Romano 1:1-32
1 Mʉ̃ra Pauloa, Jesucrito nezocaa. Ãcõrẽba mʉ̃ra edasia Jesucritoba diabueɗada ɓamãrẽã idjaɓa ɓʉsia beɗea bia Ãcõrẽnebemada jaradiaɗe wãmãrẽã.
2 Maʉ̃ beɗea biara Ãcõrẽba naẽnaeɗa diai jarasia. Idjiɗeba beɗeabadarãba maʉ̃ra Idji Beɗeaɗe ɓʉsiɗaa.
3 1:3-4 Maʉ̃ beɗea biara idji Warraɗebemaa. Idji Warra dadjirã Boro Jesucritora naʉ̃ djaraɗe Israelɗebema boro Daviɗeba zeɗaa. Baribʉrʉ idji beu ɓaɗada ʉ̃rẽbasiɗe Ãcõrẽ Jaureba unubisia Ãcõrẽ Warra ʉɓʉa ɓʉda.
4 –
5 Jesucritoɗeba Ãcõrẽba mʉ̃ra ɓʉsia idjia diabueɗada ɓamãrẽã. Idji biaɗeba mãwã ɓʉsia jũma druazabemaba Jesucritoda ĩjãnamãrẽã, idji beɗeada ĩjã oɗamãrẽã, idjaɓa idjida bia jaraɗamãrẽã.
6 Bãrã siɗa Ãcõrẽba trʉ̃sia Jesucrito itea ɓeaɗamãrẽã.
7 Mʉ̃a naʉ̃ cartara ɓʉbʉrʉa jũma Romanebema djabarã itea. Ãcõrẽba bãrãra quĩrĩã ɓʉa idjaɓa trʉ̃sia idji ẽberãrãda ɓeaɗamãrẽã. Mʉ̃a quĩrĩã ɓʉa dadjirã Zeza Ãcõrẽba dadjirã Boro Jesucrito ume ãdji biaɗeba bãrãra careba pananida idjaɓa necai ɓai siɗa dia pananida.
Paulo Romanaa wã quĩrĩã ɓaɗa
8 Naãrã mʉ̃a jaraya: Jesucritoɗeba mʉ̃a jũma bãrã carea Ãcõrẽa bia ɓʉaɗa abaria bãrãba Jesucrito ĩjã panʉnebemada druazabemaba beɗea panʉ bẽrã.
9 Ãcõrẽba quĩrĩã ɓʉra jũma mʉ̃ soɗeba o ɓʉa beɗea bia idji Warraɗebemada jaradia ɓʉ bẽrã. Idjia cawa ɓʉa mʉ̃a iwiɗibʉrʉza bãrã carea iwiɗibarida.
10 Mʉ̃a iwiɗibaria idjia quĩrĩã ɓʉbʉrʉ mʉ̃ra idu bãrã acʉɗe wãbimãrẽã.
11 Wãrãda mʉ̃a bãrãra unu quĩrĩã ɓʉa Ãcõrẽ Jaureɗeba carebai carea. Mãwã bãrãra zarea ɓeaɗia.
12 Mʉ̃a quĩrĩã ɓʉa dadjirãba aɓarica Crito ĩjã panʉneba dji careba pananida zarea panani carea.
13 Djabarã, mʉ̃a quĩrĩã ɓʉa bãrãba cawaɗida wãrãda ɓarima zocãrã bãrãmaa wãida crĩcha ɓabarida. Baribʉrʉ waɗibiɗa poya wãẽ́ ɓʉa. Bãrãmaa wã quĩrĩã ɓʉa mʉ̃a jaradia ɓʉɗeba jãmabemarãba Jesucritoda ĩjãnamãrẽã dewara druaɗebemarãba ĩjãpeɗaɗa quĩrãca.
14 1:14-15 Mʉ̃a beɗea bia Jesucritoɗebemada jũmarãa jaradiaida ɓʉa. Ne cawa ɓeaa, ne adua queɗeaa, carta cawa ɓeaa, carta adua ɓeaa biɗa jaradiaida ɓʉa.* Maʉ̃ carea bãrã Romanebemarãa biɗa jaradiaɗe wã quĩrĩã ɓʉa.
16 Mʉ̃ra peracaa beɗea bia Jesucritoɗebemada jaradiai carea, maʉ̃ beɗea ĩjãbʉdara Ãcõrẽba idji ʉɓʉaɗeba jũma ẽdrʉ edabari bẽrã; judiorãda, judiorãẽ́ siɗa.*
17 Maʉ̃ beɗea biaɗeba Ãcõrẽba cawabi ɓʉa sãwã ẽberãrãra jipa unubarida. Jesucritoda ĩjãsira mãwã unubaria. Ãcõrẽ Beɗeaɗe nãwã ɓʉ́ ɓʉa:
Ãcõrẽ quĩrãpita jipa ɓʉra idji ĩjã ɓʉɗeba zocai ɓaya.*
Ẽberãrã Ãcõrẽ quĩrãpita beɗeaɗe panʉnebema
18 Ãcõrẽba bajãneba cawabi ɓʉa cadjirua o ɓeara, jipaẽ́ ɓea siɗa idji quĩrũbiɗeba jũma cawa oida. Ãdjia cadjirua o panʉneba wãrã beɗeara idu cawabiɗacaa.
19 Ãcõrẽnebema poya cawaida ɓʉra ãdjirãba bio cawa panʉa, idjia cawabi ɓʉ bẽrã.
