Pilipo 1:1-30
1 Mʉ̃ra Pauloa. Timoteora mʉ̃ ume ɓʉa. Daira Jesucrito nezocaa. Mʉ̃a naʉ̃ cartara djabarã Pilipo puruɗebemarã itea ɓʉbʉrʉa: djabarã wagabadarã, djabarã carebabadarã, jũma Ãcõrẽ ẽberãrã Jesucrito ume ɓearã itea.*
2 Daiba quĩrĩã panʉa dadjirã Zeza Ãcõrẽba, dadjirã Boro Jesucrito biɗa ãdji biaɗeba bãrãra careba pananida idjaɓa ãdji necai ɓai siɗa dia pananida.
Pauloba djabarã carea Ãcõrẽa iwiɗiɗa
3 Mʉ̃a bãrã quĩrãnebabʉrʉza Ãcõrẽa bia ɓʉaɗa abaria.
4 1:4-5 Ãcõrẽa iwiɗibʉrʉza mʉ̃a bãrã carea ɓʉsriɗa iwiɗibaria, bãrãba idji beɗea ĩjãsiɗa ewariɗeba ʉ̃taa beɗea bia Critoɗebemada mʉ̃ careba jaradia panʉ bẽrã.
5 –
6 Mʉ̃a naʉ̃gʉda wãrãda cawa ɓʉa: Ãcõrẽba bãrã soɗe traju bia jʉwa oɗara biara o wãya aɓa Jesucrito zebʉrʉɗaa. Maʉ̃ne idjia bãrãra jũma biya o eroɓaya.
7 Bia ɓʉa mʉ̃a jũma bãrãnebemada mãwã crĩcha ɓaida, bãrãra bio quĩrĩã ɓʉ bẽrã. Mʉ̃ preso ɓʉɗe wa beɗea bia Critoɗebemada wãrã arada cawabi ɓʉɗe Ãcõrẽba idji biaɗeba bãrãra mʉ̃ siɗa careba ɓʉa idji beɗea jaradia pananamãrẽã.
8 Ãcõrẽba cawa ɓʉa mʉ̃a Jesucrito quĩrĩã waiɓʉaɗeba jũma bãrãra bio quĩrĩã ɓʉda.
9 Mʉ̃a Ãcõrẽa iwiɗi ɓʉa bãrãra biara dji quĩrĩã ɓeaɗamãrẽã, idjida biara cawaɗamãrẽã idjaɓa sãwã nĩbaɗida panʉda cawaɗamãrẽã.
10 Mãwã bãrãba bio cawaɗia cãrẽda biara ɓʉda idjaɓa Crito zebʉrʉɗe idji quĩrãpita cadjirua neẽ́ ɓeaɗia, biẽ́ jarai siɗa neẽ́ ɓeaɗia.
11 Mʉ̃a iwiɗi ɓʉa bãrãra Jesucritoɗeba ne jũmane jipa ɓeaɗamãrẽã, ẽberãrãba Ãcõrẽra dji dromaara ɓʉaɗa aɗamãrẽã idjaɓa idjía bia beɗeaɗamãrẽã.
Ne jũmane Paulora Crito carea ɓʉa
12 Djabarã, mʉ̃a bãrãa cawabi quĩrĩã ɓʉa mʉ̃ preso ɓʉra cadjiruaẽ́da, ãtebʉrʉ careba ɓʉa ẽberãrãba beɗea bia Critoɗebemada ĩjãnamãrẽã.
13 Romanebema boro de wagabada sordaorãba, dewararã biɗa cawa panʉa mʉ̃ra Crito carea preso ɓʉda.
14 Maʉ̃ carea zocãrã djabarãba dadjirã Boro Jesuɗeba biara Ãcõrẽ beɗeara ne wayaa neẽ́ jara nĩnaa.
15 Wãrãda ʉ̃cʉrʉ mʉ̃ ume biẽ́ panʉ bẽrã Critoɗebemada jara nĩnaa mʉ̃ cãyãbara cawaara panʉana aɗi carea. Baribʉrʉ ʉ̃cʉrʉba crĩcha biaɗeba jara nĩnaa.
