Romano 11:1-36
11 Maʉ̃ carea mʉ̃a naʉ̃da iwiɗiya: ¿Ãcõrẽba israelerã idji ẽberãrãda igarasica? ¡Mãwãẽ́a! Mʉ̃da israelerãnebemaa, Abrahaʉ̃ ẽberãrãnebemaa, Benjamiʉ̃neba yõnaa.
2 Ãcõrẽba naẽna israelerãra edasia idji puruda ɓamãrẽã. Maʉ̃ bẽrã ãdjirãra igaraẽ́ ɓʉa. Bãrãba Ãcõrẽ Beɗeaɗe Elíaɗebema ɓʉɗada cawa panʉa. Elíaba Ãcõrẽa israelerãra nãwã biẽ́ jarasia.
3 “Mʉ̃ Boro, bʉɗeba beɗeabadarãda jũma quenasiɗaa idjaɓa bʉ́a animarã babue diabadada jũma ãrĩsiɗaa. Aɓabe mʉ̃drʉ ɓʉa, baribʉrʉ mʉ̃ siɗa beaɗi carea jʉrʉ panʉa.”*
4 Maʉ̃ne Ãcõrẽba nãwã panusia: “Mʉ̃a siete mil ẽberãrãda mʉ̃ itea waga eroɓʉa. Ãdjirãra Baal quĩrãpita chĩrãboroɗe ɓarru coɓeaɗacaa.”*
5 Ara maʉ̃ quĩrãca naʉ̃ ewariɗe biɗa Ãcõrẽba idji biaɗeba dai judiorãda zocãrãẽ́be edasia idjiɗerãda ɓeaɗamãrẽã.
6 Mãwã Ãcõrẽba idji biaɗeba edasibʉrʉ, daiba o panʉ carea edaẽ́ basía. Daiba o panʉ carea edaɗabara, mãwãra idji biaɗeba edaẽ́ bacasia.
7 ¿Maʉ̃nebemada sãwã crĩcha panʉ? Israelerãba Ãcõrẽ quĩrãpita jipa ɓeaɗi carea jʉrʉ pananamĩna jipa ɓeaɗaẽ́ basía. Baribʉrʉ israelerã zocãrãẽ́ panʉba ĩjãsiɗaa, Ãcõrẽba edaɗa bẽrã. Ãdjirãda Ãcõrẽba jipa unusia. Waabemarãba ĩjã quĩrĩãnaẽ́ basía.
8 Ãcõrẽ Beɗeaɗe nãwã ɓʉ́ ɓʉa:
Ãcõrẽba ãdjirã crĩchara ɓʉsia poya cawarãnamãrẽã, ãdji dauba ununara poya cawarãnamãrẽã,
idjaɓa ãdji cʉwʉrʉba ũrĩnara poya cawarãnamãrẽã. Ãdjirãra waɗibiɗa ara mãwã panʉa.*
9 Idjaɓa judiorã boro Daviba maʉ̃gʉɗebemada Ãcõrẽa jarasia:
Ãdjirã bia ne cobʉda carea idu crĩchabidua bʉa cawa oẽ́da.
Mãwã ãduɓa cũrũgaɗia animarã jidabadaɗe eɗaa ɓaebʉda quĩrãca. Maʉ̃ne ãdjirãra cawa odua.
10 Ãdjirãra dauɓerrea ɓea quĩrãca ɓʉdua ãdjia unu panʉra cawarãnamãrẽã. Idjaɓa ewariza bia mĩgabidua.*
Ãcõrẽba judiorãẽ́ ẽdrʉ edaɗa
11 Naʉ̃da mʉ̃a iwiɗiya: ¿judiorãba Critora igarasiɗa bẽrã aɓeɗa waa Ãcõrẽ ume poya bia ɓeaɗaẽ́ca?* ¡Mãwãẽ́a! Ãtebʉrʉ Crito igarapeɗaɗa bẽrã Ãcõrẽba judiorãẽ́da ẽdrʉ edabaria. Mãwã judiorãra jiwaiɗa ɓeaɗapeɗa idjida quĩrĩãnia.
12 Judiorãba Crito igarapeɗaɗa bẽrã ãdjirã cãyãbara Ãcõrẽba jũma naʉ̃ ẽjũãnebema judiorãẽ́ra bio careba ɓʉa. Maʉ̃ bẽrã judiorã wayacusa Ãcõrẽ ume bia panebʉda ewariɗe ¿Ãcõrẽba jũmarãda biara carebaẽ́ca?
13 Mʉ̃a judiorãẽ́a ne jaraya. Ãcõrẽba mʉ̃ra bãrãmaa diabuesia jaradia ɓamãrẽã. Maʉ̃da mʉ̃a jũma jipa o quĩrĩã ɓʉa.
14 Mʉ̃a judiorãẽ́a jaradia ɓʉɗeba quĩrĩã ɓʉa mʉ̃ ẽberãrã judiorã biɗa maʉ̃ beɗeara ũrĩ quĩrĩãnida jiwaiɗa panʉ quĩrãca. Mãwã Ãcõrẽba ãdjirãra ʉ̃cʉrʉ ẽdrʉ edaya.
