Romano 2:1-29
2 Maʉ̃ba ni aɓaʉba crĩchaiẽ́ ɓʉa Ãcõrẽ quĩrãpita beɗeaɗe ɓʉẽ́da. Dji jipaara o ɓʉaɗa a ɓʉ biɗa mãwã crĩchaiẽ́ ɓʉa. Djãrãba cadjirua o ɓʉda jarabʉrʉɗe ara idjida jara ɓʉa, idjia biɗa aɓari quĩrãca obari bẽrã.
2 Dadjirãba cawa panʉa jũma cadjirua o ɓeara Ãcõrẽba jipa cawa obarida.
3 Maʉ̃ bẽrã djãrãba cadjirua o ɓʉda aɓaʉba jaraibʉrʉ, baribʉrʉ aɓarica o ɓʉbʉrʉ, idjia crĩchaiẽ́ ɓʉa Ãcõrẽba cawa oẽ́da.
4 Mãwã crĩcha ɓʉba igara ɓʉa Ãcõrẽba quĩrã djuburia ɓʉɗebemada, jũma droa ɓʉɗebemada, idjaɓa cadjirua oɗa isabe cawa ocaɗebemada. Idjia adua ɓʉa Ãcõrẽba mãwã bio quĩrã djuburia ɓʉda cadjiruada igarapeɗa idjimaa zemãrẽã.
5 Baribʉrʉ cʉwʉrʉ zarea ɓʉ bẽrã idjia cadjiruada igaracaa Ãcõrẽmaa ze amaaba. Maʉ̃ carea Ãcõrẽba cawa oi ewariɗe idji quĩrũbiɗeba wetara cawa oya. Maʉ̃ ewariɗe Ãcõrẽba unubiya sãwã jũmarãda jipa cawa oida.
6 Idjia jũmarãa diaya ãdjia opeɗaɗa quĩrãca.
7 Ʉ̃cʉrʉba biada o panʉa Ãcõrẽba ãdjida bia unumãrẽã, bia jaramãrẽã, idjaɓa ewariza idji ume zocai ɓʉmãrẽã. Maʉ̃ ẽberãrãra Ãcõrẽba wãrãda ɓʉya ewariza idji ume zocai pananamãrẽã.
8 Baribʉrʉ ʉ̃cʉrʉba crĩcha biẽ́ ɓʉɗeba djãrã cãyãbara biara ɓeaɗi carea jʉrʉbadaa. Maʉ̃ bẽrã wãrã beɗeara ĩjã quĩrĩãnacaa idjaɓa cadjiruada obadaa. Maʉ̃ ẽberãrãra Ãcõrẽba idji quĩrũbiɗeba bio cawa oya.
9 Idjia cawa obʉrʉɗe jũma cadjirua o ɓeara bia mĩga ɓeaɗia idjaɓa sopua ɓeaɗia. Judiorãda, judiorãẽ́ siɗa mãwã ɓeaɗia.*
10 Baribʉrʉ jũma bia o ɓeara Ãcõrẽba bia unuya, bia jaraya, idjaɓa necai ɓʉya. Judiorãda, judiorãẽ́ siɗa mãwã oya.
11 Ãcõrẽba ẽberãrãra jũmaena aɓari quĩrãca jipa cawa oya.
12 Ãcõrẽba Moisea diaɗa ley adua ɓeaba cadjiruara obada bẽrã maʉ̃ leyra adua panʉmĩna Ãcõrẽba cawa oya. Idjaɓa maʉ̃ ley cawa ɓeaba cadjiruara obada bẽrã Ãcõrẽba ara maʉ̃ leyɗeba cawa oya.
13 Ley ũrĩ panʉneba ẽberãrãra Ãcõrẽ quĩrãpita jipa ɓeaẽ́a, ãtebʉrʉ ĩjã o panʉneba Ãcõrẽ quĩrãpita jipa ɓeaa.
14 Judiorãẽ́ba maʉ̃ leyra adua panʉmĩna ãdji crĩchaɗeba maʉ̃ leyba jara ɓʉ quĩrãca eɗauɗe obadaa. Mãwã unubibadaa biada, cadjirua siɗa cawa panʉda.
15 Ara ãdjia o panʉneba unubi panʉa maʉ̃ leyba jara ɓʉra soɗeba cawa panʉda. Ãdji crĩchaɗe cawa panʉa biada wa cadjiruada o panʉda, beɗeaɗe panʉda wa beɗeaɗe panʉẽ́da.
16 Jũmarãba ãdji soɗe mẽrã eropanʉra Ãcõrẽba cawa oi ewariɗe Jesucritoɗeba cawa oya. Mãwãya beɗea bia mʉ̃a jaradia ɓʉba jara ɓʉ quĩrãca.
Ãcõrẽba Moisea diaɗa leyɗeba judiorãra jipa ɓeaɗaẽ́a
17 Bãrã judiorãba dji biarãana abadaa. Ãcõrẽra biara cawa panʉana abadaa. Crĩcha panʉa ẽdrʉɗida Ãcõrẽba Moisea diaɗa leyra cawa panʉ bẽrã.
