Romano 5:1-21
5 Jesucritoda ĩjã panʉ bẽrã Ãcõrẽba dadjirãra jipa unu ɓʉa. Maʉ̃ bẽrã dadjirã Boro Jesucritoɗeba Ãcõrẽ ume necai duanʉa.
2 Maʉ̃ awara Jesucrito ĩjã panʉ bẽrã Ãcõrẽba idji biaɗeba dadjirãra ewariza carebabaria. Idjaɓa ɓʉsriɗa panʉa cawa panʉ bẽrã Ãcõrẽ biya quiruɗebemada edaɗida.
3 Maʉ̃ awara dadjirã bia mĩga panʉne ɓʉsriɗa panabadaa cawa panʉ bẽrã maʉ̃gʉɗeba biara droa cawaɗida.
4 Maʉ̃ droa panʉneba cawa panʉa Ãcõrẽba dadjirãra bia unu ɓʉda. Maʉ̃gʉɗeba cawa panʉa Ãcõrẽ bia quiruɗebemada edaɗida.
5 Maʉ̃ra sewaẽ́a, ãtebʉrʉ wãrãda edaɗia. Mãwã cawa panʉa Ãcõrẽba idji Jaureda dadjirãa diaɗa bẽrã. Idji Jaureɗeba dadjirã soɗe cawabi ɓʉa dadjirãra wãrãda bio quĩrĩã ɓʉda.
6 Dadjirã cadjiruaɗebemada poya ẽdrʉɗaẽ́ panasiɗaɗe Ãcõrẽba ɓʉɗa ewariɗe Critora dadjirã dji cadjiruarã carea beusia.
7 Zarea ɓʉa ẽberã jipa ɓʉ carea aɓaʉba ara idjida idu beabida. Ãĩbẽrã ẽberã bia carea aɓaʉba ara idjida idu beabisicada.
8 Baribʉrʉ Ãcõrẽba dadjirãra bio quĩrĩã ɓʉda unubisia waɗi cadjiruaɗe panʉne Critora dadjirã carea beuɗa bẽrã.
9 Crito oa erozoaɗaɗeba Ãcõrẽba dadjirãra jipa unu ɓʉa. Maʉ̃ bẽrã Critoɗeba dadjirãra Ãcõrẽba cawa oiɗebemada wãrãda ẽdrʉɗia.
10 Dadjirã waɗibiɗa Ãcõrẽ ume dji quĩrũda ɓeasiɗe idji Warra beuɗaɗeba dadjirãra idji ume bia ɓʉsia. Mãwã dadjirãra wãrãda ẽdrʉɗia Critora zocai ɓʉ bẽrã.
11 Maʉ̃ awara dadjirã Boro Jesucritoɗeba Ãcõrẽ ume bia panʉ bẽrã idjiɗeba Ãcõrẽ ume ɓʉsriɗa panʉa.
Adaʉ̃ idjaɓa Crito
12 Ẽberã aɓaʉɗeba cadjiruara naʉ̃ ẽjũãne zesia. Idjaɓa maʉ̃ cadjiruaɗeba dadji beuɗira zesia. Jũmarãba cadjiruada obada bẽrã beubadaa.
13 Ãcõrẽba Moisea idji ley diai naẽna ẽberãrãba naʉ̃ ẽjũãne cadjiruara obadjiɗaa. Baribʉrʉ maʉ̃ ley neẽ́ ɓaɗa bẽrã jaraca basía ẽberãba cadjirua o panʉ carea beɗeaɗe panʉda.
14 Mãwãmĩna Adaʉ̃ ewariɗeba aɓa Moise ewariɗaa ẽberãrãda beusiɗaa cadjiruara obadjiɗa bẽrã. Baribʉrʉ Adaʉ̃ba cadjirua oɗa quĩrãca oɗaẽ́ basía. Adaʉ̃ba igarasia Ãcõrẽba idjía ebuɗa jaraɗara baribʉrʉ ãdjirãba mãwã oɗaẽ́ basía.
Adaʉ̃neba jũmarãda biẽ́ panena quĩrãca dji zeida ɓaɗaɗeba jũmarãda poya bia panesiɗaa.*
15 5:15-16 Wãrãda ẽberã aɓaʉba cadjirua oɗa carea jũmarãda beusiɗaa. Baribʉrʉ ẽberã aɓaʉɗeba Ãcõrẽba idji biaɗeba zocai ɓaida bari diasia jũmarãda zocai ɓeaɗamãrẽã.* Jesucritoba idji biaɗeba dadjirã itea oɗara Adaʉ̃ba cadjirua oɗaɗeba zeɗa cãyãbara ʉɓʉara ɓʉa. Maʉ̃ bẽrã Ãcõrẽba bari dia ɓʉra Adaʉ̃ba cadjirua oɗaɗeba zeɗa quĩrãca ɓʉẽ́a. Maʉ̃ awara Adaʉ̃ba cadjirua aɓabe oɗa carea Ãcõrẽba cawa opeɗa jũmarãda beɗeaɗe panʉana asia. Baribʉrʉ ẽberãrãba cadjiruada zocãrã opeɗaɗamĩna Ãcõrẽba ni cãrẽ siɗa obiẽ́ne idji biaɗeba ãdjirãra jipa unubaria.
17 Wãrãda ẽberã aɓaʉba cadjirua oɗaɗeba jũmarãda beubadaa. Baribʉrʉ dewara ẽberãda ɓʉa, Jesucritoda. Idjiɗeba Ãcõrẽba ni cãrẽ siɗa obiẽ́ne ẽberãrãra jipa unubaria. Idji biaɗeba bio carebabaria. Ãcõrẽba mãwã eroɓʉra Jesucritoɗeba ewariza idji ume zocai panania.
18 Wãrãda ẽberã aɓaʉba cadjirua oɗa carea Ãcõrẽba cawa opeɗa jũmarãda beɗeaɗe panʉana asia. Idjaɓa ẽberã aɓaʉba jipa oɗa carea Ãcõrẽba jũmarãda poya jipa unuya ewariza idji ume zocai pananamãrẽã.
19 Wãrãda ẽberã aɓaʉba Ãcõrẽba jaraɗara ĩjã oɗaẽ́ bẽrã zocãrã ẽberãra dji cadjiruarãda panesiɗaa. Idjaɓa ẽberã aɓaʉba jũma ĩjã oɗa bẽrã zocãrã ẽberãra Ãcõrẽba jipa unuya.
20 Ãcõrẽba Moisea idji leyra diasia ẽberãrãba cawaɗamãrẽã cadjiruara zocãrã obadada. Baribʉrʉ ẽberãrãba cadjiruara biara osiɗaɗe Ãcõrẽba idji biaɗeba biara quĩrã djuburiasia.
21 Wãrãda ẽberãrãba cadjiruada obada bẽrã beubadaa. Baribʉrʉ Ãcõrẽba idji biaɗeba ẽberãrãra jipa unubaria dadjirã Boro Jesucritoɗeba ewariza idji ume zocai pananamãrẽã.
