Romano 9:1-33
9 Mʉ̃ra Critoɗe bẽrã wãrã beɗeada jaraya. Sewa oẽ́a. Ãcõrẽ Jaureba mʉ̃ soɗe naʉ̃ beɗeara wãrã arada cawabi ɓʉa.
2 9:2-3 Naʉ̃da jaraya: mʉ̃ ẽberãrã judiorã carea ewariza bio sopua ɓabaria. Ãdjirãra Ãcõrẽ ume biẽ́ panʉnebemada poya bia ɓʉibara, mʉ̃da ãdjirã cacuabari Critoɗebemada jĩga ɓecasia.
3 –
4 Ãdjirãra Israelɗebemaa. Ãcõrẽba ãdjirãra naãrã edasia idji warrarãda ɓeaɗamãrẽã.* Idji quĩrãwãrẽã dorrodorroada ãdjirãa unubisia.* Ãdji drõã naẽnabemarã ume beɗea ɓʉsia.* Idji ley siɗa Moiseɗeba ãdjirãa diasia. Ãdjirãa cawabisia idji deɗe cãrẽda oɗida panʉda idjaɓa jũma idjia diai jaraɗara ãdjirã itea ɓasia.
5 Ãdji drõã naẽnabemarãra dji dromarãda ɓeasia. Ãdjirãneba Critora naʉ̃ djaraɗe zesia. Idjidrʉ jũmarã Ãcõrẽa. Idjíabʉrʉ dadjirãba ewariza bia beɗeaɗida panʉa. Bia ɓʉa mãwã ɓaida.
6 Mʉ̃a jaraẽ́ ɓʉa Ãcõrẽba israelerã itea oyaɗa aɗara oẽ́ ɓʉda. Ãtebʉrʉ mʉ̃a jara ɓʉa jũma Israelɗeba yõpeɗaɗara Ãcõrẽ quĩrãpita israelerãẽ́da.
7 Idjaɓa jũma Abrahaʉ̃neba yõpeɗaɗara Ãcõrẽ quĩrãpita Abrahaʉ̃ warrarã araẽ́a. Ãcõrẽba Abrahaʉ̃a nãwã jarasia: “Mʉ̃a warrarã diai jaraɗara bʉ warra Isaɗeba zeɗia.”*
8 Maʉ̃ beɗeaba dadjirãa cawabi ɓʉa jũma Abrahaʉ̃neba naʉ̃ djaraɗe topeɗaɗara Ãcõrẽ warrarãẽ́da. Ãcõrẽba diai jaraɗa warrarãdrʉ Abrahaʉ̃ warrarã araa.
9 Ãcõrẽba Abrahaʉ̃a diai jaraɗa beɗeara naʉ̃gʉa: “Za zei poaɗe ara naʉ̃ ewari quĩrãca mʉ̃ra wayacusa zeya. Maʉ̃ne Saraba warrada to eroɓaya.”*
10 9:10-12 Maʉ̃ awara Ãcõrẽba cawabisia idjia eda quĩrĩã ɓʉda edabarida. Idjaɓa cawabisia ni aɓaʉda edacada ãdjia o panʉra bia unu ɓʉ bẽrã ãtebʉrʉ edabaria idjia trʉ̃na bẽrã. Nãwã cawabisia: Rebecaba mĩguisoda tosia. Dji zezara dadji drõã naẽnabema Isa basía. Baribʉrʉ maʉ̃ warrarã toɗi naẽna idjaɓa biada ni cadjiruada oɗi naẽna Ãcõrẽba Rebecaa jarasia: “Dji nabemada dji tẽãbema jʉwaeɗa ɓaya.”*
13 Maʉ̃ carea Ãcõrẽ Beɗeaɗe nãwã ɓʉ́ ɓʉa: “Mʉ̃a Jacoboda quĩrĩãsia, maʉ̃ne Esaúra unu amasia.”*
14 ¿Maʉ̃nebemada sãwã crĩcha panʉ? ¿Ãcõrẽba jipa ocada crĩcha panʉca? ¡Mãwãẽ́a!