15 Ãcõrẽba judiorãra igaraɗa bẽrã ʉ̃cʉrʉ naʉ̃ ẽjũãnebemarãra idji ume bia ɓʉsia. Maʉ̃ bẽrã Ãcõrẽba judiorã wayacusa bia edabʉrʉɗe ¿cãrẽda sãwãi? Ãdjirã siɗa beuɗarã quĩrãca pananada Ãcõrẽ ume zocai ɓeaɗia.
16 Trigo naãrã ewabʉdaɗe paʉ̃da ocuaɗapeɗa maʉ̃ paʉ̃nebemada Ãcõrẽa aɓa diaɗibʉrʉ, waabema paʉ̃ siɗa Ãcõrẽnea. Ara maʉ̃ quĩrãca jũma judiorãra Ãcõrẽnea, ãdji drõã naẽnabemarãda idjiɗe baɗa bẽrã. Idjaɓa bacuru carrada bia ɓʉbʉrʉ, dji jʉwate siɗa bia ɓeaa. Ara maʉ̃ quĩrãca jũma judiorãra Ãcõrẽnea, ãdji drõã naẽnabemarãda idjiɗe baɗa bẽrã.
17 Ʉ̃cʉrʉ judiorãra Ãcõrẽnebemada jĩga panesiɗaa olivo bacuru jʉwate tẽtacuaɗa quĩrãca. Bãrã judiorãẽ́ra Ãcõrẽ neẽ́ panasiɗaa olivo bacuru iduɓa mẽã wariɗa quĩrãca. Baribʉrʉ ʉ̃cʉrʉ bãrã judiorãẽ́ra ʉ̃cʉrʉ judiorã cacuabari Ãcõrẽ ẽberãrãda panesiɗaa iduɓa mẽã wariɗa olivo bacuru jʉwatera dji tẽtacuaɗaɗe cara ɓʉcuaɗa quĩrãca. Mãwã iɗira Ãcõrẽba bãrã siɗa careba ɓʉa judiorã careba ɓaɗa quĩrãca.*
18 Baribʉrʉ crĩcharãnadua bãrã judiorãẽ́ra judiorã cãyãbara Ãcõrẽ quĩrãpita biara ɓeada. Quĩrãnebaɗadua bãrãra dji carraɗeba zocai panʉda. Dji carrara bãrãneba zocai ɓʉẽ́a.
19 Ãĩbẽrã bãrã judiorãẽ́ba crĩchaɗisicada Ãcõrẽba judiorãra igarasida bãrãda ãdjirã cacuabari edai carea.
20 Wãrãda mãwã ɓʉa. Baribʉrʉ Ãcõrẽba ãdjirãra igarasia Critoda ĩjãpeɗaɗaẽ́ bẽrã. Maʉ̃be bãrãda edasia Critoda ĩjãpeɗaɗa bẽrã. Maʉ̃ carea bãrãra judiorã cãyãbara biara ɓeada crĩcharãnadua, ãtebʉrʉ Ãcõrẽra waya pananadua.
21 Judiorãba ĩjãnaẽ́ panʉ carea Ãcõrẽba ãdjirãra igarasia bacuru jʉwate tẽtacuabʉrʉ quĩrãca. Ara maʉ̃ quĩrãca bãrã judiorãẽ́ba ĩjãnaẽ́bʉrʉ, Ãcõrẽba bãrã siɗa igaraya.
22 Bio crĩchaɗadua sãwã Ãcõrẽba idji biaɗeba carebabarida idjaɓa sãwã cawa obarida. Judiorãba ĩjãpeɗaɗaẽ́ bẽrã Ãcõrẽba cawa opeɗa ãdjirãra igarasia. Maʉ̃ne bãrã judiorãẽ́ra idji biaɗeba careba ɓʉa idjaɓa careba ɓaya. Baribʉrʉ maʉ̃neba pananida panʉa. Bãrãba ĩjã pananaẽ́bʉrʉ, Ãcõrẽba bãrã siɗa cawa opeɗa igaraya bacuru jʉwate tẽtacuabʉrʉ quĩrãca.
23 Idjaɓa judiorã Crito ĩjãnaẽ́ pananaba ĩjãnibʉrʉ, Ãcõrẽba ãdjirãra wayacusa bia edaya dji jʉwate tẽtaɗaɗe wayacusa cara ɓʉbʉrʉ quĩrãca. Idji ʉɓʉaɗeba mãwã poya oya.
