Pilipo 4:1-23
4 Maʉ̃ carea mʉ̃ djabarã, mʉ̃a jaraɗa quĩrãca dadjirã Boro Jesucritora bio ĩjã pananadua. Mʉ̃a bãrãra bio quĩrĩã ɓʉa idjaɓa unu quĩrĩã ɓʉa. Bãrã carea mʉ̃ra bio ɓʉsriɗa ɓʉa. Bãrãra mʉ̃ ɓʉsriɗaa.*
Pauloba djabarãa obiɗa
2 Mʉ̃a djabawẽrã Evodiaa, djabawẽrã Sintiquea biɗa beɗea djuburiaya ibiaɗamãrẽã dadjirã Boro Jesucrito ume panʉ bẽrã.
3 Djaba, mʉ̃ ume Ãcõrẽ traju obari, mʉ̃a bʉ́a iwiɗiya maʉ̃ djabawẽrãrã carebamãrẽã. Ãdjida, Clementeda, waabemarã siɗa mʉ̃ ume bio trajasiɗaa beɗea bia Critoɗebemada cawabiɗi carea. Jũma ãdjirã trʉ̃ra Ãcõrẽba idji zocai ɓaiɗebema cartaɗe ɓʉ́ eroɓʉa.
4 Dadjirã Boro Jesucrito ume panʉ bẽrã ewariza ɓʉsriɗa ɓeaɗadua. Mʉ̃a wayacusa jaraya: ¡Ɓʉsriɗa ɓeaɗadua!
5 Bãrãra ẽberã biada jũmarãa unubiɗadua. Dadjirã Boro Jesucrito zei ewarira caita ɓʉa.
6 Baridua carea jũmawãyã crĩcharãnadua, ãtebʉrʉ Ãcõrẽa iwiɗiɗadua, idjía beɗea djuburiaɗadua, idjaɓa ne jũma carea bia ɓʉaɗa aɗadua.
7 Maʉ̃ba Ãcõrẽba bãrã sora, bãrã crĩcha siɗa necai ɓʉya Jesucrito ume panʉ bẽrã. Maʉ̃ necai ɓaira ẽberãrãba ãduɓa poya cawaɗaẽ́a.
8 Maʉ̃ awara djabarã, jũma wãrãnebemada, ne jũma dadjia bia unubadaɗebemada, jũma jipa ɓʉɗebemada, jũma cadjirua neẽ́ ɓʉɗebemada, jũmarãba quĩrĩãbadaɗebemada, jũma bia trʉ̃ ɓʉga ɓʉɗebemada, ne jũma biaɗebemada, ne jũma dadjia bia jarabadaɗebema siɗa crĩcha pananadua.
9 Mʉ̃a jaradiaɗara, bãrãba mʉ̃neba cawapeɗaɗara, mʉ̃neba ũrĩpeɗaɗara, unupeɗaɗa siɗa jũma o pananadua. Maʉ̃ne Ãcõrẽra bãrã ume ɓaya idjaɓa bãrãra necai ɓʉya.
Djabarãba ne diabuepeɗaɗa carea Pauloba bia ɓʉaɗa aɗa
10 Dadjirã Boro Jesucritoɗeba mʉ̃ra bio ɓʉsriɗa ɓʉa, bãrãba mʉ̃ crĩcha panʉneba wayacusa ne diabuesiɗa bẽrã. Maʉ̃gʉra bãrãba naẽna o quĩrĩã pananamĩna poya oɗaẽ́ basía.
11 Mãwã jaraẽ́ ɓʉa mʉ̃ra ne neẽ́ ɓʉ bẽrã. Mʉ̃a cawasia sãwãbʉrʉ necai ɓaida ara mʉ̃djia eroɓʉba.
12 Ne neẽ́ ɓʉɗe idjaɓa aɗuba eroɓʉɗe sãwã ɓaida cawa ɓʉa. Mʉ̃a cawasia bariduaɗe sãwã necai ɓaida, jãwũã ɓʉɗe idjaɓa jarra ɓʉɗe, aɗuba eroɓʉɗe idjaɓa ne neẽ́ ɓʉɗe biɗa.
13 Critoɗeba jũma poya oya idjia mʉ̃́a ʉɓʉada dia ɓʉ bẽrã.
14 Baribʉrʉ mʉ̃a bãrãa bia ɓʉaɗa aya, mʉ̃ bia mĩga ɓʉɗe carebapeɗaɗa bẽrã. Wãrãda bãrãba bia osiɗaa.
15 Djabarã Pilipoɗebema, bãrãba cawa panʉa beɗea bia Critoɗebemada naãrã ĩjãsiɗaɗe mʉ̃ sãwãnada. Macedonia druaɗeba dewara druaɗaa jaradiaɗe wãsiɗe djabarã dewara puruɗebemarãba mʉ̃́a ne diabueɗaẽ́ basía. Aɓabe bãrãbʉrʉ mʉ̃́a ne diabuesiɗaa.*
16 Mʉ̃ Tesalonica puruɗe ɓasiɗe bãrãba ɓarima zocãrã ne diabuesiɗaa carebaɗi carea.
17 Mʉ̃a iwiɗiẽ́ ɓʉa bãrãba ne diabueɗamãrẽã, ãtebʉrʉ quĩrĩã ɓʉa bia o panʉ carea Ãcõrẽba bãrãra biara carebaida.
18 Ne jũma bãrãba djaba Epaprodito ume diabuepeɗaɗara mʉ̃a edasia. Maʉ̃ bẽrã aɗuba eroɓʉa. Maʉ̃gʉba mʉ̃ra bia ɓaya. Bãrãba diabuepeɗaɗara quera tũãpa Ãcõrẽa diaɗa quĩrãca ɓʉa. Maʉ̃ra Ãcõrẽba bia unu ɓʉa.
19 Wãrãda jũma bãrãba neẽ́ panʉda mʉ̃ Ãcõrẽba ne jũma eroɓʉɗebemada Jesucritoɗeba diaya.
20 Maʉ̃ bẽrã ewariza dadjirã Zeza Ãcõrẽa bia beɗeaɗida panʉa. Bia ɓʉa mãwã ɓaida.
Pauloba jĩrũare ɓʉɗa
21 Jũma Ãcõrẽ ẽberãrã Jesucrito ume ɓeaa jaraɗadua mʉ̃a quĩrĩã ɓʉda ãdjirãra bia duananida. Djabarã mʉ̃ ume panʉ biɗa quĩrĩã panʉa bãrãra bia duananida.
22 Jũma Ãcõrẽ ẽberãrã namabemarãba quĩrĩã panʉa bãrãra bia duananida. Djabarã Romanebema boro itea traja panʉba biara mãwã jara panʉa.
23 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida.*
