Romano 4:1-25
4 ¿Cãrẽda jaraɗi drõã naẽnabema Abrahaʉ̃nebemada? ¿Sãwã Ãcõrẽba jipa unusi?
2 Abrahaʉ̃ba ne bia o ɓʉɗeba Ãcõrẽ quĩrãpita jipa ɓaɗabara, ara idjiɗebemada poya bia beɗeacasia. Baribʉrʉ wãrã arada ni cãrẽ siɗa oẽ́ basía Ãcõrẽ quĩrãpita bia beɗeai carea.
3 Ãcõrẽ Beɗeaɗe nãwã jara ɓʉa: “Abrahaʉ̃ba Ãcõrẽra ĩjãsia. Maʉ̃ carea Ãcõrẽba idjira jipa unusia.”*
4 Aɓaʉba trajuda oibʉrʉ, idjia edabʉrʉra bari edaẽ́a, ãtebʉrʉ idji trajubari dji boroba diaya.
5 Baribʉrʉ Ãcõrẽ quĩrãpita jipa ɓai carea ne oẽ́ ɓʉba Ãcõrẽda ĩjãibʉrʉ, Ãcõrẽba maʉ̃ ẽberãra jipa unuya. Cadjirua o ɓeaba Ãcõrẽda ĩjãsiɗara Ãcõrẽba jipa unubaria.
6 Ara maʉ̃ quĩrãca Daviba jarasia: Ãcõrẽ quĩrãpita jipa ɓai carea ne oẽ́ ɓʉra Ãcõrẽba jipa unusira bio bia ɓaya.
7 Nãwã jarasia:
Ẽberãrãba Ãcõrẽ ley ĩjã oɗaẽ́ pananada idjaɓa cadjirua opeɗaɗada Ãcõrẽba quĩrãdoasira bio bia panania.
8 Ẽberãba cadjirua oɗa carea Ãcõrẽba beɗeaɗe ɓʉẽ́ana aibʉrʉ, maʉ̃ ẽberãra bio bia ɓaya.*
9 Maʉ̃ba ¿aɓabe cacua wẽãgo ɓeadrʉ bio bia pananica? ¿Cacua wẽãgoẽ́ ɓea siɗa bio bia pananaẽ́ca? Daiba jarasiɗaa Abrahaʉ̃ba Ãcõrẽra ĩjãna bẽrã Ãcõrẽba idjira jipa unusida.
10 Baribʉrʉ ¿Ãcõrẽba idjira sãʉ̃be jipa unusi? ¿Jipa unusica idji cacua wẽãgoɗacarea wa wẽãgoi naẽna? Wãrãda idji cacua wẽãgoi naẽna Ãcõrẽba idjira jipa unusia.
11 Abrahaʉ̃ba Ãcõrẽra ĩjãna bẽrã, cacua wẽãgoẽ́ ɓaɗamĩna Ãcõrẽba idjira jipa unusia. Maʉ̃ cawabi carea Abrahaʉ̃ba jĩrũare idji cacuara wẽãgosia.* Cacua wẽãgoẽ́ ɓeaba Ãcõrẽda ĩjãnibʉrʉ, Abrahaʉ̃ra ãdjirã zezaa, aɓari quĩrãca ĩjã panʉneba Ãcõrẽba jipa unu ɓʉ bẽrã.
12 Idjaɓa Abrahaʉ̃ba idji cacua wẽãgoi naẽna ĩjã ɓaɗa quĩrãca cacua wẽãgo ɓeaba ĩjãnibʉrʉ Abrahaʉ̃ra ãdjirã zezaa.
13 Ãcõrẽba Abrahaʉ̃a, idjiɗeba zeɗi ẽberãrãa biɗa naʉ̃ ẽjũãra diayaɗa asia. Baribʉrʉ mãwã jaraẽ́ basía Abrahaʉ̃ba idji leyda ĩjã oɗa bẽrã. Ãtebʉrʉ mãwã jarasia Abrahaʉ̃ra jipa ununa bẽrã. Mãwã jipa unusia Abrahaʉ̃ba idjida ĩjãna bẽrã.
