Santiago 2:1-26
2 Djabarã, bãrãba dadjirã Boro biya quiru Jesucritoda ĩjã panʉ bẽrã ni aɓaʉ ume quĩrã awara orãnadua.
2 Ãĩbẽrã ewari aɓa bãrã ãbaa dji jʉre panʉne ẽberãba jʉwaɗe oro oɗa jʉ̃ ɓʉda, djio nẽbʉa jʉ̃ ɓʉda eɗa zeisicada. Maʉ̃ne idjaɓa ẽberã ne neẽ́ ɓʉba djio sore jʉ̃ ɓʉda eɗa zeisicada.
3 2:3-4 Bãrãba bio djio nũmʉda bia ununapeɗa idjía nama biara ɓʉma chũmeduaɗa aɗibʉrʉ, maʉ̃ne dji ne neẽ́ quirúa jãma ʉ̃ta nũmeduaɗa aɗibʉrʉ, wa nama mʉ̃ jĩrũ caita egode chũmeduaɗa aɗibʉrʉ, ¿ara bãrã tãẽna quĩrã awara o panʉẽ́ca? ¿Crĩcha biẽ́ ɓʉɗeba mãwã o panʉẽ́ca?
4 –
5 Djabarã, ¡ũrĩnadua! ¿Ãcõrẽba naʉ̃ ẽjũãne ne neẽ́ queɗeara Jesucrito ĩjãnamãrẽã edasiẽ́ca? Mãwã ãdjirãra ne bara panʉ quĩrãca ɓeaa. Ãcõrẽba ãdjirãra bia pe eroɓaya idji quĩrĩã ɓearãa wãrãneba mãwã jaraɗa bẽrã.
6 Mãwãmĩna bãrãba ne neẽ́ queɗeara biẽ́ obadaa. Parata bara ɓeadrʉ bia obadaa. Baribʉrʉ ¿parata bara ɓeabʉrʉ bãrãra biẽ́ oɗacaca? ¿Ãdjiabʉrʉ bãrãra cawa obadamaa õgo edeɗacaca?
7 Bãrãra Jesucritoɗea. Baribʉrʉ ¿ãdjirãba idji trʉ̃ biya quiruda biẽ́ jaraɗacaca?
8 Bãrãba Ãcõrẽ leyɗebema dji dromaara ɓʉda wãrãda ĩjã o panʉbʉrʉ, bia o panʉa. Ãcõrẽ Beɗeaɗe maʉ̃ leyba nãwã jara ɓʉa: “Djãrãra quĩrĩãdua ara bʉdji quĩrĩã ɓʉ quĩrãca.”*
9 Baribʉrʉ bãrãba ʉ̃cʉrʉda quĩrã awara o panʉbʉrʉ, cadjiruada o panʉa. Ãcõrẽ leyba jara ɓʉa bãrãra maʉ̃ carea beɗeaɗe panʉda.
10 Aɓaʉba Ãcõrẽ leyɗebemada aɓa ĩjã oẽ́bʉrʉ, jũma ĩjã oẽ́ ɓʉ carea beɗeaɗe ɓʉa.
11 Naʉ̃ quĩrãca ɓʉa. Ãcõrẽba jarasia “daunemarãdua” idjaɓa “mĩã bearãdua.” Daunemaẽ́mĩna mĩã beaibʉrʉ, Ãcõrẽ leyra ĩjã oẽ́ ɓʉa.
12 Quĩrãcuita beɗeaɗadua idjaɓa jipa oɗadua, Ãcõrẽba dadji ẽdrʉ ɓʉbari leyɗeba cawa oi bẽrã.
13 Djãrã quĩrã djuburiacara Ãcõrẽba cawa obʉrʉɗe quĩrã djuburiaẽ́a. Maʉ̃ne djãrã quĩrã djuburiabadara bia ɓeaɗia.
Crito wãrãda ĩjã ɓʉba biada obaria
14 Djabarã, aɓaʉba Jesucritoda wãrãda ĩjã ɓʉaɗa aibʉrʉ, baribʉrʉ biada oẽ́ ɓʉbʉrʉ, ¿maʉ̃ba carebaica? ¿Maʉ̃ba idjira wãrãda ẽdrʉica?
