeɗa Escol jeweɗaɗe jũẽne wãsiɗaa. Baribʉrʉ jẽda zeɗapeɗa ẽjũãra biẽ́ taɓʉaɗa asiɗaa, purura Ãcõrẽba dia ɓʉ ẽjũãnaa wãrãnamãrẽã.*
10 32:10-11 Maʉ̃ carea Ãcõrẽra ãdjirã ume bio quĩrũsia. Maʉ̃ ewariɗe idjia wãrãneba jarasia jũma Egiptoɗeba ẽdrʉpeɗaɗarã veinte poa ʉ̃taa ɓeaba soɗeba ĩjãnaẽ́ bẽrã, idjia Abrahaʉ̃a, Isaa, Jacoboa biɗa diai jaraɗa ẽjũãra ununaẽ́da.
12 Aɓabe Jepone warra Calebʉrʉ idjaɓa Nuʉ̃ warra Josue biɗa soɗeba ĩjã panʉ bẽrã maʉ̃ ẽjũãra ununiana asia. (Jeponera cenezeo basía.)
13 Maʉ̃ ewariɗe Ãcõrẽra dadji israelerã ume bio quĩrũna bẽrã, ẽjũã põãsa ewaraga ɓʉɗe cuarenta poa pʉrrʉabisia jũma maʉ̃ ẽberãrã Ãcõrẽ quĩrãpita biẽ́ opeɗaɗa beubʉdamisa.*
14 ¿Iɗi biɗa bãrã zezarãba cadjirua opeɗaɗa quĩrãca o quĩrĩã panʉca? ¡Bãrã dji cadjirua obadarãba wetara Ãcõrẽra dadji israelerã ume quĩrũbiɗia!
15 Bãrãba Ãcõrẽda igara pananibʉrʉ, idjia dadjirãra waɗibiɗa naʉ̃ ẽjũã põãsa ewaraga ɓʉɗe pʉrrʉabiya. Mãwã bãrãra beɗeaɗe panania jũma dadjirã biẽ́ panebʉda carea.–
16 Dji ẽjũã iwiɗi panʉra Moisemaa caitaara wãnapeɗa jarasiɗaa:
–Dai boro, nama puru ɓeada o quĩrĩã panʉa dai wẽrãrã itea, dai warrarã itea biɗa. Idjaɓa corra ɓeada o quĩrĩã panʉa dai animarã itea.
17 32:17-18 Maʉ̃be dairãra djõne wãni carea panania. Bãrã djõne wãbʉdaɗe dairãra bãrã na nĩbaɗia idjaɓa djõnia aɓa jũmarãba ẽjũã edabʉdaɗaa. Mãwã djõ panʉne dairãra jẽda dai ẽberãrãmaa zeɗaẽ́a. Baribʉrʉ dai wẽrãrãra, dai warrarã siɗa nama puru mõgaraba auɗu jũrã ca ɓeaɗe duanania naʉ̃ druaɗebemarãba bearãnamãrẽã.
19 Dairãra djõne wãbʉdamĩna Jordaʉ̃ do quĩrãrẽbema ẽjũãra edaɗaẽ́a bãrã quĩrãca, ãtebʉrʉ dairãba edabʉda ẽjũãra nama ɓaya Jordaʉ̃ doɗeba ʉ̃mãdau odjabariare.–
20 32:20-22 Moiseba ãdjirãa jarasia:
–Bãrãba wãrãda mãwã oɗibʉrʉ naʉ̃ ẽjũãra edaɗia. Baribʉrʉ Ãcõrẽba jara ɓʉ quĩrãca djõni carea pananida panʉa. Jũma bãrã dji mẽsrã ɓeada Jordaʉ̃ do wa quĩrãrẽ wãnapeɗa djõnida panʉa aɓa Ãcõrẽba dji quĩrũrã ãyã jʉretabʉrʉɗaa. Jũma maʉ̃ drua Ãcõrẽ jʉwaeɗa ɓeɗacareabʉrʉ bãrãra namaa jẽda zeɗida panʉa. Ãcõrẽba bãrãa waabemarã itea obi ɓʉra jũma osiɗara Ãcõrẽba jara ɓʉ quĩrãca naʉ̃ ẽjũãra bãrãne baya.
23 Baribʉrʉ mãwã oɗaẽ́bʉrʉ bio cawaɗadua Ãcõrẽ quĩrãpita cadjiruaɗe pananida. Maʉ̃ cadjirua carea Ãcõrẽba bãrãra wãrãda cawa oya.
