Numero 6:1-27
6 Ãcõrẽba Moisea jarasia:
2 –Israelerãa nãwã jaradua: Umaquĩrãba wa wẽrãba ara idjida Ãcõrẽ itea ɓeyaɗa aibʉrʉ, maʉ̃ ewariɗeba ʉ̃taa idjira nazareo aɗia.
3 Maʉ̃ bẽrã idjia uva ɓa aseada, baridua ɓa aseada, uva ɓa oregueada, baridua ɓa asea oreguea oɗada, uva ɓa cũã siɗa docara ɓʉa. Idjaɓa uvada, uva beseaɗe paeɗa siɗa cocara ɓʉa.
4 Idji nazareo ɓeyaɗa aɗa ewariɗeba aɓa idji ẽdrʉi jaraɗa ewariɗaa ne jũma uva bara ɓʉda cocara ɓʉa. Uva tada, dji e siɗa cocara ɓʉa.
5 Maʉ̃ awara Ãcõrẽ itea ɓeyaɗa aɗa ewariɗeba aɓa idji ẽdrʉi jaraɗa ewariɗaa idji buɗara tʉcara ɓʉa. Maʉ̃ ewariɗe idjira Ãcõrẽ itea ɓʉ bẽrã idji buɗara idu urea zebida ɓʉa.
6 Idjaɓa Ãcõrẽ itea ɓeyaɗa aɗa ewariɗeba aɓa idji ẽdrʉi jaraɗa ewariɗaa ẽberã jaiɗaɗa caita wãcara ɓʉa.
7 Dji zezada, dji papada, dji djabada, dji djabawẽrã siɗa jaiɗasira dji bẽwãrã caita wãcara ɓʉa Ãcõrẽ quĩrãpita biẽ́ ɓe amaaba. Maʉ̃ ewariɗe idji buɗara Ãcõrẽ itea urea eroɓʉ bẽrã Ãcõrẽ quĩrãpita bia ɓeida ɓʉa.
8 Ãcõrẽ itea ɓeyaɗa aɗa ewariɗeba aɓa idji ẽdrʉi jaraɗa ewariɗaa idjira Ãcõrẽ itea bia ɓaida ɓʉa.
9 Cawaẽ́ne ẽberãda idji caita beuibʉrʉ, idji buɗa Ãcõrẽ itea urea eroɓʉra Ãcõrẽ quĩrãpita biẽ́ ɓeya. Maʉ̃ bẽrã idjira Ãcõrẽ quĩrãpita wayacusa bia ɓei ewariɗe boroɓichia tʉida ɓʉa. Mãwã oya sietebema ewariɗe.
10 Nurẽma puchirãda wa putujuda umé sacerdotea diaɗe wãida ɓʉa Ãcõrẽ wua deɗe eɗa wãbadamaa.
11 Maʉ̃be sacerdoteba aɓa Ãcõrẽa bea diaida ɓʉa maʉ̃ ẽberãba cadjirua oɗa carea. Dewarabemara Ãcõrẽa jũma babue diaida ɓʉa. Mãwã Ãcõrẽba maʉ̃ cadjiruara quĩrãdoaya. Maʉ̃ ẽberãba cadjiruada osia ẽberã beuɗa caita ɓaɗa bẽrã. Maʉ̃ ewariɗeba ʉ̃taa idji buɗara Ãcõrẽ itea idu urea zebida ɓʉa.
12 Maʉ̃ ewariɗe oveja dji umaquĩrã poa aɓa ɓʉda babue diabida ɓʉa idji biẽ́ ɓeɗa carea. Maʉ̃ ewariɗeba ʉ̃taa idjira wayacusa Ãcõrẽ itea ɓeida ɓʉa ara idjia naẽna ewari jara ɓʉɗa quĩrãca. Naẽna idjia Ãcõrẽ itea ɓei jaraɗa ewari o ɓasiɗe Ãcõrẽ ume biẽ́ ɓeɗa bẽrã, maʉ̃ ewarira juachaiẽ́ ɓʉa Ãcõrẽ itea ɓei jaraɗa ewari jũma daucha oi carea.
13 Ãcõrẽ itea ɓeyaɗa aɗa ewari jõnacarea nazareoba nãwã oida ɓʉa: Ãcõrẽ wua deɗe eɗa wãbadamaa wãida ɓʉa.
14 Mama oveja dji umaquĩrãda poa aɓa ɓʉda sacerdotea diaida ɓʉa Ãcõrẽa jũma babue diamãrẽã. Maʉ̃ ovejara jũma bia ɓaida ɓʉa. Maʉ̃ awara idjia cadjirua oɗa carea oveja wẽrãda poa aɓa ɓʉda sacerdotea diaida ɓʉa dji dragara Ãcõrẽa babue diamãrẽã. Maʉ̃ oveja siɗa jũma bia ɓaida ɓʉa. Idjaɓa Ãcõrẽ ume necai ɓai carea oveja dji umaquĩrãda sacerdotea diaida ɓʉa dji dragara babue diamãrẽã.