15 Naʉ̃ quĩrãca ɓʉa. Djababa wa djabawẽrãba cacuaɗe jʉ̃i carea idjaɓa coi carea neẽ́ ɓʉsicada.
16 Maʉ̃ne aɓa bãrãnebemaba idjía jaraibʉrʉ, “mʉ̃a quĩrĩã ɓʉa bʉra bia wãida, cacuaɗe jʉ̃i careabemara eroɓaida, idjaɓa bia ne co ɓaida,” baribʉrʉ ni cãrẽ siɗa diaẽ́bʉrʉ, ¿maʉ̃ jaraɗaba carebasica? Carebaẽ́ basía.
17 Ara maʉ̃ quĩrãca Jesucrito ĩjã ɓʉaɗa a ɓʉba biada oẽ́bʉrʉ, wãrãda ĩjãẽ́ ɓʉa. Idjia ĩjã ɓʉaɗa a ɓʉra ẽberã beuɗa quĩrãca ɓʉa.
18 Aɓaʉba jaraisicada: “Bʉa Jesucritora ĩjã ɓʉaɗa abaria, maʉ̃ne mʉ̃a biada obaria.” Mʉ̃a naʉ̃da jaraya: bʉa bia oẽ́ne acʉbidua Jesucritora wãrãda ĩjã ɓʉda. Maʉ̃ne mʉ̃a bia o ɓʉɗeba acʉbiya Jesucritora wãrãda ĩjã ɓʉda.
19 Bʉa ĩjã ɓʉa Ãcõrẽra aɓabʉrʉ ɓʉda. ¡Bio bia ɓʉa! Jairã biɗa mãwã ĩjã panʉa, baribʉrʉ Ãcõrẽ wayaaba urebadaa.
20 Bʉra crĩcha neẽ́ ɓʉa. ¿Mʉ̃a bʉ́a cawabida ɓʉca Jesucrito ĩjã ɓʉaɗa a ɓʉba biada oẽ́bʉrʉ wãrãda ĩjãẽ́ ɓʉda?*
21 ¿Dadji judiorã zeza Abrahaʉ̃ba oɗa carea Ãcõrẽba idjira jipa unuẽ́ basica? Ãcõrẽba Abrahaʉ̃a idji warra Isara babue diaduaɗa asiɗe Abrahaʉ̃ba mãwã oɗe wãsia.* ¿Ãcõrẽba idjira maʉ̃ carea jipa unuẽ́ basica?
22 Bʉa cawaida ɓʉa Abrahaʉ̃ba wãrãda Ãcõrẽra ĩjãna bẽrã mãwã osida. Idjaɓa mãwã oɗa bẽrã unubisia Ãcõrẽra wãrãda ĩjã ɓʉda.
23 Abrahaʉ̃ba oɗaba cawabi ɓʉa Ãcõrẽ Beɗeaɗe ɓʉ́ ɓʉra wãrãda. Nãwã ɓʉ́ ɓʉa: “Abrahaʉ̃ba Ãcõrẽra ĩjãsia. Maʉ̃ carea Ãcõrẽba idjira jipa unusia.”* Idjaɓa Abrahaʉ̃ra Ãcõrẽ ume dji biaaɗa abadjiɗaa.
24 Maʉ̃gʉɗeba bãrãba cawa panʉa Ãcõrẽba dadjira jipa unuẽ́ ɓʉda aɓabe idjida ĩjã panʉana a panʉ bẽrã, ãtebʉrʉ jipa unu ɓʉa idjira ĩjãnapeɗa biada o panʉ bẽrã.
25 Ara maʉ̃ quĩrãca wẽrã auɗua Rahába oɗa carea Ãcõrẽba idjira jipa unusia. Josueba diabueɗarãra idji deɗe bia edasia idjaɓa dewara óare jẽda wãbisia.*
26 Beuɗara jaure neẽ́ ɓʉa. Ara maʉ̃ quĩrãca Ãcõrẽ ĩjã ɓʉaɗa a ɓʉba biada oẽ́bʉrʉ, wãrãda ĩjãẽ́ ɓʉa. Idjia ĩjã ɓʉaɗa a ɓʉra ẽberã beuɗa quĩrãca ɓʉa.
