Santiago 5:1-19
5 Parata bara ɓea, ¡mʉ̃ beɗeara ũrĩnadua! ¡Jĩãnadua! Dãrãẽ́ne bãrãra biẽ́ ɓeaɗi bẽrã aujĩãnadua.
2 Jũma bãrãba eropanʉra ɓerawaɗa quĩrãca ɓʉa. Bãrãba cacuaɗe jʉ̃badara chimiaba ãrĩna quĩrãca ɓʉa.
3 Naʉ̃ jĩrũarebema ewariɗe bãrãba paratara waiɓʉa waga panʉa. Baribʉrʉ bãrã oroda, parata siɗa menazau ɓʉa. Ãcõrẽba cawa obʉrʉɗe bãrã parata menazau ɓʉba cawabiya bãrãba biẽ́ osiɗada. Maʉ̃ bẽrã tʉbʉ uruaɗe bia mĩga ɓeaɗia.
4 Bãrã néu ewapeɗaɗarãa paratada diaɗaẽ́ panʉa ãdji trajubari. Maʉ̃ bẽrã ãdjirãba Ãcõrẽa iwiɗi panʉa cawa omãrẽã. ¡Ũrĩnadua! Ãdjia iwiɗi panʉra dadjirã Boro Ãcõrẽ jũma poya o ɓʉba ũrĩsia.
5 Naʉ̃ ẽjũãne bãrãba ne jũmada eropanʉa idjaɓa bãrãba o quĩrĩã panʉra obadaa. Mãwã bãrãra paca boreguea ɓʉ quĩrãca panʉa. Baribʉrʉ paca beabʉrʉ quĩrãca dãrãẽ́ne Ãcõrẽba bãrãra biẽ́ ɓʉya.
6 Bãrãba ẽberã jipa ɓeara cawa oɗapeɗa beasiɗaa. Maʉ̃ne bearãnamãrẽã ãdjia ni cãrẽ siɗa oɗaẽ́ basía.
Jũma droaɗadua
7 Maʉ̃ bẽrã djabarã, jũma droaɗadua aɓa dadjirã Boro Jesucrito zebʉrʉɗaa. Ẽberã pea o ɓʉɗebemada crĩchaɗadua. Idji néu uɗacarea cueda jʉ̃ãbaria tunupeɗa bia waragamãrẽã. Dãrã jʉ̃ãbaria zaumãrẽã.
8 Ara maʉ̃ quĩrãca jũma droa panʉneba jʉ̃ã pananadua idjaɓa soɗeba ĩjã pananadua, dadjirã Boro Jesucrito zeira caita ɓʉ bẽrã.
9 Djabarã, Jesucritoba bãrã cawa orãmãrẽã djãrãra biẽ́ jararãnadua. Jesucrito dadji cawa obarira dãrãẽ́ne zeya.*
10 Djabarã, crĩchaɗadua sãwã Ãcõrẽneba beɗeabadarãba droasiɗada. Dadjirã Boro Ãcõrẽ trʉ̃neba beɗea panʉ carea bia mĩgapeɗaɗara jũma droasiɗaa. Ara maʉ̃ quĩrãca bãrã biɗa jũma droaɗida panʉa.
11 Dadjirãba crĩchabadaa bia mĩga panʉne droa ɓeara bio bia ɓeada. Bãrãba ũrĩbadaa Joba idji dãrã bia mĩgaɗara jũma droasida. Dãrã mĩgaɗacarea cawa panʉa dadjirã Boro Ãcõrẽba idjira bia ɓʉsida. Dadjirã Boro Ãcõrẽra quĩrã djuburiaiɗa ɓʉa idjaɓa quĩrĩãneba carebaya ɓʉa.
Ãcõrẽa iwiɗiɗadua
12 Maʉ̃ awara djabarã, ni aɓaʉ trʉ̃neba wãrãda oɗiaɗa arãnadua. Bajãnebema trʉ̃neba, naʉ̃ ẽjũãnebema trʉ̃neba, ni bariduaɗeba wãrãda oɗiaɗa arãnadua. Oɗiaɗa aɗibʉrʉ, wãrãda oɗadua. Idjaɓa oɗaẽ́ana aɗibʉrʉ, wãrãda orãnadua. Mãwã Ãcõrẽba cawa oẽ́a.
13 Bãrãnebemada aɓa bia mĩga ɓʉbʉrʉ, Ãcõrẽa iwiɗida ɓʉa. Aɓa ɓʉsriɗa ɓʉbʉrʉ, trʉ̃ãbiɗeba Ãcõrẽa bia beɗeaida ɓʉa.
14 Bãrãnebemada aɓa cacua biẽ́ ɓʉbʉrʉ, djabarã wagabadarãda trʉ̃ida ɓʉa idji carea Ãcõrẽa iwiɗiɗamãrẽã.* Ãdjirãba iwiɗibʉdaɗe dadjirã Boro Jesu trʉ̃neba nedragaba maãrĩ pʉrʉɗida panʉa.
15 Idjaɓa ĩjã pananida panʉa Ãcõrẽba idjira biabida. Mãwã iwiɗiɗibʉrʉ dadjirã Boroba biabiya. Dji cacua biẽ́ ɓaɗaba cadjiruada osibʉrʉ, dadjirã Boroba maʉ̃gʉra quĩrãdoaya.
16 Maʉ̃ carea bãrãba cadjirua opeɗaɗara dji jaraɗadua. Idjaɓa ãbaa Ãcõrẽa iwiɗiɗadua bia duanani carea. Ẽberã jipa ɓʉba Ãcõrẽa iwiɗisira Ãcõrẽ ʉɓʉaɗeba ne waiɓʉada obaria.
17 Elíara dadjirã quĩrãca ẽberã basía. Idjia soɗeba Ãcõrẽa iwiɗisia cue zerãmãrẽã. Maʉ̃be Israel druaɗe poa ũbea ẽsidra cue zeẽ́ basía.
18 Mãwãnacarea idjia Ãcõrẽa iwiɗisia cuera zemãrẽã. Ara maʉ̃da cue zesia.* Maʉ̃ba néura tunupeɗa zausia.
19 5:19-20 Djabarã, naʉ̃da cawaɗadua: wãrã beɗeaɗebemada aɓa ãĩ wãibʉrʉ, maʉ̃ne aɓaʉba idjía cadjiruada igarabipeɗa jẽda zebibʉrʉ, maʉ̃ ẽberãba cadjirua zocãrã o ɓaɗara Ãcõrẽa quĩrãdoabiya idjaɓa ewariza Ãcõrẽ jĩga ɓaiɗebemada ẽdrʉ ɓʉya.*
Beɗea eɗaare
^ 5:9. Jesucrito dadji cawa obarira dãrãẽ́ne zeya. Griego beɗeaɗe nãwã ɓʉ́ ɓʉa: “Dadji cawa obarira deɗe eɗa wãbadama ɓʉa.”
^ 5:14. Djabarã wagabadarã. Cãpũrĩã beɗeaɗe jara ɓʉa “ancianos” o “pastores.”
^ 5:18. 1 Reye capítulo 17–18.
^ 5:19. Ãcõrẽ jĩga ɓaiɗebemada. Griego beɗeaɗe ɓʉ́ ɓʉa “beuiɗebemada.”
