Romano 7:1-25
7 Djabarã, Ãcõrẽba Moisea diaɗa leyra cawa panʉ bẽrã maʉ̃ leyɗeba mʉ̃a bãrãa beɗeaya. Bãrãba cawa panʉa aɓabe zocai panʉnebʉrʉ dadjirãra maʉ̃ leyɗeba panʉda.
2 7:2-3 Naʉ̃ quĩrãca ɓʉa. Maʉ̃ leyba jara ɓʉa wẽrã quima bara ɓʉra idji quima zocai ɓʉɗe idji ume ɓaida ɓʉda. Idji quima waɗi zocai ɓʉɗe maʉ̃ wẽrãba dewara umaquĩrãda edaibʉrʉ, leyba jara ɓʉa wẽrãra daunemasida. Baribʉrʉ idji quimada beusira wẽrãra idji quima ume ɓaida ɓʉ leyɗebemada ẽdrʉsia. Maʉ̃ne idjia dewara umaquĩrãda edaibʉrʉ, daunemaẽ́ ɓʉa.
3 –
4 Djabarã, ara maʉ̃ quĩrãca Crito beuɗaɗeba bãrãra Ãcõrẽba Moisea diaɗa leyɗebemada beusiɗaa. Mãwã dewaraɗeba poya panania. Iɗira bãrãra Crito dji ʉ̃rẽbaɗaɗea. Idjiɗeba panʉ bẽrã Ãcõrẽ itea poya bia oɗia.
5 Dadjirãra naʉ̃ djaraba o quĩrĩã ɓʉɗeba nĩbasiɗaɗe Ãcõrẽba Moisea diaɗa leyba jara ɓʉ carea wetara cadjiruada o quĩrĩãsiɗaa. Maʉ̃ne cadjirua o panʉ carea beuɗida panasiɗaa.*
6 Baribʉrʉ Ãcõrẽba Moisea diaɗa leyɗeba pananada dadjirãra ẽdrʉsiɗaa. Maʉ̃ leyɗebemada beusiɗa bẽrã iɗira Ãcõrẽra idji Jaureɗeba ẽpẽnia. Waa crĩchaɗaẽ́a Moiseba ɓʉɗa leyɗeba ẽpẽnida.
Cadjirua o quĩrĩã ɓʉɗebema
7 ¿Maʉ̃nebemada sãwã crĩcha panʉ? ¿Ãcõrẽba Moisea diaɗa leyra cadjiruaca? ¡Mãwãẽ́a! Maʉ̃ ley neẽ́ baɗabara mʉ̃a adua ɓacasia cãrẽda cadjiruada. Maʉ̃ leyba djãrãnera awuarãduaɗa aɗaẽ́bara, mʉ̃a djãrãne awuaira cadjiruada adua ɓacasia.*
8 Baribʉrʉ awuarãduaɗa aɗa bẽrã cadjirua o quĩrĩã ɓʉɗeba mʉ̃a ne jũmada wetara awuasia. Wãrãda Ãcõrẽba Moisea diaɗa ley neẽ́ baɗabara wetara cadjiruara o quĩrĩãẽ́ bacasia.*
9 Naẽna maʉ̃ ley adua ɓasiɗe mʉ̃ra necai ɓabadjia. Baribʉrʉ cawasiɗe mʉ̃a cadjiruada o quĩrĩãsia. Maʉ̃be cadjirua carea beuida ɓasia.
10 Maʉ̃ ley ĩjã o ɓʉɗeba mʉ̃ra Ãcõrẽ ume ewariza zocai ɓaida ɓasia. Baribʉrʉ oca bẽrã maʉ̃ leyba cawabisia mʉ̃ra beuida ɓʉda.
11 Maʉ̃ leyba jara ɓʉ carea mʉ̃a cadjiruada wetara o quĩrĩãsia. Maʉ̃be cadjiruaba mʉ̃ra cũrũgasia crĩchamãrẽã maʉ̃ leyɗeba jipa ɓaida. Baribʉrʉ ĩjã oca bẽrã beuida ɓasia.