16 1:16-17 Maʉ̃gʉrãba quĩrĩãneba mãwã obadaa. Cawa panʉa Ãcõrẽba mʉ̃ra nama ɓʉsida beɗea bia Critoɗebemada wãrã arada cawabimãrẽã. Baribʉrʉ ʉ̃cʉrʉba idjiɗebemada jara nĩnaa cawaara ɓeada crĩcha panʉ bẽrã. Crĩcha biaɗeba mãwã oɗacaa. Ãdjirãba crĩcha panʉa maʉ̃gʉɗeba mʉ̃ nama preso ɓʉra wetara sopuabiɗida.
18 Baribʉrʉ ¿maʉ̃da sãwãi? Crĩcha biaɗeba wa crĩcha biẽ́ panʉneba jara nĩnabʉrʉ, Critoɗebemada jara panʉa. Maʉ̃ carea mʉ̃ra ɓʉsriɗa ɓʉa.
Idjaɓa ɓʉsriɗa ɓaya.
19 Bãrãba Ãcõrẽa iwiɗi panʉ bẽrã idjaɓa Jesucritoba diaɗa Jaureba careba ɓʉ bẽrã mʉ̃a cawa ɓʉa mʉ̃ra namaʉba bia ẽdrʉida.
20 Crito carea mʉ̃ra ni maãrĩ biɗa pera quĩrĩãẽ́ ɓʉa, ãtebʉrʉ idjiɗebemada beɗeai carea sozarra ɓa quĩrĩã ɓʉa. Mãwã mʉ̃a jũmarãa Critora dji dromaara ɓʉda cawabiya ewariza o ɓabari quĩrãca. Zocai ɓeibʉrʉ wa beaɗibʉrʉ, mʉ̃a quĩrĩã ɓʉa jũmarãba mʉ̃neba cawaɗida Critora dji dromaara ɓʉda.
21 Mʉ̃maarã zocai ɓʉɗe aɓabe Crito carea ɓaida ɓʉa, baribʉrʉ beuibʉrʉ biara ɓaya.
22 Mʉ̃ zocai ɓʉɗe Critoɗebemada poya jaradia ɓaya. Maʉ̃ carea mʉ̃a adua ɓʉa sãwã quĩrĩã ɓʉda, zocai ɓaida wa beuida.
23 Zarea ɓʉa jaraida maʉ̃ umébemarã sãʉ̃gʉda biara ɓʉda. Mʉ̃maarã biara ɓʉa beuida Crito ume ɓai carea.
24 Baribʉrʉ bãrã carea biara ɓʉa mʉ̃ra zocai ɓaida.
25 Maʉ̃ bẽrã cawa ɓʉa bãrã carebai carea mʉ̃ra waɗibiɗa zocai ɓaida idjaɓa waya bãrã ume ãbaa ɓaida. Mãwã bãrãba Critora biara ĩjã panʉneba ɓʉsriɗa panania.
26 Jesucritoba mʉ̃ra wayacusa bãrãmaa edebʉrʉɗe bãrãra idji carea biara ɓʉsriɗaɗapeɗa bia jaraɗia.
27 Jipa nĩbaɗadua beɗea bia Critoɗebemaba jara ɓʉ quĩrãca. Mãwãra mʉ̃a bãrãda acʉɗe wãibʉrʉ, wa bãrã ume ɓʉẽ́ne bãrãnebemada ũrĩbʉrʉ, cawaya bãrãba aɓari crĩchaɗeba ãbaa bio ĩjã panʉda idjaɓa ãbaa bio traja panʉda maʉ̃ beɗea biada cawabiɗi carea.
28 Bãrã ume dji quĩrũra ni maãrĩ biɗa wayarãnadua. Maʉ̃ba cawabiya Ãcõrẽba ãdjirãra biẽ́ ɓʉida, baribʉrʉ bãrãra ẽdrʉ ɓʉida. Maʉ̃gʉra Ãcõrẽba jũma o ɓʉa.
29 Ãcõrẽba bãrãra edaẽ́ basía aɓabe Crito ĩjã pananamãrẽã, ãtebʉrʉ edasia Crito carea bia mĩgaɗamãrẽã.
30 Bãrãba unusiɗaa mʉ̃ra bia mĩga ɓʉda idjaɓa iɗi ũrĩ panʉa waɗibiɗa mĩga ɓʉda.* Ara maʉ̃ quĩrãca bãrã siɗa bia mĩga panʉa.