24 Wãrãda bãrã judiorãẽ́ra olivo bacuru iduɓa mẽã wariɗa quĩrãca panasiɗaa. Ãcõrẽba maʉ̃ bacuruɗebemada tẽtacuapeɗa olivo bacuru uɗaɗe cara ɓʉcuasia. Mãwã ɓaiẽ́ ɓʉmĩna Ãcõrẽba osia. Maʉ̃ bẽrã ¿judiorãra wayacusa poya edaẽ́ca dji uɗa bacuru jʉwatera wayacusa cara ɓʉcuabʉrʉ quĩrãca?
Ãcõrẽba jũma israelerã ẽdrʉ edaiɗebema
25 Djabarã, mʉ̃a quĩrĩã ɓʉa Ãcõrẽba naẽna cawabiẽ́ ɓaɗada bãrãba cawaɗida. Mãwã judiorã cãyãbara biara ɓeada crĩchaɗaẽ́a. Ãcõrẽba naẽna cawabiẽ́ ɓaɗara naʉ̃gʉa: zocãrã judiorãda cʉwʉrʉ zarea panesiɗaa idjaɓa cʉwʉrʉ zarea panenia aɓa jũma dji Crito ĩjãnida panʉ judiorãẽ́ba ĩjãbʉdaɗaa.
26 Mãwãnacarea Israel purura Ãcõrẽba jũma ẽdrʉ edaya. Ãcõrẽ Beɗeaɗe nãwã ɓʉ́ ɓʉa:
Dadjirã Ẽdrʉ Edabarira Sioʉ̃ puruɗeba zeya.*
Idjia Jacoboɗeba yõpeɗaɗarãba cadjirua opeɗaɗara jũma quĩrãdoaya.
27 Mʉ̃a ãdjirã ume beɗea ɓʉɗara oya. Ãdjia cadjirua opeɗaɗara quĩrãdoaya.*
28 Judiorãba beɗea bia Jesuɗebemada igara panʉ bẽrã Ãcõrẽ ume dji quĩrũa. Maʉ̃ bẽrã bãrã judiorãẽ́ra Ãcõrẽ ẽberãrãda poya ɓeaɗia. Baribʉrʉ Ãcõrẽba ãdjirã drõã naẽnabemarãra edaɗa bẽrã waɗibiɗa quĩrĩã ɓʉa.
29 Wãrãda Ãcõrẽba diaɗara jãrĩcaa. Idjia trʉ̃nara igaracaa.
30 Bãrã judiorãẽ́ba naẽna Ãcõrẽra ĩjãnaca basía. Baribʉrʉ judiorãba ĩjãnaẽ́ panʉ bẽrã iɗira Ãcõrẽba bãrãra quĩrã djuburia ɓʉa.
31 Ãdjirãba iɗira ĩjãnacaa nocoarebema ewariɗe Ãcõrẽba quĩrã djuburiamãrẽã bãrã judiorãẽ́ quĩrã djuburia ɓʉ quĩrãca.
32 Wãrãda Ãcõrẽba iduaribisia jũmarãda cʉwʉrʉ zarea ɓeaɗamãrẽã. Mãwã jũmarãda quĩrã djuburiaya.
33 Ãcõrẽra bio ne cawa ɓʉa idjaɓa crĩcha cawa ɓʉa.
Idjia oi crĩcha ɓʉra ni aɓaʉba poya cawaɗaẽ́a. Idjia o ɓʉ siɗa poya cawaɗaẽ́a.
34 ¿Caiba Ãcõrẽ crĩchara cawa ɓʉ? ¿Caiba idjía crĩchada jaradiabari?
35 ¿Caiba Ãcõrẽa ne diasi jẽda diamãrẽã?
36 Ãcõrẽbʉrʉ ne jũmada osia. Ne jũmada idjiɗeba ɓʉa idjaɓa idji itea ɓʉa.
Dadjirãba ewariza idjía bia beɗeaɗida panʉa. Bia ɓʉa mãwã ɓaida.
Beɗea eɗaare
^ 11:3. 1 Reye 19:10,14.
^ 11:4. 1 Reye 19:18.
^ 11:8. Isaía 29:10.
^ 11:10. Bia mĩgabidua. Griego beɗeaɗe nãwã ɓʉ́ ɓʉa: “Ãdji ẽcarrara jũrẽã ɓʉdua.” Salmo 69:22-23.
^ 11:11. Griego beɗeaɗe nãwã ɓʉ́ ɓʉa: “¿Judiorãra tẽnedrʉɗapeɗa aɓeɗa ɓaesiɗaca?”
^ 11:17. Ãcõrẽba bãrã siɗa careba ɓʉa judiorã careba ɓaɗa quĩrãca. Griego beɗeaɗe nãwã ɓʉ́ ɓʉa: “Bãrã siɗa bacuru ɓa dji carraɗeba ze ɓʉɗeba bia panʉa.”
^ 11:26. Sioʉ̃ purura idjaɓa Jerusaleʉ̃ abadaa.
^ 11:27. Isaía 59:20-21; 27:9.
