Tito 1:1-16
1 Mʉ̃ra Pauloa, Ãcõrẽ nezocaa idjaɓa Jesucritoba diabueɗaa. Mʉ̃ra diabuesia Ãcõrẽba edaɗarãba idjida ĩjãnamãrẽã idjaɓa wãrã beɗea cawaɗapeɗa Ãcõrẽba quĩrĩã ɓʉ quĩrãca ɓeaɗamãrẽã.
2 Ãdjirãba ewariza Ãcõrẽ ume zocai panani carea jʉ̃ã panʉa. Naʉ̃ ẽjũã oi naẽna Ãcõrẽ sewa ocaba maʉ̃ zocai ɓaira diaida jarasia.
3 Maʉ̃be idjia ɓʉɗa ewariɗe mʉ̃a jaradia ɓʉɗeba idji beɗea Critoɗebemada ebuɗa cawabisia. Maʉ̃ beɗeara Ãcõrẽ dadji Ẽdrʉ Edabariba mʉ̃́a jaradiabisia.
4 Tito, mʉ̃a naʉ̃ cartara bʉ itea ɓʉbʉrʉa. Dadjia aɓari quĩrãca Critora ĩjã panʉ bẽrã bʉra wãrãda mʉ̃ warra quĩrãca ɓʉa. Mʉ̃a quĩrĩã ɓʉa dadji Zeza Ãcõrẽba, dadji Boro Jesucrito biɗa ãdji biaɗeba bʉra careba pananida, necai ɓai siɗa dia pananida.
Pauloba Titoa obi jaraɗa
5 Mʉ̃a bʉra Creta morro dromane amesia ota o ɓeɗara jũma omãrẽã. Mʉ̃a jaraɗa quĩrãca djabarã wagabadada puruza ɓʉcuadua.*
6 Djabarã wagabarira biẽ́ jaraɗi neẽ́ ɓaida ɓʉa. Quima aɓa eroɓaida ɓʉa. Idji warrarãba Critora ĩjã ɓeaɗida panʉa idjaɓa jipa nĩbaɗida panʉa. Mãwãra ẽberãrãba jaraɗaẽ́a cadjirua o panʉda wa cʉwʉrʉ zarea panʉda.
7 Djabarã wagabariba Ãcõrẽ trajura obari bẽrã biẽ́ jaraɗi neẽ́ ɓaida ɓʉa. Idjira cawaara ɓʉ quĩrãca ɓaiẽ́ ɓʉa, caicaya ɓaiẽ́ ɓʉa, beu nĩbaiẽ́ ɓʉa, jʉwaichia ɓaiẽ́ ɓʉa idjaɓa parata awua ɓaiẽ́ ɓʉa.
8 Ãtebʉrʉ idji deɗe jũẽbʉdara jũma bia edaida ɓʉa, ne jũma biada o quĩrĩã ɓaida ɓʉa, crĩcha biaɗeba ɓaida ɓʉa, jipa ɓaida ɓʉa, Ãcõrẽ itea ɓaida ɓʉa, idjaɓa idji cacuara jipa eroɓaida ɓʉa.
9 Wãrã beɗea idjía jaradiapeɗaɗara bio ĩjã ɓaida ɓʉa. Mãwã idjia wãrã beɗea jipa jaradia ɓʉɗeba ẽberãrãra poya carebaya biara ĩjãnamãrẽã, idjaɓa wãrã beɗea biẽ́ taɓʉaɗa abadarãa poya cawabiya ãĩ crĩcha panʉda.
10 Mʉ̃a mãwã jara ɓʉa wãrã beɗea quĩrĩãnacada, dadji carebaca beɗea jaradiabadada, djãrã cũrũgabada siɗa bara bẽrã. Dadji umaquĩrã cacua wẽãgoɗida panʉana abadara maʉ̃ ẽberãrãnebemaa.
11 Ãdjia jaradiaiẽ́ ɓeada jaradia panʉneba deza ẽberãrã crĩchara jũma ãrĩbadaa. Aɓabe parata carea jaradiabadaa. Maʉ̃gʉrãa idu jaradiabirãdua.
12 Cretaɗebema drõã naẽnabema dji dromaba nãwã jarasia: “Cretaɗebemarãra sewaiɗa ɓeaa, animarã cadrʉa quĩrãca ɓeaa, ne coya ɓeaa, djuburia ɓeaa.”*
13 1:13-14 Maʉ̃ba jaraɗara wãrãa. Maʉ̃ carea maʉ̃ ẽberãrãra quẽã ɓadua wãrã beɗeada ĩjãnamãrẽã, judiorãba drõã naẽna nẽbʉrʉbadara igaraɗamãrẽã, idjaɓa wãrã beɗea ĩjãnacaba jaradia panʉda ĩjãrãnamãrẽã.
15 Ãcõrẽ quĩrãpita bia ɓeamaarã ne jũmada Ãcõrẽ quĩrãpita bia ɓʉa. Baribʉrʉ Ãcõrẽ ĩjãẽ́ ɓeamaarã ni cãrẽ siɗa bia ɓʉẽ́a. Ãdji crĩchara, ãdji so siɗa cadjiruaba jũma ãrĩ ɓeaa.
16 Ãdjia jarabadaa Ãcõrẽra cawa panʉda, baribʉrʉ ãdjia o panʉneba unubibadaa idjira igara panʉda. Ãdjirãra cʉwʉrʉ zarea ɓeaa idjaɓa ne bia oɗi carea ɓeaɗacaa. Ãdjia obadara Ãcõrẽba quĩrĩãcaa.