12 Wãrãda maʉ̃ leyra Ãcõrẽnea. Maʉ̃ leyba jara ɓʉra jũma bio bia ɓʉa, jipa ɓʉa, idjaɓa ariɗe ɓʉa.
13 Mãwãra ¿ley bia ɓʉba mʉ̃ra beubisica? ¡Mãwãẽ́a! Ãtebʉrʉ cadjirua o ɓʉ carea mʉ̃ra mãwã beuida ɓasia. Mʉ̃a cadjirua o ɓʉ carea maʉ̃ ley bia ɓʉba jara ɓʉa mʉ̃ra beuida ɓʉda. Mãwã ebuɗa ɓʉa cadjiruara sãwãbʉrʉ ɓʉda. Mʉ̃a cadjirua o ɓʉra wãrãda bio cadjirua ɓʉa.
14 Dadjirãba cawa panʉa Ãcõrẽba Moisea diaɗa leyra Ãcõrẽ Jaureɗeba zesida. Baribʉrʉ mʉ̃ra naʉ̃ djaraɗe ɓʉa. Mʉ̃ra cadjiruaba nẽdoɗa quĩrãca ɓʉa idji nezocada ɓamãrẽã.
15 Mʉ̃a adua ɓʉa cãrẽ cãrẽã jãwã obarida. Mʉ̃a ne bia o quĩrĩã ɓʉra ocaa, ãtebʉrʉ mʉ̃a cadjirua o quĩrĩãẽ́ ɓʉda obaria.
16 Baribʉrʉ mʉ̃a cadjirua o ɓʉra o quĩrĩãẽ́ ɓʉ bẽrã ebuɗa ɓʉa Ãcõrẽba Moisea diaɗa leyra mʉ̃a bia unu ɓʉda.
17 Maʉ̃ bẽrã ara mʉ̃djia quĩrĩã ɓʉɗeba cadjiruara o ɓʉẽ́a, ãtebʉrʉ cadjirua mʉ̃ soɗe ɓʉba mãwã obibaria.
18 Mʉ̃a cawa ɓʉa mʉ̃ soɗera biada neẽ́da. Biara jaraibʉrʉ, mʉ̃ra naʉ̃ djaraɗe ɓʉ bẽrã ara mʉ̃djia quĩrĩã ɓʉɗeba biada poya ocaa. Mʉ̃a biada o quĩrĩã ɓʉmĩna poya ocaa.
19 Wãrãda mʉ̃a bia o quĩrĩã ɓʉra ocaa, ãtebʉrʉ cadjirua o quĩrĩãẽ́ ɓʉda obaria.
20 Mʉ̃a cadjirua o quĩrĩãẽ́ ɓʉda o ɓʉmĩna, ara mʉ̃djia quĩrĩã ɓʉɗeba mãwã o ɓʉẽ́a. Ãtebʉrʉ cadjirua mʉ̃ soɗe ɓʉba mãwã obi ɓʉa.
21 Maʉ̃ bẽrã naʉ̃da cawa ɓʉa: mʉ̃a biada o quĩrĩã ɓʉmĩna cadjirua mʉ̃ soɗe ɓʉba cadjiruada obibaria.
22 Wãrãda mʉ̃a soɗeba Ãcõrẽ leyra bio bia unu ɓʉa.
23 Mãwãmĩna dewara crĩcha siɗa mʉ̃ soɗe ɓʉa. Maʉ̃gʉba mʉ̃ preso eroɓʉ quĩrãca mʉ̃́a cadjiruada obibaria. Mʉ̃a bia o quĩrĩã ɓʉra maʉ̃ crĩchaba idu obi quĩrĩãcaa ne bia oi crĩcha ume djõ ɓʉ quĩrãca.
24 ¡Mʉ̃ra mĩã djuburi ɓʉa! ¿Caiba mʉ̃ra ẽdrʉ ɓʉi naʉ̃ cacua beuida ɓʉba cadjirua o quĩrĩã ɓʉɗebemada?
25 Aɓabe Ãcõrẽbʉrʉ dadjirã Boro Jesucritoɗeba mʉ̃ra ẽdrʉ ɓʉya. Maʉ̃ carea mʉ̃a idjía bia ɓʉaɗa aya. Wãrãda mʉ̃ crĩchaɗe Ãcõrẽ leyra ĩjã o quĩrĩã ɓʉa, baribʉrʉ naʉ̃ djaraɗe ɓʉ bẽrã cadjirua mʉ̃ soɗe ɓʉba cadjiruada obibaria.
