Romano 3:1-31
3 Mʉ̃a mãwã jara ɓʉ bẽrã bãrãba crĩcha panʉsicada judiora Ãcõrẽ quĩrãpita mãcuaẽ́ ɓʉda. Crĩcha panʉsicada cacua wẽãgo ɓʉ siɗa mãcuaẽ́ ɓʉda.
2 Mãwãẽ́a. Ne zocãrãneba judiorãra dji biarãa. Naãrã mʉ̃a jaraya mãwã panʉda Ãcõrẽba idji beɗeara ãdjirãa diaɗa bẽrã.
3 Mãwãmĩna ʉ̃cʉrʉ ãdjirãnebemaba idji beɗeara ĩjãnaẽ́ basía. ¿Maʉ̃gʉ carea Ãcõrẽba oi jaraɗara oẽ́ca?
4 Mãwãẽ́a. Ãcõrẽba oi jaraɗara wãrãda jũma oya. Ẽberãrãra jũmaena sewaiɗa ɓeamĩna Ãcõrẽra beɗea aɓa ɓʉa. Idji Beɗeaɗe nãwã ɓʉ́ ɓʉa:
Bʉ beɗeabʉrʉɗe jũmarãba cawaɗia bʉa jara ɓʉra jipa ɓʉda;
aɓaʉba bʉ biẽ́ jarabʉrʉɗe bʉa cawabiya bʉra jipa ɓʉda.*
5 Mʉ̃ra beɗeaya ẽberãrã beɗeabada quĩrãca. Ʉ̃cʉrʉba jarabadaa cadjirua o panʉne Ãcõrẽra jipa ɓʉda ebuɗa unubibadada. Maʉ̃ne Ãcõrẽba cawa oibʉrʉ, idjira jipa ɓʉẽ́ana abadaa. ¿Dji mãwã jara panʉ́a cãrẽda jaraɗi? ¿Jaraɗica Ãcõrẽra jipa ɓʉẽ́da cadjirua o ɓeara cawa oi bẽrã?
6 ¡Wãrãda mãwãẽ́a! Ãcõrẽda jipa ɓʉẽ́bara, ¿sãwã naʉ̃ ẽjũãnebemarãra jipa cawa ocasi?
7 Ʉ̃cʉrʉba jarabadaa sewa o panʉneba Ãcõrẽra sewa ocada ebuɗa unubibadada. Crĩchabadaa ãdjia sewa o panʉ carea ẽberãrãba Ãcõrẽa auɗuara bia beɗeaɗida. Maʉ̃ bẽrã ãdjimaarã Ãcõrẽba cawa oiẽ́ ɓʉa.
8 Mãwãra ¿dadjirãba auɗuara cadjiruada oɗida panʉca ẽberãrãba Ãcõrẽa auɗuara bia beɗeaɗamãrẽã? Ʉ̃cʉrʉba ãdji crĩcha cadjiruaɗeba jarabadaa daiba mãwã jaradia panʉda. Mãwã jara ɓeara Ãcõrẽba wãrãda biẽ́ ɓʉida ɓʉa.
Ẽberã jipa ɓʉra neẽ́a
9 Maʉ̃ bẽrã ¿cãrẽda jaraɗi? ¿Jaraɗica dai judiorãda dewararã cãyãbara biara ɓeada? ¡Mãwãẽ́a! Mʉ̃a naʉ̃ cartaɗe cawabisia judiorãba, judiorãẽ́ biɗa cadjiruara obadada.
10 Maʉ̃gʉɗebemada Ãcõrẽ Beɗeaɗe nãwã ɓʉ́ ɓʉa:
Ẽberã jipa ɓʉra ni aɓa biɗa neẽ́a.
11 Ni aɓaʉba adua ɓʉa cãrẽda jipa ɓʉda. Ni aɓaʉba Ãcõrẽra jʉrʉcaa.
12 Jũmarãba Ãcõrẽra igarasiɗaa. Jũmarãda Ãcõrẽ quĩrãpita biẽ́ panesiɗaa.
Ni aɓaʉba biada ocaa. Bia o ɓʉra ni aɓa biɗa neẽ́a.*
13 Ãdjia cadjirua beɗeabadara beuɗa uria ewa nũmʉ quĩrãca ɓʉa. Ãdji iteba sewada obadaa.*
Ãdjia jara panʉneba djãrãra biẽ́ obadaa damaba cabʉrʉ quĩrãca.*
14 Djãrã quĩrãma panʉneba ãdji iteba biẽ́ jarabadaa.*
15 Baridua carea mĩã beabadaa.
16 Ãdji wãbʉdaza djãrã bia pananada ãrĩnapeɗa bia mĩgabibadaa.