15 Ãcõrẽba Moisea nãwã jarasia:
Mʉ̃a quĩrã djuburia quĩrĩã ɓʉ ẽberãda quĩrã djuburiaya idjaɓa mʉ̃a quĩrĩãneba careba quĩrĩã ɓʉ ẽberãda quĩrĩãneba carebaya.*
16 Wãrãda Ãcõrẽba edabʉrʉ ẽberãra edacaa maʉ̃ ẽberãba o ɓʉda bia unu ɓʉ bẽrã ni dji ẽberãba mãwã quĩrĩã ɓʉ bẽrã. Ãtebʉrʉ idjia quĩrã djuburia quĩrĩã ɓʉdrʉ edabaria.
17 Ãcõrẽ Beɗeaɗe idjia Egiptoɗebema boroa jaraɗada nãwã ɓʉ́ ɓʉa:
Mʉ̃a bʉra dji boroda ɓʉsia bʉ mĩgabi ɓʉɗeba mʉ̃ ʉɓʉada unubi carea. Mãwã mʉ̃ra jũma naʉ̃ ẽjũãne trʉ̃ ɓʉga ɓaya.*
18 Maʉ̃ba cawabi ɓʉa Ãcõrẽba aɓaʉda quĩrã djuburia quĩrĩã ɓʉbʉrʉ mãwã obarida idjaɓa aɓaʉda cʉwʉrʉ zarea ɓʉ quĩrĩã ɓʉbʉrʉ mãwã ɓʉbarida.
19 Maʉ̃ beɗea carea aɓaʉba nãwã jaraisicada: “Ãcõrẽba mãwã obari bẽrã ¿cãrẽ cãrẽã dadjirãra beɗeaɗe panʉana a ɓʉ? ¿Idjia dadjirã ɓʉɗa quĩrãca panʉẽ́ca?”
20 Baribʉrʉ dji mãwã beɗea ɓʉra ¿cai mãwã Ãcõrẽa beɗeai carea? Zocoba dji caɗaa jaraida ɓʉca: “Bʉa ¿cãrẽ cãrẽã mʉ̃ra jãwã osi?”
21 ¿Dji egoro cabariba o quĩrĩã ɓʉ quĩrãca oiẽ́ ɓʉca? ¿Aɓari egoroba zoco ewari droma careabemada, baridua ewari careabema siɗa oida ɓʉẽ́ca?
22 Ara maʉ̃ quĩrãca Ãcõrẽba o quĩrĩãnada osia. Ẽberãrãba cadjirua o panʉ carea Ãcõrẽba idji quĩrũbiɗeba idjaɓa idji ʉɓʉaɗeba cawa opeɗa tʉbʉ uruaɗe ɓatabueida ɓasia. Baribʉrʉ ãdjia cadjirua o panʉra jũma droasia.
23 Mãwã droasia idji biya quiru waiɓʉa ɓʉɗebemada idjia quĩrã djuburia ɓʉ ẽberãrãa cawabi carea. Ãdjirãra idjia naẽna edasia idji bia quiruɗebemada eroɓeaɗamãrẽã.
24 Dadjirãra maʉ̃ ẽberãrãnebemaa. Ʉ̃cʉrʉ judiorãa idjaɓa ʉ̃cʉrʉra judiorãẽ́a. Baribʉrʉ Ãcõrẽba jũma dadjirãra trʉ̃sia.
25 Ãcõrẽba jaraɗada Osea cartaɗe nãwã ɓʉ́ ɓʉa:
Mʉ̃ puruẽ́ baɗada mʉ̃ puruaɗa aya. Mʉ̃a quĩrĩãẽ́ ɓaɗa puruda mʉ̃a quĩrĩã ɓʉ puruaɗa aya.*
26 Idjaɓa nãwã ɓʉ́ ɓʉa:
Mʉ̃a jarasia bãrãra mʉ̃ ẽberãrãẽ́da.
