Santiago 3:1-18
3 Djabarã, bãrãba cawa panʉa Ãcõrẽba dji jaradiabadada biara cawa oida. Maʉ̃ bẽrã zocãrã bãrãnebemaba jʉrʉɗiẽ́ panʉa Ãcõrẽ beɗea jaradiabadada ɓeaɗi carea.
2 Jũma dadjirãba ɓarima zocãrã ãĩ obadaa. Aɓaʉba beɗea ɓʉɗe dewara soda ãrĩcabʉrʉ, ne jũmane jipa ɓʉa idjaɓa idji cacuara jũma jipa eroɓʉa.
3 Dadjirãba cawayo quẽbʉra jʉ̃badaa ĩjã obiɗi carea. Mãwã cawayora dadji wã quĩrĩã panʉmaa edebadaa.
4 Idjaɓa barcoɗebemada crĩchaɗadua. Barcora waiɓʉa ɓeamĩna, nãũrã dji cãbãyã pua nũmʉba edebarimĩna, dji edebʉrʉba peratʉbari maãrĩ quiruba idji wã quĩrĩã ɓʉmaa edebaria.
5 Ara maʉ̃ quĩrãca dadji quĩrãmera maãrĩ quirumĩna jũmawãyã beɗeabaria. Crĩchaɗadua sãwã urua maãrĩ quiruba oi waiɓʉada jũma bábibarida.
6 Dadji quĩrãmera tʉbʉ urua quĩrãca ɓʉ bẽrã jũmarãda ãrĩda ɓʉa. Ne jũma cadjiruada beɗeabaria. Ara dadji cacuaɗe ɓʉ bẽrã dadjira jũma ãrĩbaria aɓa beubʉdaɗaa. Idjaɓa diauruba cadjiruada beɗeabibaria tʉbʉ jidabibʉrʉ quĩrãca.*
7 Quĩrãtanoa animarã ɓeada, ĩbana ɓeada, ãdji jãne wãbada ɓeada, pusaɗe ɓea siɗa ẽberãrãba jidaɗapeɗa ʉ̃mʉ̃mʉ̃rʉ̃ãbibadaa.
8 Baribʉrʉ dadji quĩrãmera ni aɓaʉba poyaɗacaa. Dadji quĩrãmeba cadjiruada baridua beɗeabaria. Nẽãrã cadjiruaba bira ɓʉ quĩrãca ɓʉa.
9 Dadji quĩrãmeba dadji Zeza Ãcõrẽa bia beɗeabadaa, idjaɓa aɓari quĩrãmeba ẽberãrãda biẽ́ jarabadaa Ãcõrẽba ara idji quĩrãca oɗamĩna.
10 Aɓari iteba beɗea biada, beɗea cadjirua siɗa beɗeabaria. Djabarã, mãwã ɓaiẽ́ ɓʉa.
11 Egoroɗeba ʉ̃taa bogadrʉ ɓʉ baidoɗeba ¿baido cũãda idjaɓa baido cʉyada zebarica?
12 ¿Higojõ bacuruba olivoda zaubarica? ¿Uvaba higojõda zaubarica? Zaucaa. Ara maʉ̃ quĩrãca egoroɗeba ʉ̃taa bogadrʉ ɓʉ baidoɗeba baido cũãda idjaɓa baido cʉyada zecaa.
Wãrã necawaa
13 Bãrãra crĩcha cawa ɓeada, ne cawa ɓeada crĩcha panʉbʉrʉ, bia nĩnaneba unubiɗadua wãrãda mãwã ɓeada. Dji dromada crĩchaɗaẽ́ne necawaaɗeba bia oɗida panʉa.
14 Baribʉrʉ djãrãba eroɓʉ carea wa o ɓʉ carea sobiẽ́ ɓeaɗibʉrʉ, idjaɓa djãrã cãyãbara biara ɓeaɗi carea jʉrʉɗibʉrʉ, jararãnadua bãrãra ne cawa ɓeada. Mãwã jaraɗibʉrʉ, wãrã beɗeara igara panʉa.
15 Bãrã necawaaɗeba mãwã crĩcha panʉbʉrʉ, maʉ̃ necawaara Ãcõrẽneba zecaa, ãtebʉrʉ naʉ̃ ẽjũãnebema necawaa, ẽberã necawaa, idjaɓa diauru necawaa.
16 Djãrãba eroɓʉ carea wa o ɓʉ carea sobiẽ́ ɓeara, djãrã cãyãbara biara ɓeaɗi carea jʉrʉ ɓea siɗa baridua caicayabadaa idjaɓa ne jũma cadjiruada obadaa.
17 Baribʉrʉ Ãcõrẽba dia ɓʉ necawaa eroɓeaba ne jũmane jipa obadaa, jũmarãda ãbaa necai ɓeaɗamãrẽã jʉrʉbadaa, jũmarã ume bia panabadaa, dewaraba jara ɓʉra ũrĩni carea panabadaa, djãrãra quĩrã djuburiabadaa idjaɓa ne jũma biada obadaa. Ni aɓaʉ ume quĩrã awara oɗacaa. Idjia jaradia ɓʉ quĩrãca wãrãda obaria.
18 Ẽberãrã ãbaa necai ɓeaɗamãrẽã jʉrʉbariba ãdjirãra ãbaa necai ɓʉbaria necai ɓai beɗea ubʉrʉ quĩrãca. Mãwã idjia unuya ẽberãrãba jipa o panʉda ne bia ewabʉrʉ quĩrãca.
Beɗea eɗaare
^ 3:6. Diauruba. Griego beɗeaɗe ɓʉ́ ɓʉa: “Tʉbʉ uruaba.”