17 Djãrã ume necai ɓeaɗira adua panʉa.*
18 Ni maãrĩ biɗa Ãcõrẽra wayaɗacaa.*
19 Maʉ̃ beɗea Ãcõrẽ leyɗe ɓʉra dji ley ẽpẽ ɓearãa jara ɓʉa. Mãwã ni aɓaʉba poya jaraɗaẽ́a cadjirua neẽ́ ɓʉda. Maʉ̃ leyɗeba cawa panʉa jũma naʉ̃ ẽjũãnebemarãra Ãcõrẽ quĩrãpita beɗeaɗe panʉda.
20 Wãrãda Ãcõrẽba Moisea diaɗa ley ĩjã o ɓʉɗeba ni aɓaʉda Ãcõrẽ quĩrãpita jipa ɓaẽ́a. Maʉ̃ leyba cawabi ɓʉa dadjia cadjiruada obadada.
Ãcõrẽba Jesucritoɗeba ẽberãrã jipa unubaria
21 Baribʉrʉ iɗira Ãcõrẽba cawabisia maʉ̃ ley oɗaẽ́ne sãwã ẽberãrãra jipa unubarida. Ãcõrẽba Moisea diaɗa leyɗe idjaɓa Ãcõrẽneba beɗeabadarãba ɓʉpeɗaɗa cartaɗe biɗa maʉ̃nebemada ɓʉ́ ɓʉa.
22 Aɓaʉba Jesucritoda ĩjãsira Ãcõrẽba idjira jipa unubaria. Jesu ĩjãbʉdara idjia jũma mãwã jipa unubaria. Ni aɓaʉda quĩrã awara unucaa.
23 Wãrãda jũmarãba cadjiruada obadaa. Maʉ̃ bẽrã Ãcõrẽ biya quiruɗebemada ãĩ ɓeaa.
24 Baribʉrʉ Ãcõrẽba ni cãrẽ siɗa obiẽ́ne idji biaɗeba ẽberãra jipa unubaria. Mãwã unubaria Jesucritoba idji beuɗaɗeba cadjiruaɗebemada ẽdrʉ ɓʉɗa bẽrã.
25 Ãcõrẽba Jesucritora ɓʉsia cadjirua carea beumãrẽã. Dadjirã carea idji oara erozoasia. Maʉ̃ ĩjãbʉdaɗe Ãcõrẽba dadji cadjiruara quĩrãdoabaria. Jesucrito dadjirã cadjirua carea beuɗaba cawabi ɓʉa Ãcõrẽba jipa cawa obarida. Crito zei naẽna cadjirua opeɗaɗara Ãcõrẽba jũma droa ɓʉɗeba cawa oẽ́ ɓasia.
26 Baribʉrʉ iɗira Jesucritoɗeba Ãcõrẽba cadjiruara jũma jipa cawa obaria. Maʉ̃ bẽrã Ãcõrẽba Jesu ĩjãbʉdara jũma jipa unubaria. Mãwã ebuɗa ɓʉa Ãcõrẽra ne jũmane jipa ɓʉda.
27 Maʉ̃ bẽrã ¿cãrẽã ara dadjiɗebemada bia beɗeaɗi? Poya bia beɗeaɗaẽ́a. ¿Sãwãẽrã? Poya bia beɗeaɗaẽ́a, Ãcõrẽba Moisea diaɗa ley ĩjã o panʉneba idji quĩrãpita jipa panʉẽ́ bẽrã, ãtebʉrʉ Jesu ĩjã panʉneba dadjirãra idji quĩrãpita jipa panʉa.
28 Dadjirãba jaradia panʉa Jesuda ĩjã panʉ bẽrã Ãcõrẽba dadjirãra jipa unubarida. Ãcõrẽba Moisea diaɗa ley ĩjã o panʉneba dadjirãra idji quĩrãpita jipa ɓeaɗacaa.
29 3:29-30 ¿Ãcõrẽra aɓabe judiorã Ãcõrẽca? ¿Idjira judiorãẽ́ Ãcõrẽẽ́ca? Wãrãda Ãcõrẽra aɓabʉrʉ ɓʉ bẽrã idjaɓa judiorãẽ́ Ãcõrẽa. Idjia jũma Jesu ĩjãbʉdara jipa unubaria. Cacua wẽãgo ɓeaba, cacua wẽãgoẽ́ ɓea biɗa Jesuda ĩjãsiɗara jipa unubaria.
31 Jesuda ĩjã panʉ bẽrã ¿Ãcõrẽba Moisea diaɗa leyra igara panʉca? Mãwãẽ́a, ãtebʉrʉ maʉ̃ leyba jara ɓʉra obadaa.