Mãwã jaraɗama mʉ̃a bãrãra mʉ̃ warrarãana aya.*
27 9:27-28 Idjaɓa Isaíaba israelerãnebemada nãwã jarasia:
Israelerãra zocãrã panʉa pusa ĩbʉ quĩrãca. Mãwãmĩna ãdjirãra zocãrãẽ́be ẽdrʉɗia dadjirã Boro Ãcõrẽba naʉ̃ ẽjũãne ɓeara isabe jũma cawa oi bẽrã.*
29 Idjaɓa maʉ̃ naẽna Isaíaba nãwã jarasia:
Dadjirã Boro jũma poya ɓʉba dadji israelerãra ʉ̃cʉrʉ zocai ɓʉɗaẽ́bara, Sodomanebemarã, Gomorraɗebemarã quĩrãca ni aɓa biɗa neẽ́ bacasia.*
Judiorãba Crito ĩjãnaẽ́ panʉnebema
30 ¿Maʉ̃ba cãrẽda jara ɓʉ? Judiorãẽ́ba jʉrʉɗaca basía Ãcõrẽ quĩrãpita jipa ɓeaɗi carea. Baribʉrʉ Critora ĩjãpeɗaɗa bẽrã Ãcõrẽba ãdjirãra jipa unusia.
31 Maʉ̃ne israelerãba Ãcõrẽ quĩrãpita jipa ɓeaɗi carea leyɗeba jʉrʉ pananamĩna Ãcõrẽba jipa unuẽ́ basía.
32 ¿Cãrẽ cãrẽã ãdjirãra jipa unuẽ́ basi? Jipa unuẽ́ basía Crito ĩjãni cãyãbara ãdjia o panʉneba idji quĩrãpita jipa ɓeaɗi carea jʉrʉ panana bẽrã.* Wãrãda ãdjirãba Critora ĩjãnaẽ́ basía mõgaraɗe tẽnedrʉbʉda quĩrãca.
33 Ãcõrẽ Beɗeaɗe maʉ̃nebemada nãwã ɓʉ́ ɓʉa:
Ũrĩnadua. Mʉ̃a Sioʉ̃ puruɗe de oi careabema mõgarada ɓʉbʉrʉa.*
Maʉ̃ mõgaraɗe ẽberãrãra tẽnedrʉɗapeɗa ɓaeɗia. Baribʉrʉ idji ĩjã ɓʉba idji quĩrĩãbe ĩjã ɓaẽ́a.*
Beɗea eɗaare
^ 9:4. Exodo 40:34-35.
^ 9:4. Genesi 12:1-3.
^ 9:4. Exodo 4:22.
^ 9:7. Genesi 21:12.
^ 9:9. Genesi 18:10,14.
^ 9:10-12. Genesi 25:23.
^ 9:13. Malaquia 1:2-3.
^ 9:15. Exodo 33:19.
^ 9:17. Exodo 9:16.
^ 9:25. Osea 2:23.
^ 9:26. Osea 1:10.
^ 9:27-28. Isaía 10:22,23.
^ 9:29. Isaía 1:9.
^ 9:32. Ãdjia o panʉneba. Griego beɗeaɗe ʉ̃cʉrʉ cartaɗe nãwã ɓʉ́ ɓʉa: “Ãcõrẽba Moisea diaɗa ley ĩjã o panʉneba.”
^ 9:33. Sioʉ̃ purura idjaɓa Jerusaleʉ̃ abadaa.
^ 9:33. Idji quĩrĩãbe ĩjã ɓaẽ́a. Griego beɗeaɗe ɓʉ́ ɓʉa: “Peraẽ́a.” Isaía 28:16; 1 Pedro 2:6.