18 Maʉ̃ leyra eropanʉ bẽrã cawa panʉa Ãcõrẽba cãrẽda quĩrĩã ɓʉda idjaɓa cãrẽda jipa ɓʉda.
19 Bãrãba crĩcha panʉa Ãcõrẽ adua ɓearãa poya bia jaradia pananida dauɓerrea ɓea jipa edebʉda quĩrãca, pãĩmane ɓea ʉ̃naanaa edebʉda quĩrãca.
20 Ãcõrẽba Moisea diaɗa leyra eropanʉ bẽrã crĩcha panʉa jũma necawaada eropanʉda idjaɓa wãrã beɗea siɗa cawa panʉda. Maʉ̃ bẽrã crĩcha panʉa crĩcha neẽ́ ɓearãa, waɗi bio adua ɓearãa biɗa poya jaradia pananida.
21 Bãrãba dewararãa jaradia panʉbʉrʉ, ¿cãrẽ cãrẽã ara bãduɓa jaradiaɗaẽ́? Bãrãba jaradiabadaa ne drʉacara ɓʉda. Baribʉrʉ bãrãra ne drʉabadaa.
22 Bãrãba jaradiabadaa daunemacara ɓʉda. Baribʉrʉ bãrãra daunemabadaa. Bãrãba quĩrĩãnacaa jʉwaba oɗa ãcõrẽa bia beɗeaɗida. Baribʉrʉ jʉwaba oɗa ãcõrẽ deɗebema nebiada drʉabadaa.
23 Ãcõrẽba Moisea diaɗa leyra bãrãba bio cawa panʉana abadaa. Baribʉrʉ maʉ̃ leyba jara ɓʉ ĩjãnaẽ́ panʉ bẽrã, bãrã carea dewararãba Ãcõrẽnebemada biẽ́ beɗeabadaa.
24 Maʉ̃ carea Ãcõrẽ Beɗeaɗe nãwã ɓʉ́ ɓʉa: “Judiorãẽ́ba Ãcõrẽra biẽ́ jarabadaa bãrãba biẽ́ obada carea.”*
25 Ãcõrẽba Moisea diaɗa leyda bãrãba ĩjã osiɗara, bãrã cacua wẽãgoɗada bia ɓʉa Ãcõrẽ ẽberãrã bẽrã. Baribʉrʉ maʉ̃ leyra ĩjã oɗaẽ́bʉrʉ, bãrãra Ãcõrẽ quĩrãpita cacua wẽãgoẽ́ ɓea quĩrãca panʉa.*
26 Maʉ̃ne judioẽ́ba maʉ̃ leyra ĩjã o ɓʉbʉrʉ, cacua wẽãgoẽ́ ɓʉmĩna Ãcõrẽ quĩrãpita cacua wẽãgo ɓʉ quĩrãca ɓʉa.
27 Bãrã judiorãra cacua wẽãgobadaa unubiɗi carea Ãcõrẽ ẽberãrãda. Idjaɓa Ãcõrẽba Moisea diaɗa leyda cawa panʉa. Baribʉrʉ maʉ̃ leyra ĩjã oɗaẽ́ panʉa. Maʉ̃ bẽrã cacua wẽãgoẽ́ ɓʉba maʉ̃ leyda ĩjã oibʉrʉ, cawabiya bãrãra judiorãmĩna beɗeaɗe panʉda.
28 Judio arara aɓabe naʉ̃ djaraɗeba mãwã ɓʉẽ́a. Idjaɓa cacua wẽãgoɗa arara naʉ̃ djaraɗebemaẽ́a.*
29 Ãtebʉrʉ soɗe jipa ɓʉra Ãcõrẽmaarã judio araa. Soɗe jipa ɓʉɗara Ãcõrẽmaarã cacua wẽãgoɗa araa. Ãcõrẽ Jaureba mãwã jipa ɓʉbaria.* Ãcõrẽba Moisea diaɗa ley ẽpẽ ɓʉɗeba jipa ɓaẽ́a. Soɗe jipa ɓʉra ẽberãrãba bia jaraɗacamĩna Ãcõrẽba bia jarabaria.
Beɗea eɗaare
^ 2:9. Judiorãda, judiorãẽ́ siɗa. Griego beɗeaɗe nãwã ɓʉ́ ɓʉa: “Naãrã judiorãda, maʉ̃are judiorãẽ́ siɗa.”
^ 2:24. Isaía 52:5; Ezequiel 36:20-23.
^ 2:25. Cacua wẽãgoẽ́ ɓea. Maʉ̃ba jara ɓʉa: “Ãcõrẽ ẽberãrãẽ́a.”
^ 2:28. Judio araa idjaɓa cacua wẽãgoɗa araa. Maʉ̃ba jara ɓʉa: “Ãcõrẽ ẽberãrãa.”
^ 2:29. Jeremia 4:4; Ezequiel 36:26-27.
