Santiago 4:1-17
4 ¿Bãrãra cãrẽ cãrẽã djõbada idjaɓa ijarabada? Bãrãba o quĩrĩã panʉ cadjiruara bãrã soɗe djõ ɓʉa mãwã oɗamãrẽã.
2 Bãrãra ne eda quĩrĩãbadamĩna poya edaɗacaa. Maʉ̃ bẽrã mĩã beabadaa. Djãrãneda eda quĩrĩãbadaa. Baribʉrʉ poya edaɗaca bẽrã ijarabadaa idjaɓa djõbadaa. Bãrãba quĩrĩã panʉra edaɗacaa Ãcõrẽa iwiɗiɗaca bẽrã.
3 Idjaɓa bãrãba Ãcõrẽa iwiɗibʉdaɗe edaɗacaa crĩcha biẽ́ ɓʉɗeba iwiɗibada bẽrã. Bãrãba aɓabe iwiɗibadaa edaɗapeɗa bãdjia quĩrĩã panʉ quĩrãca oɗi carea.
4 Daunemabʉda quĩrãca bãrãba Ãcõrẽra igarasiɗaa naʉ̃ ẽjũãnebemada ẽpẽni carea. ¿Bãrãba waɗibiɗa adua panʉca naʉ̃ ẽjũãnebema quĩrĩã ɓʉra Ãcõrẽ ume dji quĩrũda? Wãrãda bariduaba naʉ̃ ẽjũãnebemada quĩrĩã ɓʉbʉrʉ, Ãcõrẽ ume dji quĩrũa.
5 Ãcõrẽba dadjirã soɗe ɓʉɗa Jaureba quĩrĩã ɓʉa aɓabe Ãcõrẽdrʉ quĩrĩã pananida. ¿Bãrãba crĩcha panʉca Ãcõrẽ Beɗeaɗe ara idji quĩrĩãbe mãwã ɓʉbisida?
6 Baribʉrʉ Ãcõrẽba idji biaɗeba dadjirãra bio careba ɓʉa. Maʉ̃ carea Idji Beɗeaɗe nãwã ɓʉ́ ɓʉa:
Dji dromada crĩcha ɓeara Ãcõrẽba idu bia wãbicaa.
Baribʉrʉ dji dromada crĩchaẽ́ ɓeara Ãcõrẽba idji biaɗeba carebabaria.*
7 Maʉ̃ carea Ãcõrẽ jʉwaeɗa ɓeaɗadua. Diaurura ĩjãrãnadua. Mãwã idjira bãrãmabemada ãyã wãya.
8 Ãcõrẽ caita zeɗadua, mãwãra idjira bãrã caita zeya. Bãrã dji cadjirua obadarã, ¡jʉwa sʉgʉbʉda quĩrãca waa cadjiruara orãnadua! Bãrã dji crĩcha umé eroɓea, ¡crĩcha cadjirua igaraɗapeɗa aɓabe Ãcõrẽdrʉ crĩchaɗadua!
9 Bãrãba cadjirua opeɗaɗa carea sopua ɓeaɗadua, jĩãnadua, aujĩãnadua. Waa ɓʉsriɗaba ipiɗarãnadua, ãtebʉrʉ bãrãba cadjirua opeɗaɗa carea wãrãda sopuaɗadua.
10 Crĩcha eɗaara ɓʉɗeba dadjirã Boro Ãcõrẽ quĩrãpita zeɗadua. Mãwã bãrãra dji dromarãda ɓʉya.
Djãrãra biẽ́ jararãnadua
11 Djabarã, djãrãra biẽ́ jararãnadua. Aɓaʉba idji djabada biẽ́ jaraibʉrʉ wa cadjiruaɗe ɓʉaɗa aibʉrʉ, Ãcõrẽ leyda biẽ́ jara ɓʉa, idjaɓa maʉ̃ leyra biẽ́ ɓʉda crĩcha ɓʉa.* Aɓaʉba Ãcõrẽ leyda biẽ́ ɓʉda crĩcha ɓʉbʉrʉ, maʉ̃ leyba jara ɓʉra ĩjã oẽ́ ɓʉa. Ãcõrẽ leyba jara ɓʉ cãyãbara idjidrʉ djãrã cawa obarida ɓesia.
12 Baribʉrʉ maʉ̃ leyra Ãcõrẽbʉrʉ diasia. Idjiabʉrʉ cawa obaria. Aɓabe idjiabʉrʉ ẽberãrãra poya ẽdrʉ edaya idjaɓa poya biẽ́ ɓʉya. Maʉ̃ bẽrã ¿bʉra cai, bʉ djaba cawa oi carea?
Bãrãnebemada ariɗe crĩchaɗadua
13 ¡Mʉ̃ beɗeara ũrĩnadua! Ʉ̃cʉrʉba nãwã jarabadaa: “Nane wa nu dadjira dewara puruɗaa wãnia. Mama poa aɓa panania. Maʉ̃ne ne oɗia parata edaɗi carea.”
14 Baribʉrʉ bãrãba adua panʉa nubema ewariɗe cãrẽda sãwãida. ¿Bãrãba cawa panʉca nubema ewariɗe zocai ɓeaɗida? Adua panʉa. Bãrãra jʉ̃rãrã towaa quĩrãca ɓeaa. Jʉ̃rãrã towaa odjapeɗa isabe nẽbabari quĩrãca bãrã siɗa dãrã ɓeaɗaẽ́a.
15 Maʉ̃ bẽrã biara ɓʉa bãrãba nãwã jaraɗida: “Dadji Boro Ãcõrẽba quĩrĩãibʉrʉ, dadjirãra zocai ɓeaɗia. Maʉ̃be ne ocuaɗia.”
16 Baribʉrʉ bãrãba mãwã oɗacaa. Ãtebʉrʉ dji dromada crĩcha panʉ bẽrã jarabadaa bãdjia o quĩrĩã panʉra poya oɗida. Wãrãda maʉ̃ quĩrãca beɗeaɗira biẽ́ ɓʉa.
17 Bariduaba biada o cawa ɓʉmĩna oẽ́bʉrʉ, cadjiruada o ɓʉa.