20 Naʉ̃ ẽjũã oɗaɗeba ʉ̃taa Ãcõrẽ ununacaɗebemada ẽberãrãba ebuɗa unubadaa. Idjia oɗa acʉ panʉneba cawa panʉa idjira Ãcõrẽda idjaɓa ewariza ne jũma poya o ɓʉda. Maʉ̃ carea cadjirua o ɓeaba poya jaraɗaẽ́a Ãcõrẽ adua panʉ bẽrã beɗeaɗe panʉẽ́da.
21 Ãdjirãba Ãcõrẽra cawa panasiɗamĩna idjía bia beɗeaɗaẽ́ basía idjaɓa bia ɓʉaɗa aɗaẽ́ basía. Ãtebʉrʉ crĩcha neẽ́ ɓea quĩrãca crĩcha panesiɗaa. Mãwã ãdji crĩchara biẽ́ ɓepeɗa pãĩmane panesiɗaa.
22 Ãdjirãba crĩcha cawa ɓeaɗa asiɗamĩna crĩcha neẽ́ ɓeasia.
23 Ãcõrẽ beuca bia quiruda igarasiɗaa. Maʉ̃be dadji beuida ɓʉ zaca ɓʉda oɗapeɗa maʉ̃gʉ́a bia beɗea panesiɗaa. Ĩbana za quĩrãca, animarã jĩrũ quĩmãrẽ ɓea za quĩrãca, idjaɓa jãne wãbada animarã za quĩrãca oɗapeɗa maʉ̃gʉ́a bia beɗea panesiɗaa.
24 Maʉ̃ carea Ãcõrẽba iduaribisia ãdji soba cadjirua o quĩrĩã ɓʉda oɗamãrẽã. Maʉ̃ bẽrã ãdjirãba mĩã perada o panesiɗaa.
25 Wãrã Ãcõrẽda igaraɗapeɗa sewadrʉ ẽpẽ panesiɗaa. Ãcõrẽba ne jũmada oɗamĩna idji cãyãbara idjia oɗadrʉ ẽpẽ panesiɗaa idjaɓa bia beɗea panesiɗaa. Baribʉrʉ dadjirãba aɓabe Ãcõrẽabʉrʉ ewariza bia beɗeaɗida panʉa. Bia ɓʉa mãwã ɓaida.*
26 Ãdjirãba sewada ẽpẽpeɗaɗa bẽrã Ãcõrẽba iduaribisia mĩã perada oɗamãrẽã. Wẽrãra umaquĩrã ume ɓaida ɓʉda idu ɓʉɗapeɗa aɓarica wẽrã ume panesiɗaa.
27 Ara maʉ̃ quĩrãca umaquĩrãra wẽrã ume ɓaida ɓʉda idu ɓʉɗapeɗa aɓarica umaquĩrãda dji awuaɗapeɗa mĩã perada o panesiɗaa. Maʉ̃ cadjirua o panʉ carea Ãcõrẽba ãdjirãra cawa oya idjia cawa oida ɓʉ quĩrãca.
28 Ãdjirãba Ãcõrẽra igarapeɗaɗa bẽrã idjia iduaribisia crĩcha cadjiruada ẽpẽnapeɗa mĩã oiẽ́ ɓeada o pananamãrẽã.
29 Ne jũma cadjiruada obadaa. Mĩã peraida ɓʉda obadaa, ne jũma awuabadaa, djãrãra biẽ́ obadaa, djãrãba eroɓʉ carea biẽ́ crĩchabadaa, mĩã beabadaa, caicayabadaa, djãrã cũrũgabadaa, djãrã biẽ́ jarabadaa, idjaɓa nẽbʉra obadaa.
30 Djãrã ẽcarraare biẽ́ beɗeabadaa, Ãcõrẽra quĩrãmabadaa, idjaɓa djãrã quĩrãpita biẽ́ beɗeabadaa. Ãdjirãra dji biara ɓeaɗa abadaa idjaɓa dji dromaana abadaa. Djãrã biẽ́ oɗi carea jʉrʉbadaa. Ãdji djibari beɗeara ĩjãnacaa.
31 Cʉwʉrʉ zarea ɓeaa. Ãdjia beɗea ɓʉpeɗaɗara oɗacaa. Quĩrĩã neẽ́ ɓeaa, ãdji biẽ́ oɗara quĩrãdoaɗacaa idjaɓa djãrãra quĩrã djuburiaɗacaa.*
32 Ãdjirãba bio cawa panʉa Ãcõrẽba mãwã o ɓeara bio cawa oida.* Baribʉrʉ ara mãwã o nĩnaa idjaɓa dewararãba aɓari quĩrãca cadjirua obʉdaɗe bia crĩchabadaa.
Beɗea eɗaare
^ 1:14-15. Ne cawa ɓea, ne adua queɗea. Griego beɗeaɗe ɓʉ́ ɓʉa “griegorãa idjaɓa ãĩbemarãa.”
^ 1:16. Judiorãda, judiorãẽ́ siɗa. Griego beɗeaɗe nãwã ɓʉ́ ɓʉa: “Naãrã judiorãda, maʉ̃are judiorãẽ́ siɗa.”
^ 1:17. Habacuc 2:4.
^ 1:25. Bia ɓʉa mãwã ɓaida. Griego beɗeaɗe ɓʉ́ ɓʉa: “Amén.”
^ 1:31. Ãdji biẽ́ oɗara quĩrãdoaɗacaa. Griego beɗeaɗe ebuɗa ɓʉẽ́a.
^ 1:32. Ãcõrẽba mãwã o ɓeara bio cawa oida. Griego beɗeaɗe nãwã ɓʉ́ ɓʉa: “Ãcõrẽba jara ɓʉcãrĩa mãwã o ɓeara beuɗida panʉda.”
