Romano 13:1-14
13 Jũmarãda naʉ̃ ẽjũãnebema bororã jʉwaeɗa ɓeaɗida panʉa Ãcõrẽba ɓʉɗa bẽrã. Neẽ́a Ãcõrẽba ɓʉɗaẽ́ra.
2 Maʉ̃ bẽrã naʉ̃ ẽjũãnebema bororã igara ɓʉba Ãcõrẽba ɓʉɗada igara ɓʉa. Dji mãwã igara ɓeara ãdji boroba cawa oya.
3 Wãrãda jipa o ɓeaba ãdji boroba cawa oida wayaɗacaa, ãtebʉrʉ cadjirua o ɓeabʉrʉ wayabadaa. Maʉ̃ bẽrã bãrã bororã ume ne wayaa neẽ́ ɓa quĩrĩã panʉbʉrʉ, biada oɗadua ãdjia bia ununamãrẽã.
4 Wãrãda bãrã bororãra Ãcõrẽba idji nezocarã quĩrãca ɓʉsia bãrãda carebaɗamãrẽã. Baribʉrʉ bãrãba cadjiruada oɗibʉrʉ, ãdjida wayaɗadua wãrãda bio cawa oɗida panʉ bẽrã.* Ãdjira Ãcõrẽ nezocarã quĩrãca panʉa cadjirua o ɓeara cawa oɗi carea.
5 Maʉ̃ bẽrã bãrãra naʉ̃ ẽjũãnebema bororã jʉwaeɗa ɓeaɗida panʉa cawa orãnamãrẽã. Maʉ̃ awara ãdjirã jʉwaeɗa ɓeaɗida panʉa, cawa panʉ bẽrã mãwã ɓaira jipa ɓʉda.
6 Maʉ̃ carea bãrãba parata diaɗida panʉra bãrã bororãa diabadaa. Jũma dadjirã druara ãdjiɗe ɓʉ bẽrã idjaɓa ãdjirãra Ãcõrẽ nezocarã quĩrãca panʉ bẽrã, bãrãba maʉ̃ paratara diaɗida panʉa.
7 Jũmarãa diaɗadua bãrãba ãdjiza diaɗida panʉ quĩrãca. Bãrã bororãa parata diaɗida panʉra diaɗadua. Bãrãba wayaɗida panʉra wayaɗadua. Bãrãba bia jaraɗida panʉra bia jaraɗadua.
8 Bãrãba diai bara panʉbʉrʉ, jẽda diaɗaẽ́ ɓearãnadua. Aɓabe dji quĩrĩã ɓeaɗadua. Djãrã quĩrĩã ɓʉba jũma Ãcõrẽba Moisea diaɗa leyra ĩjã o ɓʉa.
9 Maʉ̃ leyba jara ɓʉa: “Daunemarãdua, mĩã bearãdua, ne drʉarãdua, djãrãba eroɓʉra awuarãdua.”* Maʉ̃ra idjaɓa jũma maʉ̃ leyba jara ɓʉ siɗa naʉ̃ crĩcha aɓaʉba jũma jara ɓʉa: “Djãrãra quĩrĩãdua ara bʉdji quĩrĩã ɓʉ quĩrãca.”*
10 Quĩrĩã eroɓʉba djãrãra biẽ́ ocaa. Djãrã quĩrĩã ɓʉɗe jũma Ãcõrẽba Moisea diaɗa leyra ĩjã o ɓʉa.
11 Jũma maʉ̃gʉra o pananadua cawa panʉ bẽrã naʉ̃ ewarira sãwã ɓʉda. Ʉ̃rʉ̃manadua. Waa cãĩ ɓearãnadua. Dadjirã naʉ̃ ẽjũã cadjiruaɗebema ẽdrʉɗi ewarira caitaara ɓʉa dadjia naãrã ĩjãpeɗaɗa cãyãbara.
12 Naʉ̃ ewari cadjiruara jõboɗoa diamasi nũmanada ʉ̃nadrʉboɗo quĩrãca. Maʉ̃ bẽrã dadjirãba cadjiruada idu ɓʉɗapeɗa biada oɗida panʉa. Mãwã dadjirãra cadjiruaɗebemada jũma jũãtrʉ ɓeaɗia sordaoba jũãtrʉbariba idji cacua jũãtrʉ eroɓʉ quĩrãca.
13 Dadjirãra quĩrãipa nĩbaɗida panʉa ãsa nĩbabada quĩrãca. Ɓʉsriɗa obadaɗe beu nĩbaɗiẽ́ panʉa, auɗuada o nĩbaɗiẽ́ panʉa, caicaya ɓeaɗiẽ́ panʉa, idjaɓa djãrãba eroɓʉ carea biẽ́ crĩchaɗiẽ́ panʉa.
14 Ãtebʉrʉ dadjirã Boro Jesucrito nĩbaɗa quĩrãca nĩbaɗadua. Naʉ̃ djaraba cadjirua o quĩrĩã ɓʉra iduaribirãnadua.
