Romano 12:1-21
12 Maʉ̃ba djabarã, Ãcõrẽba bãrãra quĩrã djuburiaɗa bẽrã, mʉ̃a bãrãa beɗea djuburiaya ara bãdjida Ãcõrẽa diaɗamãrẽã. Idji itea bia ɓeaɗadua bãrãra bia unumãrẽã. Mãwã bãrãba wãrãda idji itea bia oɗia.
2 Naʉ̃ ẽjũãnebemarãba quĩrĩã panʉ quĩrãca nĩbarãnadua, ãtebʉrʉ crĩcha djiwiɗi Ãcõrẽba dia ɓʉɗeba jipa nĩbaɗadua. Mãwã Ãcõrẽba quĩrĩã ɓʉra bãrãba cawaɗia. Jũma idjia quĩrĩã ɓʉra bia ɓʉa, jipa ɓʉa, idjaɓa idjia bia unu ɓʉa.
3 Ãcõrẽba idji biaɗeba mʉ̃ra ɓʉsia idji itea ne o ɓamãrẽã. Maʉ̃ bẽrã mʉ̃a bãrãa naʉ̃da jaraya: ni aɓaʉba crĩchaiẽ́ ɓʉa ara idjida dji dromaara ɓʉda. Bãrãba Critora ĩjãpeɗaɗa bẽrã Ãcõrẽba bãdjiza awara awara diasia ne oɗamãrẽã. Maʉ̃ bẽrã idjia diaɗa quĩrãca bãdjia o panʉnebemada jipa crĩchaɗadua.
4 Dadji cacuara aɓa ɓʉmĩna dadji cacuaɗe zocãrã eropanʉa, jʉwada, jĩrũda, boroda, ne jũmaa. Baribʉrʉ dadji cacuaɗe ɓeaba aɓarida oɗacaa.
5 Ara maʉ̃ quĩrãca dadjirãra zocãrã panʉmĩna, Crito ume panʉ bẽrã cacua aɓa ɓʉ quĩrãca panʉa. Mãwã dadjirã jũmarãda cacua aɓaʉɗe ãbaa panʉa.
6 Ãcõrẽba idji biaɗeba dadjirãza ne oɗamãrẽã awara awara diasia. Idjia ʉ̃cʉrʉa diasia idjiɗeba beɗeaɗamãrẽã. Mãwã diasibʉrʉ, ãdjia wãrãda ĩjã panʉneba mãwã beɗeaɗida panʉa.
7 Idjia ʉ̃cʉrʉa diasia djãrã carebaɗamãrẽã. Mãwã diasibʉrʉ, djãrãra carebaɗida panʉa. Idjia ʉ̃cʉrʉa diasia idji beɗeada jaradiaɗamãrẽã. Mãwã diasibʉrʉ, idji beɗeara jaradiaɗida panʉa.
8 Idjia ʉ̃cʉrʉa diasia djabarã careba panʉneba biara ĩjãnamãrẽã. Mãwã diasibʉrʉ, djabarãra carebaɗida panʉa biara ĩjãnamãrẽã. Ʉ̃cʉrʉa diasia ne dia panʉneba djãrã carebaɗamãrẽã. Mãwã diasibʉrʉ, sobiaɗeba diaɗida panʉa. Ʉ̃cʉrʉa diasia djabarã boroda ɓeaɗamãrẽã. Mãwã diasibʉrʉ, quĩrãcuita jipa o ɓeaɗida panʉa. Idjaɓa ʉ̃cʉrʉa diasia djãrã quĩrã djuburiaɗamãrẽã. Mãwã diasibʉrʉ, ɓʉsriɗaɗeba quĩrã djuburiaɗida panʉa.
9 Soɗeba dji quĩrĩã ɓeaɗadua. Jũma cadjiruara igaraɗadua. Biadrʉ ẽpẽnadua.
10 Wãrã quĩrĩãneba dji quĩrĩã ɓeaɗadua. Crĩcha biaɗeba dji waya ɓeaɗadua idjaɓa djãrãda biara crĩchaɗadua.
11 Coa ɓearãnadua, ãtebʉrʉ zoquea ɓeaɗadua. Dadjirã Boro Jesuba quĩrĩã ɓʉra soɗeba jũma oɗadua.
12 Ãcõrẽneba ne edaɗida cawa panʉ bẽrã ɓʉsriɗa ɓeaɗadua. Bia mĩga panʉne droaɗadua. Ewariza Ãcõrẽa iwiɗiɗadua.
13 Ãcõrẽ ẽberãrã dji ne neẽ́ queɗeara carebaɗadua. Bãrã deɗe zebʉdara bia edaɗadua.
14 Bãrã biẽ́ oɗi carea ẽpẽ ɓearãa bia jaraɗadua. Wãrãda biyabʉrʉ jaraɗadua. Biẽ́ ɓeaɗida jararãnadua.
15 Ɓʉsriɗa ɓea ume ɓʉsriɗa ɓeaɗadua. Sopua ɓea ume sopua ɓeaɗadua.
16 Jũmarã ume bia ɓeaɗadua. Djãrã cãyãbara biara ɓeada crĩcharãnadua, ãtebʉrʉ mĩã djuburi queɗea ume bia ɓeaɗadua. Crĩcharãnadua bãrãba djãrã cãyãbara biara cawa panʉda.
17 Aɓaʉba bãrãda biẽ́ oibʉrʉ, aɓari quĩrãca orãnadua. Jũmarã quĩrãpita biada oɗadua.
18 Bãrãareba jʉrʉɗadua jũmarã ume necai panani carea.
19 Djabarã, aɓaʉba bãrãda biẽ́ osira aɓarica biẽ́ orãnadua. Ãtebʉrʉ iduaribiɗadua Ãcõrẽba cawa omãrẽã. Ãcõrẽ Beɗeaɗe nãwã ɓʉ́ ɓʉa: “Mʉ̃abʉrʉ cadjirua o ɓeara cawa oya. Mʉ̃abʉrʉ cawa oya ãdjia cadjirua opeɗaɗa quĩrãca.”*
20 Idjaɓa Ãcõrẽ Beɗeaɗe nãwã ɓʉ́ ɓʉa: “Bʉ dji quĩrũda jarra ɓʉɗe ne cobidua. Opichia ɓʉɗe baido diadua. Mãwã oibʉrʉ, idjira bio peraya.”*
21 Aɓaʉba bãrãda biẽ́ o ɓaibʉrʉ aɓarica orãnadua. Ãtebʉrʉ bia oɗadua idjira perapeɗa idjia biẽ́ o ɓʉra idu ɓʉmãrẽã.*