24 Bãrã ẽberãrã itea puru ɓeada naʉ̃ druaɗe ocuaɗadua. Idjaɓa bãrã animarã itea corra ɓeada naʉ̃ druaɗe ocuaɗadua. Baribʉrʉ wãrãda djõni carea pananadua bãrãba jara panʉ quĩrãca.–
25 Maʉ̃be Gaɗeba yõpeɗaɗaba, Rubeʉ̃neba yõpeɗaɗa biɗa panusiɗaa:
–Dai boro, dairãba jũma oɗia bʉa jara ɓʉ quĩrãca.
26 Naʉ̃ Gala druaɗe ɓea puruɗe dai wẽrãrãra, dai warrarãra, dai animarã siɗa ɓeeɗia.
27 Baribʉrʉ dairãra djõne wãni carea panʉa. Ãcõrẽba jarabʉrʉɗe dairãra Jordaʉ̃ do wa quĩrãrẽ djõne wãnia bʉa jara ɓʉ quĩrãca.–
28 Maʉ̃be Moiseba sacerdote Eleazaa, Nuʉ̃ warra Josuéa, jũma Israelɗeba yõpeɗaɗa puru bororãa biɗa nãwã jarasia:
29 –Dadji israelerã Jordaʉ̃ do wa quĩrãrẽ djõne wãbʉdaɗe Gaɗeba yõpeɗaɗara, Rubeʉ̃neba yõpeɗaɗa siɗa Ãcõrẽba jara ɓʉ quĩrãca wãnibʉrʉ, maʉ̃ drua poyapeɗaɗacarea bãrãba ãdjirãa naʉ̃ Gala druara diaɗadua ãdjirãne bamãrẽã.
30 Baribʉrʉ bãrã ume Jordaʉ̃ do wa quĩrãrẽ djõne wãnaẽ́bʉrʉ, ãdjirãba ẽjũãda Canaaʉ̃ druaɗe edaɗida panʉa bãrã quĩrãca.–
31 Gaɗeba yõpeɗaɗarãba, Rubeʉ̃neba yõpeɗaɗarã biɗa jarasiɗaa:
–Dai boro, dairãba jũma oɗia Ãcõrẽba jara ɓʉ quĩrãca.
32 Dairãra Jordaʉ̃ do wa quĩrãrẽ Canaaʉ̃ druaɗaa djõne wãnia Ãcõrẽba jara ɓʉ quĩrãca. Baribʉrʉ dairãba edabʉda ẽjũãra Jordaʉ̃ do namaarecare ɓaya.–
33 Maʉ̃be Moiseba Gaɗeba yõpeɗaɗarãa, Rubeʉ̃neba yõpeɗaɗarãa, idjaɓa ʉ̃cʉrʉ Jose warra Manaseɗeba yõpeɗaɗarãa biɗa amorreorã boro Sehoʉ̃ba eroɓaɗa druara, Basaʉ̃nebema boro Ogba eroɓaɗa drua siɗa diasia. Jũma maʉ̃ druara, puru ɓea siɗa ãdjirãa diasia.
34 Maʉ̃ druaɗe Gaɗeba yõpeɗaɗarãba naʉ̃ puru ɓeada wayacusa osiɗaa: Diboʉ̃, Atarot, Aroer,
35 Atarot-sopaʉ̃, Jazer, Jogbeha,
36 Bet-nimra idjaɓa Bet-Araʉ̃. Jũma maʉ̃ puru ɓeara mõgaraba auɗu jũrã casiɗaa. Idjaɓa corra ɓeada ãdjirã animarã itea osiɗaa.
37 Rubeʉ̃neba yõpeɗaɗarãba naʉ̃ puru ɓeada wayacusa osiɗaa: Hesboʉ̃, Eleale, Quiriataim,
38 Nebo, Baal-meoʉ̃, Sibmá siɗa. Maʉ̃ puru ɓeara trʉ̃ awara ɓʉsiɗaa.
39 Manase warra Maquiɗeba yõpeɗaɗarãda Gala druaɗaa wãnapeɗa amorreorã mama ɓeara poyaɗapeɗa ãyã jʉretasiɗaa.
40 Moiseba ãdjirãa maʉ̃ druara diaɗa bẽrã mama panesiɗaa.
41 Manaseɗeba yõna Jaír siɗa wãpeɗa ʉ̃cʉrʉ puru zaquerãda poyasia. Maʉ̃ puru ɓeara idjia trʉ̃ ɓʉsia Havot-Jaír.
42 Ara maʉ̃ quĩrãca Nobá abadada wãpeɗa puru zaquerã Kenat druaɗe ɓeara poyasia. Mama idjia trʉ̃ ɓʉsia Nobá.
