Santiago 1:1-27
1 Mʉ̃ra Santiagoa, Ãcõrẽ nezocaa idjaɓa dadjirã Boro Jesucrito nezocaa. Naʉ̃ cartara ɓʉbʉrʉa Israel doce warrarãneba yõpeɗaɗarã druaza ɓea itea. Mʉ̃a quĩrĩã ɓʉa bãrãra bia pananida.
2 Djabarã, bariduaɗeba bia mĩga panʉne ɓʉsriɗa ɓeaɗadua.
3 Bãrãba cawa panʉa mãwã bia mĩga panʉne Ãcõrẽda ĩjã pananibʉrʉ, biara droa cawaɗida.
4 Maʉ̃ bẽrã jũma bia droa pananadua. Mãwã ne jũmane biya, jipa ɓeaɗia. Ni maãrĩ biɗa biẽ́ ɓeaɗaẽ́a.
5 Bãrãnebemaba crĩcha cawaada neẽ́ ɓʉbʉrʉ, Ãcõrẽa iwiɗida ɓʉa. Maʉ̃ne Ãcõrẽba diaya. Idjía iwiɗisiɗara quẽãẽ́ne jũmarãa aɗuba diabaria.
6 Baribʉrʉ wãrãda ĩjã ɓʉɗeba iwiɗida ɓʉa. Ni maãrĩ biɗa crĩchaiẽ́ ɓʉa Ãcõrẽba diaẽ́da. Mãwã crĩcha ɓʉra nãũrãba pusa bogozoa ãyã edebari quĩrãca ɓʉa.
7 Mãwã ɓʉba crĩchaiẽ́ ɓʉa dadjirã Boroɗeba ne edaida.
8 Idjira crĩcha umé ɓʉ bẽrã aɓari crĩchaɗe ɓacaa.
9 Djaba mĩã djuburi ɓʉra ɓʉsriɗa ɓaida ɓʉa Ãcõrẽ quĩrãpita dji droma bẽrã.
10 Baribʉrʉ parata bara ɓʉra ɓʉsriɗa ɓaida ɓʉa Ãcõrẽba idjira mĩã djuburi unu ɓʉ bẽrã. Parata bara ɓʉra dãrã ɓaẽ́a nepõnõ dãrã ɓaca quĩrãca.
11 Ʉ̃mãdau odjaɗacarea jʉ̃wʉ̃rʉ̃ãba chiruara põpõnozoabaria. Maʉ̃be dji põnõ jurrupeɗa idji biya quirura jõbaria. Ara maʉ̃ quĩrãca ne bara ɓʉra ewariza parata edai carea ɓʉɗe beuya.
12 Aɓaʉba bia mĩga ɓʉɗe jũma droa ɓʉbʉrʉ, Ãcõrẽ quĩrãpita bio bia ɓʉa.* Jũma droaɗacarea Ãcõrẽba boroɓari diabʉrʉ quĩrãca idjira ewariza zocai ɓʉya. Ãcõrẽba jũma idji quĩrĩã ɓearãa wãrãneba mãwã zocai ɓʉyaɗa asia.
13 Cadjirua oi crĩcha zebʉrʉɗe ni aɓaʉba jaraiẽ́ ɓʉa Ãcõrẽba maʉ̃ra dia ɓʉda. Cadjirua oi crĩchara Ãcõrẽmaa zeca bẽrã idjia ni aɓaʉa maʉ̃ra diacaa.
14 Ãtebʉrʉ cadjirua oi crĩchara zebaria ara dadjia mãwã o quĩrĩã ɓʉ bẽrã.
15 Cadjirua oi crĩchara zepeɗa maʉ̃da o ɓebaria. Mãwã o ɓeɗa bẽrã beuɗacarea Ãcõrẽnebemada ewariza jĩga ɓaya.
16 Djabarã, ara bãduɓa cũrũgarãnadua.
17 Ʉ̃taareba dadjirã Zeza Ãcõrẽba ne jũma bio biya queɗeadrʉ dadjirãa diabaria. Idjiabʉrʉ ne jũma bajãne uruabadara ocuasia. Maʉ̃ra ewariza aɓarica uruaɗacaa. Baribʉrʉ Ãcõrẽra quĩrã awara ɓacaa idjaɓa quĩrã awara ocaa.
18 Idjia quĩrĩãna bẽrã idji wãrã beɗeaɗeba dadjirãra zocai ɓʉsia. Mãwã néuɗebema naãrã ewaɗa idjía diaɗa quĩrãca dadjirãra jũma idjia oɗaɗebemada idji itea biara panʉa.
19 Maʉ̃ bẽrã djabarã, jũmarãba quĩrãcuita ũrĩni carea ɓeaɗida panʉa, quĩrãcuita beɗeaɗida panʉa, idjaɓa baridua carea isabe quĩrũniẽ́ panʉa.
20 Dadji quĩrũbʉdaɗe Ãcõrẽba jipa obi ɓʉra oɗacaa.
21 Maʉ̃ bẽrã ne jũma cadjiruara, ne jũma jipaẽ́ ɓʉ siɗa igaraɗadua. Maʉ̃be Ãcõrẽba idji beɗea bãrã soɗe ɓʉɗada crĩcha biaɗeba ĩjãnadua. Ara maʉ̃ beɗeaba bãrãra Ãcõrẽba cawa oiɗebemada poya ẽdrʉ edaya.
22 Ãcõrẽ beɗeara ĩjã o pananadua. Aɓabe ũrĩbadada ɓearãnadua. Mãwã ɓeaɗibʉrʉ, ara bãduɓa cũrũga ɓeaɗia.
23 Ãcõrẽ beɗea ũrĩ ɓʉba ĩjã oẽ́bʉrʉ, ẽberãba quĩrã acʉbadaɗe idji quĩrã acʉbʉrʉ quĩrãca ɓʉa.
24 Acʉbʉrʉɗe idjira sãwã ɓʉda unubarimĩna, ãyã wãsira aɓeɗa quĩrãdoabaria.
25 Baribʉrʉ bariduaba Ãcõrẽ beɗeada ũrĩpeɗa quĩrãdoaẽ́bʉrʉ, bio bia ɓaya. Maʉ̃ beɗea jipa ɓʉ dadji ẽdrʉ ɓʉbarida ewariza quĩrãcuita crĩchapeɗa ĩjã o ɓaibʉrʉ, idjia o ɓʉɗeba bio bia ɓaya.
26 Aɓaʉba Ãcõrẽda ĩjã ɓʉda crĩcha ɓʉbʉrʉ, baribʉrʉ idji quĩrãmeda quĩrãcuita wagaẽ́bʉrʉ, ara idjiduɓa cũrũga ɓʉa. Wãrãda ĩjãẽ́ ɓʉa.
27 Wãrãda ĩjã ɓʉba nãwã oida ɓʉa dadji Zeza Ãcõrẽba idjia o ɓʉra bia unumãrẽã idjaɓa jipa unumãrẽã: jẽrãmãrãda, pẽdra wẽrãrã siɗa bia mĩga panʉne carebaida ɓʉa, idjaɓa naʉ̃ ẽjũãne ɓea cadjiruada oiẽ́ ɓʉa.
Beɗea eɗaare
^ 1:12. Bia mĩga ɓʉɗe. Griego beɗeaɗe maʉ̃ba idjaɓa jara ɓʉa: “Cadjirua oi crĩcha zebʉrʉɗe.”
