Romano 6:1-23
6 ¿Maʉ̃nebemada sãwã crĩcha panʉ? ¿Dadjirãra waɗibiɗa cadjiruaɗe nĩbaɗica Ãcõrẽba idji biaɗeba biara quĩrã djuburiamãrẽã?
2 ¡Wãrãda mãwã oɗiẽ́ panʉa! Dadjirãra cadjiruaɗebemada beusiɗaa. Maʉ̃ bẽrã ¿sãwã cadjiruaɗe nĩbaɗi?
3 6:3-4 Bãrãba cawa panʉa borocuesiɗaɗe unubisiɗada Crito ume ãbaa panʉda. Mãwã unubisiɗaa idji ume beusiɗada idjaɓa jousiɗada. Maʉ̃be dadjirã Zeza Ãcõrẽba idji ʉɓʉa waiɓʉa ɓʉɗeba Crito ʉ̃rẽbabiɗa quĩrãca dadjirã siɗa ʉ̃rẽbabisia zocai ɓai djiwiɗiɗe nĩbaɗamãrẽã.
4 –
5 Dadjirãra Crito ume beusiɗa bẽrã idji ʉ̃rẽbaɗa quĩrãca zocai ɓai djiwiɗiɗe nĩbaɗia.
6 Dadjirãba cawa panʉa dadji crĩcha drõãra beusida Crito ume cruɗe cachiɗa quĩrãca. Mãwãbʉrʉ dadjirã crĩcha drõãba naʉ̃ cacuaba cadjirua o quĩrĩã ɓʉda waa poya obiẽ́a. Dadjirãra waa cadjirua nezocarãẽ́a.
7 Wãrãda aɓaʉda Crito ume ãbaa beusibʉrʉ, cadjiruaɗebemada ẽdrʉsia.*
8 Dadjirãra Crito ume ãbaa beupeɗaɗa bẽrã ĩjã panʉa idji ume zocai pananida.
9 Dadjirãba cawa panʉa Critora beu ɓaɗada ʉ̃rẽbaɗa bẽrã waa beuẽ́da. Beuba idjira waa poyaẽ́a.
10 Crito ɓarima aɓa beuɗaba jũma cadjiruada poyasia. Idjira waa beuẽ́a ãtebʉrʉ Ãcõrẽ itea zocai ɓʉa.
11 Ara maʉ̃ quĩrãca cawaɗida panʉa bãrãra cadjiruaɗebemada beusiɗada idjaɓa dadjirã Boro Jesuɗeba Ãcõrẽ itea zocai panʉda.
12 Maʉ̃ bẽrã cadjiruara idu bãrã boro babirãnadua. Mãwã bãrã cacua beuida ɓʉba cadjirua o quĩrĩã ɓʉda oɗaẽ́a.
13 Bãrã cacuaa idu cadjiruara obirãnadua. Ãtebʉrʉ ara bãdjida Ãcõrẽa diaɗadua. Bãrãra cadjiruaɗe beu pananada Ãcõrẽ itea zocai panesiɗaa. Maʉ̃ bẽrã bãrã cacuada Ãcõrẽa diaɗadua jipa oɗi carea.
14 Ãcõrẽba idji biaɗeba bãrãra ẽdrʉ ɓʉɗa bẽrã idjaɓa Ãcõrẽba Moisea diaɗa leyɗeba panʉẽ́ bẽrã, cadjiruara bãrã boroda ɓaiẽ́ ɓʉa.
Jipa oɗiɗebema
15 ¿Maʉ̃nebemada sãwã crĩcha panʉ? Ãcõrẽba idji biaɗeba dadjirãra ẽdrʉ edaɗa bẽrã idjaɓa dadjirãra Moisea diaɗa leyɗeba panʉẽ́ bẽrã ¿cadjiruada oɗida panʉca? ¡Mãwãẽ́a!
16 Bãrãba cawa panʉa ara bãdjida djãrã nezocada ɓeaɗi carea diaɗibʉrʉ, dji boroba jarabʉrʉra jũma ĩjã oɗida panʉa. Ara maʉ̃ quĩrãca bãrãba cadjiruara bãrã boroda ɓʉɗibʉrʉ, cadjiruara oɗapeɗa beuɗia. Baribʉrʉ Ãcõrẽda bãrã boroda ɓʉɗibʉrʉ, idji beɗea ĩjã obʉdaɗe jipa nĩbaɗia.
17 Naẽna bãrãra cadjirua nezocarã basía. Baribʉrʉ jũma Ãcõrẽnebema jaradiapeɗaɗara soɗeba ĩjã o panʉ bẽrã mʉ̃a Ãcõrẽa bia ɓʉaɗa abaria.
18 Bãrãra cadjiruaɗebemada ẽdrʉɗapeɗa Ãcõrẽ nezocarãda panesiɗaa jipa oɗi carea.
19 Mʉ̃a mãwã nezocaɗebemada beɗea ɓʉa naʉ̃ crĩchada jaradiai carea. Ara bãdjiɗeba cawaɗida zarea ɓʉ bẽrã mãwã jaradia ɓʉa. Wãrãda naẽna bãrãba ara bãdjida ɓʉsiɗaa cadjirua nezocada ɓeaɗi carea. Mãwã bãrãba mĩã peraiɗebemada, jũma cadjirua siɗa ewariza wetara o panabadjiɗaa. Baribʉrʉ iɗira Ãcõrẽ nezocarã bẽrã ara bãdjida ɓʉɗadua jipa oɗi carea. Mãwãbʉrʉ Ãcõrẽ itea bia ɓeaɗia.
20 Bãrãra cadjirua nezocarã basiɗe jipa oɗida crĩchaɗaca basía.
21 Baribʉrʉ cadjirua o panʉneba ¿cãrẽ biada edasiɗa? ¿Mãwã o panana carea iɗira quĩrã pera panʉẽ́ca? Cadjirua o panʉ carea ẽberãrãra beuɗia.
22 Iɗira bãrãra cadjiruaɗebemada ẽdrʉpeɗaɗa bẽrã Ãcõrẽ nezocada panesiɗaa. Mãwã bãrãra Ãcõrẽ itea bia panesiɗaa. Maʉ̃ bẽrã idji ume ewariza zocai panania.
23 Wãrãda cadjirua o panʉ carea ẽberãrãra beuɗia. Baribʉrʉ dadjirã Boro Jesucritoɗeba Ãcõrẽba ewariza zocai ɓaida bari dia ɓʉa.
Beɗea eɗaare
^ 6:7. Cadjiruaɗebemada ẽdrʉsia. Griego beɗeaɗe maʉ̃ba idjaɓa jara ɓʉa: “Cadjirua o ɓʉɗebemada Ãcõrẽba jipa ɓʉsia.”