15 Néuɗebema siɗa sacerdotea diaida ɓʉa Ãcõrẽa diamãrẽã. Uva ɓa siɗa diaida ɓʉa Ãcõrẽa wea diamãrẽã. Maʉ̃ awara paʉ̃ ẽsãbari neẽ́ ɓʉda jamara aɓa diaida ɓʉa. Maʉ̃ paʉ̃ra quĩrã cacua umé ɓaida ɓʉa: aɓa dji biara ɓʉ harina nedraga bara oɗaa, dewarabemara nedragaba ʉ̃rʉ̃ pʉrʉɗaa.
16 Sacerdoteba dji oveja wẽrã dragada Ãcõrẽa babue diaya nazareoba cadjirua oɗa carea. Oveja dji umaquĩrãda Ãcõrẽa jũma babue diaya.
17 Maʉ̃are Ãcõrẽ ume necai ɓai careabema oveja dragada babue diaya. Maʉ̃ babue diabʉrʉɗe jamaraɗe ɓʉ paʉ̃ ẽsãbari neẽ́ ɓʉda, néuɗebema siɗa Ãcõrẽa diaya. Idjaɓa uva ɓada Ãcõrẽa wea diaya.
18 Maʉ̃be Ãcõrẽ wua deɗe eɗa wãbada caita nazareora boroɓichia tʉpeɗa idji buɗa Ãcõrẽ itea idu ureabi ɓaɗara babueida ɓʉa Ãcõrẽ ume necai ɓai careabema oveja djara dju panʉ tʉbʉɗe.*
19 Boroɓichia tʉɗacarea sacerdoteba oveja jĩrũ nocoarebema djuɗada nazareo jʉwaɗe ɓʉya. Idjaɓa jamaraɗe ɓʉ paʉ̃ ẽsãbari neẽ́ ɓʉda umé edapeɗa maʉ̃ siɗa idji jʉwaɗe ɓʉya: aɓa nedraga bara oɗada idjaɓa aɓa nedragaba ʉ̃rʉ̃ pʉrʉɗada.
20 Maʉ̃be sacerdoteba jũma maʉ̃gʉra Ãcõrẽ quĩrãpita ʉ̃taa waida ɓʉa diai carea. Mãwã jũma maʉ̃gʉra Ãcõrẽ itea ɓeɗa bẽrã sacerdoteba edaida ɓʉa. Maʉ̃ awara oveja jã nocoarebema djara Ãcõrẽ quĩrãpita ʉ̃taa waɗada, chĩde ʉ̃taa waɗa siɗa idji itea ɓeya.* Jũma mãwã oɗacarea nazareo baɗaba uva ɓada doida ɓʉa.
21 Jũma maʉ̃gʉra Ãcõrẽ ley nazareoɗebemaa. Ãcõrẽ itea ɓaɗada ẽdrʉbʉrʉɗe maʉ̃ leyba jara ɓʉ quĩrãca jũma diaida ɓʉa. Maʉ̃ awara idjia Ãcõrẽ itea ɓeyaɗa aɗa ewariɗe auɗu poya diayaɗa asibʉrʉ, ẽdrʉbʉrʉɗe idjia jaraɗa quĩrãca jũma diaida ɓʉa.
Sacerdoteba sãwã israelerã bia jara ɓʉi
22 Ãcõrẽba Moisea jarasia:
23 –Aaroʉ̃a, idji warrarãa biɗa jaradua nãwã israelerã bia jara ɓʉɗamãrẽã:
24 Ãcõrẽba bãrãra carebaya idjaɓa wagaya.
25 Ãcõrẽba bãrãra bia unu ɓaya idjaɓa idji biaɗeba bia eroɓaya.*
26 Ãcõrẽba bãrãra quĩrĩã ɓaya idjaɓa necai ɓʉya.*
27 Aaroʉ̃ba, idji warrarã biɗa mʉ̃ trʉ̃neba israelerãra mãwã bia jara ɓʉɗibʉrʉ, mʉ̃a wãrãda carebaya.–
Beɗea eɗaare
^ 6:18 Ãcõrẽ ume necai ɓai careabema animarã dragada babue diapeɗa dji enenaba dji djarara arima djupeɗa cobadjia. Sacerdote biɗa maʉ̃ djaraɗebemada ara idji itea edabadjia.
^ 6:20 Exodo 29:27-28
^ 6:25 Bãrãra bia unu ɓaya. Hebreo beɗeaɗe nãwã ɓʉ́ ɓʉa: “Ãcõrẽba idji quĩrãdarrara bãrãmaa uruabiya.”
^ 6:26 Bãrãra quĩrĩã ɓaya. Hebreo beɗeaɗe ɓʉ́ ɓʉa: “Ãcõrẽba bãrãare acʉ ɓaya.”