14 Ãcõrẽba Moisea diaɗa ley ĩjã o ɓeaba Ãcõrẽba diai jaraɗara edabʉdabara, dadji quĩrĩãbe Critora ĩjã panacasiɗaa idjaɓa Ãcõrẽba diai jaraɗara edaɗaẽ́ bacasia.
15 Maʉ̃ leyɗeba Ãcõrẽba cawa oya. Wãrãda leyda neẽ́ baɗabara, dadjirãra maʉ̃ ley igarabʉda carea beɗeaɗe pananaẽ́ bacasia.
16 Ãcõrẽba diai jaraɗara dadjirãba edaɗia idjida ĩjã panʉ bẽrã. Ãcõrẽba idji biaɗeba maʉ̃ra bari dia ɓʉa. Maʉ̃ bẽrã jũma Abrahaʉ̃ ẽberãrãba maʉ̃ra wãrãda edaɗia. Ãcõrẽba Moisea diaɗa leyɗeba panʉba Ãcõrẽda ĩjã panʉbʉrʉ maʉ̃ra edaɗia. Baribʉrʉ aɓabe ãdjiabʉrʉ edaɗaẽ́a, ãtebʉrʉ judiorãẽ́ biɗa Abrahaʉ̃ quĩrãca Ãcõrẽda ĩjãnibʉrʉ edaɗia. Mãwã Abrahaʉ̃ra jũma dadjirã, dji Ãcõrẽ ĩjã ɓea zezaa.
17 Ãcõrẽ Beɗeaɗe nãwã ɓʉ́ ɓʉa: “Mʉ̃a bʉra ɓʉsia zocãrã puru ɓea zezada ɓamãrẽã.”* Wãrãda Ãcõrẽ quĩrãpita Abrahaʉ̃ra jũma dadjirã, dji Ãcõrẽ ĩjã ɓea zezaa. Ãcõrẽba beupeɗaɗara ʉ̃rẽbabibaria idjaɓa ne neẽ́nebemada obaria. Ara maʉ̃ Ãcõrẽda Abrahaʉ̃ba ĩjã ɓasia.
18 Ãcõrẽba nãwã jarasia: “Bʉɗeba yõbʉdarãda zocãrã duanania.”* Abrahaʉ̃ba poya warra unuẽ́da cawa ɓʉmĩna ĩjãsia Ãcõrẽba warra unubida idjia jaraɗa quĩrãca. Mãwã ĩjã ɓʉɗeba zocãrã puru ɓea zezada ɓesia Ãcõrẽba jaraɗa quĩrãca.
19 Warra unui carea jũmawãyã drõãda ɓʉmĩna Abrahaʉ̃ba maʉ̃gʉra waɗibiɗa bio ĩjã ɓasia. Idjira berara cien poa ɓasia. Idji quima Sara siɗa warra tocada cawa ɓʉmĩna Abrahaʉ̃ba waɗibiɗa bio ĩjã ɓasia.
20 Idjia ni maãrĩ biɗa crĩchaẽ́ basía Ãcõrẽba diai jaraɗara diaẽ́da. Ãtebʉrʉ soɗeba wãrãda bio ĩjã ɓasia idjaɓa Ãcõrẽa bia beɗeabadjia.
21 Idjia cawa ɓasia Ãcõrẽba oi jaraɗara wãrãda jũma poya oida.
22 Abrahaʉ̃ba mãwã ĩjãna bẽrã Ãcõrẽba jipa unusia.*
23 Ãcõrẽ Beɗeaɗe mãwã ɓʉ́ ɓʉa. Baribʉrʉ maʉ̃ beɗeara aɓabe idjiɗebemada beɗea ɓʉẽ́a.
24 Ãtebʉrʉ dadjirãnebema siɗa beɗea ɓʉa, dadjirãba ĩjã panʉneba Ãcõrẽba jipa unu ɓʉ bẽrã. Ãcõrẽba dadji Boro Jesura beu ɓaɗada ʉ̃rẽbabisia. Ara maʉ̃ Ãcõrẽda dadjirãba ĩjã panʉa.
25 Idjia Jesura ɓʉsia dadjirã cadjirua carea beumãrẽã. Maʉ̃be beu ɓaɗada ʉ̃rẽbabisia dadjirãra idji quĩrãpita jipa ɓʉi carea.
